بالرغم من حركاتك "الأرعة" لكن شكرا ليك يا القيسبوك..
قنوات التواصل دي باقية عليها قصة اللابريدك ولا بحمل بلاك... إتا عارف أنه بتجيب ليك مصايب تنرفزك، تزعلك، تحزنك وحتى ممكن تمرضك. لكنها كمان بعض مرات توفر ليك معلومات تساعدك في حياتك، تفرحك، تسرك، تبهجك وتلاقيك بناس هم في وقت من الأوقات كانوا بيشكلوا جزء من حياتك، أساسي أو جانبي أو مكمل وإفترقت بيكم السبل.... مثلن يعني... أسرتي الكبيرة وأهلي، أصدقاء من أيام الصبا "ناس الصغر ديك بيكونوا ياهو ذي حلاتي كدي وصعبة عليهم يتذكروك حتى لو إلتقيتهم" زملاء الدراسة ورفقاء العمل وناس لندن، جماعة سودانيات، جماعة الحزب وناسن تعرف عنهم ولكن ما إلتقيتهم.. تبتهج لمن تلاقيهم وتتواصل معاهم وحتى تشكر الأسافير الجمعتكم وإنتم في وش العريضة قبل ما تجتمعوا في سابع الأسافير. مع الفرحة دي تنشغل عن حاجة مهمة خلاص. قول مثلن أنا لقيت فلان وطوالي رسلت ليهو طلب صداقة. بعد يوم يوميين تجيك لستة بتاعت ناس ومستر فيسبوك يقول ليك (ناسن ممكن تعرفهم) وبي سخاء يحفزك أنهو هموا أصدقاء لي فلان زولي الكنت رسلت ليهو إضافة صديق ووتوسع الحلقة وتكبر وفلان يجيك ناطي وأنهو صديق فلان، الهو صديق فلان الهموا أصدقاء فلان دآآآآآك.. وهنا بقآ حركات عم قوقل "الأرعآ" البتكشف كيف أنهو عارف كيف يلمنا كلنا في بيت عنكبوتهو وما فينا زولن بيقدر يدس روحهم ما برضك عندهو قوقل ماب وغيرهم كتير.. |
تشبدي منبطة
كبدي مهريهة كبدي إنشقت وقولوا ليك.. حالات يمر بيها الإنسان في هذا الزمن الغابر. يا زلمي، يا زول، يا ريال.. يا أخ، يا زميل، يا صحبي... مناداة لمن تعرف. حبيبتي، ستي، روحي. قولن عدي من وشك... يما، ياختي دي تنقال لزولن فعلن ليهو خاصية وبين ديلا وديك تقيف كلمة حبوبة حائرة بين الخاصية والعدي ن وشك.. الحبوبة الجدة والحبوبة من حبيبة... القول الفي الأول هو وصف الحال من المحال والجزء التاني هو الحيرة في تنوع الأقوال وبرضك كلهو عربي.. خليجي، شامي وسوداني :rolleyes: |
العُرف
العرفة المعرفة التعريفة.. ديل؟ الأول؛ تبدل وبقى بعبع يصد كل تطور وفكر مستنير "الفرعوني، الأخلاق العربية و..." الثانية؛ كانت نابعة عن صدق وما موضوع تفاخر ومكاسب "كل زولن بي معارفة وكلهو بقصد التمكين ذي الحكومة الفاتت والحسي" التالتة؛ إنحسرت وضعف شأنها بقت الحكاية واتساب وفيسبوك.. أما الرابعة؛ فدي عليها الرحمة وبقت نسيا منسيا.... الأربعة ديل... زاد بلاهن مع الإنقاذ. فلا لوم على أجيال لم يلمسوا منها حتى شوية غبار أو هبة هبابية.... |
العمر أو الحياة
تتلون وتنقلب وتعيش فيها أفراح وأحزان، أحداث وأوكات خاملة ومملة.. تعيشها واقع مر ولا حلو، تبقى منها ذكريات ممتع إجترارها وفيها دروس وعبر.. ترضاء بيها بي شكلها دآ وتستكين وتحاول تكرز.. "تركز" دي كلمة لمن تسمعها طوالي تشوف صورة العميد أحمد عبيد عبد النور قدامك من أجمل وأحلى الناس اللمن الذاكرة تتكرم عليك بيهم تفرح. وقولة "تركز" دي رجعت ليا أقوال.. منها على سبيل المثال: أبوي؛ يا أخي الله يهدينا ويهديك أمي؛ "قولة مشتركة عند كل بنات بابكر" وحاة بابكر نعمة حياتي أبو الكل خالي محمد؛ أسمع يا شاطر البيه أبراهيم مجذوب؛ عفَن خالتي زينب والسارة موسى؛ يندخر ليك خالتي عزيزة؛ الوعوع "صغار السن" خالتي عديلة؛ منهو، منو وقولة خاصة جدن للعميد يوسف بدري؛ واححححححد "لمن ينادي سكرتيرهو الشخصي تحت التدريب من إبناء الأسرة.... كانت الدنيا كدآ وواااااا حليلها.. أكيد كل واحد مننا بتذكر قولة ديمة بتتربط بي شخص قريب منهو وبقت لهذا الشخص علامة مميزة... |
سلام
[rams]https://www.youtube.com/watch?v=A7JrqsXgYjM[/rams] |
[QUOTE=عبدالله الشقليني;549697]سلام
ويا عليك سلام كنا قلنا شوفت الزول في الصورة مااااااا بتوري الحقيقة.. الحقيقة بي شوف العين بس هي الأكيدة.... أها عندي صاحبن ليا وسنييييييين ما إتلاقينا بس ياهو في الفيس لمن إتلاقينا "اتفردننا" وهو صاحبي بس ينزل في صور وليداتهو وبنياتهو ومرة مرة كدآ صور بتاعتهو من زمان ويوم ختا ليهو صورة يظهر أنها بالكمرات ديكآ الفي الكورنر تحت كدا بيختوا الساعة واليوم وعليها تأريخ حديث جدن بتاع سنتين يعني "طبعن ناس إحنا حاجة أقل من تلاتين سنة بنشوفها جديثة وأشوف ليك زولي وهو دفعة يعني زول سبعينات ذيي كدآ.. وشهو دآ ذي صفحة النيل لما يكون هاااااااادئ ولا حتا فقاقيع ولا أثار طمي يعكر صفاهو والشعر كسواد الليك كحال والعيون إتنيين بس وما في طفجات فريم حوالين النخرة توري أنهو سبق وإتخت نضارة... بيني بينكم تنازعت عواطفي إتجاهو بين غيرة على أنهو كيف محافظ كدآ وبين فرح ليهو في أنهو محافظ... شاء الظروف والأقدار... كيتن فيهو وراحتن ليا أنهو نلتقي وجها لوجه أو كان يقال عن المرحوم النميري "وجها لوجآ"... لم يكن كما كانت الصوره صورته.. كان زولي ياهو زولن ضربه الكُبر بلا رحمة ولا هوادة، عمل فيهو ما عمله الجراد في السعودية قبل أيام فأتي على أخضره (يعني لونهو) فصار قاتم لون ال (dark chocolate) وجفف منابيع مياهو بقاهو ذي السوباط وكت الجفاف وجلدتهو عليها أثار كتلك التي يتركها المحراث الكارتبيلر في الأرض. لكن الأدهشني أنهو نضارتهو تكاد أن تخفي كل الوجه وتبرز جواحظ صعب أن تسميها عيون لأنهو كانت بتظهر بحجم كرة المضرب أو أكبر وتشوف عروق العين أكثر غلظة من شرايين تتلألأ في باطن يد حسناء بيضاء مع الفارق في أنهو عروق عينهو حمراء كوجنتيها وشرايين يدها زرقاء كلون أظافر يده.... يا زول؟؟ شوفتا صورتك في الفيسبوك وأنك اخدتها قبل سنتين.. شنهو مرضتا ولا شنهو؟؟؟ رد عليا بي براءة.. دآ المصوراتي الهندي هناك لم أداني الصورة النزلتها دي. قلتا ليهو دي حقت زول تاني ما أنا. فرد عليا: لا بابا أنا في دخل فوتوشوب.. وزولي قال: فأنا كمان دخلتها في الفيسبوك... فقلت ليهو: بس أنا دخلت عليا لمن شوفتها..... العين أصدق أنباء من الصورِ فيها الحقيقة لا كذب "وريي" هذه الكلمة مستعارة من اللغة الأمهرية ومعناها كلام أو حديث... طبعن لغتنا العربية أصولها تقريية، أكسومية وأمهرية .. كان رضينا ولا أبينا |
يا أخي في حاجات كدآ؟؟
زمنا ما كانت.. حسي منها في شوية باقيات لكن في مساحات ضيقة ومحدودة بين ناسن قلال.. في زمنا..... كنا للمعلمين أوفينا التبجيل. وكان شوقي هو شاعرنا الأشهر.. كنا قمة في الأدب ولم نقل للوالدين أوف.. لم نسب الكبير ونحنو على الصغير.. كانا أخوان بنات، سند أخوان، صديقين للحبان... كان لينا زعماء روحيين وكنا راضيين بي السيدين ورؤساء وزاراتنا البهوزا ويرزوا.. كنا بقوة وإصرار نطالب بي حقوقنا وما بنشتري الوعود الوردية... هتفنا في زمنا ضد البنك الدولي وضد التاج المصري وضد المستعمر الغاشم وضد هتلر وحتى الهوليكوست وضد العدوان الغاشم ولي فلسطين حرة أبية وجبينا منديلا وتش جيفارا وكفرنا لينيين وقدرنا كينيدي في نفسهو.. إحترمنا السيدة زينب الميرغنية وإعتزينا بي شهدائنا في كرري وبي ثورة أربعة وعشرين وحتى بي ود حبوبة... ثورة أكتوبر كل زولن فينا كان متأكد أنها هيلتهو وبي جدارة وورينا أننا نحنا الخلعنا النميري.. نحن الشعب كل الشعب بي نسوانهو ورجالهو وإحنا الأسر وإحنا الشيب والشباب.. كنا الثوار وكنا النصرة والإنجاز وكنا كلنا ليها الفلاح... حسي بستغرب.. الشهداء القدمناهم في ثورتنا دي.. أكثر عدد من الكانوا زمان وهو لا فرق بين شهيد وشهيد قهر الظلم ومات.. ننسا مسببات تضحياتهم بأروحهم ونكتفى بذكراهم العطرة.. وين الحرية وين السلام ووين العدالة... ولييييه بقينا ذي النعاج للنساق وليييه بنخلق في فرعونن جديد وليييه نفرح لمن يجينا غريب وفاضه خاوي وهو غاوي في الفتات الباقي من مائدة الإنقاذ.. ليييه بنشكر حمدوك بدل ما نطالبهو بي سداد حق الإندفع من الشعب لي قرايتهو ونيلهو لي شهادات (كما تنص عليه قوانيين إبعاث موظفي الحكومة).. لييه نشتري قولة؛ تلاتين سنة صبرنا ما نديهم فرصة.. يعني بقينا فئران التجارب وكدآ بقآ حالنا وقلا مقدارنا... |
عشان تبقى دولة جد ذات قيمة
ضروري تستفيد من غيرك وتربط الحضارة بالصدق والأمانة..... قصص وحكاوي باللينكات عن ناس إتصرفت في المال العام وأقلاها إحترموا أنفسهم وإستقالوا... * إساءة صرف أقل من الف يورو https://www.telegraph.co.uk/news/201...trage-lobster/ * منهو العمل كدآ https://www.thenational.ae/world/eur...andal-1.560129 يا مدني لمن تدي وعد أبقى قدرهو https://www.reuters.com/article/us-i...-idUSKBN1YT0Q4 * وزير المالية البريطاني لمن ما عجبهو كلام رئيسهو https://www.cnbc.com/2020/02/13/brit...ports-say.html * الصرف البذخي https://www.fishfarmermagazine.com/a...ishupdate-com/ الف دولار لتستقيل https://www.dawn.com/news/818708 * إستقالة بي سبب كباية عصير https://www.theglobeandmail.com/news...rticle4453440/ * بس عشان دفعت حق رخصة التلفزيون من قروش الحكومة.. إعتذرت وإستقالت.... https://www.dailymail.co.uk/news/art...V-license.html |
لي كل زول مننا يوم عيد ميلادهو بتعني أنهو مرآ 12 شهر علي إحتفالهو الماضي..
إلا الناس مواليد يوم 29 فبراير من أيتها عام كبيس... ديل يعني يحتفلوا بعد مرور كل 48 شهر أو كل أربعة سنين.. بس ما بتتحسب ليهم نفع ونعمة لأنهم ومعا قلة أعياد ميلادهم بيكبروا زينا.. :(:(:( ليهم هبي بيرث دي وللجميع http://www.sudanyat.org/vb/uploaded/851_1582947729.png |
الحق يا الجلك وعيش أيامك....
زمنا كان يعني لو عندك معرفة بي وزير وتقابلهو.. تخاطبه بي عمي... حسي تقابل أحفادك ومعارفك من البقوا وزراء ويوقلوا ليك: يا جدو. ما جدي أو حتى عمي ولا خالي.. بتذكر في أوائل التمنينات كنا في الهجرة الأولى مع السيدة الفضلى والبنيات... (لسة الولد القلب البلد ما إتولد). المهم مدون وزنوبة أبتدن المراحل الدراسية في الامارات فكانن لمن يجن ويحكن عن المدرسة لاحظة أنهن بيقولن "أبلة" فلانة ويقصدن المدرسة. طبعن إحنا بتذكر لمن كنا في عمرهن وفي الروضة في الأحفاد كنا بنعرف (ست فاطنة دكة ومسز بيتري وشيخ ميرغني السنجك) أكيد هن لو كان بيدرسوهن رجال كانن قالن "أبيي" ;). ولاحظت أنهو أطفال أصدقائي من الكانوا عايزين يقروا أولادهم على مستوى في ناس "الوردية" بيقولوا "مس" وكأنهم تنبوا ببزوغ نجم بالمعجزة الكروبة "مسي" قبل مولدهو.. من أحب أصدقائي هو أخي مصطفى محمد الأمين وكان ساكن في بيت عمهو الوزير الأسبق المقبول الأمين الحاج وكذلك أخي الحبيب عبد الرحمن عبد الله نقد الله وكان أبو وزير أسبق كذلك وكانوا في مرتبة الأعمام سنا وحنوا... يومتها إتعين وزير دولة لوزارة وهو دفعة بناتي وليهو طبعن بكون (عمو بابكر وما عمي بابكر) ويومتها إتعين وزير وفي الحسبة بي أمهو أنا خال وعم أمهو وأنا أبقى جدهو "ما جدي"... وكما ذكرت من قبل في مناسبة سابقة... ربنا يوفق حكومة "الوعوع" على قولة خالتي عزيزة... حمدوك في تشكيلة وزراهو من الأبناء والأحفاد بذكرني بي أرسن فينيغر مدرب الأرسنال الأسبق وإن شاء الله ما فالن عليهو لأنهو فنيغر فشل في تدريب الأرسنال .. بالمناسبة البعين و"بيطرد" (Sack) المدرب هو الجهاز الإداري الذي هو نفسهو بدوره بيجي من قبل الجماهير... طبعن فنيغر ديمة كان بيسجل لعيبة صغار في السن وبدون تجارب ودآ ممكن يكون سبب فشله في إحراز كوؤس عشان تتختا في فترينة النادي... أسمع الكلام يا المنطط عيونك.. يا تجيب كأس يا بتلحق فنيغر... |
الروح تروح ما مشكلة
وتزيد الجروح، مامشكلة المشكلة السذاجة البقت هي المشكلة وروني حل للمشكلة والمشكلة... هي؟! تعيش لمن تبقى كبير تشوف عجبن كتير... زمنا كان إلا يكون زولن يهز ويرز، سمح جد لمن مكلها وضكراً مر لمن تقول حنضل وشاطرن جد لمن تقول هو المعلم والباقي تلاميذ... شوف عندك وقول؛ مبارك زروق القيافة وأبو هاشم سيد الوجاهة.. والضكارة ذي الزيبق سيد أرضن ظروف... وشوف ليك شطارة، كان علم ذي بروف عبد الله الطيب، كان سياسة ذي سيدي الإمام عبد الرحمن، كان عرفة ودراية ذي المحجوب... دآ كان زمنا.. لكن حسي؟؟؟ بتعرف ليك زول عايز تطيرهو السمآ. عليك بالميديا والتواصل الأسفيري، من الحبة تعمل قبة. تقراْ... فلان دآك العملهو والسواهو أيام كان شنهو دآك، عمل وسوى وأنجز وما في زول في الدنيا دي بيساويهو ولا بيشبهو. لا من قريب ولا من بعدي. تقوم إتا المسكين دآ.. تحك رأك لمن ينصلع وتقرآ في النت تفتش عنهو لمن عيونك يطشطشن وما تلقى ليك عنهو سطر لا في الويكي ولا حتى إسم موتر تفتيش إسفيري. تدخل تدور ورآ أصل القمري العلى الغصون، البذكر الدر المصون والهو فريد عصره المامثله شئ. ما تلقى عنه سيرة ولا صورة، شكر لا شينتن منكورة... من أقوال العندهم زول وعايزين يلمعهو: يا أخي دآ دكتور، بس يخت يدهو فيك ودقايق إتا شديد ولضديد، مفروض يعملهو وزير صحة.. الزول دآ لمن يضرب ليك إنتباه تقول قنبلة هيروشما وهو أنسب زول يكون قائد عام الجيش.. يا أخي دآ زول راقي وطول حياتهو عايش في أوربا وأنسب منهو يكون وزير خارجية ما في... بالله عليك سماحتها غنا ليه الفنان وتسأل؟ إتا شفتها والرد يا عجبي!! دآ ما بت ناس فلان شفتا أهلها سمحين كيف... طيب عرفنا أهلها نااااااار لكن كمان ما الرماد أصلهو نار.. نقعد كدي ونلمع التقول بتاعين ورنيش وجندر حتى الشين ذي بتاعين الكوافير وأخرتها... ماسسسسسسسسسسسسسسسسسسسسسسسسسورة.... وهم في سرهم في السحر وأطراف النهار وعند المغيب واناء الليل.. ي"حمدو" ويشكرو. أننا بقينا ننساق دون بوصلة للكلام البوصل لي أعلى المناصب |
اقتباس:
قبل كم يوم جيت وقفت في صف بنزين و بعد ما أخدت الــ 120 لتر طلعت وقفت و جيت أساعد في تنظيم الصفوف و أراقب عمال المحطة بالتقيد بالــ 120 لتر أكان ألقي ليك شافعاً كده من شفع الحِلَّة هو المسئول الأول و الأخير في المحطة :p الشافع ده في الحلة عبارة عن شافع ما تشتريه بقرش مسطول الــ 24 ساعة بنقو ، عرقي ، سرقة مرايات عربات ، متردي سجون ... إلخ لامي كل وسخ الدنيا دي هنا لقيته ليك و بإسم لجااااااااان المقاومة ، هو المسئول الأول ،، هو الآمر و الناهي المُطاع ياخي الإسمو ذو النون داك عامل فيها بطل ثوري هو معاه كتااااااااااار لايف ، لايفين تلاتة و تلم عليك أصحابك و فوووووووووووو تطير لا فووووووووووق لكن مصير البالونات تطرشق يا دكتور صدقني ، قريباً أو آجلاً كل هذه الفاقاقيع الجوافاء حتطرشق |
اقتباس:
إحنا الحمد لله عشنا وكل ما بالونة تتنفخ ما بتلقى ليها فسحة عشان تطير. تقوم تنفس براها. لكن شباب حسي ربنا يهديهم.. إتملوا كره وحقد على كل شئ جميل فالإنقاذ كرهة الناس في المحبة والولفة والأخاء.. |
ؤ الخط
الحبيب بابكر
رجاء كبّر الخط عشان نحنا الكُبُر بوظ عيوننا |
اقتباس:
الخلا عادتهو قلة سعادتهو.... من الزمن الغابر وحلاوته الغابرة ذكرياتن في الفؤاد وفي القليب والباقي من المخيخ. من الزمن دآك وأيام الكتاب والف والباء والتاء وبداية النكد والمعاناة مع رسط الحروف بالصورة البتخرج بيها كلمة صحيحية وأنا ذآك الطفل الملهم والما كنت تب وأبدن ومستحيل. أنا والقراية نتخاوى فقد كنت أفضل عليها ضرب المسطرة يسيفها على ظهر أصابعي وحتى لمن كبرت شوية ودخلت الكتاب مكرها لا راغبا "يا أخي قراية شنهو ما أهو العميانين عايشين في أمن وأمان وهم ولا بيقروا حتى حرف واحد لمن جاهم بريل". نرجع لي الكتابة وأنهارها من إملاء وإنشاء وتهجي وقواعد ونحو و و و و. المهم أني كنت وأنا الشاطر الفهلوي وما بتمر عليا حيلة أو خدعة وإلا في وقت الحاجة إستعملتها ذخيرة حية تصيب الهدف فترميهو مجندل أسير مؤمن بقدراتي الإبداعية.. كنت بكتب الكلمة بحروف مثل التي يقال عنها "مشي النملة المغسطنها في المحبرة. وهناك فرق بين المحبرة ودواية الخلوة وإن كن متقاربات في البيئة التي يعشن في أمر التعليم ومختلفات في موضوع الجلد.. كنا بالمسطرة وتعتبر أداة عقاب حنينة بالنسبة لديك المساكين بتاعين الخلوة وأنواع السطوة والقهر الفيها... كتابة الكلمة بحروف صغيرة ومجهجة بتخلي المدرس في حيرة من أمره إن كانت الكلمة هي صحيحة وهو لم تتبين له لصغر الفونت أم أن هناك خطاء بين في الكتابة وعليه فهو يختار من الأمور أسوطها، حتى لا يظلم ولا يتهاون وهذا كان مبتاقي فأحصل على نص النمرة وأهي بتكفي وتلحقك من السقوط الذي لهو وقع مدوي في البيت وخاصة أنهو كان قبلي ("الكشاح"، كما كان يسميه عمنا أحمد داؤود نسبة لأنه كان ديمة بيمتحن من السنة التالتة للإرتقاء للمرحلة التالية) قاسم أخوي الله يرحمه والبعدي طوالي النابغ كورية كمان شاطر وديمة من الأوائل فما كان يتقبل مني غير النجاح والحمد الله ديمة كنت بعالج الأمر بأنه "Marginal" لا أن أسقط.... طبعن مع الكيبورد إنكشف المغطى لكن برضك هنا في عذر مقبول حتى لو غلطتا. مع الكُبر اليدين برجفن والأصابعين يتهون بي الحروف.. |
| الساعة الآن 07:54 PM. |
Powered by vBulletin® Version 3.8.8 Beta 2
Copyright ©2000 - 2026, vBulletin Solutions, Inc.