كل يوم جديد فيهو أسئلة تتمنى تلقى ليها جواب..
مرة قريت قالوا أنهو الزول لمن يموت ما طوالي بيدخل في الغيبة الأزلية. لا لساتهو بيحس بي الحوالينهو وممكن يسمع لكنهو أكيد ما بتكلم ولو "كتلوو ليه عينهو" بديهي ما بيشوف.. السؤال دآ إتبادر لي ذهني في الغيبة بتاعتي دي.. إتا حي وسط الناس وليك مشاهدين لي هضربتك ومتابعين لي كتاباتك وبس يومين توقف وإتا يا الظريف تتنسي.. لمن تكبر في العمر مواعينك بتفضى وتركيزك بيتجهجه وتفكيرك بتشتت وتبقى بتدور في حلقة صغيرة ومحدودة وعليهو الإهتمام بيك بيضعف والسامر حواليك ينفض والكانوا جمبك يفزوا. ما هو! كل يوم يمر لو ما فيهو تجديد بيصدى ويعتق ويبقى ممل... والسؤال؟؟ هل نَضَبَ شخصي حين جفا مداد قلمي وهل أنه البربط الناس ديمة العطاء مهما قل حتى ولو سطور ضعيفات ولا هناك؟ صداقة ومودة ومحبة حبالها دون سبب تنقطع؟؟ |
في لحظة التجلى والخلو بالنفس حيث ديمة بتجيني أفكآر في أغلب الأحيان بشاركم فيها.. فكرت ليييييييييييه؟؟؟
لييييييييه؟؟؟ الناس ما بتحب زولن يأكل بيدهو الشمال؟؟ وفي أغلب الأحيان تكون الإجابة في منتهى الغرابة أنه اليد الشمال غير محببه.. طيب! المولى عزر وجل ربنا سبحانه وتعالى قال: "لَقَدْ خَلَقْنَا الْإِنسَانَ فِي أَحْسَنِ تَقْوِيمٍ". يعني لو كان أصلهو اليد دي ما محببة كان وهو القادر وإن أراد شئ أن يكون قال له كن فيكون. كان خلقنا بالصورة التي تتجنب الغير محببات. لا ويقول ليك لو ضبانة وقعت ليك في كباية الشاي المقنن الكآآآرب دآك، إتاكد أنك تغطسها كلها عشان تضمن أنهو شقها اليمين إتغطس ويقوم يبقى "بفر" لي الشمال..... أمسك عندك.. لييييييييه؟؟؟ العطسة بتذهب بكم من الجراثيم وإن حمدتا بشموتوك طيب إن طلق زول ريح البتخفف نفاخ البطن وتشفيهو ولا إترع عشان يطلع الهوآ عشان يخفف علي بطنهو بشتموك... لييييييييه؟؟؟ الأرملة فرصها في الزواج أعلى من فرص المطلقة وفرص الراجل كان مطلق ولا أرمل في أنهو يتزوج تاني أكبر من فرص النساء لييييييييه؟؟؟ والناس كلها (يعني إلا البعض القليل) أولاد تسعة شهور وحيموتوا وحيقوموا يوم الحساب العظيم عشان يقيفوا كما ولدتهم أمهاتهم لا بدلة موهير ولا ساعة رولكس ولا جزمة بالي ولا ريحة أرمادي. ملط جمبهو وجمب دآ الكان شحات في الحلة حايم وفقير ما عندهو حق قوت اليوم.. تلقى الغني والمتعلم والجميل ليهو مكانة أعلى من الفقير والأمي والشكله ما جميل في وسط المجتمع لييييييييه؟؟؟ ولييييييييه كبييييييييييييييرة؟؟؟؟ الثقيل دآ "الكُبر" بيعمل في الزول كدآ |
زايد بي جآي وناقص في نفس الوكت...
مع العُمر الذكريات بتكتر لانهو كل يوم فيهو شيتن بينحفظ . أها والدماغ غير أنهو حجمهو ما بزيد عشان يحفظ كلهو دآ بالعكس فيهو أجزاء بتتلف وبتروح معاها أمور كتيرة.. في فصيلة من الحبوب العلاجية قالوا: بتشطب الأحداث الحدثت قريب وما بتأثر علي القديم ولمن الجديد يقدم بيبقى محفوظ وممكن تتذكرهو.. يومتها بشة من نوادرهو، حكاية أنهو عندهو صاحبهو حكى ليهو حاجة عنهو.. كتيريين تناولوها بسخرية وأعتبرت من (طبزات) الإنقاذ ذي هبل اللمبي. لكن حسي مع الذاكرة الخربت دي بفعل الفاعل (العُمر) لقيت أنهو حاجة في حياتهو الفاتت 75 عمر البشير قال حاجة واااااااااحدة حقيقة.. يعني يومتها شقيقتي رجوئات حكت ليا حكاية ووالله لو شنهو دآك! أنا ما متذكرها وقبلها أخي الحبيب حسن "دوشة" برضك وحتى قبل يدخل الما بتداوآ دآ "الكُبر" أخي الصديق صلاح الأمين حكى ليا عن زيارتهو لينا وأنهو أعجب "طبعن دي أنا عجبتني تب" بي حاجة كنت لابسها في براتسلافا وهو متذكرها وأصر من دآك اليوم أن يقتني مثلها وحتى أنهو وراني الشئ المقصود الكان لابسهو ساعتها لكن هيهات (تصيح الميتة).. دحن نظرية البِكتر، يقِل تتفسر كيف وإن كان فيها تشابه من نظرية أرخمديس.. كمية الموية لمن يترمي في جسم بتقل من الحجم الأولي... وليكم محبة |
يا بابكير ،، كيف حالك و إزيك..
صحي الموت سلام ما يغشاك شر... |
اقتباس:
ويا حليلك تعرف يابا غيبتك دي الطويلة ما زادتنا شوق لأنهو ديمة إتا في دواخلنا ومعانا بس أنها حقيقة حرمتنا شوفتك المفرحة الجميلة |
مع الكُبر
الجفاف قلنا بيبقى متسيدك العيون جلد الركب من برآ جفاف ومن وجووووا المفاصل ضاربها نشاف الكوعيين من شدة نشافهن، إتجرحن وشوقك للوضوء الإنقال للمرفقين والخدود الكانن ملمسهن عادي بقن ذي ورق الصنفرة الحكمة حتى اللسان المفروض يكون اللعاب بطريهو وشوية رطوبة يزقيهو بقى قالب طوب نشفان وللموية ديمة عطشان الجفاف فاض وملئ الجسم من قشرة الرأس لييييين وطاية الكُرعين.. وما إكتفى.. إتوسع وإتعمق ونخر جوووووآ في المشاعر والأحاسيس البعد كانت مرهفة ذي طين الجروف لو زرعتا فيها حصاية تنبت بآكر وكانت ذي السفنجة قدر ما تذقيها من فرجة وشوف ولطافة وحلاوة وجمال تشيل، ما بتروى وتقول هل من مزيد... حسي؟؟ آآآآآآآآآآآآخ!! بقينا لا حس ولا إحساس :(:(:( |
[rams]https://www.youtube.com/watch?v=tQG7FtXag8w[/rams]
حن يا دكتور |
|
شكرا لك عزيزي دكتور بابكر .. لمحتك في تكريم د. حيدر ، والله انت صغير
[rams]https://www.youtube.com/watch?v=KaDM8CqobIs[/rams] |
http://www.sudanyat.org/vb/uploaded/851_1577109476.jpeg
أول مرة في حياتي أجرى عشان أتحظ بالتصوير مع شخص. لكن هو ما الشخص البستاهل تجري وتفوت رابحة الكنانية في مرثونها... يوم الأحد في المندولا لندن كان اليوم البكون فيهو "الشف" وصدف أنهو في دآك اليوم جأت مجموعة إنجليز كان بيناتهم آلن هيكمان. وبعد ما عضوا من أكلنا السوداني الشهي.. طلبوا يلتقوا "الشف" نظام الخواجات يعني إعتراف بي حسن الصنع وقام هو قال ليا: ممكن نتصور معاك.. شوف بالله طلاشت (الغرابة) إعتذرت.. المرة التانية كان جانا برضك يوم أحد السير بول مكارتني في الحقيقة جابتهو بتهو ظنيت إسمها تشيلسي اللهي كانت زبونة مستديمة. أها برضك عنظتزت الرباطاب فوتت عليا أتصور معاهو.. لكن الحمد لله ربنا خظاني بي صورة مع من هو أقيم وأرفع مكان..... |
|
لمن الواحد يصيب من الكُبر نصيبهو فمن حقهو بيهو يزهو. لأنه بيكون أكيد ومن دون شك جمع خبرات ووسع مداركهو وتعلم أمور متنوعة منها القيم ومنها"الكشآ مشآ".
أمسك من الكِبرو سيدات أو رجال ونقول أرفعهم قيمة في الحياة العامة كان في الحلال ولا المدينة أو حتى قول عموم البلد كم أقصاها لي أدناها، من بورتسودان ليين الجنينة ومن حلفا "الغرقانة" ليين الحدود الحزينة ومحزنة بين شقين السودان وجنوب السودان والمقصود المشايخ والعمد وكل المسميات حسب مناطق السودان المتنوعة وهم ناس الحل والربط والرأي والمشورة ودآ ما كان بيكون ليهم لو لا أنهم عاشوا سنيين عديدة وهو ما يسمى بالكُبر. أمسك الحياة العملية تلقى البروف شعرهو شايب كان من السيدات أو الإناث ولا الرجال، القيادات كان مدنية ولا نظامية، العمال كان مهرة ولا جربندية.. مع الكُبر وقدر ثقالتهو لكنهو عماد تجويد الأمور. ميزة الكُبر أنهو بيضعف البغضاء ويوسع ماعون المحبة أنهو بيوازن الأمور بعين المجرب وما بندفاع المغامر وفي نظرهو قليل الأشياء جديدة لأنه بيكون مرآ بيها أو شبايها من قبل خلال رحلتهو المسافتها سنين مع الكُبر في حاجات بنترفع عنها وفي حاجات تعجبنا عند الغير لأننا خلاص فات وكتها بالنسبة لينا وفي حاجات ما بتعجبنا من تصرفات لكن برضك نقول؛ ما زمان كان ممكن نكون. بتذكر الوالدة كان عندها قولة بترددها: من الرفوف ينزل في الكتوف.. يعني كل شئ ختيتهو في الرف لابدن يوم ينزل عليك... |
والله صورتك يا دكتور صغييير
يا محيرني ومتحيير |
اقتباس:
وحكاية التوثيق دي تسوق الواحد لي حقيقة أنهو الكتير من الناس تحب توثق للمشاهير. طيب المشاهير ديل منهو؟؟؟ في كل ضروب الحياة تلقى مشاهير يعني في الكورة، السياسة، الفن وغيرهم وغيرهم وديل شهرتهم ممكن تكون قصيرة المدى أو طويلة المدى وغير كدآ ممكن تكون نتاج مقدرات مهارية أو إنجازات مهنية أو أعمال إبداعية وكمان في شهرة دائمة ودي مثلن في حالات خاصة وهي ممكن تكون مربوطة ببشر خاصيين أو معالم جغرافية وفي نظري ما هم إلا الكون والسماء لأنهو كل شئ بتغير ويبقى كان الأرض تغمرها مياه والأنهر يتبخر ماءها والجبال تنمحي ويبقى وجه ربك ذو الجلال والإكرام.. المهم أنك تشوف في الدنيا دي ناس قمم شامخة وقامات تفيض قيماً ملوا الدنيا بفضائلهم وخيرهم وعملوا ليبدعوا وأنجزوا وتقيف أعمالهم منارات وضاءة ولكنهم ما مشاهير وناس نكرات وتكون إتعرفت بمناسبة في لحظات محدودة ولا بالصدفة ولا أهو كدآ نبت شيطاني يعني مثلن ذي كم هائل ممن عرفت أساميهم في فترة التلاتين سنة ديل واحدين يكاد يكون بس أهل بيتهو بيعرفوهوا وفي فترة الإنقاذ لمع إسمه وصار من المشاهير وديل منهم من خلاص خبآ ضوهو ومنهم الفي النزع الأخير. كمان موضع الشهرة دآ مقايسهو شنهو؟؟ هل بعدد البشر البيعرفوك ولا لي الأعمال البتربط مباشرة مع الإنت مشهور بيناتهم ولا في عناصر خارجية؛ الغنى، الإعلام والتلميع، شغل سياسة ولا الجهل والسذاجة.. بيستحضرني حسي من بين مجلس الوزراء لو قلنا نصفهم... حمدوك ممكن يكون معروف للخاصة والبعض ولكنه بدآ نجمه يلمع لمن طلبه البشير ليكون وزير مالية وإعتذر، فيصل وزير الإعلام ليهو تأريخ في مناهضة الإنقاذ وهو إعلامي وكان في متناول يدهو أنه يكون أكثر شهرة ولكن يبدو أنه زول متواضع ما بيحب شهرة الزيف وليدي وزير الشئون الدينية والأوقاف وهو مشهور في وسط أهل الجزيرة أبى وبين الأنصار ودي شهرة سبقتهو وغيرهم ممن إشتهر أكثر ومنهم من كان/ت أصلن مشهورة. :rolleyes: بتذكر أيام عملي الفترة الأولى في أبوظبي كان مديري السيد المحترم العظيم عماد الدين المرشدي وجوا ناس تلفزيون أبوظبي طلبوا يعملوا معاي لقاء وطبعن لأزم موافقة المدير وبتذكر أنهو قال ليا: تعرف يا بابكر في استديو التلفزيون في كشافات قوية هي بتوضحك وتعرف الناس بيك "أي تشهِركَ" بس سخونتها ممكن تحرق... وهذه هي حقيقة الشهرة يعني حلوة ومورة....... |
كل عام ميلادي يبدا في شهر يناير وأول يوم فيهو الناس تحتفل. ما يهم دينك شنهو ولا جنسك الجسدي ولا الجغرافي، ياتهو ولا حتى العمر ما بيدخل كعنصر يمنع الإحتفال بمقدم عام جديد والكل والجميع (ما توفر) يستمتع بالألوان الزاهية التي تضئ السماء من وهج الألعاب النارية والتي تطلق مع أول لحظة في العام الجديد بمعنى تحمل التفاؤل بأنهو حيكون عام مضئ ومشرق على غير قرارة سابقه ولكن والمصيبة أغلب الجموع تردد نشيد الوداع "Auld lang syne (أولد لنق سين) بالسكوتلندية وتعني ما تَرَاءَا قديما" الذي في كلماته يتحسر على الذي مضئ، يعني عديييييل كدآ ما مستبشر بما هو قادم...
هل ننسى أياماً مضت هل ننسى ذكراها هل ننسى أياما مضت مرحاً قضيناها. من أجل أيام مضت من أجل ذكراها فلنرفعن علم الوفا من أجل ذكراها كم قد رتعنا في الربى فرحاً بمثواها كم قد قطفنا من زهور من ثناياها كم قد مشيناها خطى كم قد مشيناها فلنرفعن علم الوفا من أجل ذكراها كم قد سبحنا في الغدير معا صباح مساء واليوم يفصل بيننا بحر به هوجاء من أجل أيام مضت من أجل ذكراها فلنرفعن علم الوفا من أجل ذكراها هذي يدي يا صاحبي قدم إلي يدا ولنخلصن نياتنا ولنصدق الوعدا من أجل أيام مضت من أجل ذكراها فلنرفعن علم الوفا من أجل ذكراها كم قد مرحنا كم طربنا إذ طويناها أيام أنس زاهيات كيف ننساها من أجل أيام مضت من أجل ذكراها فلنرفعن علم الوفا من أجل ذكراها [youtube]https://www.youtube.com/watch?v=-oaeNVbP1RE[/youtube] [youtube]https://www.youtube.com/watch?v=acxnmaVTlZA[/youtube] |
| الساعة الآن 10:29 PM. |
Powered by vBulletin® Version 3.8.8 Beta 2
Copyright ©2000 - 2026, vBulletin Solutions, Inc.