متلازمات الكِبر كتااااااااار ومن الصعب ترتيبن ولا وصف ياتها الأكبر والأسوء لأنهن كلهن سواسية "الغريبة يقولوا ليك متساوية كأسنان المشط وهن أبدن ما تساويات وتلاحظ إختلافهن في مشط الحلاق"
إتكلمنا عن الخرف، التحشري، الثقالة و و و .. لكن في دي كمان؟؟ شقاوة الكُبر.. فعلن الثقيل دآ بيخلي حياتك كرضمة من الشقاوة.. تقول تعمل بي قولة جدي بابكرفي أنك تشوف ليك شغلة خوفن من أكبر شغلة الي هي قلة الشغلة.. تلقى الشغلة بقت ليك شقاوة ومشاكل ومساخة وإزعاج... شقاوة الكُبر تتجلى في أنك تكون أسير لهذا الثقيل يتحكم فيك كما شاء. إن قلت تشغل نفسك يغير ويعترس ليك أيتها شغلة وتبقى إتا شغلك الشغال هو.. إن قلت تعيش ذي الناس. بسطوته يفرض عليك قانونه ويمنعك من كل مما يعيشه البشر العاديين "يعني ما الذي كدآ".. الأنا بستغرب ليهو حقيقة للناس القدري والأكبر مني ممن تملكهم الثقيل وملاهم شقاوة وأكلهم من مآسيه وشربهم حنضل أمراضهو.... منهم كتيرين كان في الحياة العامة من كتاب وساسة وعسكر ;) |
الدموع أنواع
دمعة تنزل من الفرح ودمعة تنزل سببها الحزن دموع دون سبب عاطفي لكن ممكن يكون سببها طبيعي "عوامل الطبيعة" وممكن غير طبيعي براها تذرف.. دمعة الفرح اليوم شفتها متتلئة في عيون المندوب الأثيوبي أثناء خطابهو وثناهو علي الشعب السودان، شفتها تلمع تراري وغطت علي النجوم المرصوصة في أكتاف العسكر. لمن شفتها كانت أحاسيسي لساتهو بيتجمع وبعدهو ما تلقت إشارة من الدماغ أنها تنشحن وترسل راجعة أيجابا عشان يقوم الدماغ يرسلها للعيون وتفتح مواسيرها.. عاينتا في عيون الكانوا هناك كلهم لقيتهم ناشفاااااااات وبحسن نية قلتا يكونن جفن لأنهو النوم جافاهن والجماعة مساهرين من مغرب أمس.. شكرا ليهم تحمل المسئولية وربنا يوفقهم كمان وكمان.. ما بنسى برضك ممثل الوحدة الأفريقية وكيف كانت كلمتهو تهز المشاعر لمن شعرت جلد الواحد كلبت والغريبة أنها تمت بصورة أسرع بي ذي أربعين رمشة عين من الدموع تزرف.. الدموع ذي ما قلنا منهن الإتغنوا بيهين وشبهوهن بسائل الشمعة لمن تنزل وحتى اللؤلؤ برضك بيشبه الدمعة.. بس في دمعة وأجاركم الله جريانها من العيون وهي الدمعة الأخيرة .. حكمة عجيبة أنه لحظات الفراق لمسافر أو حبيب مهاجر تنزل دمعة وهي لا حزن ولا فرح ولكنها كبطاقة دعوة للقاء.. فهل تلك الدمعة الأخيرة تذرف مع التمني بلقاء.... |
إنها دموع مفرحة ياصديقي ،فقد بسم أخيراً
[rams]https://www.youtube.com/watch?v=oIC_CzNOzI0[/rams] |
لن تغادر يا دكتور .....
|
[rams]https://www.youtube.com/watch?v=6ZrfyxWTbCM[/rams]
بيني ما بينك |
اقتباس:
مع الثقيل دآ.. (الكُبر) إتقفلت في وشينا وياهو ما فيها إلا الباب دآ.. باب التواصل والمحبة "سودانيات" ونمشي وين ولا وين :rolleyes: |
اقتباس:
ما قال ليك: محل رهيفة بتنقد ويبقنك ملطشة.. حسي دحن أنا الحردان والهو أقوى من الحنة البتغير ليك لون الشعر والحردان أكثر منها فعالية في التغيير كتير مرات يغير أخلاق الزول والحكمة أنهو بتشكل ولا صبغة Clairol ذاتها، مرة بلوند ومرة أحمر ومرة مهوقني.. الحردآن... هو حالة نفسية بتغلب علي الزول في حالة العجز عن المصادمة فيقوم ينسحب من المعركة ويتحجج بي الحردة... ... تعرف يا بيكاسو.. مشكلتي في الدنيا دي "الإدمان" السجاير، الشيشة والغالبهن الإتنين ؟؟؟ سودانيات |
يقولوا ليك؛
شعرة جلدي لمن كلبت... دي طبعن بتتقال في حالات هي أقرب للخدة "الخلعة" ومن الخلعة أنواع منها الخفيف ومنها ذي جنس دآ.. إندهاشة؛ ودي تخليك منطط عيونك وفاتح خشمك دون قول ولا حديث :eek: صدمة؛ دي بتخليك عيونك قربن يطلعن من حجرن وتتبعها تمتمات :لا حول الله ولا قوة إلا بالله" يعني وكتها الما مسلم ينده باريهو أووووو GOD.. الخفيف دآ هو أصلن ما مفروض حتى يدعي للخلعة لأنهو شئ طبيعي وبديهي.. يعني ذي حسي وفي العمر دآ.. يقول يقوم يجري يحصل الباص، تقوم رجلك تتشمط.. البيخلعك شنهو.. ما هو سكر ينحرق عشان يديك طاقة ما في.. دي هينة؟؟ قدر السبيبتين الفي رأس تلزقهن بي موية والحكمة ينطن "كوكي الحق" وليهن حق ما بس ياهن الحاجة الوحيدة البتنط... وتلبس وتتقيف وتقول تمشي تشرب ليك قهوة ورأس شيشة وتبصبص يمكن شعرة جلدك تكلب وتجدد شبابك.. آهاااااااااااااااا الثقيل "ما الكُبر" يقهمك ويخلي شعرة جلدك تتأكسد (من كديسة) وتصدي "وياها دي الحالة" وتتجمد وبي ندم ترجع مكسور الخاطر... حزين ومدبرس ومحبط ولا خلعة ولا خدآ بس بإندهاشة علي الزمن، زمن كان للزول شنة ورنة وحسي بقت صنة وفنة ذي الريال البرآني :) |
يا أخي الواحد حقهو يحترم نفسهو ويبعد عن الحيطان الميلة في الفيسبوك..
شئ ذي ذو النون يجيك ناطي دون دعوة ولا إتفضل، يغمك ويزهجك ويرفع ضغطك (هو أصلن عالي وعلي الهبشة يطرشق شراينك وأوردتك ويفجر قلبك) وبي دآ كله أخير من المصيبة ديك الإسمها تراجي لأنهو في أم روحهو دي ما بيسيء للناس بس لي روحهو بي هبلهو دآ... سيبك من الإتنين ديلا لأنهم برضك ما هابشنك مباشرة ولا بعيروك بالحاصل عليك.. يعني شوف ليك زول/ة تعترض علي حكمته.. الكِبر وكما ذكرنا مرارا وتكرارا أنه بقلل أشياء ويعظم أمراض ويوسع مخارج ويصغر مسامع ويضعف روىء ويصعب نطق ويفقد منطق.. مع دآ كلهو وتجيك مصيبة كدآ تشغل الخلق في الفيس والواتس وشويييييييية كدآ تصل قنوات التلفزيون.. قال إسمها داليا الياس.. إسم علي مسمى لأنها بتجيب اليأس :mad::mad::mad: |
كبرتا وعجزتا وقول خرفتا..
ودآ بيدني الحق الكامل أن أقو رأيي عدييييل.. والعندهو الهوآ اليمسكهو... خلاصة الأمر أنه إحباط وقرف نتج عنه ما سيلي لاحقا... كنت في حيطتي في الفيس مرة من المرآت ذكرت قولة: زرزور في يد جهال "جهال بمعنى صغار العمر ويمكن برضك التجربة والدراية) وقصدي كان قادة الحرآك من شباب غالبا علي روحهم الثورة والثورات إن لم تدار صاح بتنقلب علي الثورا والشباب الدلقت ممشينها "الثورة" متحمسين وهذا جميل وغيورين ودي محمدة ونيتهم حسنة ودي خصلة متميزة لكن والله فاقدين التجارب وهم مسجلين نجاح باهر في العمل المعارض... بتذكر مرة قلتها لي المرحوم دكتور عمر نور الدايم في أنه علي حزب الأمة أن يغير قياداتهو التي مرست العمل المعارض المصادم وأجادت فيهو بي ناس من الصفوف الأخرى في الحزب كانت تعارض بالفكر والرأي وقلت حينها لتوضيح رؤيتي "ما ممكن معول هدم يكون هو أداة بناء وللتفسير الطورية ما بتبقى مسطرين".. الموضوع الخلاني أكتب دآ؟؟ ظنيتهو لقاء مع الإبن الأصم والذي أعتبر نفسي من المعجبين به لحد ما ولكني هنا إندهشت فقوله فيهو نبرة إنهزامية لمن تحدث عن مستقبل الحكم المدني وكان إقصائي برضك في مضمون قولهو وختمها بتحريض شديد.. ودي مشكلة الطورية الما ممكن تبقى مسطرين... https://www.alrakoba.net/news-action-show-id-323892.htm |
في نظريات متباينة في موضوع الزول لمن يجلكن "يكبر في العمر ويعجز" ببقى مرتب يعني حاجاته لو شال منها حاجة وعايز يرجعها. برجعها في مكانها نفسه ويكاد أقول في نفس السنمترات أو المليمترات الكانت فيها (هنا بستحضرني الوليد نسبة لصغر سنه "نادل" لاعب التنس الإسباني لمن يشيل قزازة الموية يشرب منها تأخده حكاية دقيقة أو إتنين لمن يرجعها في نفس المكان بالميتر).
واحدة من النظريات بتوري أنه العجوز بينضرب بآفة النسيان وعليه تفادين للجهجة أخير يرجع الحاجة في نفس حتتها وبعد دآك بيبقى الموضوع بالنسبة ليهو ما موضوع تذكر وين ووين قدر ما هو أمر عوامل خارج مخيخهو الخلاص مسح وهي الأوتماتيكية (العنصر العفوي أو التلقائي). منها برضك عامل الرتابة وهو صفة ملصوقة بالكُبر.. ونقول شوية عن الرتابة... مصدرها رتب... يعني نظَم،، درجة "رتبة عسكرية وكدآ"،، تقول رتب الزول بالبلد يعني أقام فيها،،، راتِب بمعنى ساكن.... ودي بعض منها لكن القصد شوفها كيف تتوافق مع "الجلآكين" موضوع أنه بنظم وهي ظاهرين دي ذكرناها فوق وأنه القصة كلها بيبقى غالب عليه أمر الأوتوماتيكية. بعدها الرتبة العسكرية يعني بيكون وصل أعلى ما يمكن حتى الفكر فيها صدام العجوز بيكون فاتها "ما هو صدام كان أعلى رتبة وما مات عجوزن مخضرم". أها حكاية الرتبان بالبلد برضك العجوز بقى إهرامات البجراوية في البلد وموضوع "السكون" دآ حدث فيهو ولا حرج... سكون في كله علي كله إلا لسانهو المتبري عنه... الرتابة حسب ما أنا شايفها؛ مرض نفسي يصاب به الإنسان قسرا نسبة لرِتابته في هذه الدنيا وقعادهو فيها مدة طويلة ورتابة الحياة الروتينية المملة مما يؤدي للدبرسة والزهج... وسؤالِ هذا الناسِ كيفَ لبيدُ:(:( .............. |
النووووووووووووووووووووم
لي يوم الليلة مستني النظرية بتاعت لمن تكبر ذي البترجع متل الطفل الصغير.. أكتر من تلتين يومك تنوم.. يا أخي بالله عليك في اليوم ياهن خمسة لي سبع ساعات متقسمات بين الفجر والصباح والنهار والضهر والعصر والمغرب والعشآ والليل... كانن ترجع بليل قول أيتها وقت تنووووووووووووووووم وتقول لمن المنبه يضرب بس تضربه ضريب يضرب شوكاتهو وهن يأشرن لوقت النهوض من حضن البطانية الدافء (:o) وتجرجر الكرعين لي الحمام وتسب وتلعن وتسخط علي فكرة الدوام ولزمتهو شنهو وليييييييييه ما يخلوهو حسب الإختيار الشخصي وتحديد ساعات العمل الثمانية حسب راحتهو.. بس برضك نمتهن حتى ولو خمسة ساعات دون الزيارات المتواصلة غير المنقطعة للحمام. يا زول يمكن تمانية مرات بين تلحق تخلص صلاة العشاء بالليل المتأخر قبل ما اليوم ينتهي وإن كان هو إنتهى من إتناشر بس برضك عض بالنواجز على قولة إقامة الليل وغير محددة بساعة بس المهم قبل ما يدخل الوقت التاني في اليوم دآ وصلاة الفجر (ما هي جابت ليها صلاة في وقتهاlooool) بالله عليك بس حجوة أم ضبيبينة.. يعني حسي إقامة الليل وهي ممكن ممتدة من إتناشر لي ما بعدها وتبقى عملين دخلت في اليوم التاني من نص الليل يعني بعد إتناشر.. المهم النرجع لي النوم الجافاني من بعد صلاة الفجر ياهو البي بي سي والحكمة إسكاي نيوز العربية الكنت مكجنها فاجاتني بتجاوبها المقدر تجاه الثورة في السودان لكن برضك مكجنها لأنها ما بتخليني أنوم.. يا أخوانا لو زول عندهو وصفة يكون كتر خيرهو والله كايس النوم الفي الدنيا دآ. النومة ديك بس متين تجي وتبقى بلاااااااااااا هم ولا هموم ولا بي بي سي ولا اسكاينيوز. موضوع الصلة دآك بيبقى جرد حساب ويا اليأكا الماشفتا النوم من منكر ونكير يا نمت هااااااااااادي لين يوم دآك. يوم يكرم من يكرم ويهان من يهان... يلا نقوم نشوف لينا ساعة كدآ ونتوكل علي الصلاة :cool::cool::cool: |
الحركة تقلت
والزيارات إنعدمت بس الحمد لله لساتهو النظر فيهو طشاش قدر البيكفي شوفت الحبايب هنا وهناك.. شكرن قوقل بقيت لينا دابة نترحل بيها نتواصل مع الحبان اليوم في الفيس لماني في فيسات جميلة وطولت منها كانت لامانا مواقع جغرافية.. في لندن مع ولدي الجميل أباذر صديق ومواقع إسفرية ذي سودانيات مع طيب القوم الطيب البشير ومواقع هي جوآ في القلب محشورة ومليانة بدم دم القربى ذي كم هائل من أخوتي وأخواتي وبناتي وأبنائي وحفيداتي وأحفادي من آل مخير وبدري. من زيادية ورباطاب وتُرك (يا بدور التركي ما أنا برضي فيني العرق) وتعايشة حلويين وأصدقاء مقربين وناس الحسب والنسب الطيبين.. وأهلي الغالين في سودانا الحبيب وكمان جيرانهو المحبيب... ملعون أبو الكُبر الصعب التواصل المباشر والشوفة التفرح.. لكم المحبة والمودة حتى تكتفو أجمعين |
ذي ما هي عادتهو "الثقيل" دآ كل ما يوم بي جديدهو
كل يوم أكتشف أنهو فجعني بمصيبة ما تكون منتبه ليها وتكون أيام عزك تعفيصها ذي الضريسة وإتا لابس ليك بوت حقات الجيش والمتارث لاباسه من زمن الإنجليز... الكيزان زمنهم أول حاجة عملوها أفقدو الأجهزة النظامية المُتدرسة (يعني لابسة دريس أو نقول ذي موحد) كتير من قيامها الإنضباتية وبرضك الموروثة وحافظ عليها عظام رجالات تلك الأنظمة ويا ريت قائد عام القوات المسلحة والمنضمين ليهو أولن تبادي يصدر أمر بأن تلتزم تلك القوات بأمر الحلاااااااااااااااااااااااااقة (اشعث، أغبر). الغريبة التقول ليا حقين الدعم السريع حالقيين ما مربيين دقون ذي كيزان الدبش ولا حتى ناس المجلس الإنتقالي فيهم دقون ولا أهآآآآآآآآآآآآ عشان كدآ تأمروا علي البشير... يا زول ما علينا!!! الفجعني عدم الصبر وكره الإنتظار الثانية تتوارى ليك أكتر من دقيقة والساعة من دون إنقضاء الأمر يبقى إسبوع ومُر ما بنقدر نطييقة... تبقى تتململ وتتزحزح وما بيحلك الإنتظار دآ خلهو بس للملكة المتحدة منفردة.. قال ليك إتنين سايقيين عرباتهم موتواجيهين في كبري خط سيرهو واحد يعني نوع دآك البيكون مرسوم فيهو سهم بي جآآآي كبييير أحمر وتحته سهم صغير أخضر... المن الجنبة بتاعت الأسهم الأحمر ما إنتبه في عربية من الناحية التانية وخل نص الكبري لقآ العربية التانية ودآك سيد حق وحقاني فحرن في القيد ورفض يتحرك قيد أنملة المن الجهة التانية ظنيتهو كان حكمدار في المستعمرات وشايف روحه ما إشتغل بي صاحبنا وفتح ليهو كتابن كبييير وبدآ يقا.. التاني ولا هماهو بيربرود مشى عليهو وطقطق في شباك العربية وقال ليهو: لمن تخلص القراية أديني ليهو عشان أقراهو... الإنتظار يا عالم أنواع.. المفروض ودآ مستني الزوجة تلدي بتنتظر بي شغف الإنتظار لنتائج الإمتحان دي حرق دم وجرسة إنتظار الكُبر طبعن مفروض يكون ملياااااااااااان.... تبروكة وسبحة وجوآك؟؟ تعد كم من الأيام تخفي يا قدر وكيف يكون ختام الأمر |
[rams]https://www.youtube.com/watch?v=QwCCln3AN4c[/rams]
عزيزنا دكتور بابكر سمعت هذه الأغنية من راديو ترانستر ، كنا نحمله معنا ونحن ننتظر الناقلة التي تحملنا من الضفة الأخرى لجوبا تحملنا لتوريت في ديسمبر 1972 . |
| الساعة الآن 09:06 PM. |
Powered by vBulletin® Version 3.8.8 Beta 2
Copyright ©2000 - 2026, vBulletin Solutions, Inc.