اقتباس:
اقتباس:
أريتني لو كنتا أصغر من كدي، كان ممكن أكون زاملتك أو صادقتك زمن الصُغر الجميل في واحدة من مراحل الحياة وكان يابا ذكرتا ليا الجميل وكان كنت بفرح بأنهو الفنان، الجميل، الأديب إتا. تطراني وتذكرني في مقاماتك دي شية اللحن وحلوة اللحن، ومتزامنة في التوزيع. كاملة اللازمة الموسيقية... |
الحبيب دكتور بابكر
تحياتي ولك عذوبة التعبير الحلو فأنت أكبر مني في التعبير هاشم يتوسط فيليب والرشيد وصورته سوف تعرفها ، لكن صورتي لن تتمكن من معرفتها |
صديقه الفرجوني ، وكان يحضر معه للجامعة ويحضر العود ويغني لنا من رمضان حسن وعثمان حسين
كانت لنا أيام [rams]https://www.youtube.com/watch?v=XVsslucYwzo[/rams] |
بتذكر كنا مشينا أسلوفاكيا في إجازة مع يوسف أخوي ووليداتهو..
وليدات يوسف طبعن هجين بالدم الأيرلندي وتربية في لندن وشبعانيين حقوق طفل وحماية وسطوة الرعاية الإجتماعية.. كدي بس أنهر جناك في الشارع وزولن مسلط يبلغ عليك.. غايتهو لو خلااااااااص قدروا ظروفك يكتبوك تعهد بأنك ما حتكررها وإلا اهو بينقلع منك ذي قلب سيدنا حمزة رضي الله عنه.. مشينا هناك وقاعدين لينا في منتزه ووليدات يوسف ما شاء الله ينططوا ويلعبوا وصياح وضحك ومرح. يوسف قال ليا: ما ملاحظ أنهو إبراهيم ومدينة هم الأطفال الوحيدين المنسمع ليهم صوت، شفع الأسلوفاك ديل بكم ولا شنهو...;).. قلتا ليهو: يا أبو الجوبس، الناس ديل لسة خلعة الشيوعية قارصاهم وتربيتهم ياها الدقة القديمة ذي بتاعتنا في السودان.. لسة لمن يشموا صناحهم بعد دآك تشوف لو ينقدروا ولا يتمسكوا... (في حي في أديس أبابا إسمهو أسكو دآ البنيات البيمرقن منهو لي العالم بس تقول خريجات هارلم، فمرة كان في واحدة منهن إشتغلت في المندولا وخلقت ليها (باعت تلج) ولكنها ما صبرت وإختفت، فسألني أحدهم وينها بت فريق أسكو، قلتا ليهو: إتا عارف بنات أسكو ما بيتمسكو)... أتذكر زمان أبقى كدي بالجد راجل وأفتح خشمك قدام أهلك وتذكر إسم زول كبير (إن شاء الله بس كبر عمر وممكن يكون السوء بي معانهو برضك ما بيفرق) ما بيستنوك تتم قولك، مدح ولا ذم ولا حتى عايز تقول شفتهو ساكت، إن ما إتلفختا بالعجوز سدت بيتا عشان تنطم أقلا شئ نهرة كدآ بس تقول ضربت ماس.. حقنا ما كان تسلط حكم ذي شرق اوربا، لكن كان ياهو، نبع الذكورية الراوينا لمن ضربنا الإستسقاء. وترجمتهو الأدب كان ظلم الأدب يجمع ولا يفرق، كل ضعيف محتقر كان إنسان "المرأة، الطفل، الفقير، المريض" ولا الحيوان.. يا أخي حتى الشجر برضك مطلوب منهو يتأدب للرجل فيظله بظله ويديهو الحطب يولع بيهو نارهو للطبخ وفي الأمسيات الباردة يتدفا بي نارهو... هل حكاية التأدب دآك كانت كويسة والله ما تعرف لكن الحاجة الواحدة العارفها.. أننا إتخمينا، كم غسلنا للكبار أياديهم وكم مشينا تسلطهم نهاديهم.. أها حسي الزول الكبير سعر سوق تبقى سبعين تبقى ضحكة ، تبقى تسعين تبقى ليك مسبة.. ما عليك الدنيا دوارآ.. يوم ليك ويوم عليك.. باكر شباب الثورة بيكبروا ذينا كدي (ما كنا شباب أكتوبر) وبيجلكنوا وحقهم بيكون أمر من حقنا.. ظنيتهم جناهم يدقوهم في جلدهم.. لجان شعبية ولجان مقاومة وناس إحنا وصديق يوسف |
[youtube]https://www.youtube.com/watch?v=kQdm75763fU[/youtube]
|
من الصدمة تقيف وتشوف تلقى شعبً بين الشعوب. كان ماضيهو سمح، مضئ مالي الدنيا إشعاع. فيهو من مكارم الأخلاق بيمدحهو بيها كل شعوب العالم.. شعب كله نخوة ومليان ولفة. شعب عزيزة نفسهو عليهو ما بيرخصها ولا بحطها. إن إحتاج ما بيشحت وإن تملك فاض كرم.
مالهو إتغير؟؟ ياها هي الإنقاذ ولا شيتن غلط صابهو في مقتل.. بقى الكبير عندهو ما ليهو قيمة وكت زمان كان الكبير حتى إن أعوج مكانتهو محفوظة... كان ناسهو بيناتهم الترابط حسي الفرقة... كانت المحبة حل محلها البغض والكره.. كان ما بِتلوم لا في كبيرة ولا صغيرة، حسي الخوف في أنه اللوم لابسه جبة.... كان ديمة وقفة رجال عند الحاجة والنفرة لي منادة ما محتاجة. بس حسي الشعور خاتنهو في تلاجة.... كان جامع جبل من الصفات السمحة ويومنا دآ صغرت بقت قمحة.... كان مستور وأخو أخوان. ما تعرف لييييه جار به الزمان وإتغير ولا دي متطلبات العصر.. ولا لأنهو الدنيا حالها إتغير ويوم باكر يمكن معاهو كل الأمور تتغير.. خلت بقى لسان الحال؛ أبقى علي العندك عشرة وإن لقيت مباصرة، أبقآ عليها عشرة.. ومني زول عاش الزمن دآك وشبع من نعيمه..... بوصيكم. إن درتوا تحسنوا الحال؟ أرجعوا للقديم الكان |
ذكريات جميلة ونبيلة
الحبيب دكتور بابكر ربنا يديك العافية |
2 مرفق
اقتباس:
فيهم صفات تانية غير العين الحارة.. سرعة البديهة ويحسنوا التشبيه والشبه ما بروح ليهم.. موضوع مساخة ديك، إشاعة مقرضة حسي لومني ;);) ظنيتك تكون.. في الدايرة الحمرآ وكان ما راضي بيها.. نطلعك ونشوف ليك قدمن أخضر ومبارك ذي العلي يمين الأحمر :cool::cool: http://sudanyat.net/vb/attachment.ph...1&d=1595267749 |
في جدودنا الكُبار، كأن حلاة الكُبر
نضميهم درر قولهم جمر يدينهم خُضر عيونهم حمر بشرتهم سمُر درر؛ ما بقولوا إلا قولن سمح قولهم؛ دغري لي اللما بدروهو بيحرق خُضر؛ عطاء وعمل (أرض مزروعة وممرة) عيونهم؛ حمرآ وشرارة سمُر؛ Africa Mother Land |
حبيبنا دكتور بابكر
عاين الصورة كاملة أنا واقف في الصف الأول وراء الأساتذة ، تالث زول لابس جلابية بلدية ! |
الصف من جهة اليمين
|
اقتباس:
قلتا ليا جلابية بلدية والله يا ناس أمدضرمان علا إنكو قول:: وإن كان ليك حق يابا.. ما هو الجلابية أنواع... جلابية السادة المرغنية وجلابية الغبش جناح أم جكو وجلابية أم زرار وجلابية ذي الخليجية والخليجية ظاتها أنواع، أهلنا ناس الإمارات والأقرب ليها من الرقبة العمانية وفي الوسط الكويتية وفي الأكمام السعودية وفي جلابيات أنصار السنة اللاها عراقي ولاها تامة جلابية.. قال: جلابية أنصار السنة ذي الحمام البلدي بابها ما واصل الواطآ... طبعن زولن ذيي "ليمان" بسيط بفتكر أنها تهوية طبيعية لكن دي ما صاح لأنهو الروائح أخف من الهواء العادي وخاصة السلفيد هيدروجين فتمشي فوق، يعني مفروض القصا تكون فوق وتحت تكون الجلابية جارآ.. معليش يا هندسة لكن لو عندك فكرة لييييييييييه باب بيت الأدب كان يقصوهو من تحت.. طبعن أخي الحبيب بروف هاشم الخليفة محجوب مهتم وشغال في حكاية العمران وربطه بالتراث فلو ما لقيت عندك إجابة، طوالي بحول ليهو السؤال وبحول ليك الرد إن تكرم بإفادة |
لو ختينا الحزن والفرح في كفتين ميزان..
نلقى الحزن ترجح كفتهو... فالحزن غالب على حياة البشر، يتملك المشاعر أسرع، يجد تجاوب من البشر بصورة أكبر، ساهل الوصول ليهو والعيش فيهو. أبسط الأسباب يمكن أن تقود لي الحزن. الدراما متعددة الضروب ولكن تلقى من بين أبوابها الغلبة للحزن، الميلودراما مثلن الهي التلاعب بالأحاسيس، أسهل الطرق البتصل بيها لغايتها من خلال حبك محزن، الدراما المأساوية ودي الإسم بيكفي وحتى تشوف في الدراما الكوميدية، تلقى الكاتب في كتير من الأحيان يستعين بالحزن بعض الأفلام تلقا فيها واحد فقير يتنمر عليهو البعض وبعض المشاهدين يضحك بفرح.. في الحياة المعايشة كم من أحداث محزنة تلقاها وجدت تجاوب غير محدود وكت المفرحة محدودة القبول.. عايز تستدر عطف إنسان، أدخل عليه مدخل حزن، إتمسكن وإنقرض وأبن الضعف والوهن وحلاتها لو ختيت ليك دمعات من فايض بكاء ما تم أو لم يكن.. غير أنك أكيد الفشل في تعاطفهو معك لو رسمت إبتسامة (حتى لو بتاعت مضيفات الطيران، وقتية ولثوان معدودات).. الحزن، الحسد، العجز، الوهن والضعف. ربنا يغطينا. وديل منهم العياذ بالله.. لا حول ولا قوة إلا بالله ........... |
[youtube]https://www.youtube.com/watch?v=EMoJpyRc_Ok[/youtube]
[youtube]https://www.youtube.com/watch?v=cLZaV5Aa5rI&t=158s[/youtube] |
[youtube]https://www.youtube.com/watch?v=cLZaV5Aa5rI&t=158s[/youtube]
|
| الساعة الآن 06:44 PM. |
Powered by vBulletin® Version 3.8.8 Beta 2
Copyright ©2000 - 2026, vBulletin Solutions, Inc.