البركة فيكم ياعم مخير.
البوست دا من أعظم وأجمل ما اتكتب في سودانيات |
أحسن الله عزاءكم في بروفيسور مالك بدري.
رحمه الله وأحسن إليه وجعل الجنة مستقره ومتقلبه |
اقتباس:
اقتباس:
في كلة روضة فيها زهور متميزة، بلونها خلابة، رائحتها أخاذة وألوانها جذابة.. برحيل هؤلاء مالك والنور فقد آل بدري زهرتيين. شكراً ليكم وإن شاء الله ما مردودة ليكم في شينة |
اقتباس:
وضرب المثل: القرد في عين أمهو غزال شكراً ليك يابا شهادة غالية وعزيزة |
ما غلطوا لمن قالوا للزول الكبير، عجوز
والعجز هو عدم القدرة وأنواعهو كتيييييييييرة فيها الشين الببقيك ذي الناقص وسط الناس الكاملة وفيها الحار البخليك عايش دون رجى.. تشوف شئ يعجبك وتعجز منالهو، تسمع وتعجز تبينهو أقوالهو.. لو فتش الزول عن العجز. يلقى حقيقي أنهو شيتن فات حد الكُبر في ثقالتهو وبياختهو.. وبخليكم مع صفحة المعاني عشان تحكمو براكم .... https://www.almaany.com/ar/dict/ar-a...9%D8%AC%D8%B2/ أها الأثقل دآ وعلى القولة، طقاني فاول في الأنكل ولمن وقعتا وقع فيني زيادة في الايجاع.. أفقدني حبيبة عشتها بكل روحي ووجداني السبع سنين الماضي، فاخرتا بيها وعزيتها. أنستني لمن كنت برآي وخاصتن لمن أكون خرمان.. شيشة وجبنة بالمجان.. لمن جوني ضيوف كانت هي المكان. براح وبراحة تعزم فيها بإطمئنان. أها الأثقل. تقل حركتي وعجزني ولمن عجزتا.. بيني بينكم الكرونة برضك تحالفت معاهو وطيروا مني المندولا.. :(:(:(:( |
الدنيا درب طويل ممدود، ممكن تمرق منهو لي مسافة لكنك برضك راجع ليهو ظاتهو. ماشي لي قدام فيهو الحفر وفيهو تمر ليك بمزرعة برسيم ريحته تملا خشاشيمك ولي قدام تمر ليك بي مرمى زبالة تزكم نخرينك. تبتديهو الطريق خايفين عليك تتعتر تقع فيقوموا يشيلوك ويونسوك عشان ما تزهج، بالحكاوي ناس فاطنة السمحة وود النمير ولي قدام تلقى الطريق حوالينهو لافتات صور مزكرشة تفرحك وتبسطك وكمان شيتن جديد بسموهو الحروف وتعرف في مشيك تلقط منهو وتعاين وتعلق. البناية دي لو ختوا فيها طابق تاني بتبقى أسمح والزول البيعرج دآ، نعالهو يكون عوق رجلهو وإنجرحت. (ناس هندسة وطب)
وإتا ماشي في الطريق تلقى جمبك سيدة وسايقا ليها جنيات. وفي الطريق قدام... نفسك من المشي الطويل يبتدي يقوم، رجلينك يواجعنك، شوفك يضعف وتتعتر. مرة تقع ومرة تقوم.. وتناتك ماشي بس تقول ترجع لأنهو الدرب إبتدى يكون وعر وما شيتن بسر تشوفهو قدام عينيك هناك. لكن وين ما الدرب ماشي بس لي قدام ما رجعة لزمن بداية المشوار.. أخرتها؟؟ ينقطع الدرب وتبقى لا هنا ولا هناك.. يا هو حال الدنيا بس؟! درب تراب |
ناس تتكلم عن الرجيم "التخسيس" وأنهو الضعفة صحية وفيها مسحة جمال وطبعن هي في النسوان إستايل أوربي أما الرجال فهي وسامة. والضعفة مقاييس ومواصفات. منها المسوسو (هي طبعن كلمة عامية تقال في حال التشبيه بالسوسيو "صغير الطير") أو العدمان العضمة وجلدهو ناشف فاقد نقطة الموية ولا بيكون ضعيييييف سيقانهو ذي عيدان الكبريت وهو البارجغل في بطنهو شغل. في ناس ضعفتهم طبيعية، يأكل أكل السوسة والعافية مدسوسة وهناك تفسير علمي مرة سمعت زول كان بيحكي عنهو. وهو نوع من الأنسجة في الجسم تعمل على عدم تراكم الشحم وتحمي من السمنة. الضعفة الشديد الشينة ديكي عند الرجال يعني أها لكن عند الإناث بعض مرات إنعكاساتها سالبة وخاصتن حسب ذوق الرجل من العالم بتاعنا، كان شرقيين أو أفارقة.. يحبونها مكتنزة وذكرت في أشعارهم والأفارقة بزيد إعتزازهم بيها قدر ما إتعزت بنِعم ومميزات وكفاءات..
إذا تمشي تأود جانباها وكاد الخصر ينخزل انخزالا تنوء بها روادفها إذا ما وشاحها على المتنين جالا دآ عن ضعفة الأجساد في شكلها وهيكلها لكن في الضعفة التانية وهي ديمة بذكرها بي خيرها وبي شرها.. الذاااااكرة ونعمت الكُبر في أنهو بيطفئ نارها.. إتصور إتا بالعمر دآ. كم من حدث وخبر ونباء تعيس ومحزن وقبيح مرآ عليك، عكنن حياتك ومسخ يومها ظاتهو.. إتصور كل دآ يكون طوالي معاك.. لكن الكويسة أنهو الذاكرة بتضعف وتسوسو ومشيلوا بما هو أضعف من عيدان الكبريت. فتنهار وتنمحي، تتكسر والجميل أنها الذاكرة ظاتها بتتنسي [youtube]https://www.youtube.com/watch?v=hl3srnfIgY4[/youtube] |
اسع انخزالا دى جبتها من وين ياشاب يا انيق الطله
مشتاقووون والبوست حقكك دى بقراهو كل يوم بس ماقادره اشارك ...يلا اعتمدنى زبونه فيهو ... وسؤال : شنو تصنيف العجوز ؟؟ وهل العمر ترادف ايام ...ولا لحظات حلوة ؟ |
اقتباس:
نطا وقدر ما نطط، يطير ويقع ولا في الحير ولا حتى حوب ليهو ريشة من الطير.. غلبتهو تب. قام عاين ليها.. وقال: ريحتك ذي ريحة الصقر، وقدومك من النقر علي الشجر إنبرى ظاتهو أكيد لحمك من كترت النطيط بين الفروح بقى قطعة عضل لا بتنساق ولا بتنهضم. لم يعترف بالهزيمة وأنهو في مبتاغهو فشل ولي نيل المرام "عجِز". أهو دآ الحال حال الثعلب مع العصفور وأكيد حال كل الثعالب مع العصافير الحلوة وجميلة.. وهذا القبيح "العُجز" ياهو ردم وأكواااام من فشل الثعالب والإنهزام المحتوم. والرجل (عجُوز) والمرأة (عجُوزة) والبنية (عاجزة :confused:) والولد (عاجز) وكلاهم إن ما راعى الأمور صاح وأفلتها بينتقل وبي سرعة لمرحلة العُجز ويبقوا (عجوزة وعجوز). حماكم الله من العُجز والعجزة والإنعجاز إن جاز القول لكنهو ما تقال :eek::eek: |
من متلازمات الكُبر،، الضيق وعدم الصبُر..
بحب أتفرج في التلفزيون وحصريا على النقل الرياضي الحي لي ناس كورة قدم كنت وباسكت لكني لمن جيت لندن بقيت من ناس الكركيت وبي الخمسة يوم الكاملات بتاعت التست السيرز ولا الكمين ساعة بتاعت الوندييي ودي أنا ما عارف كييف عملتها وعن نفسي أنا عارف من طبعي الملل والضيق من القعاد في حاجة لي مدة طويلة. السيدة حسب سيدها كانت بتقول: لمن تتفرجوا على رياضة رجالية، أبقوا شوفو الرقبي.. ما ظنها شافت كرة القدم الأمريكية... بحب أتفرج على الأفلام الأمريكية الأكشن وبالأخص بتاعات الكاوبوي ودآ ظنيتهو لي حقيقة طبعي بتاع الملل لأنها ما بتحتاج تركيز ووين ما زهجتا بتقوم منها لأنهو أكيد إتا متأكد أنهو البطل ما حيموت.. أها قام دخل برنامج جديد عليا في هواية التلفزيون وقلب مزاجاتي "التفرجيية" في البيعرضهو في التلفزيون. وهو مشاهدة المسلسلات من خلال تطبيق ولا نقول محطة ولا سمها ما شئت الأربع وعشرين ساعة. الأفلام الأكشن في والأفلام جرعات خفيفة من الدراما الممكن الزول القلق يتحملها برضها متوفرة لكن فيها حاجة أصلن ما كنت متوقع أني سأستهويها وبل كنت لمن أشوف ناس يتونسوا بما حدث في الحلقة الماضية وتلهفم وإنتظار على جمر للحلقة القادمة بستغرب وبندهش. معقول الناس دي فاضية كدي ويربطهو حياتهم في إنتظار باقي القصة والقصة أصلن دايمن بتجر أسابيع وشهور. أها لقيت روحي في الجُب غريق ولقيت أني بقعد بالساعات ولقيت أنهو المسلسلات أمتع من الأفلام لكن بالطريقة دي. تسك المسلسل لمن تجيب أخره ودآ ممكن يأخدك إسبوع بدوان كامل لا يقل عن ساعات العمل الرسمية إضافة لساعات غير معلنة تمتد لي نص يوم بي حالهو وتتخللها دقايق الأكل والصلاة. بس طبعن عامل العمر بجرجرك كمين مرة فأحسن شئ أنهو لمن تعزم على الدفنة في الكرسي ويستحسن يكون وثير وليهو سنادات ما تتعاطى سوائل كتير تفرض عليك الجرجرة. أفتكر أنهو الفارق دآ هو الخلاني أقع في مصيدة المسلسلات. لأنهو لو عندك عزيمة قوية وما بتشرب سوائل كتير ممكن ذي مسلسل قرين لييفز تخلصه في أيام معدودات.. أهااااا القصة في ما يقدم من مسلسلات في هذا التطبيق أو المحطة أو سمها كما شئت.. هناك نظرية مؤامرة بالجد خطيرة. تناولتها مع أخي الصغير وصديق الودود حاتم العوض. هل عن قصد المسلسلات دي محورها كلهو ممارسة مختلف عليها إجتماعيا وأدبيا وحتى دينيا وهو ترويج من قبل مجموعة أو تنظيم أو حركة نشطة. أكيد كثير من متابعي هذا التطبيق أو المحطة أو سمها كما شئت لاحظوا ذلك.. أما عننا إحنا الإتنيين فا لينا رأيي متحفظين عليه. فهل من أراء؟؟؟؟:( أكيد ما فايت على القارئ عدم ذكر الجهة المقصودة. فالدنيا دي ما معروفة.. يقوموا يتبلوا عليا ومحاكم ومطالبات بتعويضات تصل للملايين الدورارااات. وهو أنا محقو ربع دولار |
المغفرة والعفو والتسامح...
هي أمور باركتها الأديان.. في الإسلام، جاء قول المولى عز وجل "وَالْكَاظِمِينَ الْغَيْظَ وَالْعَافِينَ عَنِ النَّاسِ وَاللَّهُ يُحِبُّ الْمُحْسِنِينَ" إذا كان المولى عز وجل وضع لينا أُسس التحلى بالحكمة والرحمة بيننا فيخاطبنا بأن نحسن لبعضنا حتى ينعنم الله علينا بحبه. فهل لنا غير أن نكتم الغيظ ونتسامح فيما بيننا؟؟ في المسيحية، جاء في أنجيل لوقا "من ضربك على خدك فأعرض له الأخر ، ومن اخذ رداءك فلا تمنعه ثوبك ". قمة في التسامح والعفو فحتى إن أعتدى عليك أخوك الإنسان، أعفو عنه وسامحه بل يوصي أن تحسن اليه.. في اليهودية، ورد في الوصايا " كل ما تكرهُ أن يفعلهُ غيرك بك فإياك أن تفعلهُ أنت بغيرك" وهذا تذكير بأن نتجنب إيذاء الأخريين لأنهم مثلنا ومثلهم. نكره أن يعتدى علينا فخير أن لا تفعل أمر لغيرك لا تراضاه أن يفعل بك. القصد أنهو؟؟ الأديان السماوية حين تأمر بالعفو والتسامح والمغفرة لنكون قريبيين من الله فيحبنا ويحبب الناس فينا. فهي قطع شك خير.. كذلك الأعراف والتقاليد السمحة تقوي من التعايش بالعفو والتسامح والمغفرة بين البشر. دحن النبقآ ليكم لقمان عشان نوصيكم.. أبقوا عشرة علي العفو والمسامحة والمغفرة . "أغلطوا إنتو يا الحلوين نجيكم نحن بالأعذار" [youtube]https://www.youtube.com/watch?v=XjBw0FmybbQ[/youtube] |
موضوع قبل كدي تناولته هنانا..
الخواجة إن فلس بفتش في ورقهو القديم... الفلس والكُبر وفتيش الأوراق القديمة.. زمان ما كان في الكمبيوتر القدامنا دآ والكان زمان أوضة حدادي مدادي وبعدها بقآ شيتن ينختا في التربيزة وبعدها شيتن يتوهض في الورك وبعدها بقى حبة وتلفون منمق وجيه ومع دآ إحتفظ بالتسميات التقليدية ناس file و folder وياهن ديل هم المقصود بيهم الأوراق يعني الملفات والحزم والرزم.. البيحصل أنهو مع الكُبر والذي يرمز له بالخواجة لأنهو الخواجات ما بيفلوسوا إلا لمن خلاص يقعدوا ويبقى مراجعة أوراقهم عصية على القدرات الجسدية من مسك القلم بسبب الرجفة وشيل الفايلات لضعف البنية وكما أنهم يصابوا بمتلازمة الكُبر وضعف الذاكرة وأنهو فلان ما رجع السلفة وفرتكان ما سدد فاتورة الشهر وفات عليهو يعمل طلبية عشان تكون المواد متوفرة في الخازن وتشح وينفض الزبائن من حوله كما تعوف الفيران بيتن خالي من الجبن.. أها يقوم يفتش عسى ولعل أن يجد قصاصة تؤكد تملكه لأمر يعيد له قبل المال؟ الثقة في النفس وأنهو كان وكان.. يومتها وماني خواجة لكني زولن عادي وبسيط بس قولة جدي بابكر، خوفتني وقلتا ما تبقى عليا "قلة الشغلة، أكبر شغلة".. قمتا وفتشتا في أوراقي وشكرن عزيزة مخير.. ساعدتني بأنها شجعتني أسترد بعضها.. لقيت بحث أو دراسة أهو حاجة عن تعاطي البنقو وسط شباب العاصمة القومية سنة 1977 وبمساعدة إتنين أحباء من الرعاية الإجتماعية لكن للأسف "الزهاايمر. أساميهم إتبخرت" وقدمتهو في المؤتمر العربي الثالث لمكافحة المخدرات بالخرطوم.. برضك لحقتني بي كلام أتذكر كنت كتبته قافيتهو كانت مبتدية من الألف ومنتهية بالياء عن الكيزآن وإنقلابهم الأسود بعد هجرتي للقاهرة ....... http://www.sudanyat.org/vb/uploaded/851_1613896964.pdf http://www.sudanyat.org/vb/uploaded/851_1613897016.pdf |
يا أخي الكُبر دآ نعمه وأجملها تعاطف الناس معاك..
طبعن في بعضهم بيتظاهر بالتعاطف ولكنهو جواهو يكون قاصد التريقة. وطبعن التريقة أمرها ما حلو يعني جارحة ومشكلتها أنها بتتقال لي الزول في وشيهو، حاجة كدآ مشابها للغيبة وبرضك تتنوع في المعنى حسب تشيكلها بي ناس ضمة وكسرة وفتحة وديك البتشبه حرف w "الشدة" وتخليك تشد في الحرف حسب التون وما تنسى العلامة البتشبه الخمسة بالحربي التخليك تنطق وما تتسمع فهي موصوفة بالسكون. غايتو وأنا بفتكر أنهو سيبويه ما أثراء اللغة العربية فهو أنقصها كلمات بحكاية التنوين والتشكيل دآ. أهي ولا وأهو ذي كلمة غيبة تدخل في المعاجم تلقى الحروف في رصاتها ظاتها بس ضمة تبقى المعنى كدآ، فتحة تغير المعنى ولو كسرة ياها بتبقى القاصدها أنا هنا وهي من الكبائر.. والتريقة في أصلها تتنوع وتتشكل حسب ما تورد في الحديث يعني موقع الكلمة؛ فالأصل "ريق" وبالضمة في الأوصل معنى وكسرة في الأول قول تاني والغريبة أنهن معاني وذي ما بقول المثل "حواء وآدم ما بلموهم" والمثل دآ بتقال لمن مثل شخصيين بيتشابهو ولكن لا يجمعهم لا قربى ولا دم. إتصور ريق هي أصل الريوق ويعني بلة الريق وهو الفطور وكما يقول أهل الخليج وهي جآية منها ترقية يعني ترفيع كان ملازم يبقى نقيب وكان مستشار يبقى رئيس وزراء وذلك عن جدارة ولا واسطة وكوسة ولا في غفوة زمان.إتصور لو ما كان في تنوين وتشكيل وإضافات لأصل الكلمة الديمة بتكون من تلاتة حروف.. كييييييف كانت اللغة العربية دي واسعة وعدد كلمات يتعدى المعقول والمقبول لي أن يصل الي اللا نهاية "طبعن دي قولة بليدة في أن يصل لي اللا نهاية وإلا ما تكون نهاية وكلامنا السودان يذخر بمثل هذا ومنهن ناس قاعد يمشي". القصد بعد السرحة حقت الكُبر دي.. أنهو الناس الطيبة وظريفة بتتعاطف معاك بي صدق فيقوموا لو غلطتا يعذروك ولو إتساخفتا يسامحوك والجميلة أنهو في ذي حالتي دي؟؟ لو كررتا القول!! بيلقوا ليك العذر؟؟ ما هو كِبر ويكون خرف :eek: |
رغم الفقد الجلل
هو حزن وما حزن لأنهو بتتذكر وتحمد ربك على شيتن جميل.. جميل أنهو قاسم أخوك الأكبر منك وكيف كان مفخرة أمهو وأبوهو وأختهو وأخوانهو... https://www.facebook.com/babiker.muk...ment&ref=notif |
في صغرنا..
علمونا كتيييير وكانت كلها حاجات جميلة.. وما بتذكر شيتن واحد كعب علمونا ليهو.. علمونا الشجاعة. ما ديك بتاعت المضاربة والتعدي على الناس الأضعف. كانت بتاعت عدم الخوف من قولة الحق الوقوف مع المظلوم ومساندتهو حتى لو إتعرضتا إتا للأذى. إتعلمناها من أبواتنا وجدودنا. ما نسرق، ما نكضب، ما نغش.. علمونا محبة الناس وحب الناس وتوزيع الحب قدر ما نقدر ولي أكبر عدد من الناس. علمونا الإحترام لي غيرنا وقبله لي أنفسنا. علمونا العلموهو ليهم أماتهم وأبواتهم وحبوباتهم وجدودهم.. علمونا نرضى بي قسمة المولى وكمان برضهو إضافتن ليها علمونا أن نعمل لي مرضاتهو. دآ العلمونا ليهو. والقصد الإحنا الإتعلمنا ديل. ياهم الملايين الكانوا عايشين في المليون ميل مربع، أهل شجر نمولي لي الكوشيين بتاع حلفا وغرابة الجنينة ليين أحفاد دقنة في شرقهم. ولمن كِبرنا؟؟ أهو إفتكرنا برضك علمناهو لي جنانا من كل العلموهو لينا. لكن ذي الإتوارآ ليا.. أنهو العلموهو لينا أهلنا دآ ولا دآك. كان بس لي زمن زمانهم وزمنا الزمان. الدحنهو حسي بقت الشجاعة سك والغش سلك والكضب فرشهو في الدرب.. يتسيطروا بيهو لمن بقوا حكام والسرقة بقت لي تملك القرش والجاه عنوان وبيقو بيقولوا للحرامي شاطر.. أتذكر زمني الزمان.. لمن تشوف كومر إتا بتكون متأكد ياهو بتاع الديش وما تشاف في الشارع إلا بي سبب والعياز بالله معناها إنقلاب.. حسي تشوف الكومر "تاتشر" عاادي طالع ونازل ومليان في الشوارع دون عجب ولا إستغراب. بس إمكن تكون تتحير؟؟ دآ بتاع ياتهو من "الغزآة".. أبان بريية أحمر ولا اللونهو تاني ولا عمامة خضراء ولا باللبس المدني ولافي شالهو كمامة.. حالة سعبة!! بين الكان زمان والحسي زمان |
| الساعة الآن 09:04 PM. |
Powered by vBulletin® Version 3.8.8 Beta 2
Copyright ©2000 - 2026, vBulletin Solutions, Inc.