افيدنا عن أخبار صاحبنا كوريا |
اقتباس:
وإتا عارف هو أصلن كتاب مهما قريتهو أبدن ما بتمله وهو مسرح فيهو تتفرج وتشوف أشياء لما تستعجب هو السينما بمجملها. دار العرض هي درايته بالهندسة، ديكورها هو قدرته في كسب محبيه كراسيها كم أجلس عليها من ناس علاقاته الواسعة شباك التذاكر معرفتهو في جذب الحضور عشان يملوها فيلمها يتحدث عن سيرة بطلنا الذاتية المشوقة وحضور السينما هم تلك القلوب التي أحتضنها كورية والعاملين ياهم البشر المستعمتعين بي ؟؟ فيلم : "أحمد كوريا حبيب الكُل" |
ات عارف يا دكتور في سنة اولى قرينا الأحفاد المعانة سنة اوللا سوا في فصل واحد لمدة عام وكان ناظرنا المرحوم محمد بدري .... اتنقلت للمؤتمر قبل ما نتلاقى في فصل المعمار في سنة اولى وثانية ...................
دي ايام ما بتتنسي [rams]https://www.youtube.com/watch?v=_yRzs9ozzjs[/rams] |
ذي ما قلتا مرات ومرات..
مع الكُبر العاطفة متلازماتها كتار لمن ما بتحسبن ونذكر منهن.. تأثر القلب الذي يتأرجح بين رهبة من أمر تخاف حدوثه أو فرح لشئ تتمنى أن يحدث، العيون تذرف الدمع وينهمر ذي المطر في الحاليتن كانت فرح أو ترح. اليوم ومن الصباحية في النت وعن العاطفة الجياشة الكنت أنا قايل هي بس حقت النساء لمن قريت أنهو الرجال هم العاطفتهم جياشة أكتر من النساء (دراسة من معهد مايندلاب للأبحاث النفسية ببريطانيا).. المهم في القصة ما موضوع العاطفة هو المعا الكُبر بتضخم. في نوع من الخوف كدآ بتملك الزول لمن يكبر، ما موضوع الخوف من أنهو يمشي من الدنيا دي واللهو أمر حتمي ولا خوف من المرض لأنهو دآ سيك سيك معلق فيك. خوف كدآ بتشعر بيهو ذي بتاع الزول أنهو مفروض يكون هو المسئول والمحل حل والربط ويرجع ليهو ليستشار في أمور كتيرة في هذه الدنيا لوساع تجاربهو وضخامة عرفتهو.. أها في العمر بتاعنا دآ ياكا إتا المفروض يرجعوا ليك، يسألوك ويشاوروك لكن برضهو بتكون الخوفة ضارباك وعايز ليك زولن هو القادر على كل الأمور دي منك... يومنا دآ حمدتا الله أنهو عندي الزول المقصود دآ.. زولن مثالي عشان أنهو يكون زولي الأنا طامع ليهو.. الزول البسأل عنك، يتفقدك البدور يطمئن عليك مع أنهو إتا المفروض تبادر.. تفقدني اليوم أخي الحبيب إدريس أحمد الحاج وعمل كل جهد وبذل غاية المجهود أنه يلم فيني، شئ تلفونات لي مدينة وواحدات لي أمنة "بناتي".. لمن لما فيني وبخلقه الرفيع وأدبه الجم وعظيم رقيه.. سألني، بابكر كيفك يا أخي.. أها هنا أنا تلاعبت بي العاطفة بين الفرح الشديد لسماع صوته ووخز الضمير في أني طولت ما تواصلت معه (وعادتنا السودانيين أنهو الصغير هو البيتفقد الكبير).. دكتور إدريس أحمد الحاج، إسمهو دآ أنا مستعمله كرت بلانش وين ما إلتقيت ببعض من ناس أبوظبي وإلا كان مدخلي؛ دكتور إدريس دآ ود عمي. فمن من أهل أبوظبي لا يعرف هذا القامة.. شكرا ليك يابا.. You made my day |
حبيبنا الدكتور ما سألناك عن القهوة |
اقتباس:
القهوة من المكيفات وصاحباتها مفطرات والتفكير في مثل هذه الأمور مجرحات.. عشان كدآ يابا قلبناها عضة.. غذاء للجسد وداعم للمقاومة ضد الكرونا .. أول أمس عملنا إفطار على شاكلة بتاع السودان دآك، يا ريت لو تشرفنا يوم الإتنين برضهو عندنا التاني.... طبعن هنا مسموح بأربعة أشخاص في الطاولة الواحدة والمسافة بين الطاولات مترين ونص.. يعني محافظين على التباعد المنصوص ;) http://www.sudanyat.org/vb/uploaded/851_1588411730.jpg |
ما هببتني في سؤالي عن شوقي وكوريا
|
اقتباس:
لأنهو زولي رديت عليك بالتفاصيل ;) لكن يابا ؟؟ في سؤالك عن شوقي أرد كيف وهو زولك ذي ما زولي ما بيفرق بين صحاب لأنهو الناس كلها عندهو احباب صديق صادق في صداقتهو راجل، هميم عند المسئولية كريم عند العطاء تثق بيهو ديمة وتلقاهو سند عند الحوبة دغري وما بغالي ومن صفاتهو أنهو مثالي.. |
صعب صعب .... يا دكتور
|
بابكر
كل رمضان وانت بي الف خير |
اقتباس:
تصوم وتفطر على خير |
حبيبنا دكتور بابكر
أظنك مسمست لي اليوم ، وأنا كنت في الحمّام ، أزازي من اللوضة للحمّام .فضحني الرصيد........................ |
نفش غبينة الحبسة في سودانيات
كان نعوض فرقة شوقي |
قصة الكرونة دي عجيبة..
يقول ليك في شهر تمانية وهو الكلام دآ يكون في شهر خمسة. ماشي أحضر إجتماع في الحتة الفلانية وبعد دآك حاسافر في إجازة لمدة تلاتة أسابيع... وكأنه يعلم ويعرف وأنه قادر على تسيير الأمور كما يشتهي.. الأيام دي الصدمة الكان قالها رئيس وزراء البشير قبل الثورة العظيمة. جات وضربت ما السودان بس، بل العالم بي كلهو.. صدمة عشان نصحصح ونعرف أنهو ما فينا زولن بيختار علي كيفهو. ما موضوع مسير ومخير، لا دآ شيتن تاني؟؟ مكتوب ومقدر... إمتحان كإبتلاء. قال تعالى: ﴿وَنَبْلُوكُم بِالشَّرِّ وَالْخَيْرِ فِتْنَةً﴾ وتذكرة. قال تعالى (وَذَكِّرْ فَإِنَّ الذِّكْرَى تَنْفَعُ الْمُؤْمِنِينَ).. كانت الناس حاجزة الرجوع من الإجازات لبلد الإغتراب وكان ناس في زيارة لأهل وأحباء وكان ناس خلاص أفترق عليها الطريق وقررت سواء إختيار أو قسرا العودة والعود أحمد.. لكن هيهات كله مخطط ومسطر كان كرهنا ولا رغبنا، لأننا مانا عارفين حقيقتن وين مصلحتنا. العقال بيتوكلوا وبيعملوا بمراضاة من الله وطوعا لقوله تعالى (وَلَا تُلْقُوا بِأَيْدِيكُمْ إِلَى التَّهْلُكَةِ ۛ وَأَحْسِنُوا ۛ إِنَّ اللَّهَ يُحِبُّ الْمُحْسِنِينَ) ومنوا هم المحسنين ولمن يحسنوا؟؟ (هَلْ جَزَاءُ الْإِحْسَانِ إِلَّا الْإِحْسَانُ) فإن أنت أحسنت لنفسك بأن تصينها وتحافظ عليها من كل سقم وشر فأنت منهم (المحسنين).. والقصد من كل هذا؟؟ أولن تبادي أعقلها وتوكل على الوكيل الواحد فهو من يدبر لك أمرك ولكن لا تنسى أن عليك أن تسعى لمراضاته وكسب إحسانه.. ثانيا عش لدنياك في دنياك هذه الحالية، لأنك فيها لفترة مقدر أن تعيشها. فلا تظلم نفسك خلال إستضافتُك في هذه الفانية كما لا تظلُم نفس غيرك. ثالثا إنها هكذا كقول المولى عز وجل (وَمَا تَدْرِي نَفْسٌ مَّاذَا تَكْسِبُ غَدًا ۖ وَمَا تَدْرِي نَفْسٌ بِأَيِّ أَرْضٍ تَمُوتُ).. إنها الكرونة جاءت لتذكرنا.. وأطلب من المولى عز وجل أن يرفعها عنا... http://www.sudanyat.org/vb/uploaded/851_1588618646.jpg |
عصرت على الدين كتير يا دكتور ...
من سودانيات إلى الآذان : الصلاة في البيوت |
اقتباس:
وهناك من يعمل ويساهر ليضمن لهم الرعاية والحماية نعمتي دولة الإمارات برجالك "التعقيم ورش لي أنصاص الليالي" http://www.sudanyat.org/vb/uploaded/851_1588623849.jpg |
اقتباس:
ما هو لمن تهلع، لي دينك ترجع.. والقصة وما فيها رجعة وكت الفجعة وفزعة جابت خوفة |
هع هع
قال بتخاف نحنا الخلا الجن ينوني قال ود الفراش الشاعر أنا البحر الكبير إن هِجتَ دَايس أنا أب لَحَمَاً مِريرْ تَابَا الفَرايس أنا الفارس البِشيل كَتفُو النَفايس أنا اب لَهَباً يقيف للريح يَسايس * |
اقتباس:
لو سمحتا تفرع لينا عنه بوست.. هل كان زولن ماجن ولا دينهو هاين لأنه في أقوالهو بين دآ ودآ.. عندك دراسة تحليلية لأشعارهو؟؟ |
حبيبنا دكتور بابكر
الملف كبر ما شاء الله |
حبيبنا دكتور بابكر
الحقيقة عندي في الجحر أشياء كتيرة . ود الفراش نشأ في بربر ، وتوفي قبل سنتين من استرداد الخرطوم . عاش زمن التركية السابقة . خلينا نفتش جحر الكمبيوتر والهارديسك ربما واحتمال ... [rams]https://www.youtube.com/watch?v=syyX19iN0YI[/rams] |
[QUOTE=عبدالله الشقليني;551476]خلينا نفتش جحر الكمبيوتر والهارديسك ربما واحتمال ...
[QUOTE] وأنا تراني راجي بس خايف ما يطلع ليك شيتن يعضك.. ينسيك الوعد |
لا ما نسيت.. أنساك وإت بتتنسي [rams]https://www.youtube.com/watch?v=_yRzs9ozzjs[/rams] |
بتي أُختي قالت:
قالت وهي لساتها في عز الشباب.. يا أخي كتلوك ولا جوك جوك.. والقصة هي الكرونا... حسي دآ الشهر التالت ولساتها الكرونة شافعة. لا بتعرف براها تِترَع إلا يضربوها في قفاها ولا بتعرف براها تتنضف وياها حايمة بي خ..ها.. ولساتها شافعة وماها يافعة، عشان كمان تتزوج وتخلف (نجركوكاتن صغار).. لسة تلاتة شهور وشكل العالم إتغير. تراعي في الزول وهو كان أمس القريبة دي قاعد معاك. يغباك شكلهو إلا كان هو فارس نضيج وعرفك من مشيك.. ما الكمامة لأزمتن تغطي كل الشفايف والشلاليف وحتى لو كان الشنب أكبر من شنوبت الحرافيش؟ ما بينشاف وإلا ياهن شوية بتراون حواجبن رهاف، أها تعرفهو كيفن.. تلاتة شهور ما جاك فيها زولن من سفرن قريب ولا بعيد ما كلهو مقفول في زنزانتهو إلا بس أبوابها ما إيلت حديد، حيطان أسمنت ولا جالوص مكسية بي زبالة من الزمن البعيد وحتى لو كان حصل في المقدر وقدر بي طريقة ولا تانية علي السفر ووصلك وجاك وفرحت بيهو وفرح بيك إلا بعد قريب الشهر حتى تقدر تلمهو عليك وتشبع شوقك وتضموهو عليك شديد.. ديل بس تلاتة شهور والكرونا لساتها شافعة.. أها بعد السنة تفوت وهي تكبر وخدودها تحمر ويكتنز الجسم وتبقى لي العرس وتفكر في الولادة؟؟ بيكون فضل شئ عشان جنياتها يعيشن عليهو؟؟ الله وأعلم.. إلا بس ربنا يغطي.. ويزيلها قبل ما تعمل ليها جضيمات وجنيات :(:(:( |
|
لست تقليلا في شأن الكثير من المناضليين الجديرين بهذه التسمية ولا إنقاص في حق من إجتهد في أن ينال هذا الشرف الرفيع إلا أنه لم يسير في الطريق الذي تضيئه الأفعال القيمة وتفرشه التضحيات المقدرة بل إختار أن يعرض نفسه بصورة أو أخرى للأجهزة الأمنية لتلقي عليه القبض ويعتقل ويعرف بعدها بأنه مناضل...
المهم أننا وإحنا صغار ودآ طبعن قبل زمنن طويييييييل. كان مفهومنا للنضال مربوط بي مواقف مشهودة نحو بلدن مستعمر وأهل البلد شالوا القريب منهم ووقفوا دُت ضد المستعمر، شئ حراب وشئ عصي وسيوف وبي ضراعهم غنموا سلاح بارود وسمعنا قدر ما عرفنا وشفنا بقايا النصرة.. بلد ناضل أهله وحققوا ما كانوا يصبون اليه... وكذلك من الشفناهم أيام صغرتنا من مناضلين متعلمين وزراع وعمال. أنهم سهروا الليالي ووهبوا جل وقتهم للعمل على إستقلال السودان وقد توج هذا بأن نال السودان إستقلاله ورفع علمه خفاقا بين الأمم. مرت الأيام وإتغيرت المفاهيم؟ الكان زمان ناضلهو بالنفس والنفيس وهجروا ديارهم نصرة للإستقلال وهاجروا من أقاصي البلاد الي أقاصيها. إتغيرت تسميتهم وما بقوا مناضلين وإتغير مفهوم النضال الكان ثمنه الدم جداول وترمل مئات النساء وتيتم الوف البنات والبنين. بقى النضال في رأي بعض المفاهيم.. هو أن يوصف بالمناضل كل ممن أمن وعمل على خدمة فكر وارد ومستورد من خارج الوطن سواء دعوة لعنصرية أيدلوجية أو روحانية (القوميين العرب، الإخوان المسلمين، الشيوعيين، البعثيين وما ومن لف لفهم). بقى النضال يعرف بسنين الإعتقال وكل ما كترن يكبر في مكانته النضالية وكأن كل ممن عمل وإجتهد في نشاطه الإجتماعي والسياسي والعملي ولم يحظ بأن أعتقل.. ناضل العديد من السودانين منذ الوهلة الأولى ضد إنقلاب الجبهة بعضهم "حظي" بأن أعتقل وتم تسجيل إسمه في قائمة (المناضلين) إلا أن هناك الغالبية التي ناضلت وبذكاء فوتت على أجهزة الكيزان القمعية أن تلقي عليهم القبض ولكنهم للأسف لم تنزل أسمائهم في قائمة المناضلين.. يحكى وعلى ذمة الرواة أنهو؛ مولانا محمد عثمان الميرغني حين إعتقله المجرمين ديك وختوهو في السجن قال ما معناه بأنه جدير الأن أن يكون ضمن قائمة الشرفاء المناضلين. غير ذلك أستغرب دوما على الأقلام التي تكتب والأصوات التي تصيح معارضة لسيد الصادق وهو من أكثر إن لم يكن الوحيد من السودانين الذين قضوا أطول فترات في الإعتقال.. أحمد مخير "كوريا" نشط في أول أيام إنقلاب الكيزان وكان من أول مجموعة خلقت التجمع الوطني، ممثلا لحزب الأمة القومي وكان نشيط ومتحرك وأكاد أن أقول أنه لم يغب عن لقاء واحد لتلك المجموعة ولكنه الحبيب ما إعتقلهو وهنا السؤال الذي يستوجب أن يطرح.. كوريا مناضل ولا لا؟؟ |
كوريا بطل كاد يوقعه دكتور في المصيدة وربنا أنقذه |
قبل 15 سنة وكم ويوم كدآ أفتكر...
في صباح اليوم دآك صحتني مدينة بتي عشان تعزيني في الشيخ زايد بن سلطان رغم أنهو ما تربطني بيهو شئ خاص، بس أني كنت شغال في دولة الإمارات للمرة الأولى وهي عاشت سبع سنين من عمرها وقت كانت زولة سنة. الشيخ زايد الرجل الذي ترك إنطباعا خاص في كل من سمع به، عرفه أو إلتقاه... بتذكر قمتا طوالي وكتبت الكلامات دي... السبب أني إذكرتا دي.. أنهو قبل أسبوع كان عيد ميلادهو أيتها الأرض الكريمة المِعْطاءَة ، أيتها السخية منبع كل الرخاء.. هذه أنت وصفاتك الكاملات. إلا أنك قدر ما أعطيتي أخذتي دون التفات. فيك وبك العيش أرغد ومنك الخير زاد وأوفرُ أعطيتينا الزرع والضرع والماء بكل مافيه من نقاء إلا أنك أخذتي الى جوفك أيتها الكريمة. من هو أغلى من الذهب ومن نفيس المعدن. أخذتي الى باطنك أيتها الكريمة. الأجود والأخير والأحسن والأنفع والأقوى والأشجع والأطيب والأكرم والأكمل. الي باطنك ذهب الذي عبد وصلى واطاع المولى. نعم ذهب من لا يخاف عذاب، لماله من رصيد يومَ الحساب. الي باطنك أيتها العزيزة، ذهب من قدم لأخرته مايشفع وعمل في دنياه ماينفع. أخذتي مننا الذي عندك له محبة تخلب الألباب وشوق فاق الإعجاب. أنتِ أيتها الأرض العزيزة، على سطحك الجبال الشامخات و"زايد" فاتها شموخاً، وتحتضنين السهول الواسعات و"زايد" زادها وساعاً بقلبه الذي وسع كل أهل العريضة وتحتضنين الغابات المثمرات وثمار "زايد" هموا حسنات طيبات فاتت الغابات عطاءاً. انك تحتضنين البحار والمحيطات وبما بها من غالي الدرر والنفيس، إلا أن "زايد" زاد عليها فجاد بخلفٍ وذريةً أغلى من كل لألئ الكون مجتمعات. أنت أيتها العزيزة أحشائك لممتيها على رسولنا الحبيب (ص). أنتي حين لامستي باطرافك السماء عند المغيب. أظلمت علينا الدنيا وأجهشنا بالبكاء والنحيب لفراق الذي هو أزكى من المسك ورائحة الطيب. "زايد الخير" هكذا بنو شعبه سموه. وصدقاً أجادوا بما وصفوه. فهو كل الخير، أسمه خير، أبناؤه خير، أحفاده خير، بلده خير، شعبه خير، أرضه خير، حديثه خير والخير هو وكل الخير. شيخنا الجليل الأب والقائد والمعلم، اهله باقة زهر ورياحين، تفردوا بأن احتضنوا اهل اسيا وافريقيا متعايشين فرحين، ومن اوربا وامريكا جاءوا ليعيشوا في ترف هانئين ومن كل قارة عليك أيتها العزيزة تجدينهم وكأنهم في بلادهم قاطنين. في هذه البقعة المباركة أيتها الأرض العزيزة أنبتي رجال ونساء ندر ان يوجد لهم مثالاً. أهل "زايد الخير" الذي اخلص في حب شعبه فزادهم الله من نعمه. أهل زايد إجتمعوا بإرادتهم ولثقتهم في ريادته بعد أن كانوا قد تغربوا عن بعضهم بعضا. توحدوا تحت رايته وإتمروا بحكمته. فانتفعوا برضاء الله عليه. ورضي الله عنهم وعليهم. ارض (زايد الخير) هي الامارات: هي الفجيرة جمال بلا حيرة وهي عجمان حيث الامان، هي ام القيوين في صدر الدولة تزين وهي الشارقة نضرة بارقة، الامارات هي راس الخيمة الوضاءة، هي دبي موطن كل عزيز أبئْ وهي ابوظبي تسندها "العين" سند حصين. (زايد) الذي أحب الله وأحباه الله. أحب الناس فحبب الله الناس فيه وفي ذريته وبنيه. ترك زايد من خلفه ورثةٌ للحِلم والكرم والجود وعطاء غير المحدود، دماثة الأخلاق وفكر خلاق وشجاعة الرجال وتطويع المحال. أيتها الأرض، أخذتي منا عزيزنا فتيتمنا وأخذتي ماءنا فعطشنا وحين أخذتي نورنا، دونه أظلمنا. أخذتي شيخنا صاحب الرآي السديد والقول المفيد.. فرحمة الله الواسعة على "زايد الخير" وليجعل كل الخير في أهله وشعبه وبلده من بعده ...... وإنا لله وإنا اليه راجعون |
فعلا با دكتور الكُبُر دة حاجة ثقيلة خالص
انا الايام دي اليد اليمين عضلتا تقيلة بيقولوا في فيتامين ما بيصل من المخ ، عشان كدة باخد فيتامينات تعويض .. غايتو نشوف آخرتا |
الكون ماهو مضمونن تب..
والحياة هي ذاتها ذي الكون برضها ماها مضمونة ومروحا للدرب. والكثير من المعادلات غير مضمونة كذلك.. هل أن يُغيب أحدهم تدخل في ضمن الأحكام الغير مضمونة أم أنها لأمر لا علم لنا به؟؟ طفل صغير يغيب قبل أن ينال حظه في هذا الكون. شاب في عنفوان شبابه يغيب قبل أن يصل مطمحه. رجل يحلم ببذورته في قمة النجاح ولا يتسنى له ذلك فيغيب.. شايب هرم لازال يعيش حين رفاقته؛ (مَنْ قَضَى نَحْبَهُ) وهو لازال (يَنْتَظِرُ)..... https://www.facebook.com/babiker.muk...06927789422890 |
دكتور بابكر
رمضان كريم غابتو البقت علينا حاله ما تتوصف كبر وصيام وحظر وعزوبية وزيادة وزن ..... والحمد لله علي كل حال ربك يزيح الغمة |
اقتباس:
عات الغمة إن مشت ولا قعدت!! بترجع لينا شبابنا وقوتنا ;);) |
ما أحلى إجترار الذكريات لمن تكون جميلة. ذي الفيلم التشوفهو مرات ومرات ويكون ناسهو هم البتريحك شوفتهم ويسعدك العيش معاهم لحظات معادة ومتكررة..
بتذكر زواج خالي محمد بدري من دكتورة فاطمة عبد الكريم بدري في حي الشيخ دفع الله في بيت ناس العم ذي أمس القريبة دي. رزق الخيلان الإتنين بي باكورة العيال وسمي بابكر ولقب بأشرف وكان حقا قد شرف الأسرة الصغيرة بإطلالته عليهم وزان من إسم بابكر تكرار في الأسرة الكبيرة. جاء أشرف "بابكر" يحمل جينات متقاربة وعلى عكس ما يتحدث عنه الطب فقد جاء نابغا ومتكامل المظهر والشكل ووظائف الجسد كلها. كان ثائرا على ما لا يقنعه ورافضا لما لا يلائمه. شعلة متحركة لا تحرق ولكنها تضئ، نسمة جامحة عاتية عذبة تنعش ولا تعيق، خلق سامية مترفعة عن الصغائر، متواضع لا يرضى بأن يُخدم ويقنع حين يخدِم. أتذكر يوم حنته كان وكأنه يجلس على مقعد من نار لأن الكل كان يخدمه وما أن إتشالت الحنة تلاحظ أنهو إستعاد عافيته وتهياء للعودة لي طباعه. هنا يسأل أجيب ليك شنهو وهناك يتناول الصينية ويحضر الضيافة للضيوف وحتى وكت العروس في نص السباته إتا يا "شروفي" تناول دآك شئ وتتناول من دآ حاجة.. مندفع بعاطفة نحو الخير وام أعظم خير غير خدمة الناس ومتهور في ردع الظالم لنصرة المظلوم وذكر لينا مصطفى الصادق بدري واحدة من المواجهات.. رحمة الله تنزل عليك كل لحظة وكل حين.. أشرف يابا كنت غير إعتيادي ولا عجبا أن المولى عجل ليك منادي..... |
اقتباس:
شديد الشكيمة، كاظم الغيظ لكنه أيضا رقيق القلب وناعم الحواس.. فقد صهره أشرف بدري فجر في دواخله، حزن خفي. صاغه بطريقته الخاصة وكلماته الخاصة... شوقي بدري لهذا لا أبكي على اشرف نتباكى على الزمن الجميل ونتحسر على بيوتنا التي كانت تمتلئ باعز البشر واكرم الصحاب ، الحب والحنية . يذهب اصدق الاهل والرفاق . وبدلا عن التحسر والبكاء نقول .... الحمد لله لقد كان عندنا كل تلك الروعه والسعادة . تخيلوا اذا لم يكن عندنا مثل اشرف ، واذا لم ننعم بكل تلك السعادة والذكريات . الا يعني هذا ان حياتنا كانت قاحلة وخالية من الروعة . هل نحن جاحدون بنعمة الله ؟ اشرف اكمل رسالته . اعطى واعطى ثم اعطى . ترك ذكرى عاطرة . لم يكن بخيلا ، ثقيلا او انانيا. كان شجاعا نقيا وصاحب رؤية . ترك خلفا صالحا واعمالا رائعة اعطي الآخرين اثمن شئ ، العلم والمعرفة . الا يكفي هذا ، لكي نكف عن البكاء ؟ قد لا يعرف البعض انني كنت اتراسل مع اخي الاصغر اشرف طيب الله ثراه . ولا ازال احتفظ برسائله منذ السبعينات . كان ابو الكل طيب الله ثراه يحمل على اشرف في بداية شبابه ، وقد يدفعه ببعض قسوة حتى يكون اقرب الى الكمال ، وقد يحتد معه في بعض الاحيان وربما بسبب اختلاف الاجيال . كنت قد عجمت عود اشرف في الكثير من المواقف لأن ابو الكل كان صديقي كتبت له خطابا . قلت له . الم تلاحظ ان اشرف رجل هميم والرجل الهميم لا تثريب عليه وسيكون اشرف عند حسن ظنك . وانت قد عشت دنيتك كما لم يعشها الآخرون . وتعرف كيف تقيم الناس . كتب لي ابو الكل قائلا ...... كلامك صاح انا ما لا حظت ان اشرف هميم جدا ز بعد جوابك لاحظت لمن يكون موجود ما بيخلي زول يعمل ايا حاجة . وتغيرت معاملة ابو الكل . فاطمة بدري ابو الكل واشرف وايمن كان من عادتهم الحضور الى براغ . صحبت اشرف وايمن الى حديقة الحيوان مع مارسيلا الشيكية . قالت مارسلا في نهاية اليوم . ان اشرف له عيون جميلة مليئة بالحياة وكان يتصرف بمسؤولية وكأنه ليس كطفل في العاشرة . كان يهتم بشقيقه ويمسك يده دائما بحنان . وايمن كان متمردا وعنيدا في طفولته . اذكر انني احتفظت لهم بصورة التقطها مصور في الحديقة . ولكن قبل سنوات ارسلتها لاشرف وقلت له انها يجب ان تبقى لاحفاده . تأخر زواج اشرف ولمياء ، او زوبا كما عرفناها وهي صغيرة . كان هنالك بعض سوء فهم وتخلف من البعض . آخر زيارة للسودان قلت للجميع . قد لا تقابلوني مرة اخرى . انا هنا لاحسم هذا الزواج . وليس هنالك من هو اصلح لشقيقتكم غير اشرف الذي اعرفه جيدا . وان عليكم ان تفرحوا باشرف لانه انسان مميز . وتركت السودان . قبل عقدين وعندما كانت الانقاذ تحارب الاحفاد اتوا بليل وانتزعوا تمثال بابكر بدري . وصاروا يستدعون مسؤول الاحفاد الى مكاتب الامن لاخافته . كان اشرف يذهب مرفوع الرأس ولا يبدوا عليه الخوف . كان يبقى للساعات الطوال بدون كلل او ملل، ويعود في اليوم التالي ، حتى قنعوا من اخافته . هجم رجال الامن على الاحفاد باسلحتهم المشرعة ومجوعة من السيارات ارادوا اخذ المسؤول في الاحفاد. كان قاسم في اجتماع مع ممثلي الامم المتحدة . برز لهم اشرف بكل شجاعة وتبعهم خارج الاحفاد ألا ان الضابط في الخارج قال .... مش ده انحنا عاوزين الطويل . في احدى مناسبات الاحفاد اتى بعض رجال الامن وارادوا الدخول . قال لهم اشرف مرحب بيكم ، لكن عربيتكم دي ما بتخش . وبالرغم من التهديد والصراخ لم يتزحزح اشرف فانصرفوا . قالت لي الهام بدري وهى قد حزنت على اشرف منذ بداية مرضه وبكته بطريقة قد خفت على صحتها ..... اشرف يا شوفي احب تلاتة حاجات في الدنيا امه اسرته والاحفاد . علاقة اشرف بزوجته لمياء سارت بذكرها الركبان لم اعرف انسانا احب زوجته ، اشاد بها وعظمها مثل محمد بدري ابو الكل مع فاطمة . اشرف كان الفرع من ذلك الاصل ...... هل يصح ان نبكي على اشرف ؟ |
[rams]https://www.youtube.com/watch?v=CEg00UOQqQA[/rams]
رحيل أشرف رحيل القرى والمدائن أشرف ابن أستاذنا محمد بدري ، ناظر الأحفاد الثانوية.كان أبوه غليظا معنا في التربية ، لحكمة عرفناها بعد ذلك بمدة طويلة. هؤلاء إرث الشيخ بابكر بدري الذي عيّن في ثلاثينات القرن العشرين مجلس أمناء لمدارس الأحفاد، حيث لم يتعرّف الناس على مصطلح مجلس الأمناء. إن أمثاله من الشرفاء نذكرهم لأن في تاريخنا أمثال هؤلاء الأبطال. إن لنا معلمين في مدرسة الحياة ، وهو لا شك واحد منهم. دائما النجباء نفتقدهم في الطريق. إن تاريخهم يبقى مُرشدا إلى آخر العمر. أشرقت حاضرا وغائبا يا أشرف . بكتك القرى والمدائن في صمت، لأن الحُزن يشل التفكير. العزاء لكل منْ يحمل شعلة مُضيئة للطريق الطويل |
بتذكر كان لينا خالة. مرضت وتعبت تعب شديد.
ولمن إتوفت بعض الأهل قال: والله إرتاحت.. الوالدة عليها الرحمة كانت ديمة تقول؛ إن شاء الله من القوة للهوة.. بعضهم تسمع أنهو، كان شديد وما حاسي بشئ. بعد إتغدآ رقد في المغرب لمن جوا عشان يصحهو كان متوفى. قالوا واحد لمن حكوا ليهو الحكاية دي، قال دي الميتة المتمنيها أنا.. بعضهم يقولوا تخفيفا لحزن الأخرين: كلنا لها. هم السابقون ونحن اللاحقون. الموت حق... إذن يبقآ أنهو فعلن في الموت رحمة وراحة إستشهادا من ما الناس بتقول، إرتاح وبرضك الموت ما هو شيتن غريب في سلسلة حياة الإنسان في قولة الموت حق.... الكرونا بعضهم قال: يا أخي خليها التجينا وتاخدنا بيبقى أحسن من جوك جوك... وهي قريبة من قول دي الموتة المتمنيها.. |
بعض الأبطال يعرفهم أقرباءهم يا دكتور
|
ما هو حبس منزلي لكنهو برضك الساعات البتكون فيها في البيت طويلة..
قاعد في الأوضة وما قدامك إلا تلفزيون في الأوضة وعشان تتفرج فيهو إلا تصنقع ومع العمر الثقيل دآ.. الرقبة أصلن عصباتها رقن وما بتحملن رميىت الراس عليهن . تاني في الأوضة لابتوب رفيق طيب وظريف ومطاوع وأجمل حاجة فيهو أنهو معاك مليون في المية وما بيرفض ليك أيتها شيتن عايز تعملهو من خلالهو.. إن شكر بيرص ليك البتقولوهو دون إضافات أو تحسين. وإن زم وقدح هي نفس أحاسيسك البتكبها بينزلها لا نقص ولا تعديل يعني ما ذي نوع البيقولو ليك دى ما صاح ودآ غلط. اللابتوب هو الشارع البتتحاوم فيهو لمن تكون جوآ الاوضة وياهو الفريق الإتا ساكن فيهو. تواصل وتراحم وملاقاة، مش مافي مرقة وحوامة أهو الحبيب اللاب بقوم بالواجب ويفتح ليك الحياة من خلال شاشتهو وبيسوقك فيهو بدل رجلينك أصابعيك لمن يلعبن بالكيبورد... فيهو التواصل الإجتماعي بكل أوجهه، فيهو النميمة والقطيعة وتبادل المحنة والمحبة بشكلها دآ وهو غريب الوصف. فهي محبة وعواطف جارفة وأحاسيس مرهفة، لا تلامس يشوبها ولا تلاصق يحرمها. كله على كله شوف بالعين لرسم ممكن يكون واقعي وممكن يكون إفتراضي لعب فيهو الفوتشوب وشوهو أو أبدع فيهو وأحسن حتى أنك تنجذب اليه وهو في الحقيقة "فشوش".. فييهو وما فيهو الواتساب والفيسبوك والإنستقرام والمسنجر كتابة وفيديو فيهو صفات السين بي حدين، نفع ومضرة.. فيهو الأخبار وترامب، فيهو الفرجوني وغناء الحقيبة وفيهو الناس السماح والناس السناح وفيهو أسماء من حياتنا وفي حياتنا ولي حياتنا وبي حياتنا هي كسبت وإستكسبت الشهرة وحكمت وإتعرف.. وأنا طاقي الحنك مع صاحبي والمسافة الباعدآ بيناتنا حوالي عشرة كيلومتر وفي نفس الوكت بنتفرج في برنامج غنائي فيهو الجميل الحلو ياسر تمتام ومقدمة البرنامج السيدة هديل المشرف ومن باب الفضول سألت العم قوقل عن؛ من هي هذه السيدة لأني كنت ذي شفتها قبل مدة ظنيتها سنين في برنامج خاص عن التجميل. وعند العم قوقل لا واردة تتوه ولا شاردة تضيع لادن يديك المفيد وفعلن ما قصر ولكن أثار فضولي أنهو في اليوتيوب هي مستضافة من أحمد في الصندوق ويلا. يعني لاحق شنهو ما كمان نشوف شنهو هو الحاصل. حقيقتن السيدة وجيهة وجذابة وهي صورة من أوماتنا في الثقة بالنفس والإعتزاز بما هي فيه وتعمل من أجله وفي أخر صندوق "الأسود" كان سؤال هل فعلن تفكر في أن تفتح دار تجميل للرجال. قلت ليكم العجبني فيها ما موضوع العفوية في الإجابة لكن الصدق في الرد وقالت: أيوة.. الغريبة أنهو مقدم البرنامج إستغرب ما كونها ردت بصدق لكن؟؟ كيييييييف يعني دار تجميل للرجال وبذكاء سألتهو إتا ما عملوا ليك مكياج في يوم زواجك وأجاب بنعم.. غير ذلك أحمد بيه دآ قبل ما يجي على الهواء ما قعدعهو قدام المريا ومكيجوهو "عات كان ما متنا شقينا المقابر" أنا لاحظت أنهو قص شعرهو كان إستايل وموحفحف بالموس ومجلط بي ذي عشرين جرام جل... معاكم الحلقة دي وماني ندمان على أني كنت منشغل معاها وفات بي هناك لقاء لقمان تلميع مع السيد وزير الصحة الإتحادية.. يعني إتصور لقمان ةبعدهو لقاء ترامب.. الله يزيحك يا الكرونا أقله تخف علينا طلة ترامب اليومية [youtube]https://www.youtube.com/watch?v=e_1539S68fI[/youtube] |
الكُبر
رزانة وتقلة وكتير مرات حكمة بيقولوا: الما عندهو كبير يشوف ليهو كبير. يحميهو، يوعيهو، يشفع ليهو .... ما هو الكُبر ما بس عمر لأنه ممكن يكون مكانة زول الإجتماعية أو إقتصادية أو علمية مرموقة وزولن جسده من طول قامة وعضلات مفتولة أو صاحب كلمتن مقدرة وعند الجميع مقبولة.. يعني ممكن نقول أنه الكُبر ممكن يعتبر ذي النعم الربنا بيتكرم بيها على الإنسان من نقول مثلن جمال في الطلعة أو كمال في الخلق وكدآ يعني.. أها إن المكرمة الإتخصا بيها زول الكُبر دآ ما عمل بي الحفاظ عليها يبقى برفس في النعمة.. قول مثلن كاتب مرموق وبقى زولن كبير مشي يسقط في التعامل مع معلومات كآذبة ولا فطرة وغير موثقة. قول زولن أدهو مكانة وختوهو فوق وكبروا مقامه يقوم يفسد ويتمكن وكدآ يعني. أها ذي ديل كُبرهم شين.. ذي الزول البيكبر في العمر ويكضب (ما عمر البشير كان كبير وبكضب)، شفتهو هبل نفسه كيف. ولا زولن كبير في العمر ويقعد يلقط في الكلامات والقوالات وفلان قال وفلانة سوت ذي دآ مش بيقولوا ليهو كِبر بي جهلتهو وحكاية كِبر بي جهلته دي النقيف فيها؛ زول ذي إتختا ليهو في مكانة ما مكانته وعمره ما كان لا في الحير شافها ولا من عند الطير سمعانها.. بيقوم يتصرف كما أنه في وضعه الأساسي. قول بقآ دكتور وإسم وسكنن زين والعربية طولها مترين لكنه في جواهو لساتهو دآك لا طور من فكرهو ولا صان نفسهو. حاقد يكره لكل جميل مع أنه ممكن يكون صاب منهو الكتير لكن تقول شنهو ما هو الصغير بيستمر صغير حتى لو وصل من العمر عتيا وفي المكانة عليا ودا هو ظااااااااتهو الكُبر الشين.. |
حبيبنا دكتور بابكر
ان شالا عيدا بخيره عليك ويحفظك المولى بجلالة نعمتو |
| الساعة الآن 04:20 PM. |
Powered by vBulletin® Version 3.8.8 Beta 2
Copyright ©2000 - 2026, vBulletin Solutions, Inc.