اقتباس:
إتا نسيت أنهو إمعانن في (تصغير) الكبير في السودان بيقولوا شنهو؟؟ ساكت ترفع عينك تعاينها وهي قدامك تتمواج ذي النسمة في هجير النهارية ومن بعد تتنسم الهمبريب البيهب بعد ما مطر الخريف يكون صابي هناك بعيد ويقوم زول يظبطك ويقول ليك!! الفي عمرك دآ مفروض تكون سبحتهو طولهو وتبروقتهو إنطبعت فيها أثار ركبتهو.. هو شوف التوبة. بنطلبها من صاحب القدرة.. وقولتن لي الآيات؟ مرة في البوست دآ ذكرتها، أنهو مع الكُبر القبل شوية بنمحي ويفضل حق زمان..:( فدحن ياهو الحفظ للقرآن بتاع الكتاب شوية من عم وبعدآك حق الإبتدائي.. بدآ حسي يظهر على السطح بعد غرقان فوق الخمسين أو ستين سنة.. اقتباس:
|
قامة أمدرمانية
المرحوم الهادي نصر الدين... جمعني معاهو كل الجميل البيجمع.. السودان الوطن الواحد، الأمة الشعوب السودانية والحزب التليد، الأنصارية عقيدة قوية، أمدرمان العشق وكانت الدم النازف في كل عرق، أبراهيم عوض الفنان الذري. ربما لست وحدي ولكن كل ذرة من تراب أمدر لأنهو كان كالعسس كل أحيائها تحت نظره، عنده الخبر الأكيد. ناس فلان إتوفا ليهم فلان وناس فلان عرس بتهم لي ود ناس فلان. كان في ود نوباوي ولا القلعة، العباسية ولا الموردة، حي الضباط ولا الملازمين وحتى الأحياء الجديدة التي لم يكن يرتاح بتسمياتها.. ذي قصة عباس أحمد عبيد. إلتقيقته من أحبائي من ناس حلتهو وواحد فيهم سألهو.. بتعرف دآ منهو (ليا أنا) وبطريقة حديثة الممتعة بألحانها الشجية وتقسيماتها التي أنعم الله بها عليه عشان تكون ماركة مسجلة وخاصة بيهو قال. بتأتأته المعروفة.. ك ك كيفففن ما بعرفهو حفييييد العميد ناس الأأأأحفاد... عملنا معا في لجنة كان قد شكلها السيد مبارك المهدي حين كان وزيرا للشئون الدينية والأوقاف لتعمل في رصد الأوقاف ومراجعة مدخولاتها والعمل على تعديل الإيجارات للتناسب وقيم العقارات في الجوار.. الهادي الله يرحمه لا أكذب لو قلتا أنهو عارف كل أوقاف العاصمة القومية، من دكان لي عمارة، من بيت لي زريبة، كما أنه يكاد تقريبا يعرف كل مستفيدي تلك الأوقاف بأسمائهم وحتى من تجاوز وأورث العقار المئجر لمن هم بعده وكان يعرف كل محصلي الأوقاف وأغلب العامليين فيها.. بتذكر إلتقيتهو بعد الإنقلاب في عزاء بأمدرمان وسألتهو عفويا.. لساتك في الأوقاف.. وييييين يا دكتور، ما سمعتا بي قصتي؟؟ عرفت لاحقا أنه قد قام بعمل جهادي متفرد أثناء إجتماع للعامليين بالوزراة... رحم الله الأخ الحبيب الهادي نصر الدين وليسكنه الله مع الأنبياء والصديقين وأحبابه الشهداء من الأنصار ... Like |
اقتباس:
حتى تحلو أكتر وتجمل زيادة لو كان بيدي.. ولو عندي السيطرة والقدرة متوفرة.. كنت على البراق كل فرد أحضرتهو.. والباسط الأحمر لي كل الطول مننا فرشتهو.. كانت أيام زمان ذي سودان زمان (وأبقى قيس على كدآ).. زيادة علي الحسي من أقوالن بهية والحروف الجميلة ورخية أدب وافر طعمه ذي معزوفة رخيمة والقلوب بيناتها صافية ورحيمة.. ما شاء الله وعيني باردة.. بس برضك زيادة الخير أخير.. حبي لكم ولهم [youtube]https://www.youtube.com/watch?v=dTjPEMdX_kQ[/youtube] |
اقتباس:
جيلنا الجميل يا أخوانا ما رآح بيهو الدليل.. لساتهو في الحوش البي غادي... ادخل هنا [youtube]https://www.youtube.com/watch?v=DDW9z7XpYG8[/youtube] |
[QUOTE=بابكر مخير;552963]
جيلنا الجميل وكمان أمآل :o:o:o:o:o يا أخوانا علينا بي جآي كمان طلونا... اتفضل اضغط هنا |
عمرهو الحزن ما شيتن بنطاق..
لكن ما بكضبكم ولو قلتا... ليهو حلاوة؟ بيقرب الناس ويخليهم "يذكروا ديمة حسنات موتاهم".. * الهادي نصر الدين.. زولن عااادي جدن، راس مالهو في الدنيا.. ذكراهو الجميلة.. يذكر عنه طرائفه وقشاته، حلو كلامهو وجميل تصويرهو ووصفه.. أديب، له أسلوبه الخاص.. يصيغ القول لحنا وللحديث يبدعه عزفا وللأخبار يرصها إبداعا فينشرها عطرا طعمها ريحان وملمسها مخملا.. * السر دوليب زولن فوق العادي عالم، معلم أديب وشاعر هادئ في طباعهو ثائر في شعرهو صاخب في إظهار جوانب! تكادُ تتشكك في أنها صفاتهو وهو الحلم، الرزين كعوده، مستقيم حين يحب تندثر الكلمات منه... لتستقر في صدور الحالمات نياشين وتتوهج في روؤس المحبين تيجان كان لحنا شجى به محمد ميرغني وموسيقى أبدع في تصويرها عثمان حسين وقلما سطر به سيد خليفة دلالا.. زدني من دلك شوية.... [youtube]https://www.youtube.com/watch?v=vxZHuC4d1aE[/youtube] |
لسَ يا دكتور عندك رقشة
تتبارك .. بِسْمِ اللَّهِ الرَّحْمَنِ الرَّحِيمِ قُلْ أَعُوذُ بِرَبِّ الْفَلَقِ (1) مِنْ شَرِّ مَا خَلَقَ (2) وَمِنْ شَرِّ غَاسِقٍ إِذَا وَقَبَ (3) وَمِنْ شَرِّ النَّفَّاثَاتِ فِي الْعُقَدِ (4) وَمِنْ شَرِّ حَاسِدٍ إِذَا حَسَدَ (5). ما نسحرك |
اقتباس:
الرقشة؟؟ وبرضهو الركشة ودي تاريخها ظريف.. لو تتذكر زمان المواتر الفيسبا لكن عاملين ليهو صندوق وبيرحلوا بيهو أنابيب الغاز.. بتاع شركة أجيب.. بتذكر الفني السايق الموتر لابس أبرول وشايل شنطة العدة التقول داية ماشة تولد.. ديك كان ركشة برضهو وبتاعت اليابان العربية البيجروها الناس ذي ما في الصين برضهو ركشة.. الركشة كانت أكتر مربوطة بي ترحيل بنات الجيشآ في اليابان، لكن حسي بنات الهوآ ترحيلهن باللموزيين.. لكن يابا موضوع "الرقشة" دآ كان الماضي المغبور مع أنهو كان مفروض يكون محل السرور مع الحاصل حسي وخليهو مستور :cool: |
الربيع
كلمة ليها وقع جميل في قلوب العجايز والغريبة في أمرها، مش لأنها مربوطة بأيام خوالي ولا هن أيام مضت.. لا أبدن بتديك إحساس ظاهريا، مشابه لنظرة الشباب لي الكلمة دي من إستشراق لما هو قادم وفرحة مليانة أمل بما هو أت أما باطنيا فهي لحظة تأمل على الكتير الرآح والقليل الباقي. وهنا المفترق بين الظاهري والباطني.. الربيع هو من أعياد أغلب الديانة وإمكن إلا الإسلام فهو يعتبر من أعياد المجوس والوثنيين (مع أنهو مسلمي آسيا الصغري وشمال غرب أسيا من قوقاز وأخوة "السودان بتجمعهم الحروف وتفرقهم السحنة والعزيمة :( "ناس لا جليد بيمنعهم عمل ولا صحراء بتمنعهم ترحال") من ناس كزخستان وإيران وحتى التركمان وحتى الأمم الفرعونية كان نوبة أو أقباط (وقبط هي مصر في زمن زماااااان قبال كتير زمان من بتاعتنا).. الربيع هو ذي مرحلة إنتقالية (هههه) تفصل بين أعتى التغيرات الجوية،، الطقس البارد والجو الحار. بين الشتاء والصيف.. بيناتهم بيحضر الجسم للتقلبات من البرودة للسخانة عكس مصانع البيرة أنهو الغرف المتجاورة البتمر بيها مواسير المشروب الشعيري واحدة أبرد من تلاجة الموز والتانية ذي حلة الضغط "البرستو".. الربيع غير أنهو للتوازن بين الظاهرتين العاتيتين ديل، كمان الجميل فيهو الزهور تفتح بعد برودة الجو وهبت نسمات الصيف.. بتذكر أيام الجامعة في براتسلافا.. يوم 21 مارس دآ.. لو البلد يوم عشرين مغطية كلها بالجليد.. تصحى في اليوم دآ ما تلقى ولا قطعة جليد حتى في حجم حبة فشار.. الربيع هو واحد من أربع فصول العام مرصوصة كدآ. شتاء، ربيع، صيف وخريف وإحنا في السودان ربيعنا لمن تصب بعيد ويجيك الدعاش ودي طبعن في حالات نادر لأنهو في الأغلب لمن تصب بعيد بتقوم التراب وتجيك الكتآحة كأتحآ.. الربيع بيتغنوا بيهو.. روح الشباب هي ربيع العمر ربيع الدنيا هو المحبوب وحتى الحب ظاتهو بي حلاتهو... ليهو ربيع......... [youtube]https://www.youtube.com/watch?v=cU_5bkLBwVc[/youtube] |
كنا قلنا الربيع..
بس ما وراهو الصيف.... "وَمِنكُم مَّن يُرَدُّ إِلَىظ° أَرْذَلِ الْعُمُرِ" من المعروف في تسلسل فصول السنة أنهو الربيع من بعهدهو الصيف وهو حال الإنسان.. من بعد ربيع العمر "الشباب" يبتدي صيف العمر الي أن يبلغ أقصاه بقيظه الحارق وصيهد نهاره حتى يقارب سعار النار في عظمته والفيح الحارق في قسوته.. ويبقى ياهو دآ الأرزل......... فتبدى الحالة تنهار والصحة تتدهور وشرها أن لا يدرك الإنسان هذه الأمور ويستمر في إمتاع النفس لهوا وصرف وإهدار ما تبقى له من رصيد في "كليندر الأيام" ويعيش كانهو الأيام لساتها ربيعها جاري ومتواصل وأنه لن ينقطع الي أن يفاجئ بقول الحديث (إذا غضب الله على قوم أمطرهم صيفا).. فتمطر ويجيء من بعيد سمومها لا همبريبها وكتاحتها ما دعاشها... وتنقلب نسايم الليل الربيعية!! هجير نهار صيف حارق... ياهو دآ الكُبر الثقييييييييييييل.. آفة علي البشر لافة بلوة لا بدن باقية مع طولة العمر.. |
االصخب أنا لو سئلت عنهو بقول: في تفسير العامة هو الجلبة وخلق أصوات عالية ومرتفعة عن حدود السمع المعتاد وهو بذلك يثير الإنتباه ويشحذ "غدد الفضول" عند البشر (ما هو الحكاية هن ياهن البتحكمن في جسم الإنسان ياهو مثلن نمسك الغدة النخامية والدرقية والكظرية).
المهم في القصة أنهو الصخب دآ أنواعه كتيرة. فيهو الفارغ وفيهو البي سببه وفيهو العفوي وفيهو نتاج الطبيعة والعوامل الخارجية، ذي صوت الطيارة الأسرع من الصوت والبركان وخرير السيول وصوت الساوند وقولت: واحد، واحد، واااااحد. إتنين، إتنين، إتنين، إتنين وممكن يقيف على الرقمين ديل لمدة نص ساعة. الديسكو مترع وبيئة خصبة للصخب وكذلك حلقات الذكر وهنا الصخب بيكون ليهو تأثير مباشر على مراكز في الدماغ مماثل لأنواع عديدة من العقاقير التي يساء إستعمالها بقصد التمتع واللذة الوقتية ... فليكن الصخب كما شاء أن يكون فهو متباين التقبل عن البشر.. الشباب متعة والكُبار نغمة.. وهناك الهدوء ليكون هو المتعة عند الكُبار والممل عند الصغار :rolleyes::rolleyes: [youtube]https://www.youtube.com/watch?v=D3i22chiFp0[/youtube] |
[rams]https://www.youtube.com/watch?v=4yhDyqmcZgU[/rams]
حبيبنا دكتور بابكر النُكتة بتاعة المدحة دي عندما نتقابل إن الله أذن |
أمرنا كأمة عجيب يا أخوانا..
ساهل عندنا تذليل الصعاب وإنجاز المستحيل.. لكننا ضعفاء قدام المسلمات والبديهيات.. أكتوبر، أنجزناها ومايو أسقطانها والإسلامويين أزحناهم.. إنجازات عملناها بسلاسة متناهية ولم يستطع أي شعب أن يسبقنا اليها.. هاتريك خلال المبارة والقون الأول في المبارة. ما إتحسب لأنهو الحكم كان أصول أجنبية وحاقد علينا لأنهو قبل كدآ غلبنا فريقهو الأم غابت شمسهو في المليون ميل.. أمرنا عجيب لأننا ؟؟؟؟ الرابط هنا |
نقطف مما كتب حبيبنا دكتور بابكر:
السر دوليب زولن فوق العادي عالم، معلم أديب وشاعر هادئ في طباعهو ثائر في شعرهو صاخب في إظهار جوانب! تكادُ تتشكك في أنها صفاتهو وهو الحلم، الرزين كعوده، مستقيم حين يحب تندثر الكلمات منه... لتستقر في صدور الحالمات نياشين وتتوهج في روؤس المحبين تيجان كان لحنا شجى به محمد ميرغني وموسيقى أبدع في تصويرها عثمان حسين وقلما سطر به سيد خليفة دلالا.. زدني من دلك شوية.... * حبيبنا بابكر لا أريد أن أضاعف أحزانك و أحزاننا بفقد البروفيسور السر دوليب الذي كان معلما في جامعة الأحفاد ...رب أرحمه برحمتك الواسعة |
قالوا:
البهوِّن نفسهو. بيهون هوانهو، ينحقر في حياتهو وزمانهو البيهين ناسهو. بيهِن روحهو، أهلهو وأوطانهو ... نحنا منشغلين ديمة نشنف نفسنا، فلان دآك الفعلهو والتركهو، فلانة ديك شنهو وما تعرف شنهو.. دآ ود ناس منهو؟ هي ظاتها من وين. أمسك عندك ... غرابي وهو تصنيف لمديريتين بالقديم وظنيتهو تسعة بالجديد والتصنيف دآ ما بينطبق إلا عليهو وعلي الجنوب لمن كنا سوآ (جنوبي). بس الحكمة مديرية واحدة تصنيفاتها قبلية متعددة المذاهب والمشارب ومتوحدة الحكمة في النسب عدآ المجموعة الما بتتنسب للعربية، إن ما كلهم أغلبيتهم ماشين للعباس عم النبي (عليه الصلاة والتسليم) من جعل لي رباطاب وشوايقة وغيرهم من ناس المديرية الشمالية (زمان). إلا أهلنا المحس والنوبة والدناقلة الرطانة ديل تصنيف براهو وكوش راعيتهم وحامياهم ولا يمكن مانعاهم من "العباس". أمش شرق تلقى برضك تصنيف متنوع وما متوحد في الكوقع الجغرافي "الشرق".. إلا بتجي وتبقى في الوسط وياها العاصمة المثلثة "برضك زمان" والقومية حاليا وإن كان برضها في المتنازع بين التصنيفات البالية وقديمة وحتى لو تصاهروا بين أنفسهم أو تجاوروا في مساكنهم. قومية مسمى ولكن ما فعل.. المهم والقصد؟؟ تأريخنا كتبهوا غرباء وأجانب إن كان قديم أو معاصر أو حاضر. كان ممالك كوش ياهم الأوربيين، القرن التاسع عشر ياهم الخوجات من أوربيين لي شوام وكانت ياها المراجع ونقلها من جاء بعدهم بي صمت خشمها، لا تحقيق ولا تأكد، (طبعن قولة تأريخ حاضر دي ظنيتني ما إتوفقت فيها، لأنهو ذي الإتنين ما بيجتعوا، إما تأريخ أو حاضر) أما عن الحاضر. فهو إجتهادات أكاديمية مراجعها برضك خارجية فمن يكتب عن فترات الإستعمار والإستقلال وما بعد ذلك فهو حاله حال ما بني عليه في تدوين تأريخنا في الحقبتين القديمة والمعاصرة. مراجع أجنبية، حروفها أجنبية أُعيد طبعها، فكرها أجنبي أُلبس ثوب سوداني، مذاقها أجنبي طُعم بالنكهة السودانية فكان يتوافق مع المزاج الأكاديمي ولكنه كان مسخ واقعي.. القصد أننا إرتمينا في مستنقع، لا فكاك من التلوث بأوساخه ولا خروج منه سالميين. يانا نشب نقول نمرق وما نقدر وكل ما طولنا قعدتنا فيهو كل ما إتوسخنا زيادة.. نحنا براااااااانا الإخترنا دآ.. شوف مثلن ومن إحنا صغار في المدارس المنهاج التعليمي.. منهو قول الأدب؛ من الجاهلية ومرورا بشكسبير ولغاية حافظ إبراهيم (وينهم ناسنا؟؟). التأريخ؛ مصر الفرعونية وما هببنا شيتن لي البجراوية، الفاتح صلاح الدين وبن زياد والأندلس (إسبانيا في أوربا) وصهينوا القبلنا لي تأريخ نيكانقو أكوار وقبيلته الشلك في أفريقيا.. الجغرافيا؛ الهملايا والإنديز وإلا إجتهادات خاصة التآكا وجبل مرة والنيل دآ ظاتهو إن ما مصر صاحبت المصلحة الحقيقة ما ظنيتهو كان لقا فرصة من الدانوب والتيمز.. يانا إحنا برااااااااااااانا الخلينا البسوى وما بيسوى يضحك ويتندر بينا.. زرعنا الجزيرة، حاربنا في فلسطين وفي ليبيا، حفرنا السواقي والدناكي، كنا مدرسين في اليمن وأطباء ومن أوائل محترفي الكورة في العالم العربي عمر النور والسد العالي وقرن شطة وماجد عبد الله وسانتو ودكتور كسلا وحتى من أنديتنا سموا الأتيام والهلال ولو ما شوية كان نصر دبي بقآ الهلال.. وينهو دآ.. هان علينا نذكر بيهو ديمة... عشان كدآ هونا إحنا |
وتاااااااااااااني نرجع لي ؟؟
المابتريدهو في الضلمة بتحدرهو.. وذي ما قلنا في بوستنا البهون نفسهو.. مباريت ناسن أنفسهم مريضة لكارهي السودان بتأريخهو التليد.. ختهم يغرقوا في مستنقعات الغلط والخطاء والمبادرة بيهو حتى ولو ضد بلدهم. طبعن قولة وطن كبيرة شوية... إن رضينا وإن كان أبينا.. تاريخنا وغسبن علينا.. إثارة الموضوع المستديمة ما هي إلا ما بين أسباب غير حميدة.. كره، جهل، عمالة. هناك واقعة صورت أنها واحدة من قساوة المهدية "وبالتحديد سيدي خليفة المهدي" التي وصلت حتى الأموات. بأنه رحل رفاة المرحوم الصالح حمد النيل من مكان دفنه الي مكان أخر.. الحصل أنهو لو لم ينقل الرفاة من مكانه الأول لكان إختفت المعالم عن قبره وغرق في النيل جثمانه الطاهر... هل من بين هؤلاء الذين يتناولون إسم سيدي ود تور الشيل يعلم عن هذا أو ما جاء في الفيديو؟؟؟ [youtube]https://www.youtube.com/watch?v=zjDGLR44_yU[/youtube] |
الكمين سنة دي
ورتني.. ما بصورة الكمال لكن نقاط ومقتطفات عن الحياة.. قول مثلن: البتعملهو كريت بتلقآ في جلدها.. إن ظلمتا أبقى راجي للأكيدة والسأضدة رادآ وطبعن بينقال: السادة رادة.. لكني بفتكر أنها الساضدة وهي جاية من الضد. والضد هو مبادرة منك يعني طالع منك وهو الحينرد عليك.. طيب الظلم دآ هو ظاتهو شنهو.. بس ياهو ذي حق البشير لي شعبنا؟؟ بفتكر هو أشمل وأوسع مضمونا.. قصر في عملك تبقى ظالم.. ناكف وعارض عن جهل فأنت ظالم.. نافق ودسدس لمنفعة خاصة برضك ظالم.. تتدعي المعرفة وإتا ماسورة، ياكا ظالم.. تسرق، تنهب، تغتغت أنت ظالم بإمتياز... فدحن ما تظلموا فترتد عليكم.. ولا قولي دآ باقية عليهو يا ناس الحيكومة ذي.. "لقد أسمعت لو ناديت حيـًا.. ولكن لا حياة لمـن تنادي، ولو نارٌ نفخت بها أضاءت.. ولكن أنت تنفخ في الرماد " أعمل شيتن كويس بينرد عليك أقلهو؟! ذكرن من زولن يمدحك ويذكر ليك العملتهو.. |
الزنزانة.. The Cell
دوما مساحتها صغيرة ومكانها قصي عن باقي المباني.. لها باب كالغرف ولكن أساسها محدود.. دخولها متنوع ومتعدد الأسباب ومختلف الأغراض.. تتميز بالهدوء. لمن يرغب يجد فيها "الراحة" وبين جدارها يتوفر له مقومات التركيز وصفاء التفكير. فيها يمكنك أن تقضي حاجتك وبهدوء عقل وعدم الإنشغال إلا بالسبب الذي أتى بك للزنزانة إن كان أمر طبيعي أو جزائي (لتقضيه) يتم وينجزه ومن بعد للراحة التامة تنطلق من جديد لحياة أخف وأسهل ليس من ذكريات أليمة في نوع من الزنازين وذكريات حزينة، موجعلة وأليمة في الزنازين الأخر.. يقال أن وحد من الأغاني. كاتب كلماتها رصها وهو في واحدة من الزنازين حيث "الراحة".. وهنا قفز الي ذهني طاري درستي الصيدلة في براتسلافا وكنت وكتها كويس في اللغة الاسلوفاكية، غير لزوم الدراسة كمان التعامل مع الناس في الحياة اليومية والعامة. أها إتذكرت والكلام عن الزنازين أنهم بيقولوا لل (bunka) cell ولي المكان مستو، فهل يا تراى زنزانة قضاء الحاجة إسمها خليط ما بين الإسلوفاكية واللغة العربية.. إلا أن نوع الزنازين دي مسمياتها كثيرة منها ليهو دلالة خاصة مثلن "بيت الأدب" وما القصد أنهو بتاع الشعر الذكرنا أنهو شاعر الف أغنية مرة هناك ولا الأدب البيفرضه عليك حارس الزنزانة المدجج بالسلاح بس الأدب بمفهوم الأتيكيت، ما هو لي لكل ممارسة بشرية هناك أتيكيت، الجلوس، الحديث، الأكل، الإستماع وفي الزنزانة دي الأوتكيت أنك ما تأكل وما تشرب لكن ممكن تقراء وتدخن. بيقولوا أنهو التمباك والتدخين بيساعد في تحريك البطن وعليهو ممكن أن تقتصر فترة البقاء في تلك الزنزانة وتعجل بالخروج.. من ثقافة البوبات ال(Pubs) أنهو يكون في كبريتة في الزنزانة دي وما القصد التشجيع عللى التدخين ولكن لمن تولع قشة الكبريت بينبعث دخان رائحة نفاذة فيغير من رائحة الزنزانة ليشغلها غيرك دون تأفف كما أيضا يلاحظ أن الزنزانة دي فها حوض غسيل يدين وصابونة ونسبة للغرض الأساسي من إشغال الزنزانة فبديهي فيها مقعد... الزنزانة دي تبقى كما هي في حالها ولكن بتغير المستفيد منها تلقى أنهو فترة إنشغالها يتفاوت؟؟ كل ما زاد العمر؟ كثرت الزيارات لها وزادت فترة إشغالها وبدلن أن تكون إسترخاء وصفاء ذهن، بتبقى شدة وعناء وتفكير في كل لحظة هناك لتشخيص هذا وتقدير ذاك أنهو آي نوع من الأمراض.. كفاكم الله وإيانا شر حتى؟ تلك الزنازين بتاعت ناس عايد عبد الحفيظ وحتى بي شربوتها الكآرب.. |
اقتباس:
الفاضي يعمل قاضي.. مع الإعتذار للسادة القضاة وأخص بيهو مولانا قاضي محاكمة البشير "وصحبهو". هذا المكان الهام في حياة البشر والذي هو واحدة من دلالات إكتمال الصحة وفي بعض الأحيان إعتلال الجسد. تسميتهو متباينة عند الأمم، منها من يضفي عليه نوع من الإحترام والتفخيم. ذي ما قلنا (بيت الأدب) وهي مرادفة الى (أدب خانة) ومكونات الإسم يدل أنه تركي الأصل يطلق على هذا المكان.. وهناك الإسم المركب من مستو القلنا تعني مكان وراح من الراحة التي يشر بها الجسم بعد خروج الخبائث.. بالإنجليزي تسمية هذا المكان فيها تسمية تقارب تسمياتنا العربية وهي عند الأمريكان الريست روم (restroom) لكن الإنجليز ذي تشبيهي ليهو في أنهو مكان صغير إذا ما قورن بي بقيت مكونات البيت. فهم بيقولوا ليهو "دبليو سي" والكلمة دي هي إختصار لي وبالترجمة الحرفية "خزانة الماء" (Water Closet) وبرضك في تسمية تانية وهي "لوو" (Loo) والتسمية دي أصلها أسكوتلندي وإختصار لكلمة (gardyloo) وكانوا بيقولوها لتنبيه المارة لمن يجوا يكشحوا حاجة في الشارع يعني ذي كشح موية البلاعة في الشارع (وأنا أقول العادة السيئة دي جات من وين.. أتريهم صف ضباط الجيش البريطاني "المعروف أنهو الضباط بيكونوا إنجليز وصف الضباط أسكوتلنديين والأنفار والطباخيين وساياس الخيل من الولزيين والايرلنديين" وبرضك من المسميات التويليت وهي من شكلها كدآ فرنسية الأصل وتطلق على غرفة اللبس والهندمة ولكنها بقت من المسميات المختلفة المستعملة للحتة دي.. والفاضي... يعمل شنهو؟؟ |
اقتباس:
فتشت حسب قدرة في الأسافير لكن ما لقيت عن هذا المكان شئ لا شعر ولا أدب معاصر ولا جاهلي لكن لقيت شيتن أشركم فيهو... رابط ويكيبيديا |
الإنسان في جغرافيتهو ذي الكرة الأرضية وقل ما تفوت عليا وأكون ما ذكرتها من عوامل الكُبر وما يحدث من تغيرات "تشويهات" نتيجة عوامل خارجية أو ذاتية.
الأخاديد؛ نتيجة جريان المياه لتترك أثارها على سطح الأرض وكما هو حال وجه الإنسان تشوف ليك كمية من الخطوط في مكان رطوبة الوجنات ورويان الجبهة.. الجفاف؛ يضرب الجلد في كل موقع ومكان ويتشقق الجلد الكان منتفخ ومليان التأكل؛ يصيب المفاصل وتبقى ذي مفصلات باب السنط يسكسك ذي الفار ويطقطق ذي القش تضربهو نار التعرية؛ تكون تستعمل المشط ولا الفرشة عشان تسرح شعرك. الرأس يبقآ ذي الأرض الجدباء ومن شدة لمعان جلدة الرأس لمن يتوارى ليك شوفت سارب. أكيد الهنود الحمر زمان لمن يأسروا (جلك) بيطلقوا سراحهو لأنهو جلدة رأسهو ذي عدمها ما فيها الشعرة التقول تتباع (باروكة) Human Hair.. الكُبر شبهو في الما بسر، كتير وما هو يسير.. الكلام تلتلة، السمع جهجهة، الشوف عمش واليد يدك لا بتهش ولا بتنش.. حذااااااااااااااااري لكم منهو :mad::mad::mad: |
الشوق والريد
طال الغياب وتنساب مع سهارى الحي وتشوف النجوم عقد جواهر تتوارى العودة لأمدرمان ويوم دآك لمن هبت الخرطوم بي عزة وحاة عازة سوداني أنا وسودانيات هي دمي |
بحتار وبتحير لي إتنين
واحد سكرآن والتاني زول تدخين.. الكُبر بيخلي الزول يضحك علي الإتنين ديل.. إن داروا ينسوا البيهم وعليهم ولا داروا كترت النوم ولا كايسين الترتحا في المشي والذهول والهذيان أو العديد من أنواع الذهان وهزآل الجسد السهيان.. أصبر وأبقى شاطر؟ حافظ علي صحتك وسلامتك أكل أكلن زين وأشرب من القراح أقلهو في اليوم لترين عيش حياة هادئة، لا زعل ولا غضب وحافظ على القولون.. كدآ إن شاء الله تحصل من العمر عتية وبعدها إستنا؟؟ دآ كلهو بيبقى وتكون لا ضريت الحواليك ولا خالفتا قانون ولا عرضتا نفسك للقيل والقال ومن هبا ودبآ يصفك بالسكرآن والمسطول.. مع الكُبر... كله بيقآ.. تنسى ونومك يكتر وتعيش في دنياك وأحلامك إن كتر؟؟ عدم كمين صحية نص الليل وإن قلتا تترتح هو أصلن الببقى في مشيكا بلا سبب تتعتر.. أقول قولي هذا ولا شكرا منكم ولا عفواً جزيلاُ.. قال علي بن أبي طالب كرم الله وجهه "لو كان الفقر رجلاً لقتلته" ولكم أقول لعن الله الكُبر والكِبر والتكّبُر "إِنَّ ٱللَّهَ لَا يُحِبُّ كُلَّ مُخْتَالٍۢ فَخُورٍۢ" ........... |
آآآآآآخ...
الكُبر مشاكلهو كتييييرة.. مع الأيام تشوف حاجات وتعيش أحداث وكل ما الأيام تستمر في التراكم، كما تتراكم الأحداث التي تعايشها.. طبع الأحداث أنواع؛ فييها الفرح وفيها الترح وفيها السمح والقبيح شين وفيها العجب والعجاب وفيها القول الظريف والقول درآب... في تلاقي ناس في أيام قرايتك، أيام عملك وفي شدتك وفي ضعفك، تلقآ الحنين واللئيم، والعادي والمتلولو، الدرغي ذي الخيط وتلاقي البنزل المحيط ويطلع ناشف... من مشاكل الكُبر، أنك بتضعف وبتهون وتهون حتى الما بسوى ليك يهين (بي عمرنا دآ، يتحكم فينا "الهوبلي" (قولة شعير لمتولي عيد حين فصل من الإذاعة فقال: حكومة الهوبلي الرفدت متولي --- أو كما سمعتها من حاجة حنينة عليها الرحمة لمن عرفتني بي من هو يوسف عبد الفتاح). من أغاني البنات "وليد دارفور" لكن كرفان سمعنا عنها قولهم "الغرة أم خيرن برأ" ولكن مالها مع الأيام لفظت لينا ما هو غير خير ومر حنضل "نلوك". (ما يفوت على فطنة القارئ النغمة).. كبرنا ومع الكُبر ذي ما الذاكرة تهتز ومنها الكتير ينمحي. كمان ظنيتهو راح كل الزرعهوا فينا من قيم وإنسانية... زمان جدودنا وقفوا مع الأمهرآ لمن بطشوا بيهم التقرآي فورثونا الوقوف مع المستضعف من جيرانا وأبواتنا وقفوا مع الليبيين ضد الطليان والفلسطنيين ضد الغزو البريطاني والمصريين في الإعتداء الثلاثي ضد المستعمر الوافد... دحن حسي دفعتنا الفوق رأس الهرم والدفعة البعدنا النخنخوهو جابهو للحكم.. ما عيب منهم... يخلونا بي عزتنا أيامنا الباقيات ديل نعيشهن في أمن وأمان، نجتر ذكرى الأباء والجدود وننعم في السودان.. حسبي الله ونعم الوكيل على كل غدار عميل... |
ما وهن لكنهو قولن
صافي خالص ما فيهو طعن... يقولوا: الإختلاف لا يفقد "للود" قضية... والود، هو المودة البنعرفها كلنا دي وهو الحب بأسمى معانيهو (لا يؤمن إلا من يحب لأخيه ما يحب لنفسه "قمة الإحساس") ... عندنا في السودان أيام أبواتنا زمان.. كان الود هو ديدن حياتهم ومتعة إختلاف أرائهم.. أمسك عندك السيدين والتواصل الدائم بينهم، الساسة والإحترام المتبادل بينهم، شيوخ القبائل والسعي الدائم لتقوية العلائق بينهم والتي تصل في كثير من الأحيان الي خلط الدماء ببعضهم البعض من خلال التزاوج، الفلاسفة بينهم الود متجسد في أن يختلفوا بين بعضهم البعض ليروا جروف جهلنا لتنمو معارفنا وتدهر إبداعا. أمسك عندك درجة الدكتوارة لا تتحصل عليها إلا حين تأتي بشئ تضيف به لما هو معروف والإضافة هي الزيادة في الشئ والمتعارف عليهو أو حتى تغييره وهو الإختلاف الهادئ المفيد الذي يأتي بالجديد.. حسي في الزمن دآ اللا فيهو مودة ولا إختلاف مؤسس. تلقى الشتائم لغة العصر، ودفن الحقائق سمة الدهر والكذب الأشر هو السائد في كل شارع أو ممر والموضة حسي "قنوات التواصل".. تفش غلك وأفش غلي بالجد ولا الكضب ما عليّ... أجرح ناس، أعادي ناس. ما يهم وما عليّ بس الأفش غلي أهجم وأرجم ولا كمان أكضب. ما يهم وما عليّ بس الأفش غلي ما عليا، ممكن أغتاب ولا أخاف من الضمير عتاب. بس الأفش غلي إتصور أنك تكون بتكره زول في شخصه وأسباب الكُره عديدة وكتيرة. منها وأسوءها هو الحسد ودآ طبعن كتير من الناس سبب كرها مركب نقص تجاه شئ معين يكون متوفر في زول وهو ياهو البتكرهو.. تقوم تفش غلك فيهو وعشان تجرحهو تعمم الجرح ودون مراعاة لأناس أخريين.. فيهم وفيهم، فيهم الأحسن والأكرم والأفضل وفيهم الزول العادي الذي النسمة ترطب وشيك وهي بتعدي وفيهم الدمك وأخوك وود عمك.. لييييييييه بس ما تعالوا نبدى صفحة مودة بيناتنا ونرمي الكره بلا عودة ولا رجوع... |
الصاخة
بين السياسة والصاخة
السياسة نعيشها واقعا في هذه الفانية الصاخة لنيعشها في دنينا الدائمة قدر ما إختلف الزمان والمكان، بين الأن وبعد الممات يوم الحساب الحق نرى الإنسان محكوم بين خياريين. وهو أن يقع في ما بين، مسير أم مخير... هو مسير من حيث خلقه في هذا المكان ومن أولائك الأبوين ووسط هؤلاء الإخوة والجنس بين ذكر وأنثى.. وهو المخير في ما إختار لحياته، فكرا وعملا وصحبة... إلا أن السياسة والصاخة قد إجتمعن في قوله تعالى: "فَإِذَا جَاءَتِ الصَّاخَّةُ* يَوْمَ يَفِرُّ الْمَرْءُ مِنْ أَخِيهِ* وَأُمِّهِ وَأَبِيهِ* وَصَاحِبَتِهِ وَبَنِيهِ" صدق الله العظيم... (سورة عبس) |
قال ليك؟؟
الفايق ...... الفاضي أو يعمل قاضي متلازمات الكُبر الثقيل https://www.facebook.com/babiker.muk...56717641110566 |
يعني هم بي جدهم؟؟؟
ولا بس قلة شغلة وعدم دراية مننا... إهتمام غير الأمريكان بالإنتخابات والمعركة بين ترمب وبولدين.. هل هي تدخل في شئون الغير.... أنا التمثيلية دي بتتشابه عندي بي، زول يقوم يتكلم عن شخصية معروفة ومشهورة في أيتوها نوع من ضروب الحياة ويقوم يتعرض ليهو بكلام فارغ، تسأل لييه. يقولوا ليك: شخصية عامة ودي كأنها مذمة وما محمدة... حسي لو كان أمريكي علق على الإنتخابات في أيتها بلد إسلامي ومع ندرتها أو عربي طواااالي يصنف على أنها الهيمنة والإستعمار الحديث والصهيونية العالمية وقول وام بتخلص قول.. طبعن بعضهم ممكن يقول ليك؛ الإنتخابات الأمريكية أهميتها في من سيحكم أمريكا ليكون على رأس أقوى دول العالم تأثيرا في كل أوجه الحياة على العريضة. قول أوكي.. هل إهتمامي أنا دآ الزول الما بأثر بأيتها صورة في من سيفوز ومن يخسر. ولا قول أضعف الإيمان التمني في أنهو يفوز دآ ولا دآك بتساعدني في شئ.. أمريكا في رأيي المتواضع أنها محكومة بي نظام أمني، إقتصادي، عسكري وعنصري بإمتياز.. خليهو يجي أزرق، أخضر، أصفر، أحمر أو برتقالي.. عندهو برنامج موضوع متمحور في النقاط الفوق دي.. نظامهم بلا إستراتيجية بكل بمحكومية.. ما فيهو حسابات ربح وخسارة، ربح بس، بلا تبادل منافع عليهو بي منفعتهو وما بتعامل بي التغيرات بل بشعر بأنهو هي البيفرضها.. حكومته البيت الأبيض ليها هو قلم التوقيع بس لكن القرار لا كونقرس ولا شيوخ. هو عند 1- سي أي ىء و2 - الئف بي آي والجهة المنفذة البنتاقون... 1 - السياسات الخارجية و2- السياسات الداخلية وجهة التنفيذ بقدراتها في إخضاع شعوب الأرض للسطوة الأمريكية.. يعني الإنتخابات الأمريكية في حد ظاتها.. ملاهات وشغل هولويود.. فما تنشغلوا بي شيتن أصلن 1 2 حاسمنهو.. إلا بس أللهم عشان شركات القمار تشتغل ومراهنات عائدها للخزينة المتسيطر عليها من 1 و 2 ولتجميل وجه أمريكا وإظهار أنها بلد الديمقراطية.... خلاصة القول.. الإهتمام بالإنتخابات من الغالبية أنها أمر بيهم دولة معروفة مشهورة وبس فضول بنتناول أمر الإنتخابات الصورية دي هناك... |
ناس كل تكبر كل ما تتعتق [youtube]https://www.youtube.com/watch?v=fq_T_K8KM3E[/youtube] |
[QUOTE=بابكر مخير;553369]
ناس كل تكبر كل ما تتعتق.. العالم عباس خير مثال :L [youtube]https://www.youtube.com/watch?v=BgNP9Ze2g3U[/youtube] https://www.youtube.com/watch?v=FaJjxnvOtZk |
[youtube]https://www.youtube.com/watch?v=FaJjxnvOtZk[/youtube]
|
أثيوبيا والسودان
تبادل بشري مستمر.. من قديم الزمان كانت الحركة بين البلدين عفوية، أعقبتها حركة مسببة.. لاجئيين من أثيوبيا نتاج الحروبات القبلية وقوات معارضة سودانية لأثيوبيا.. كنت الحركة بيتن البلدين غير التمازج وتخالط الأعراق "قبائل وشعوب لتعارفوا" كان في برضك تبادل إقتصادي وتجاري (بطرق شرعية أو غيرها). كان أغلب المهاجريين الي السودان من العنصر النسوي وكن يعملن في أغلب الأحيان في المنازل وأغلب المهاجرين ال أثيوبيا من الرجال.. النساء الأثيوبيات وجدن ترحاب كبير بين الأسر وكذلك بين الشباب من العزاب وتوفقن البعض منهن بأن خلقن أسر من زيجة شرعية ونفس الحال للعديد من المهاجريين من السودان.. أيام منقستو شهدت حركة لجوء وأيام الحرب بين أريتريا وأثيوبيا كذلك وأيام نميري والإنقاذ أوائل السنينن كانت قمة الهجرة المعاكسة من السودان... الأن وبما يدور في إقليم التقرآي بدأت المرحلة الجديدة من اللجوء الي السودان.. كيف حيكون الحال يا ترى؟؟؟؟ بالمناسبة الموضوع دآ ما بس بصورة عفوية أن ينظر اليه.. داير دراسة متكاملة.. عن ليييييييه إختيار الطرفيين بعضهم البعض من الأول ومن ثم ما هي النتائج السابقة والحالية والمستقبلية.. هل في مصالح مشتركة لتكتسب.. الإنعكاسات الموجبة والسلبية.. يعني عيييييييييك شغل كتير يستوجب أن يتم......... ولا شنهو يا ناس الإقتصاد والإجتماع |
التشريعي واللغط..
رؤية للإنتساب له؟؟ فات على قحت وكل زول فكر في الموافقة على الحكومة والمجلس السيادي.. سؤال بسيط جدن... عملتا شنهو للبلد ؟؟؟ حتى لو في أصغر مستوى قول الحلة الإنتا ساكن فيها... بتذكر أيام الخريف أولا د جدي صديق بيمروا على ناس الحلة ويتفدوا معاهم السباليك لو مقفول يفتحوها وكمان شباب الحلة البيساعدو في فتيح الخيران.. مع إحترامي لمجهودات لجان المقاومة في مراقبة المخابز والترمباطات.. شوف حكومتنا من رئيسها لي أحدثهم سنا، أغلبهم قراء في السودان لغاية الجامعة وبُعث للدرجات الفوق جامعية عمل شنهو في حيهو خليك من مدينتهو ولا محافظتهو ولا ولايتهو الهو ساكن فيها من أعمال ملموسة أو شئ للبلد. طبعن حكاية قبيلتهو وعشيرتهو دي ما بذكرها لأنها إسترزاق وحنك بتاع معارضة مسلحة وديل كمان أسوء وأشر وأضل من القروء بقروش الشعب وما قدموا ليهو التكتحة وبعد دآ حاكمينهو وينظروا طبيز وبي عدم فهم، ناس المسلحة بي قضية ناسهم لبسوها بدل وقعاد في هوتيلات وحسي كمان عايزي من الكيكة الهاملة دي... ما هو لييه ما في حد أحسن من حد.. ما تقدم حبة وتاخد كيمان.. بيت حكومة وعربية حكومة ولسة ما كفاية إنجعاصة في مكتب مكندش وبعضهم العربية فيها علم يرفرف.. عمل شنهو للعلم دآ عشان يعمبب بيهو يرفرف ويفسح ليهو الطريق ويمكن كمان موتر بي ونان.. المهم قصدي ؟؟ أنهو في إستمارة الترشح لكرسي في المجلس التشريعي يكون فيها بند يوري الإنجازات الإتعملت ويكون ترتيبها داخل حساب الإنجازات بالمنفعة وشمولها، مثلن التعليم والصحة أعلى نقاط البيئة، ارفاة، الإهتمام بالروحانيات، الأسرة، المرأة، الشباب و و و و وأنها الإنجازات للمصلحة العامة مش الخاصة بالشخص أنهو بقآ طبيب ولا مهندس ولا شاعر ولا فنان ولا وزير ولا سياسي ولا شيخ طريقة ولا ولا ولا .. وأنه يكون نصيب صاحب أعلى نقاط هو صاحب الأفضلية في أنهو يكون في المجلس التشريعي وتقييم الإنجازات بالدرجات مثلن 30 نقطة نقاط للحي، 40 نقطة للمحلية، 60 نقطة للمحافظة، 80 نقطة للولاية أما صاحب الإنجاز اإستفاد منهو البلد فهذا عضو أكيد في المجلس |
في دنيانا هذه العجب العجاب؟؟
كنت متابع ليا مسلسل فهو شفتا حكم الدنيا وعجائبها.. من المسلسلات ديك بتاع الجريمة والعصابات ومجرميين.. طبعن بين بعضهم بسموا العصابة العايلة.. تشوف كدآ تلقى أنهو العلاقات بيناتهم قوية وربما تتميز على تلك التي تربط العائلة البيولوجية والحياتية المعاصرة. فيها ضوابط، فيها عقد شرف (طبعن إجرامي)، فيها إمتيازات دون تمييزات (المكافاءة حسب العطاء ما بمدى العاطفة)، الولاء للأسرة أولاً وللرأس طاعة عمياء، للعايلة الذود حتى بالروح، التستر وعدم إفشاء السر حتى تحت العقاب المؤدي للموت، نبذ الجهوية والعنصرية. هذا النوع من الخلطة من الناس والذين يحلوا تسمية أنفسهم بالعائلة أو الأسرة (الفامليا) فرقها الأساسي من الأسر التقليدية (عايلة فلان أو أسرة فرتكان). أنها مجموعة إرتضت بشخص واحد يقوم مقام الأب وكل الباقيين تحت إمرته. لست مدحا ولكنها روح لم تتوفر أقوى منها، إلا عند المهاجرين والأنصار والحواريين والنصارى وأخوه هارون.. قال تعالى: (ووهبنا له من رحمتنا أخاه هارون نبياً)... في هذه الحياة المعاصرة، تجد أن العاطفة هي اليد العليا التي تتحكم بي المجريات بين أفراد الأسرة الواحدة، فالأب والأم عندهم أبنائهم سواسية في الحقوق المعاشية من توفير مأكل ومشرب وتعليم وإبداء الرعاية والإهتمام بتعليمهم أنماط القيم والأدب (في هذا ولأغلب الأحيان يرجع للنزعة الشخصية في أن الأب والأم يعملا هذا من منطلق الحفاظ على وضعهما الأجتماعي) ولكن تطبيقها بينهم يتفاوت حسب تجاوب البنات والأبناء تجاه الوالدين ففي رأي بعض الباحثيين (أن العلاقة القوية للابن بوالدته والفتاة بأبيها) وهذا يبعث نوع من التفاضل بين أفراد الأسرة.. إن للأسرة بالمفهوم المتعارف هي: النواة وهي الأسرة الصغيرة الزوجة والزوج وأطفالهم؛ الأسرة الممتدة وهي أما بسيطة أي الجدود والحبوبات والأولاد وأطفالهم أو ممتدة مركبة ودي النسابة وأنواع عدة أخرى من الأسر.. أما العايلة في وكما ذكرت غير ك ذلك ولكنها ولاء للرابط الأخلاقي (رغم سوءه) والمنفع المشتركة وحماية كل فرد من الأسرة من أي مخاطر تحدق به والتكافل وحسن المعاشرة... ودآ الفرق الكبييييييير بين الإتنين ديل؟ الأسر بالمفهوم العام والأسر (الفامليا)... |
كتيريين من جيلنا والأجيال السبقتنا ربنا يطول في عمرهم ويديم ليهم الصحة والعافية. يقولوا ليك أيامنا كانت حلوة والحياة فيها سهلة والناس متحابة والإحترام كان بيناتهم متبادل دون فرض أو غسب.. على قول أمي السمعتاها من كبارهم: المحنة لا مشي مدارس، لا دق عصا، هي فرطة في القلب وكانت دي قلوبهم مليانة محبة لا درسوها ليهم في خلوة ولا مدرسة لكنها شيتن إتخلقوا بيهو.
لو قلنا نشوف المقاييس الإحنا والقبلنا بيقيسوا بيها الحياة في زمنهم ولييه أنها كانت، أسهل وأهون والأمور متيسرة والتفاهم أيسر. بتذكر بروفسير عبد الله الطيب ولمن أطراهو معناها بتكلم عن قمة، رمز وأيقونة ترمز لي الكتير من المفاهيم، علم، معرفة، خلق وقيم. في دروسهو الكان بيقدمها في التلفزيون ما كان بيستعمل غير اللغة البسييطة البيفهما الناس عامة. الغنا اللي حسي كل زول بيطرب لي سماعهو كلماتهو كان بسييييييطة وداجرة وعامية. الأكل كان بسيط وطاعم ومن مواد متوفرة بي سهولة. ما أطول عليكم في الكان زمان وناس زمان الكانوا.. زمان كان بيقولوا: زول إقليمي وبقصد أنهو ما من العاصمة المثلثة أو عواصم المديريات (الشمالية والشرق والغرب والجنوب) ودآ لي سبب بسيط جداً وهو مربوط بالتوزيع الجغرافيا وللعلم الزول دآ ممكن يكون ما أصلن جذوره من الحتة الهو جآي منها فممكن يكون ود مدرس شايقي لكنهو سكن وإستقر كل حيلتهو في دافور ولا حمري إشتغل في السكة حديد وبقآ ناظر محطة في ديار الرباطاب وذي ما بيتقال؛ هلما جرآ.. حسي المشكة بعدت مننا إحنا العلماء ياهم ناس عبد الله الطيب بالكلام الساهل ما حق المثقفاتيا والكلمات الصعبة الما بتتهضم لمعدة زولن ساهل وبسيط والساسة ياهم ناس أزهري ويا أهل طابت طبتم وطابت بكم طابت والحسي بقت حقوق ناس الهامش والتوزيع المتوازي للثروة الهي ياها غنمايتين وحمارن مجرب. زمنا كانت المليونية بنعرفها مسيرة. وما جمالها المساير في شعرهن وحلاة الشلوخ في الخدودهن الحسي بقن باروكات بلاستيك ومبيض قشير جلد ودآ الكان بكانهو الدلكة والدخان وملاية القرمصيص.. زمنا كانت العفوية وأبوسن بيسأل البوث؛ مركوبي ما وقع في عينك، زمان كان الغنآ بالمعرفة والحفلات بي حق العازفين، عشوة وترحيل وإن بقآ فيها جغمة كمان تكون زيادة وبركة، زمان كان دار الرياضة أمدرمان، اللعيبة لو واحد عندهو عجلة بيجوا متردفين من الحلة وممكن يكون في الفريقيين لاعبين ضد بعض، ما المحبة أقوى من العداوة .. زمنا اليا حليلهو صحافتهو كان ناسها بيكتبوا لينا بير البنفهم عربي بالعربي، ما شيتن معوج ومكلوج.. والله زمنا كان زمان وزمنكم برضهو زمان. لكن زمنكم ما ذي زمنا وزمنا الكان زمان زمن الزمن الكان فيهو للسودن شنة ورنة، يقدر زمنكم يغلب زمنا الزمان؟؟؟ |
الدماغ ولا المخ، سمه ما شئت..
أمرهو عجيب، يبتدي معاك السفر، رفقة جميلة ومريحة.. يذكرك في طفولتك بالأمور الحياتية الهامة. من مساعادت طبيعية من أكل ومشرب، نوم وصحيان و، (وعلى قول صاحبن ليا عظيم عظمة) رميان البايظ الصادر الذي هو بنفس موازنة الوارد. إن لم يتم فالتضخم يسبب أذى كبير. الدماغ هو جهاز بالنسبة للإنسان حاكم وللإنسان هو خادم ومع الإنسان دوما متعاون لكنهو عندهو حساباتهو براهو وحسب تقاسيمهو التشريحية والوظيفية وفوق هذا وذآك الهيكلية بمعنى من الأعلى قيمة الي أصغرها رتبة ذي ما تقول كدآ يعني المخيخ والقشرة.. وقصدي من تسميته بجهاز بأنه وجد له ما يمكن أن يسمى ببديل ينافسهو التحكم في الإنسان وربما أنه أقدر منه في عون الإنسان، إذ لا يشيخ بمرور الزمن إن وجد الإهتمام التقني والتحديثات فالكمبيوتر ممكن تزيد طاقته الإستيعابية بالقيقات عكس صاحبنا الدماغ فهو مع الزمن يفقد العديد من صلاحياتهو.. الذاكرة تلك المهمة الهشة في العقل البشري فهي أكثر المهام عرضة للخراب وبعوامل كتيرة وهي متعددة منها إنشغال حيز تلك المساحة بأمور خاصة وخارجية وكذلك بسبب الأمراض التي تصيب الجسم ويضاف الي ذلك أخطر عامل ينسف هذه المنطقة الهشة وهو العمر. فكل ما طال سفره تقطعت سبل وصوله الي هدف.. الذاكرة ذي الشجرة من بذرة زرعت يوم الإنسان إتولد وتبدى زقايتها مع مرور الزمن لمن تبقى شجرة تثمر أفكار وتجارب وخبرة ومن بعد ذلك تبدى ورقها يتساقط وساقها ينشف فلا أمويقا 3 بتلحقها ولا تدخل جراحي بينقذها فتسقط ويسقط معها الإنسان في غياهب النسيان والإنميزيا والخرف والزهايمر.. نخلي مقتطفات الرعب هذه ولنحلي هذه القصة بمسحة جمال يعني ذي الأفلام الهندية، بدايتهو كره و قتل وموت وأخرتهو فرح وزواج ورقص وحب.. بعد مرات الذاكرة تفسح مجال كبير للتفكير بالمسلمات من الجميل والمفرح، فمثلن؛ هل هي حقيقة أو هو مربوط بتلك المسلمات التي يمارسها البشر. بتذكر كيف أنهو السيدة بتول بت الأمير يعقوب طبعت قبلة حب في جبيني حين ولدت حفيدا لها وأنهو جدي بابكر بدري أخذني لحضنه يبارك مولدي. وكيف أنهو أبوي ترورقت عيونه فرحا بمقدمي وكيف لمن أم قاسم إبتسمت في وجهي لتشرق أمامي نورا وهي تتمنى لي بكلماتها "طبعن وكتها ما كنت عارفها شنهو" كل الحب ودعاء صادق بمستقبل جميل كوجهها الحلو. لي في حياتي. ومن الذكريات الحلوة؛ أني ولدت في زمن كان فيها شوفت الزعيم أزهري متاحة وحضوري مع جمع في جنينة السيد عبد الرحمن المهدي في الخرطوم وفي القبة بأمدرمان بصحبة أخي الحبيب بروف قاسم بدري وجدي بابكر. رؤية نهرو بلحمه ودمه والإمبراطور هيلاسلاي بهيبته العسكرية وزكرشة نياشين لا حد ولا حصر لها. حلاوة أيام أمدرمان العباسية في حي الأمراء وجدي صديق مخير وأولاد السيد الطيب بن الأمير يعقوب وجدي عبد السلام الخليفة وعلي بدري وصادق بدري وعبيد عبد النور وحسن عوض الله وصحوبية الفاضل العات وحسن محمد أحمد ود عمنا الصول وإدريس الهادي صاحب المسلة الشهيرة في شارع العرضة مع الأربعين والأمير منزول وجاد الله في المكتبة مع أحمد ود بدري والتحدث مع أبراهيم عوض وصداقة أولاد مولى وناس جرجس ومصطفى محمد الأمين وصلاح حمد ويوسف ميرغني وتقبيل يد جدي الخضر والعم والقعدة في سرير جيد الطاهر مخير وزيارة جدي حسين وناس عاكف وكم شربت من عصير الليمون في القصر الجمهوري مع الخال عزالدين وسافرت بي الصالون لي عطبرة وعمي عبد الرحمن حسن ومع فاروق الطيب ميرغي وناس كوستي عشت معاهم كالإبن جدي أحمد وعمي عيسى وزيارة الجزيرة أبا ومن ليمون توتي أكلتا وطماطم جروف وادي سيدنا وناس شيخ العرب عمر النصري وأحمد بدر والسفير بكري.. مشحون الذاكرة بالجميل مما كان زمان. بس الخوف والمشكلة بيقولوا أنها دي علامات الزهايمر؟؟ تتذكر الزمان والحسي يبقى في طي النسيان :(:( |
|
العزيز د. بابكر تحياتي
رحم الله القامة والزعيم السيد الصادق المهدي و ادخله فسيح جناته و انزله منها الفردوس الاعلى في جوار الحبيب المصطفى فقد ترجل و البلاد تختطفها هوجة الفتن و تذبح احلامها العنصرية البغيضة و تبدد وحدتها الجهوية المفرقة فما احوجنا اليوم لمثل سيد صادق احد اقطاب الربط بالماضي التليد و الحاضر المخيف و جبل من اوتداد التثبيت في بلاد تموج بها الفتن ترجل و هو يسدي الموقف الوطني و الديني و يتوعد ذل التطبيع البغيض و لكن سبق الأجل و يبقى الموقف .. و لا يسعنا من القول إلأ ما يرضي الله فالحمد لله و انا لله و انا إليه راجعون تقبله الله قبول حسن و احسن الله عزاءكم و عزاء حزب الامة و جماهير الانصار و عزاءنا جميع السودانيين كباشي الحاج |
اللهم اغفر لعبدك الصادق المهدي واوجب له الجنة فانا نشهد له بأنه كان محبا لوطنه والناس، اللهم أفتح له في برزخه ومرقده بابا من الجنة لايسد وحين يلقاك اسألك ياربي أن تهبه لذة النظر إلى وجهك الكريم.
العزاء موصول لك كبيرنا بابكر. انا لله وانا إليه راجعون |
الحبيب كباشي
ظهرتا والحمد لله. مصداق لقولة: المصائب يجمعن المصابينا نعم سيد صادق إفتقدانهو في لحظة نحن في أشد حوجة له.. العزيز عدولي أحسنت له بجميل الدعاء وإن شاء الله ما تترد ليك في شينة........ اللون الأسود وشاح الحزن ولكني أحبكم فأختر هذا اللون الجميل كما أنتم |
| الساعة الآن 04:26 PM. |
Powered by vBulletin® Version 3.8.8 Beta 2
Copyright ©2000 - 2026, vBulletin Solutions, Inc.