اقتباس:
الصوت هو طاقة تخلق اهتزازات تتقبلها الاذن، يعني مصادره كتير ومتعددة، منها صوت الموج، صوت الريح، أصوات الالات وباقي ليا الصوت دآ بيكون إهتزازات تتجمع وتخلق قوة ضاربة، ممكن تكسر ودا البشعر بيهو حتى الاطرش، الما بيسمع الكلام ولا حفيف الشجر، لكنه بيشعر بطاقة الصوت من الريح والبهز الشجر وبيشوف أثار الصوت تحرك الاغصان. الصوت والمتعارف عليه بالصوت (الكلام) عند البشر من إختصاص الاعضاء العلوية من جسم الانسان (ما علينا من الاصوات الاخرى، نحن بنتكلم عن صوت الكلام:eek:). أولن تبادي الجهاز التنفسي، والمعروف أنهو في ترابط بين أعضاء الجسم وتكامل تام، لو نخا واحد بنحصل الشلهتة وأنها كلها بتعمل تش، الا إن صاب احدها خلل وفي أغلب الاحيان نتيجة عدم إنضباط في تنظيم الفرد للعيش، فترابط مهام الجسم تاكيدها في قول المولى عز وجل "لَقَدْ خَلَقْنَا الْإِنسَانَ فِي أَحْسَنِ تَقْوِيمٍ". أها الكلام أولن تبادي الجهاز التنفسي، دآ غير أنهو بيدي الاوكسجين للدم من الهواء ومرورا بالانف والقصبة الهوائية الي الرئتين "وردي ديمة لم يغني وعشان يطلع صوتهو بنغمة معينة، يشحن رئايتهو تمام وتلقاهو يرفع كتافينهو لجمع كم من الهواء ليزفرهو لحنا شجيا ودا البيقولوا عليهو كرب القفص الصدري" (على وزن كرب قاشهو). بعد الاعضاء القُلاد ديل الصوت والبِأثر فيهو بي لمسات ناعمة يخرج بالنغمة "البصمة" المتفرد بها هذا الفرد، تجينا الحنجرة وهي البتخرج الذبذبات الارتجافية بصورة خاصة بيها؟ الجهاز الصوتي، ديل ناس الحنجرة والحبال الصوتية الأوتار، اللسان، الشفايف، حتى السنون ليها أثر إخراج الصوت ليكون مسموع وواضح. أه دآ كلهو كوم ولمن يجي للزول الكُبر، الحكاية بتجوط والترهل البيصيب عديد من الجسم، لمصنع الصوت نصيب كذلك.. قصة الانجليز شنهو البديت بيها البوست؟؟ الناس ديل صوتهم أقول جهوري، أجش وأقرب لي صهيل الخيل الذي كان ساقني وdiagnosed بما صابني.. أها طلع أنهو حجم الرأس ليهو تاثير في قوة الصوت، مثلن شوف أهلنا الاثيوبين الرجال منهم صوتهم هادي لأنهو أحجام رأسهم ما كبيرة وكت الإنجليز من كُبر رأسهم، إضنينهم تقول حقات فيل. ناس الموسيقى، عشان ما ألخبت خليني في جهوري وأجش وهادي، حكاية عالي ومنخفض وري سي، عالي ومنخفض دي بتعرفوها براكم. برضك شوف السيدات في الغالبية وحتى تكون الصفة الواحدة، أنهن رؤسهن ما كبار، عشان كدى أصواتهن "حنينات";). من أقوى أصوات الأحياء هو الحوت، دا تحت الموية بنسم وبين الحيوانات المعاشة نلقى الاسد زئيره إسمع مسافات دا من ناحية القوة وما التصنيف اللحني.. أهو مشاركة وكدآ |
مش قالوا، العمر دائرة، نقطة الانطلاق هي الطفولة ونقطة المنهتى برضك الطفولة.
يعني في ما بعد عمر الرضاعة وتعلم الكلام، تجي قصة الأسئلة والفضول. أها حسي ظنيتني عايش هذه الفترة وهي في الدائرة، تمثل ما قبل العودة لطفولة الرضاعة. المهم في الامر هو السؤال الأتي؟؟ هل اليهودية، عرق أم دين أبناء النبي نوح هموا! سام: وهو أبو العرب والساميين الاُخر. حام: وهو أبو الحبش وما جاورهم. يافث: وهو أبو الروم وإفتراضا ما يسمى بالبيض "الأوربيين". كنعان: وعنه روايتان واحدة أنه إبن نوح والثانية أنه إبن حام.. ومن الديانات السماوية المتعارف عنها وبالتسلسل حسب القدم هي: اليهودية وأرسل بها موسى عليه السلام، المسيحية وأرسل بيها عيسى عليه السلام، الإسلام وأرسل به على سيدنا محمد صلى الله عليه وسلم. غير أنه جاء في القران الكريم؛ {قُولُوا آمَنَّا بِاللَّهِ وَمَا أُنْزِلَ إِلَيْنَا وَمَا أُنْزِلَ إِلَىٰ إِبْرَاهِيمَ وَإِسْمَاعِيلَ وَإِسْحَاقَ وَيَعْقُوبَ وَالْأَسْبَاطِ وَمَا أُوتِيَ مُوسَىٰ وَعِيسَىٰ وَمَا أُوتِيَ النَّبِيُّونَ مِنْ رَبِّهِمْ لَا نُفَرِّقُ بَيْنَ أَحَدٍ مِنْهُمْ وَنَحْنُ لَهُ مُسْلِمُونَ}. السؤال الذي يتبادر لذهن شخص عادي مثلي؟ إسرائيل وفي الكتب هو يعقوب إبن إسحق إبن إبراهيم عليهم السلام وموسى عليه السلام هو من أرسل بالديانة اليهودية وموسى عليه السلام هو حفيد (سبط) أوي بن يعقوب عليه السلام والأسباط هموا حسب الديانة اليهودية (التي يعرف أن جاء بها موسى علي السلام) إثني عشر ويعرفوا بأن كل سبط قبيلة. في رأيي المتواضع أنهو اليهودية دين ولست عرق، كما إلاسلام والمسيحية وعليه يكون اليهود كما المسيحين والمسلمين لست لهم أرض محددة ولكن يمكن أن تكون لهم قبلة يخصونها بروحانيات التدين، مثل مكة المكرمة والمدينة المنورة عند المسلمين، وبيت لحم حيث ولد عيسى عليه السلام وجلجثة حيث صُلب وهو الان معروف بكنيسة القيامة للمسيحيين. من باب ما يذكر أيضا.. "وَأُمِرْتُ لِأَنْ أَكُونَ أَوَّلَ الْمُسْلِمِينَ".. هذه الأية هي الاقوى فيما ذكر عن الإسلام. غير ذلك أترك لكم قرأة ما جاء في (النت).......... https://www.almaany.com/quran-b/%D8%...5%D9%8A%D9%86/ |
حكاية الدكاترة مع الكُبر، هل هي شماعة ولا هي مخارجة ولا فعلن الكُبر يعني تحويل الزول لي لجنة عشان يتلجن؟؟
تمشي الدكتور وإتا حاسي بألم ما في أيتها عضو من أعضاء الجسم، تلقاهو فاتح في المونيتر بتاع كمبيوترهو صفحة وإسمك فووق فيها. سرقتا النظر ليها ووبالجد بقولها، أول ما إسترعا إنتباهي كلمة Birth وتحتها تقسيمة ليها تأثير سلبي فعلن، اليوم، الشهر والسنة وطبعا مبتدية بي 19 وقدمها رقمين. قربتا أقول لي الدكتور: من فضلك لا تعير هذا إهتمام وركز معايا على شكواي الصحية وأكيد أنك تدين بواحدة من الديانات السماوية وهذا جلي من منظرك وأنك مسيحي، يا بروتسانت أو أنجليك أو كاثوليك ولا أرثودكس أو ماروني ولا ممكن تكون متبع ديانة موسي عليه السلام وتكون من الارثودكس اليهود أو إصلاحي أو من القراء ولا من الشميرا. لأنهو ما شكلك ولا إسمك مسلم حتى تكون سني حنفي ولا مالكي ولا شافعي ولا حنبلي ولا إسمك حتى شيعي إثني عشري ولا إسماعيلي كمان ما ظنيتك إباضي. علي أي حال مهما كانت ديانتك ومذهبك أكيد حتى لو من الصابئة لا تنسى أنهو نبي الله أيوب وهو معروف عند كل الديانات الإبراهيمية، لأنهو حفيد أب الانبياء أجمعين أبراهيم عليه السلام عاش عمر فوق التسعين وصابه من العلل الكثير في جسده وماله وأهله، فعشان كدآ ما تركز ليا على العمر وشوف شغلك.. بعد دآ كلهو يبدا كلامهو؛ طبعن في العمر دآ ويبدا يعلق ليك كل ما يغطي حفاظه على مهنته أو شق معلوماته في شماعة "عمري" تطير شقاوتي ويستغل كّبري طوق نجاة Lifebuoy ولا يكون الزول دآ؟ عارف شغلهو ومتمكن في علمهو إلا القصة وما فيني من علل!! أني فعلن كّبِرت :075::075: |
اقتباس:
بعد ده كله هل يصلح أن أقول لك دكتوري ... فعلا دكتوري أو دكتورنا .... فأنتم الدكاترة أدرى بشعاب العلل :) أقل من أسبوع وتحديدا السبت الماضي ذهبت للدكتور خليها الدكتورة لصرف علاجي التأميني وكانت نتيجة الفحص ارتفاع سكري التراكمي لدرجة مخيفة أخافتني وعندي ثقافة عن أعلى درجة تراكمية واستخلفت الله وقلت لها ليس لدي طريقة لخفضه إلا أن تزيدي الجرعة الأنسولونية أو تشوفي مخرج إلا المشي ففي هذا الجو الحار جدا يصعب كل شي حتى التنفس .. فما كان منها إلا أن استجابت لطلبي وكأني أنا المشخص والدكتور في وقت واحد وزادت الجرعة وأضافة أدوية جديدة وبعد مجابدة جاءت الموافقة من شركة التأمين ويممت صوب الصيدلية وحسيت أن الصيدلي انبسطت اساريره وقد اصطاد صيدا ثمينا وصار ينزل في بضاعته من انواع الأدوية المتعددة هاك يا لانتوس بإبره وهاك يا منظمات السكر وهاك يا فيتامينات وهاك يا مسحات طبية لزوم الحقن وهاك يا .... المهم الكيس الكبير إمتلأ علاج لمدة ثلاثة أشهر وإن حمله لتنوء به العصبة أولي القوة والطريف والظريف من الصيدلي زودني بجهاز قياس السكر مع شرائحه حريص على صحتي ومراقبة هذا السكر التراكمي .. فحملته وذهبت به لداري ووضعت الأنسولين في الثلاجة وبقية الأدوية دولابها المخصص .. علما أنه تم إيقاف حبوب الضغط بحجة أن سني هذه لا تقوى عليها ربما تؤثر على الدورة الدموية ... فهذه استشارة لك هذا صحيح ؟؟ فقلت الحمد لله على ما أنعمت وتفضلت فالشفاء بيدك والحمد لله تدبيرك وتيسيرك بتوفير هذه الأدوية والعلاجات ويقيني التام أن الشفاء من عند الله وهذه من أسبابه سهلها الله من عنده تماما لشفائه فما أنزل الله من داء وإلا أوجد له دواء .. أنَّه صلَّى اللهُ عليه وسلَّم قالَ: «تَداوَوْا؛ فإنَّ اللهَ عزَّ وجلَّ لم يَضَعْ داءً إلَّا وَضَعَ له دَواءً، غيرَ داءٍ واحدٍ: الهَرَمِ» الشاهد إني فعلن كبـــــــــــــرت . سامحني للإطالة أطال الله في عمرك وأعمارنا على طاعته .. :p |
اقتباس:
طول وطول ودا يوم فيهو بسعد لمن أشوف زول يتحاوم بي جاي وخاصتن لمن يكون قامة وزولن متلك... يومتها، بعد ما وقتا من الدكتور، غشيت ليا مطعم، قعدتا ضربتا فيهو تمام والمعنويات عِلت وهبت ليك فيني نسمة "مورال" عالية.. هو تعرف فعلن الدكتور بشكل كم هائل من عجلة الشفاء وإن كان قبل كم يوم شفتا ليا فيديو موضوعه التشافي وفيهو سيدة إتكلمت عن أنهو الزول هو أحسن من يعالج نفسه وإتكلمت عن أمور دينية وأنهو المولى خلقنا على أحسن تقويم وإن ما حافظنا على هذا، فنحن تبقى علينا قولة: على نفسها جنت براقش وعليه أنهو ذي ما بنسبب في الامراض، ممكنا نتشافى وعلى قول المرحوم الممثل المصري سعيد صالح: إستك منو وفيهو |
أتذكر وإحنا صغار، بيجبروننا أن نمشي أماكن ما دايرينها، يعني بيغسبونا ذي البيت الكبير وهو عجايز صرف وما فيهو شفع نلعب معاهم،،
مرت السنيين وحسي شايف الحالة تتكرر أمام أعيوني بي عمشتن دي. البيحصل في سودانيات هو البذكرني تلك الاوقات الصعيبة، أيام الغسب.. تلقى الاحباء وهم بالعدد؛ ناصر، عبد الحكيم، عبد المنعم وبعض أخر منهن ومنهم وشخصي "اللايوق"، يظهر وأهو يعملوا ليهم رد كدا ذي المجاملة ولا ذي المغسوبين على التواجد هنانا (بعضهم يشوف في "هنانا" كأنها كلمة مختلقة لتعني "هنا"، لكني لقيت أنه وفي ما يبدو، في المخ في منطقة ترجعك لي جذور قديمة وتيقظ الحمض النووي DNA فتخليك تستعمل كلمات من عربي ما قبل أن يكتب ويتنقط ويشكل وهذا على ما يبدو، دا البيحاصل عليا وقولة هنانا)، يعني أخونا المحسي وبوستاتهو صاحبت القبول الاكتر وبي التجاوب المنقطع النظير يسجل غياب، ناس بوست دفعة خريجي مصر شيو وكيشو وباقي الاحبة البرضهم فاتوا المليون، إن شاء الله تبقى ليهم ملايين الدولارات (وما ينسونا)، سمراء (عفاف) والوجيهة ظهرن وبنيتي آل الدمرداش ديك من يوم فتحوا الواتساب وبدوا الفيسبوك، خلاص عافتنا لي غادي، جيلينا أكيد بيجي يعاين وهو ذي هندرزة معتصم، بس بيفوتونا حوبة.. كوكي ظاتهو وكنت قايلهو سيد وجعة والوجع بيغسبهو.. لكنه سك ما باين :(:(:(:( |
العاطفة الجياشة وقبل هذه المرة تحدثت عها وكيف أن الكِبر يؤجج لهيبها.
الدمعة تبقى قريبة، الخلعة في طرف الأحاسيس، شنهو؟ مالووو، كيفن وهذه هي الأسئلة التي تصدر حين سماع إسم لشخص، فدوما هو التشاؤم يتبادر للذهن. ما الكُبر بيخليك قرفان وزهجان وما بتشوف الدنيا إلا بهذا المنظور، يعني زول جسده ضعف، عطاءه شح، سمعه ضعف، كلامهو وهن وما بسمعن غير مؤنس حديثه وشكله "يحنن". تستنى منهو شنهو غير يكون سلبي؟؟ نرجع لي قصة العاطفة؟؟ (في جامعة كاليفورنيا الأميركية سوزان ترك تشارلز، تراقب تغير المزاج، والشعور بالرضا، ولحظات التأمل، ونوبات الغضب والحزن واليأس لدى الأفراد من مختلف الأعمار، مع اهتمام خاص بكيفية التعامل مع المشاعر واختبارها مع التقدم في السن. وقد لاحظت تشارلز هي وزملاؤها، أنه رغم علاقات كبار السن الاجتماعية الضئيلة إلا أنهم يتمتعون بعاطفة كبيرة تجاه المقربين منهم.) المقربين من البشر، هم أهلك وأصدقاءك ومن الجماد هي أرضك وبيتك وهناك الجديد وهو الاسافير فمنها ما هو قريب منك قرب البشر والجماد وهنا بيت القصيد. قرب سودانيات من قلبي، قرب البيت الذي أعيش فيه مع نخبة مميزة، التقيهم حين أضجر وعندهم بلقا التقبل، أشاركهم همي وهم يبادلوني الرأي والروئ، أشكيلهم ويخفيفو عني، في سودانيات وأنا الذي ندر أن أحظى بالنجاح، تغير أمري وششعرت بروح إيجابية عالية وغير مسبوق، حين دعمني أعضاء سودانيات وروادها من زوار، بأن أوصلي بوستي هذا لرقم لو شنهو وشنهو دآك ما كان بقى، مليونية من المشاهدات، خلال هذه العشر سنين وأنا مدفوع بهذا التشجيع، يومتها وفي سنة 2015؟ ولا في الخيال أني أستر في البوست لكن كنت بستمر بقصد الإستجابة لمتابعي البوست... تاني وتالت ولي الدشليون،، شكراً ليكم وليهم.. أها عاطفتي تجاه سودانيات وبي ضلمة الكبر البتغطي سما من هم في عمري من تشاؤم ويأس، مخوفاني بالجد أنهو؟؟ سودانيات تمشي قبلي وللحق والله، بحزن شديد كل ما تراودني الخاطرة دي.... في نشيد مدارس الاحفاد قال شاعره في أحد البيوت؟؟ حافظ عليها يا فتى، تسمو على الاجيال وبطول السنين |
لمن زول يكون الناس مكتشننهو، يقولوا عنهو:
* عامل لينا وجع وش.. * كترت الطلة بتمسخ خلايق الله * الكل يوم معانا الي أخر من ما يقال للتعبير عن عدم تحملهو أو شوفتهو أو ما يربطهم بيهو.. أنا وذي ما بقول ديمة، مع الكبر بتزيد الحساسية (مش allergy بتاعت الهيستامين البتتسبب في الاكزيما والجيوب الانفية الي أخره) قصدي sensitivity من إحساس وهشاشة في المشاعر ويبقى يفسر كل شيء بتصورهو وكما قلناها قبل كدي أنهو الزول مع الكُبر بيبقى سلبيي وبشوف الدنيا إن خلااااااااص حالتهو في قمة الايجابية، بشوفها رمادي وغير ذلك فالدنيا بتتورا ليهو ضلما عديل.. أها وذي أولياء أمرونا والذين علمنا القرآن أن نطيعهم، أستعير قولتهم البيقولوها بي فهم أو كإرث سطووي، بقول: من هذا المنطلق وإستشعارن بأن الهروب الجماعي لعضوية سودانيات والتي تماثل هجة السودانيين من بلدهم الحبيب والذي سببه القوي والاعظم؟ هو تكشينتهم للجنجويد والحرابة "العبثية".. أني أُمثل السبب المباشر وتنطبق عليا؟؟ * عامل لينا وجع وش.. * كترت الطلة بتمسخ خلايق الله * كل يوم معانا فبشوب وبسبب الحساسية بتعت المشاعر. أخير أنقطع واتوارآ، عسى يتلم الجمع من تاني،،خليكم عافية وربنا يحفظكم متلمين ديمة.... :(:(:( |
اقتباس:
الله يكضب الشينة .. لا تفعلها .. وما سودانيات إلا دكتور بابكر مخير .. يا أخي مشاهداتك فاقت المليون .. فكيف تنقطع وتتوارى ؟ يرضيك الله لا تنقطع ولا تتوارى .. فماذا يبقى لسودانيات ... رحم الله أخونا خالد الحاج رحمة واسعة فقد رحل وترك صدقة جارية من علم ينتفع به .. فكان النفع مما سطرته يا دكتور فلا تحرمنا من ما ينتفع به وتوقف صدقاتك .. لك من الشكر أجزله واترك الباب مفتوحا ولا يضيق صدرك وصبرك ودع حبل الود موصولا ... فالكبر لا يقف حائلا بين العطاء والروح . أطال الله في عمرك وأبقاك ونفع بك .. فهذه مناشدة .. والله على كل شيئ قدير . ومن وراء القصد والهادي الى سواء السبيل . ونهديك : ومين زيك ... |
اقتباس:
سودانيات يابا بي أهلها وزوارها. سودانيات بمؤسسيها، خالد الحاج رحمة الله عليه وطيب ثراه مع العزيزة دكتور حنينة. سودانيات بهمة وروح الغالي "كوكي" الذي هو إصرار وعزم لا ينقطع في تحمل الرسالة. سودانيات هبة ومستمرة ديمة وهِبة من الكريم لن تنقطع |
زمان كان عندنا كُبارنا.
لهم تحية إجلال وإكبار ملؤها المحبة والافتخار، والكرامة والاعتزاز الحل والعقد، الأمر والنهي، العقل والفكر.. التراحم والرفق بالبعض، التحاب والاخاء.. والمدهش الحسي؟ ما البيدهش بوَلَهٍ وإعجاب ولكن يدهش فزعا ودون حياء ونكران.. أن يانا إحن الكوبار.. فشلنا فيما نجح فيه كوبارنا ولم نعلم صوغارنا أيتها حاجة من الورثناها.. منهم تعلمنا كيف أننا مؤدبين، نحترم الكبار ونعز النساء، ما بنفرق بين دآ من ياتو جهة وحتى الغريب من ديار تانية، لميناهو علينا وأعزيناهو.. أتذكر الوالد كان في الجمعية التشريعية (على قولهم؟ صنيعة الاستعمار) كان معاهو العم بوث ديو وكان دائم التواصل وبزيارات دائمة للوالد في البيت، الناظر الأمين ترك كان من رواد الوالد في البيت أيضا وهو رفيق في الجمعية التشريعية، الزعيم اسماعيل الازهري كانت تربطه بالوالد زمالة في الجامعة الامريكية ببيروت وتواصل مستمر في إجزخانة أمدرمان. كنا نسكن أدرمان بالعباسية وكان الحي يعج بعدد من أهلنا الفلاتة (حي العمايا) وكذلك فريق فنقر، تزاملنا مع صغارهم ولعبنا الدافوري وتبادلنا اللحمة في الاعياد.. في ثانوية وادي سيدنا، زاملت الشوايقة والدينكا وكان أساتذتنا من الهاشماب والحمر وقبل ذلك في الاحفاد كان الاستاذ موسى من الفتيحاب ومرسي من مصر وحضرت في طفولتي دروسا من الشيخ بابكر بدري ومن بعده فير مراحل متقدمة من إبنه العميد يوسف بدري وكان له فسحة خاصة في الاسمبلي تركز في الحس القومي والتربية الوطنية.. الزخم دآ كلهو ما قدرتا أوصله لأولادي.. لأننا إنشغلنا بخلق حياة جديدة في المنافي والمهاجر. إلا قدر الأدينا ليهم، شيء من دمنا وجينات كوبارنا.. ربنا يغطيهم ويحفظهم من أخطار الدنيا والمستقبل القدامهم.. إلا في الحقيقة؟؟ لعن الله الذين حرمونا من البقاء على سودانا الوخلوهو لينا كوبارنا :frown::frown:.. بلد عزيز وعظيم :cool::cool: |
سألت أحد أقاربي من كبار السن وهو عندهو حساسية مبالغة تجاه الكِّضب.
شنهو قصتهو مع الكضب، هل لأمر حدث وصحبه ضرر ولا هي حاجة في الدم وهل أنهو أصلن ما كضب؟ قال ليا تعرف يا بابكيير (وهكذا كان دوما يناديني) في طفولتي كنت ما بتلفت لي الكضبة وزيادة على كدا، كنت بستعين بي قدرتي الفائقة في التذكر يعني بينطبق عليا القول بتاع "إن كنت كذوبً فكن ذكورً"، لكن كرهي لي الكضب بداء بعد ما بديت أفهم الحياة وكبرتا وعقلتا، لقيت أنه كنت أنا غبي جدا لمن أكذب وأني بصغر نفسي، فبعض مرات تكضب في بديهيات والزول البتقول ليهو الكضبة أكيد بكون ملم بهذا، فالبحصل أني برخص نفسي. غير كدا البيحصل أنك لمن تكذب، فأنت تستخف بي فهم الزول المتلقي للكذبة، يعني أبوك هذا الشخص الذي أنت منه أو أمك التي حملتك كل الاشهر في بطنها وأرضعتك، تكذب عليهم وتستخف بي فهمهم أو مدرسك هذا الذي يعلمك حين تكذب عليه فهذا إستخفاف بعقله.. في اللغة؛ الكذب هو خلاف الصدق وقول يخالف الحقيقةَ مع العلم بها. الكذب محرم في الإسلام بشكل عام.. (إِنَّما يَفتَرِي الكَذِبَ الَّذينَ لا يُؤمِنونَ بِآياتِ اللَّـهِ وَأُولـئِكَ هُمُ الكاذِبونَ). الكذب في الكُبر؟؟ (منقول) تشير بعض الدراسات إلى أن كبار السن قد يكونون أكثر ميلاً للكذب أو تصديق الأكاذيب مقارنة بالشباب، وقد يكون ذلك مرتبطًا بتغيرات في الذاكرة أو آليات التكيف مع صعوبات معينة. في المقابل، هناك دراسات أخرى تشير إلى أن المراهقين هم الأكثر كذبًا، وأن كبار السن (من 60 إلى 92 عامًا) أكثر ميلاً للكذب وتصديقه مقارنة بالشباب (من 18 إلى 24 عامًا). أسباب محتملة لكذب كبار السن: تأثير الذاكرة: قد تندمج الأكاذيب مع الذكريات وتصبح تبدو حقيقية، وقد يكون الكذب آلية تكيف مع صعوبات الذاكرة أو الارتباك. أخطاء عرضية: قد لا تكون بعض الأكاذيب متعمدة بل مجرد أخطاء ناتجة عن صعوبات الذاكرة. الاستمتاع بالقصص: قد تكون الأكاذيب أحيانًا حكايات معقدة غير مدروسة جيدًا، وقد يجد البعض متعة في سردها أو قد تكون جزءًا من التكيف مع صعوبات الذاكرة. طيب الجاب السيرة دي شنهو؟؟؟ 1 - ما يتم تداوله في الاعلام والوسائط الاسفيرية ويتم تبادله "يعني عندي صديق" كل البيقع في يدهو من معلومة يفكها عليا وعلى الكثيرين. طبعا هو ما بيكذب، لكنه ينطبق عليه أنهو كبير وبصدق الكضبة 2- كضب الناس الكبار في عمرهم وفي مناصبهم، ذي ترامب والبرهان عليهم اللعنة حيث ما كانوا وأين ما ناموا أو قاموا؟؟؟ # لا للحرب :cool::cool: |
قبل تلاتة أيام، رجعت بيا الذاكرة والهّي بقت حترب، حترب..
رجعت بيا 67 وأنا زولن في أواخر ايام الطفولة وبواكير عمر الشباب 12 سنة، في مثل هذا اليوم. ومن إذاعة أمدرمان؛ بيان هام فترقبوه. هذه العبارة النحس تعالى صوت المذياع، بيان من القوات المسلحة (وكتها كان الجيش السوداني) وموسيقى الجيش التي أصبحت نذر شؤم ومستقبل أسود للبلاد لفترة من الزمان. كنا نسكن شارع عثمان دقنة في الخرطوم شرق في منزل حكومي لأن الوالد كان كبير الصيادلة بوزارة الصحة (ناس دولة 56) وهذا الشارع يمتد من ضفاف النيل الازرق حتى بوابة القيادة العامة، ما متذكر بالضبط اليوم كان شنهو في الاسبوع لكن حسب قوقل أنه كان يوم إتنين، بس الغريبة العسكر ديمة إنقلاباتهم أيام الخميس باليل، لأنه يوم الخميس دآ كان مضاف الي أنه أخر أيام الاسبوع فهو كان يوم خروج الناس للإحتفالات من زفافات وحفلات غنائية الي أخره من أفراح وبيرجعوا بيوتهم مرهقين وفترانين، يا ريت لو كان الواحد يقدر يرجعِي سجلات البوليس (الشرطة) عشان يقدر يعرف حوادث السطو المنزلي أيام الخميس، لمجرد إرضاء نفسي والرد على تساؤلاتي. في إحتمالية إنخفاض هذه الحوادث في هذا اليوم من كل إسبوع للتأكد بأن اللص الاكبر والحرامي الجد (الجيش) والذي يقوم بالسطو الأكبر منزل الشعب والأمة السودانية بالحكومات الديمقراطية، محتكر اليوم دآ وخوفا من تضارب مصالح الحرامية بتاعين السطو على المنازل بالاحياء والحرامة الكُبار (الجيش). أها بفضولي الذي وهن وخبا وضمر حتى أضحى قرب بضعة مقاييس من التلاشي، مرقتا أشمشم الاخبار وإذا ببعض العساكر واقفين في ناصية الشارع والتي هي ناصة المنزل الكان مخصص لوالدي واسرته، نهروني: أدخل جوا وكان هذا كافيا لإشباع فضولي وخطوط عريضة لنسج قصة أحدث بها أهل البيت.. أعلن العم إبراهيم عبود الرواية الممجوجة التي يحكيها كل العسكر من غيرة على الشعب والخوف على الناس من حكومة هو الشعب إختارها وأصدقها قيادته.. قالها عبود وبعض ممن حاول الإنقلاب عليه وقالها نميري ولكنه لم يحفظ قوله فكان دكتاتورا خنق الشعب الذي جاء لإنقاذه من حكم أبناءه لأهلهم والذين جاؤا بإختيار الناس لهم وقالها البشير الذي كذب من أول يوم حين إدعى أن إنقلابه وهو من القيادة العامة للقوات المسلحة، حين كان إنقلاب مجموعة حكمت البلاد لمدة 30 عاما وضاق فيها الشعب شتى أنواع العذاب والهوان... كان يوم 17 نوفمبر من العام 1958 هو أنحس أيام السودان فهو اليوم الذي بداء فيه الجيش يعرف الطريق نحو الانقلابات والسطو على الحكومات المدنية وتسلم زمام الحكم وإذاقة شعبنا العذاب بكل أنواعه.. |
الحبيب بابكر
يَوْمَا مَا، سَنَبْنِي فِي نَهَارِ بِلَادِنَا، جَيْشًا بِلَا تَارِيخ، يُبْنَى مِنْ عُمُومِ النَّاسِ، يَحْرُسُ بَابَنَا الْمَفْتُوحَ نَحْوَ الشَّمْسِ، جَيْشٌ لَا يُقَاتِلُنَا وَلَا يقتاتٌ مِنْ دَمِنَا، وَيَحْمِي الْعِرْضَ، جَيْشٌ لَا يُجِيدُ الْاِنْسِحَابَ، إِذَا أَتَانَا الْجَنجَوِيدْ تحياتي لك ولذكرياتك وربنا يديك طول العمر والصحة يا صديقي |
اقتباس:
تعديل 57... يعني 67 وأكون مسحت عشرة سنوات من العمر الحقيقي |
بين الاتنين يتسربل ويتسرب نقيضان يجتمعان في حالتي دي..
الواحد وما أنا الحمد لله لكن كامل إدريس حسب شهادة ميلادهو المزورة من 55 وبقاها 45 عمللهو يتسربل بي تصبيغ شعره ويجلطهو بالجل، مع أنهو بقولوا الشيب حشمة ;).. أها لكني برضهو بعض مرات بتسربل وأقوم أحشي القميص وألبس ليا فنلة تحتانية ضيقة عشان تشد الكرش الإترخت ودا يا هو التسربل. لكن حكاية التسرب دي ياهن الايام والسنين، ذي الموية بين الاصابعيين، براحة ودون تحس بيها تنسرق ومن الرطوبة لي الجفاف والهو رفيق للكُبر، يدينك الكانن ملمس ناعمة شوية وشحمانات نسبين ومليانات مدقلبات، بقن ذي مساحة السبورة، من جهة جامدة ذي الخشب ومن جهة خشنة ولا ورقة الصنفرة sand paper :rolleyes:........ القصة وما فيها والحصل، مصادفة ولا عن قصد وطبعا أكيد والله ما متذكر (ما الكًُّبُر)، لكن أنهو قبل يومين من هذا اليوم 25/11/2025 وقبل 10 سنوات، بديت البوست دآ وأنهو قبل يوم من هذا اليوم كذلك 25/11/2025 كان تأريخ ميلادي الهو كان 11/24/1946.(ما تقولوا ليا كم عشان بيحبطني ::gap:::gap:).. وأذكر في ذكرى مولدي، كان الحبيب الراحل المقيم وصاحب هذا الحوش المبارك، خالد الحاج (خلودي) له لي تهنئة بصورة خاصة. عليه الرحمة والمغفرة دوما تتجدد ذكراه عندي في مثل هذا اليوم من كل عام. الا رحم الله خالد وكل الذين غادرونا وجعلوا ذكراهم حية عندنا دوما |
العجب العجيب والشيء الجميل
ما تعرف هل هي من الله نعمة، أم هي نقمة يفعلها الكُبر تصحى الصباح وتلقا نفسك حي وأوبس، تقول تقوم علي حيلك تقلى السرير شاديك ليهو، وييين يا صاحبي، هو الوقوع في الشباك ساهل ذي الخروج وتبدا المنازعة تقول تنزل كيرعينك من السرير، تلقاهن مشمطات وكأنهن منسقات مع السرير في أن لا يطلق سراحك وتبدا تتنازل عن حقوقك المشروعة في التحكم من أضاء جسمك وتقول نمشي لي الخطة باء، أن أمسك رجليا بي يداي وأنزل الرجلين، لكن وييييين يابا، ما يدين يترجفن وما فيهن قدرة حتى يشيلن ورقة ريزلا RIZLA (زيقزاق ZIGZAG البلفو بيها السجاير ويسمى في مصر أخت بلادي يا شقيقة بي البفرآ).. هنا والشيء للشيء يذكر، أنا قايل مدة السنتين وشوية الفاتن ديل، سبب بطلي للسجاير بي سبب سرطان الحبال الصوتية. بس بديت أتوكد أنهو السبب الحقيقي هو عدم القدرة على لف السجارة (ما تمشوا بعيد وتحسنو الظن أني زول مزاج، صاحب طرفة ن أثار السطلة) الكنت مشهور بأني متمكن في لفها حتى أني كان ممكن أحوز على مكانة في موسوعة "جينس" للأرقام القياسية.. تكون دي عين صابتني :(:( الحلتني أبطل السجاير. العين طبعا أشد أيذاء من الحسد الذي هو تمني زوال النعمة عن الغير، بينما العين هي الإصابة بالإيذاء. الغريب في القصة أنهو العين لمنعها، يستعان بي عين زرقاء والكثير يؤمن بأنها تميمة للحماية من الحسد.. أتذكر في الوسطى كان لي زميل عزيز (ربيع عبد المعطي نجار) كان عيونهو زرقاويات نسبيا، كان وللحق زولن وجيه وطيب وظريف وراقي وما بيحسد أبدن... شوف بالله عليك من شنهو وسرحنا في شنهو، أتذكر أبو قاسم (أبوي) كان قاص متميز وحكاويهو تجذب المستمع لأكن ترآ ذيي كدي، يدلف في أزقة القصص والحكاوي وينتقل الي قصة أخرى، فتقوم أم قاسم تقول ليهو؛ كدي تم لينا القصة.. عليهما الرحمة فقد كانا ثنائي متميز، يشهد لهم الغير قبل الأهل بعظمتهما.. https://sudanyat.org/vb/showthread.php?t=8673 |
في زمنا الالقاب كانت لها حرمتها وكانت مقياس بي الزمن دآ، شيحية ونادرة.
يعني نمسك الألقاب الاجتماعية؛ قولة شيخ دي ما كان بتنقال لي كل من لبس كوفية ولا رمى طرحة في رأسهو ولا أطلق لحيته لغاية ما قربت تغطي رقبتهو ولي زولن إتلموا حوالينهو جماعة وأطلقوا عليه هذا اللقب الهام وحساس، زمنا الشيخ دي بيكون وراهو ناس ولاءها ليهو وما بتطمع في أن تنقلب عليهو عشان تبقا محلهو وعلى سبيل المثال، "شيخ حسن الترابي" "وشيخ علي عثمان"، الشيخ عرفناهو شيخ قبيلة ولا شيخ طريقة صوفية ذي الشيخ محمد عثمان الميرغني (الميرغني) وشيخ البرعي وعوج الدرب.. (بس من زمنا ومن الاكبر مننا، درامتنا الكوميدية في السودان بلد العجائب، تتجلى في تسمية زعيمة حلقة الزار "بالشيخة").. والأقاب العلمية؛ زمنا كان لقب "دكتور" دآ بصورة ما لقب حصري على الاطباء وفعلن وقتها عدد محدود من غير المهن الطبية يعرف بدكتور يعني بتذكر مكي شبيكة وأحمد السيد حمد وهؤلاء حصلوا على درجة PHD وهي حروف لإختصار دكتور في الفلسفة (Doctor of Philosophy) الاول في التأريخ والثاني في القانون ولكن بعد كدآ كتر عدد حاملي شهادة PHD وتوسع وهناك شهادة تشريفية تحمل لقب "دكتور" لكن تم مراعاة الحقوق الاكاديمية لمن نالها الدكتورية بجهد دراسة وبحوث ودراسات، فقموا سموها (دكتوراة فخرية) وديل في فترة الإنقاذ وبقت وذي ما بيقولوا ناسنا؛ بيصرفوها لمن هبا ودبا ونتحفظ عن ضرب الامثلة بالاسماء عشان ما تخرب ليهم التمتع باللقب. أها ثم جاءت مرحلة "البروفسير" ودي نقلة برضهو لنظام الانقاذ في إنتشار هذا اللقب حتى وممكن بلا مبالغة أقول عدد "البروفسرات" تجاوز عدد الدكاترة وقرب يلحق عدد الطلاب مع أنهو البروفسرات (البيجوا من رحم الدكاترة) هم اصحاب إمتياز أكبر من الدكاترة ولأنهم مرحلة أكديمية تجي ما بعد الدكتوراة وإن كان بروفسير وهو لقب لاتيني يطلق على المعلم، كما دكتور الرومانية تعني المدرب، يعني مدرب فريق المصارعة الرومانية يقال دكتورى.. طيب بعد ما عرفنا عظم درجة البروفسير وأنهو هوالمعلم بالعامية "أستاذ" أها هنا بقا لاها درامة كوميدية ولا تقاليد وعرف بلهو منتهى الجهل: لاينجح الدجالون إلا في أمة الجهلاء.. في زمنا لمن تقول لي زول أستاذ، احنا وقتها الصغار كنا نرتعد رهبة، ما الاستاذ هو المعلم وهو الافهم وهو الأب في فناء المدرسة والعسس في إنتظام الفصول والساحات وهو الحاكم الذي يأمر ولا ينهى وهو الجلاد وهو الحكيم الذي عنده الرأي القويم وهو الفي نظرنا التلاميذ عارف كل شيء. حسي يعني ذي أحمد طه بتاع الجزيرة مباشر، يقال ليهو أستاذ، يعني دي كيف وهو كل الحلقات زبرامجه يسأل ليعرف.. دي بالله مش "غلوطية القرد" (Monkey Puzzle) |
من وإحنا صغار ليين كبرنا وهرمنا غريب أمر الدنيا دي.
ليها خالق وخلق آدم وحواء رفقة ليهو وجابوا ياهم البشر ولا الناس ولا سميهم متل ما تسميهم. إلا الحقيقة واحدة ونشئتهم واحدة وعيشتهم ياها. من نطفة ثم علقة ثم مضغة لإتحول عظام وأتشكل الجنين ومن ثم إتولد (بَلَغَ الرَّضِيعُ لَنَا فِطاماً) وبقا ياهو الصبي "كيف نكلم من كان في المهد صبيا" ولا شافع واليافع والوليد ولا متل ما بنقول الوليد ولا البنية وبقا طفل وولد ولا بت وشاب ولا شابة ومن ثم بقا زول (أشبه الأنبياء كهلاً وزولاً ) ولا زولة (وهي عجوز حيزبون زولة)، يعني عمرهو فات العشرينات. ونقول الكلام الجاي كلهو لي الإتنين مؤنث ولا مذكر ولكن لسهولة الضرب على مفاتيح اللابتوب، حنذكر المذكوران.. فأها، صاب ما صاب وصار ما صار، عاطل هامل أو طبيب مشهور، مهندس، محامي، راعي ولا عسكري جيش أو شرطة أو سجون ولا جمارك أو عامل مهني ولا ساكت جايط وبرضهو بنقول ليهو يا هندزة، مانا ذاتنا أمورنا كلها جايطة وغير ما ذكر كتير من مهن أمتاهنا الزولة والزول. من ما ذكر نلقا أننا كلنا ولاد تسعة وأبةنا آدم وأمنا حواء، لكن الحظوظ مختلفة. فينا الإتولد في السودان وياهو ربنا سلط عليهو غضب ولا تخفيفا نسميهو إمتحان وهناك الإتولد في أوربا وهاجروا أهلوا لي أمريكا وبقا رئيس، ذي ترامب دآ، بالله ما ظاتها جايطة، ذي ما داك قولنا ليهو هندزة دا يتقال ليهو رئيس. سيبك من دآ الإتحظا ما إتولد في السودان، خلينا في أرض المليون ميل والوجع و(مختالك يحاكي الشولة دمعه الهميل) وحكم ما بين البشير والبرهان ووجع الشيوعي ووهم الكيزان وجابات معاها جنجا ومنياوي وعقار الغير إسمهو حسب المكان.. بالله عليكم؟؟ خلاااااااااص وقفوها الحرابة دي وخلوا الناس ترجع السودان ودور الدايرة والناس تعرس ومن نطفة الي علقة وتمتهن المهن وتشتغل وتبني وتعيش وتعشعش وأخرتها ياها ؟؟ كوم تراب |
بما أني وصلت عمر الناس المفروض كلامهم ينسمع ودا حسب ما تربينا عليه.
أنه الكبير في العمر، أوسع معرفة وأغنى تجارب وأذكى فطرة وهو حليم عطوف ومحب، متزن، متوازن في علاقاته الاجتماعية، واعي بالاحداث من حوله، ما كانت وحاضرها ومتقد العقل في تقييم الامور (طبعا إلا يكون ضرب الزمهرير "الزهايمر").. أها بعد ما قدمت وبما أني من أولائك المفروض كلامهم ينسمع في حاجات وعايز أقوله، رؤية عن ما نمارس نحن على بعضنا وأيضا ما يراه الناس من حولنا عن هذه المماراسات. قال المولى عز وجل "فسوف يأتي الله بقوم يحبهم ويحبونه أذلة على المؤمنين أعزة على الكافرين" تفسير هذه الآية مساقه واحد وقصده بين ومعناه جلي ويفهم القصد بوضوح، إلا أننا ونحن هذه الامة التي والعياذ بالله قد ُأعمى بصرنا عن الرحمة وأغلق قلوبنا من المحبة ومنع عنا البصيرة الواعية، نعمل عكس معناها جملة وتفصيل. تجد إذلآلُّنا موجه للمؤمنيين منا، نسُبهم ونلعنهم وحين أُتيح لنا، قتلناهم وبشعنا بجثامينهم، نأكل إحشائهم وإن لقينا طريق، ظاتهو من جلدهم نعمل مراكيب ونديها إسم ذي مركوب الفاشر والاصلة والنمر. هذا اليوم هو حالنا، لا حرمة لإناثنا، لقواريرنا وأخواتنا وأمهاتنا. في يومنا هذا تطبعنا بأن لا نرحم اليتيم، بل صرنا نستبيح ماله ولا نعين المسكين بل أضحينا نستغل ضعفه ولا نعين عابر السبيل بل ها نحن نمنع عنه المؤن. خلاصة قولي وأنا من أولئك الذين بوسع تجاربهم كثير معاصرتهم لمختلف أحوال عبرت مرورا على السودان بحلوها ومرها، بجميلها وقبيحها، بظلامها وظلم أبنائه بعضهم على بعض وأنه يحق لي كما هو واجب علي أن أكون لشعب السودان من الناصحيين. فيا أهل السودان، نساءكم ورجالكم، شيبكم وشبابكم، إتقوا الله في حق أرض فيها تعيشون وبخيراتها تنعمون ومن أنعامها تأكلون وفي حق الأجيال القادمة التي ستعقبكم ولكم سيتذكرون. وأستحلفكم الله بنبذ الخلاف وتمكين من يريد بكم شرا ويعمل بينكم للفرقة والعداء من شعوب أخرى وأتمنى من الله أن أكون لكم من الناصحين، فخوفي عليكم من المثلات لِّشديد وكبير. ان الله عز وجل علينا رقيب وأفعالنا شهيد ويوم الحساب لا بد آت عن قريب أو بعيد ولكم في (سورة الرعد) خير تبرءة ووعيد |
سؤال ويا ريت، أهل العلم وأصحاب المعرفة يوروني.
بين الأركان الاسلام، لييه بس هناك ركن خص بي سورة والاركان الاخرى بأيات في سور من الذكر الحكيم.. والركن الذي خص بي سورة هو الحج؟؟؟ |
الحبيب بابكير،
ربنا يتقبل منا ومنكم الصيام والقيام وصالح الأعمال. بلغنا الله وإياكم ليلة القدر |
الجفاف مشكلة كبيرة حيث ما كان.
جفاف البشرة، جفاف الحلق، جفاف التربة، جفاف الاحاسيس، جفاف العيون وجفاف الحبر من الورق وياهو دآ الحسي مزعجني من بين كل الجفافات "اذا صح ان تكتب".. يعني أخر مشارك كانت قبال شهر وكمين يوم. حسي قلتا مع جفاف الحلق العامي للناس مع الصيام وأنه بعد بكرا عيد الفطر. نبل جفاف الحبر دآ بي سطرين تلاتة وأهم ما فيها. معايدة بحلول العيد وإن شاء الله ربنا يتقبل صيامكم ويحقق أمنياتكم ويدينا فيها مهلة، يجمعنا،، العيد الجاي ونعايدكم فيهو.. عيدكم مبارك :biggrin::biggrin:looool:D |
| الساعة الآن 02:55 PM. |
Powered by vBulletin® Version 3.8.8 Beta 2
Copyright ©2000 - 2026, vBulletin Solutions, Inc.