من نعم الكُبر إنعدام الغيرة.
قول مثلن بتحب ليك واحدة ولا واحد ومربط أمرك لي أخرهو. إن هبت نسمة بتغير تقول لمست الخدود، إن مرت غيمة تقول غطت الجسم كلهو الإتا متمني تكوني أو تكون لامهو بي حنان وشفقة، إن إتشربت موية تغير من الكوباية تقول لمست الشفايف وإتي ولا إتا محروم. وإن كانت هي ولا هو والطرف التاني هي ولا هو. المشي في الشارع يوقد النيران ما خوف يشوفنهو ولا يشوفوها.. واليوم أسود إن كان مدِح، نار لظى بتحرق جوآ القلب. حسي ويييييين هو ظاتهو الحب؟؟ نعم الكُبر كمان دم الحسد.. والحسد في أغلب الأحيان ناتج عن عدم القدرة في المنافسة في أوجه الحياة المختلفة والحكمة كمان في الهبة البيديك ليها الله من محبة الناس ليك، من سماحة خلقة ومن حاجات كتيرة.. كان الزول بيحسد لمن يغلبهو الشئ يعملهو غيرهو، بعض يحسد في القرش، بعضهم يحسد في الشطارة والبعض بيحسد في حمرة "المؤخرة" حسي ويييييين مع الكُبر ما هو الزول ما طامع في شيتن منها الزايلة.. الكُبر دآ السمح فيهو.. نقاء الروح :):) |
سالت استاذي السر عن صاحبو ودفعتو المترجم عبدالله، ياخ صاحبك دا مالو بقى زهجان كدة
قال لي: ماعندو اي حاجة، الكُبُر بس ياخ الكبر دا بزهج زهج شديد خلاص، .... ياخ الموت اكان خلاك الكبر ما بخليك ... لك العمر كله يا دكتور يا امير، |
اقتباس:
قولنا سمح وطعمه ينضاق حلاوة حتى لو سماعهو في الإضنين. قولنا حق الحبوبات والجدود والإتوارثهن الآمات والأبوات، يقالدك بحضن داااافئ وحنين. وخاصتن بعد دخول المحسنات اللغوية من حق خيلانا ولاد بمبا وأهل الشام أهل الأوردية والأمهرية.. ليك العمر واحدة منهن وهي تقال وكأن العمر ليهو مقاييس محددة وهو شئ خارج عن قدرة البشر وهو بيد العاطي المعطي.. أتذكر شيخي الحبيب دكتور حاكم مرة قال ليا: تعرف يا بابكر مشكلة الموت من عدمهو دي عند صاحبها والقال عن نفسهو: الله أحد، لم يلد ولم يولد وذي ما بيقولوا ناسنا في السودان "يا الماك سر زول (يعني ما قريب زول)" فما في طريقة لي واسطة ولا بلصة، يومهو اليقول خلاص. يبقآ خلاص... لا وكمان الأكثر إدهاشً، قولة: إن شاء الله أخر الأحزان.. وكأنهو القائل والمتلقي القول هم خالدين فيها أبدءا أو كأنها تمني بأن الإتقال ليهو الكلام دآ يموت قبل أن يسمع بموت شخص يحزنه موته.. لكن أكيد نعومي الحبيب لك صادق المحبة وجزيل الشكر وربنا يحفظك ويغطيك ويمتعك بكمال الصحة وتمام العافية.. الكُبر الله يلعنهو.. تنطبق عليهو قولة الكرآر؛ "لو كان رجلا لقتلتهو" |
اقتباس:
كانوا بيقولوا ليك. زح الحاجة دي وكان طوالي تقوم بفعل أنك "تقيم هذا الشئ من مكانه" ولا زح ليا كدي بمعنى أبعد عن طريقي أو أنهو راكز ذي الجبل وما بتزحزح بمعنى أنه في مكانهو ثابت.. جونا أهلنا من التعايشة والزيادية ليدخلوا علينا مفردة تحمل المعنى وهي كسكس وعرفنا أنها تعني زِح وبعدها كلمة توُّر وبنفس المعنى وإتضح أنه في كتير من بلاد ناطقي الضآد يقال: أبعِد أو قوم وبعضهم يقل ليك؛ إنقلع... مع العمر تزيد المعلومة إتساع وغير التجارب من الأمور شيتن عجاب.. الكُبر سمح بديك فرصة تتعلم أكتر. لكن؟؟ ما بتستمع بيهو لأنهو بقآ ماضي :( |
الحبوبات يا حليلهن ليهن أكثر كبير في هز الشخصية السودانية. الله يرحمهن كانن هي مبعث أول كضبة الواحد يعيشها.
لمن وعييت وفتحتا والأمور قدامي بقن واضحات وبدت أخطائي تكتر ومصيرها ديمة كان عقاب. كانت الحبوبة هي الدرع الوارهو تتمركز عشان يصد عنك شديد التعنيف وكم من أنواع التعذيب المختلفة الواقعة تحت مسمى العقاب ومنها؛ الكف الساداتي والكف الصاموتي والفلقة والجلد بأدواته المتنوعة. بدء من الحبل المبروم ومجندل ضفاير مرورا بأفرع الشجر من نيم وأعواد البان من بسطونة لين العصاية وحتى دخلت الصناعة الحديثة لتضيف حبال مغلفة بالنايلون وبالوان زاهية في الأصل كانت بتتستعمل لجلادة الكراسي والسراير الحديد والتي تسودنت فصارت للعناقريب. الجدود كانوا شوية متحفظين فكانوا بمُكر يحولوا شدة الموقف لي تخفيف ويصيغوا ذلك تحت بند الماضي وأيامهو. فيذكر ولي الأمر بأنه كان في غابر الزمان طفل ويخطئ وهذا كان سلاح ذو حدين. فلو كان ولي الأمر مشاغب ودائم يعاقب بشدة وطراوة. أكيد ما حيستجيب لي شفاعة الجد وسينزل العقاب بعنف ما كان يخضع له في ماضيه ولكن لو كان الجد من أولائك النفر الرحيم فهنا أنت تكون إستفدت من حماية الجد وهو أنقذ الموقف دون أن يكذب ذي الحبوبة.. يا أخي دي وإتا كرعينك مخرخرات بسبب التشطيف السريع من غبار الدافوري وهي ممكن تحلف أنك كنت معاها في بيتها المجاور بنفاج يربط الأسرة بالجيرة تقوية لرابط الدم وفي حينها ولي الأمر بيمشي الموضوع قدامها إحتراما لكن بعد كل صباح نسماتهو تفرح بيجي نهار شمسهو تسيح دماغ الضب وليلهو حالك دون كهرباء وإضاءة شارع وإن قلتا هم نسوا، فأنت واهم لأنهو الحصل بس. تأجل عمل اليوم للغد ليتم النجر والجزر وكانهو العقاب أضيفت ليهو خميرة بيرة ويزيد بدل كورية شوربة حتى قدح العصيدة ما بيوسعهو. ما هو القصة أنك في وكتها كان العقاب حيكون حسب المزاج في وقتها، ممكن كفين تلاتة وشلوت علي الماشي. لكن الحبوبة الله يرحمها غير أنها سمحت لولي الأمر أن يخطط بي رواقة ويفكر في أقسى أنواع العقاب أولن للخطاء الذي أُرتكب وثانيا أنهو ولي الأمر كرنر الحبوبة ووضعها في مأزق الكضب وأنهو العقاب بمثابة تضحية لمغفرة كضبة الحبوبة.. الكضب قصتهو مجتمعيا في السودان طوييييلة لكن فيها فجات راكزة وجميلة.. بين الجدود والحبوبات، الأباء والأمهات، جيلنا منهن ومننا ولي للناس الحسي.. |
اقتباس:
هنا من التفاسير لمعنى الكلام دآ؟ الرجال بغلبتهم دي بيسمحوا لأنفسهم بكل مسموح مباح وحتى ممنوع ما بيصح. عديل وبي حمرة عين يكذب ويكضب ويقول غير الصدق ويلوي عنق الحقيقة لمن يفطسها. بكضب في علاقاتهو الخاصة والعامة والأسرية ولا بتلفت بكضب بفكر ميكفليي بكضب بمنهجية بغاية الرزق والإسترزاق والعيش برغد بكضب من باب الفشخرة وبكضب دون خوف أو محاسبة لاحقا. يقولوا أنه الكضب أنواع والوان.. كضبة بريئة وكضبة بيضاء.. الشخص الكذاب؟؟ أنا بيتخيل ليا أنهو بشوف روحهو صاحب ملكة فوق العادية. فهو أكثر من الممثل قدرة وأنبه من البشر العامة مع حقيقة الأمر أنهو بيلعب بي شخصتهو وبختها في محك الإنحطاط حين تكشف الكذبة فيهوي الي قاع بئر الإنحطاط ويصبح شخص تافه لا يثق في حديثه ولا يحترم في شخصه.. ما هو الكضب حبله صغير.. في بعض الحالات يكون الكذب لست بقصد السوء وتبقى عليهو قصة إما لإسترضاء مرغوب أو لعقاب مرهوب ومثل هذا الكذب غير ضآر ويمكن أن يضمن ككذب برئ و كذبة بقصد إصلاح وسماح وإرضاء وهذا الكذب الأبيض.. مشكلة الكضب غير قصر حبله إلا أنه يستوجب عند الكضاب قدرة عقلية جبارة وعلى هذا يقال: إن كنت كذوبا كن ذكورا.. |
اقتباس:
هذه الشخصية التي نعمنا في طفولتنا بوجودها لمن تقالدك تتشمشم فيك بمحبة وحنية خالصة. حتى لو كنت مغبر ومكتح ولا حتى راجع من الزريبة جنوب سينما العرضة ولا سوق السمك في الموردة ولا الخزان بجبل أولياء أو مثلن من القماير فهذه الأماكن من على بعد وريحتها نافدة وقوية منها ما يزكم المناخير ومنها ما يدوش الرأس ومع دآ برضك تغمتكآ بقوة مبعثها المحبة الصادقة. الحبوبة شخصية تجسد ليك قيمة التسامح، فهي إن غلطتا مغطياك وإن حزنت ياها الحتجر مفحضتها وغامتا ليك البفرحك وحتى في كتير من الأحيان لمن تكون مفكر ليك في مشروع هي أول زول تصارحها بيهو لأنها بحاسة ما فوق وما تحت الأمومة ( على وزن فوق البنفسجية وتحت الحمراء) وبرادارات إستشعاراتها الغير عادية تكون عارفة أنهو في شئ في داخلك. كيف لآ وهي الربت أبوك وأمك وخيلاتك وخيلانك وعماتك وأعمامك يعني خبرة من تجارب متعددة ومدعوة بحب يفوق قيس وليلى ووتاجوج والمحلق وخاصة لو في مشروع مستقبلي فهي. أولن تبادي بتكون أول الشاعرين بأن هناك أحاسيس داخلك ومتكتم عليها وبحقها المكتسب في أن تكون الأجراء في مبادرتك حبوبتك وأكبر سلطة في البيت: مالك يابا ذي الشئ حاقص بيك في قلبك ، كدي تعال جمبي وقول ليا. ثاني شئ هي الملمة بكل إخفاقاتك وإجرامك والديمة بتحميك فواجب عليك أن تشاركها الأمر فقد تحتاج لدعمها.. رغم أن الحبوبة هي الحبوبة لكن وذي ما بتقال: في خيار وفقوس.. الحبوبة من جهة الأب أم من جهت الأم؟؟ المعايش أنهو البت دايمن لي لأبوها والولد أقرب لي أمهو وهنا تجي حكاية الحبوبة أم ياتهو فيهم. بتذكر وإحنا أطفال وظنيتني ذكرتها قبل كدآ. حبوبتنا نفيسة كانت ياهو ساكن الحوش بعد وفاة جدي بابكر وكان يكاد أننا كل مساء بنمشي ليها في الحوش وتعليقها كان لمن نجي "مدينة جابت الجهادية بتاعينها" هو طبعن ما كره لينا أكيد ولربما يرجع لأن عدد كبير من أسرتها إستشهدوا في فتح الخرطوم من قبل جيوش الأنصار لكن كما المعاملة المعاكسة كانت من السيدة بتول الأمير يعقوب لمن ندخل عليها في بيتها. الحبوبة هي ياها الباقي ليا ديمة ظاتها ما بتتغر في طباعها حتى لو تغير المكان ولا الزمان (أذكر على سبيل المثال حبوبة أولاد يوسف أخوي وهي أيرلندية في القرن الحادي والعشرين. كم هي إمرأة جميلة وعطفوة على إبراهيم ومدينة من هنا لها التحايا) رحم الله حبوباتنا كان من جهة الأم ولا من جهة الأب فقد كانن رحيمات، كريمات وطيبات... |
العزيز حسين عبد الجليل..
توجع على الوطن وعلى الأحبة في مقابر فاروق وزاد وجعه تغيير محطة التعاون لي محطة بشدار.. وظنيتهو لو كان حالهو حالي كان ما إتوجع. لأنهو الوجع لمن يكتر ويشد البيحصل أنهو الزول بيتبلد وببقى لا بحس ولا بشوف ولا بيسمع. والأحسن يبقى سادي دي بي طينة ودي بي عجينة.. الحصل أني سافرت مشيت قريت برآ ولمن رجعتا؟؟ كان مفروض أتوجع لمن جامع الخليفة إتغير والمولد بقى في فسحة بين البيوت شمال شرق أمدرمان, لكني ما إتوجعتا لأنهو البيحصل أنهو الوجعة المؤلمة بتغلب الوجعة وشارع النيل بقى أقرع دون شعر يغطيهو من هجير الشمس وشارع الجمهورية بقى صاااااااااني بعد المغيرب وضلمة. وسافرت تاني وكت كتا ملاحظ في البوليس ولمن رجعتا ما إتوجعتا أنهو البوليس بقآ الشرطة الملاحظ بقآ نقيب والأسكلآ إتوزع بين متحف وقاعة.. رضيت بالنقيب وبي البوليس وجاء الوجع الأكبر. وسُفرتا. أديتها صنة زيادة عن تلاتاشر سنة خوفن ما أتوجع بأني ألقى البوجع أكتر من الوجع دآك.. ورجعتا. جنينة النزهة "حديقة الحيوان" بقت فندق خمسة نجوم وصينية الحركة بقت بلا حركة وإتجاه واحد.. وعفراء بقآ عندها تنل ومول وروتانا كمان في اللصق هوتيل. لقيت المعهد الفني إتغير لي التقانة وقدام المطار في شارع أفريقيا صرح إسمه نادي ضباط القوات المسلحة والجامعات بالهبل وكافوري لا لبن ولا حليب ما هو بقآ سكن العسكر. ما هو ذي ما قلتا ما في شئ وجعني في أمدرمان. لأنها حافظت على شكلها حتى مبني الإذاعة والتلفزيون والمسرح القومي ودار الرياضة ياهم ظاتهم وطبعن الفضل ما بيرجع لي الإنقاذ في أنهم عملوا حسب توصيات اليونسكو في أنه أمدرمان العاصمة القومية موقع تراث تأريخي. أبدن الفضل في أنهو ناس الإنقاذ ما شافوا فيها كجة ذي الحتت الإتقاسموها بيناتهم. ومراعاة لكِبر سني وأكيد أنهو الوجع الجسدي الواقع فيني بيكفيني. فما مشيت تاني اللهم إلا قبل كم سنة ولي يوم واحد ومن المطار لي بيت العزاء وبالعربية ظاتها الكانت مضللة.. بفتكر أيتها زول وهو برآ وممكن يتوجع. أخير ليهو؟ يقعد في حتتهو ....... |
.. اخي الحبيب وكبيرنا .. دكتور بابكر
.. السنوات الذهبيه .. هي هذه التداعيات .. والاشارات الذكيه .... للاجيال .. لكي تتعلم من التاريخ و .. الخبرات التراكميه .. وفي هذا العمر ما اجمل الاحساس بحاله الرضا ... والشعور بالالفه مع الاخرين ... .. كل الحب .. |
[QUOTE=بابكر مخير;555190][B][COLOR="DarkGreen"][SIZE="5"]الحبوبة
هذه الشخصية التي نعمنا في طفولتنا بوجودها لمن تقالدك تتشمشم فيك بمحبة وحنية خالصة زز الحبوبات .. اه .. يادكتور الحبوبه .. مشتقه من الحب .. وانا تربيه حبوبات ... .. و ... .. هبشتني في اللحم الحي ... لكن بمشي .. وبجيك صادي .. لانه ... يتعين علي اول ان .. ( اترس ) ... تحسبا للفيضان ..لان منسوب ..... ( بحر الموده ) .. عالي و لو .. انكسر .. ترس .. الذكريات .. حا يجرفنا .. فيضان الحنيه .. و نغرق .. وحا يشيلونا .. ( للطواري ) ..اصلو ما في شي كاتلانا .. غير ..( العمته ) ..و ,... ( الشمه ) ..و .. ( العصره ) .. واللبده بقربهم .. تحفنا هذه الهاله .. من الحب.. والعاطفه ..و بالتاكيد ...يا دكتور .. نتاج تربيه الحب .. دي .... شخصيه عاطفيه .. .. تتبع قلبها وعاطفتها .. في كل امور حياتها ...تتاثر بالذكريات .. وتسيل .. دموعها ..عندما تحركها العواطف ... .. بجيك صادي .. كل الحب .. |
اقتباس:
في ذِكرهو بيطابق زولن ظنيتهو إتنينتنا نتشارك في معزتهو.. زولن رقيق الحواشي وقوله أصلن ما بفوت الذوق.. كلامهو عذب، أسهل من السلسبيل بنبلع وأحلى من سلسبيل الجنان.. أكتب وأنا أسطر من هنا ليين هنووووك وبرضك ما بلحق... دحن شوف جنس دآ :cool: (ابرق ببسمتك التى لو اشرقت .. .. ما اختار اهل الارض شمسا غيرها ... .. وهى التى من اجلها قد اطفئت نار المجوس .. .. وهى التى نحيا عليها فى زمان القحط .. والدم .. والهزائم ..) https://www.alkhaleej.ae/%D9%85%D9%8...B7%D8%A8%D9%87. راجيك تصد وريتك تلكع... :cool::cool: |
[QUOTE=بابكر مخير;548786]http://www.sudanyat.org/vb/uploaded/851_1577109476.jpeg
[B][COLOR="DarkGreen"] أ المرة التانية كان جانا برضك يوم أحد السير بول مكارتني في الحقيقة جابتهو بتهو ظنيت إسمها تشيلسي اللهي كانت زبونة مستديمة. أها برضك عنظتزت الرباطاب فوتت عليا أتصور معاهو.. >>>> كبيرنا .. دكتور بابكر نهايه اسبوع سعيد .... الذين صافحتهم ... يشبهون الالهه .... في الميثولوجيا الاغريقيه اولا الراس تافاري هيلاسلاسي ... نسل بلقيس .... اهل جامايكا يعتبرونه ... الها ... وان بلاده هي ارض الميعاد ... زار جامايكا وهطلت الامطار ... واهل جامايكا كان ما بخافو ... الكضب .. قالوا شاهدو اثار المسامير علي كفه عندما رفع كفه للتحيه ... واحرج البابوات في الفاتيكان وخلاهم يتضايرو ... دحين يادكتور .. انت صافحت .. هذا الاله .. هل شاهدت اي اثر للمسامير علي كفه !!!! ثانيا بول ماكارتني كاتب نصوص وايات .. ديانه ... البيتلز التي اجتاحت كل الكره الارضيه ...كالزلزال .. ملؤ العالم صخب وضجيج ... وثقافه ... وهوس ... وانقذوا العالم من الملل وفي حمي .. الاجتياح التي انتظمت كل العالم ... قال كبيرهم في تصريحه الشهير ...في الستينات We are more popular than Jesus …….. غايتو يادكتور هم موجودين الي الان !! واهو .. جون لينون .. وشعار اغنيته Imagine Above us only sky يزين مطار جون لينون في ليفربول ... دحين يادكتور .. وقت الاله ده دخل مطعم الماندولا السوداني .. وضرب الشطوط ... كان توثق للكلام ده بالصور .. كان الان مطعم الماندولا .. مقصد ومحجه ... للمهوسين من كل العالم ... وان منطقه Westbourne grove سوف تصبح اشهر من Notting Hill Carnival اليوم الجمعه .. المائده كانت .. الكسره والمفروكه ... قلت لصديق .. بان بول ماكارتني .. ضرب كسرتنا دي بالمفروكه ... نظر لي بكل اشفاق وقال لي .. ياسيد .. انت رجعت لي ايام .. الهيبز .. والهلوسه .. تاني !!! الثالت جواهر لال نهرو ده الاله ... الذي ... اخترع الهند .. بعد كلام ونستون تشرشل داك ... بان الهند حاله جغرافيه ... والاله ده ... في باندونغ .. استغني عن منديل حبيته الابيض .. و كتب عليه .. اسم السودان .. باللون الاحمر ... لما الاونطجيه كانو عايزين ياكلو بعقلنا حلاوه !!!..... مرفق فيديو لزياره نهرو للسودان نحتاج منك تدينا Long shot / wide shot كما يقول اهل السينما ... وهذا يعني اظهار المشهد بكامله والبيئه المحيطه به .... و ...شعورك .. وانت تصافحهم .. و هيئه هولاء االاساطير علي الطبيعه ... وهل احجامهم الجسمانيه علي الطبيعه ... تتطابق تماما .. ما شاهدناه في شاشات التلفزه ... دعوه لتنشيط الذاكره ... عشان .. نقطع لسان ... سموره !!! كل الحب ... https://www.youtube.com/watch?v=GBimuwfHYJk |
اقتباس:
أها أنا حأتبرع وأديها طرف خيت. ما هو أصلهو الشطارة في محاربة الجواسيس أنك تديهو طرف خيت وأهي وتشغلهم بيهو وحتى الإف بي آي ظاتهم يلفوا بيهو وما يقدروا يفهموا حاجة.. شوف بقآ يا سيدي ندخل في لب الموضوع وطرف الخيت...... الحاجة البستغرب ليها أنهو البعض بيمز باللب واللب هو أنواع؟؟ اللب الأسمر والبنقول ليهو الجُرم ودآ كان مشهور خالص بين رواد دآر الرياضة بأمدرمان. أما اللب الأبيض فهو مشهور جدا في مصروبسموهو التسالي وعند الباعة تلقاهو مقومنهو ذي الإهرامات وينادوا "آزئز، أبيض يا أبيض" وعند أهل الشام الأكثر شهرة هو لب القرع (القطين). بتذكر في طفولتنا للترغيب في قبول طبيخ القرع أنهو بيقولوا الرسول صلى الله عليه وسلم كان بيحبهو. قال دعا رسول الله صلى الله عليه وسلم رجلاً، فانطلقت معه فجيء بمرقة فيها، فجعل رسول الله صلى الله عليه وسلم يأكل من هذا الدباء ويعجبه. (عن انس بن مالك رضي الله عنه، قال دعا رسول الله صلى الله عليه وسلم رجلاً، فانطلقت معه فجيء بمرقة فيها، فجعل رسول الله صلى الله عليه وسلم يأكل من هذا الدباء ويعجبه). طبعن بالأمهرية دبآ هي القرع... يا زول عمك سرح فأخير نرجع لي لب الموضوع بدون تسالي :). لكن بالشوتات ال Long shot/wide shot.. أنواع الشوتات والكنا بنسمع عنها "منتهى البراءة:eek:" هي التكيلا والإسلوفافيتسا وB 52 وفي واحدة إسمها البازوكآ، دي شمومة سآكت تروح الزول... في زمن كان مسموح بيهو ياهو الأبيض ضميرك هو أساس وسيد الشوتات في السودان وحتى الفودكآ ما كانت معروفة.. سمعت أنهو لمن طرح موضوع بيع الخمور والمطالبة بحظرها في المجلس التشريعي الأول. طالب بعض الأعضاء بأن الأمر يترك لصلاحيات المجالس البلدية وهي التقرر ما بين السماح بالبيع وبين عدمه.. يعني موضوع شربهو كان يعوم ما بين (منافع ومضار)... منتهى الإعتزاز بالإبنة الصديقة عفاف http://www.sudanyat.org/vb/uploaded/851_1618189040.jpg |
مرة أتذكر وفي مجلس وعامل فيها أني ناقشها للطيش وفهم وفلسفة وشئ لا تعرفهو علماني ولا رؤية دينية فاسفية على طريقتي. يعني المهم فيهو تساؤلات وإجابات إستغرب لها البعض وتحفظ على التعليق فيها بعض أخروكان بين الحضور السيدة الفضلى حسب سيدها بدري.
بين السطور يبدو أن بعض الروؤى ما كانت مهضومة خالص ليها وعلقت بقولة ظريفة. إن شاء الله بنحضر اليوم التقعد تفتي لينا فيهو وتنصح وتبقى فيهو مولانا.. إتذكرت الحكاية دي حسي لمن لاحظت أنهو الناس تتداول مسميات ولمن ترجع لي معانيها في اللغة. بتكون أبعدها أعمق من الفهم السطحي يعني مثلن قول حكاية "الصلاة" هل ممكن تكون هي لحظات صفاء "الصلة" بين العبد وربه مع الإحتفاظ بوجوب أوقاتها وطبعن برضك في من يقول أنهن الذكرن في القرآن عددهن غير البيمارسهو الناس وخاصة صلاة العصر التي بعضهم يقول أنها المعروفة بالصلاة الوسطى وأنهو بعض العلماء مع وضوح أن الصلوات كما ذكر في القرآن مربوطات بتوقيت محدد منها الفجر والوقت الفاصل بين الصبح وام بعدها والوقت الفاصل بين الضوء والظلام وكدآ يعني.. كما أنههو الصلاة ما بس هي شية مسلمين بس ولا أول ما شرعت مع الإسلام فمن قبل اليهود والنصارى كانوا بيصلوا. ومثلن التسبيح هو ما بس الحركة في والعدد سواء بالأصابع أو المسبحة. فمن وذي ما بتقال (من نلفلة القول) أن كلمة سبح تعنى أكثر. وهنا بفتكر المقصود هو الإكثار في ذكر المولى بأيتها صورة من الصور وما شرطن الصورة المتعارفة عامة وهذه الممارسة من الحاجات برضك المشتركة مع الديانات التانية لو تلاحظ المسيحيين في الفاتيكان شايليين السبح وبتذكر أيام الدراسة الجامعية في تشكوسلوفاكيا كنا بنمر بي اليونان وشئ تلاحظة بشدة وإتا قاعد في واحدة من القهاوي المرصوصة حول ميدان أمونييا. أنهو كتيرين من الرجال شايلين سِبح وطوالي يسبحوا بيها وبرضك أتذكر في بيروت على الرووشة نفس المنظر وكانوا كلهم مسيحيين.. والله أعلم |
هي دي ماشة لي وين؟؟
زمن شفع كان الحاكم العام وهو خواجة ومستعمر ولكن كمان كنا شايفين السيدين كما أنهم هم بالنسبة لينا السودانيين هم أكبر من الخواجة الحاكم إداريا. لأنهم سودانيين وشخصياتهم متجمع حواليناها السودانيين بشقيهم الأوسع والأكبر (ختمية وأنصار) وغير كدآ كانوا هم الإتنين أصحاب الحل والربط.. كبرنا شوية والحاكم العام بقى هو رئيس الوزراء وهو سوداني وبرضك السيدين هم الأقوى وهم أصحاب الحل والربط.. وكمان كبرنا تاني ومن رئيس الوزراء! الحاكم بقآ ضابط في الجيش وبي هيبتهو لأنهو هو كان القائد العام وطبعن الجيش حسب المعروف أنهو جسم وطني خالص، لا يظهر ميل لا نحو أي من السيدين ولكن كمان وبما أنهو طائفة مهنية غير صاحبة سند شعبي فكان لابد لها أن تعمل على إضعاف عظمة السيدين لتكسب قواتها. لكن كانت قوتهم أشد وصامدة أمام هذا التحدي ومع مجموعات متنوعة من قطاعات الشعب وهي طائفية المزاج أيدلوجية المذاهب ومن غير أصحاب الإنتماء لجماعات السيدين وإن كان معظمهم أصحاب أوصل مرتبطة بالسيدين. أُزيح الحاكم العسكري.. يذكر أنهو حتى في فترة وما قبل فترة حكم الحاكم العام. كان السيدين نظموا مواليهم وأتباعهم في تشكيلات سياسية داعمة لرؤية أحد السيدين واللذان كان بينهم إختلاف نحو مستقبل البلد هل يحافظ على التاج المصري كسلطة أعلى أم يتخلى من الحاكم العام الخواجة وأتباعهو من أهل التاج.. ثم كبرنا ونضجنا أكثر وهنا بدأت روح الشباب تؤثر على إنتمائتنا فكان الواحد يبقى على بينة من أمرهو سياسيا وأن يختار بين حزبي السيدين أو يتجه نحو واحدة من الطوائف الأيدلوجية "كما أذكر أنهو عبد الرحمن فرح قال خوفا من أنهو يوصف بالبيبسي فقد إحتار الإتجاه الإسلامي" وقد إخترت الحزب الذي لي به روابط تأريخية وأسرية وثقافية. (بتذكر أخواني الكبار الزاملتهم في دراستي الجامعية، كانوا يطلقوا عليا قولة رجعي).. وأنا في هذه المرحلة العمرية عادت الحياة لمسار ما بعد الحاكم الخواجة وما تبعها من حكم رئيس الوزراء السوداني والحاكم العسكري لحاكم هو رئيس وزراء. لكن طائفة العسكر ما هان عليها أن يحكم البلاد غيرهم وهذه المرة لم يكن له هيبة قائد حاكم ولكن من الرتب الوسطية وحكم بسطوة ودكتاتورية لكن الشعب أزاحهو وعاد رئيس وزراء ليحكم.. في سن العمر الوسطي تحالفت فئة بسيطة مع طائفة المزاج الأيدلوجي الإسلامي وجاء مرة ثالثة حاكم عسكري.. هذه الدوامة الما معروف ماشة لي وين. أستنفدت من العمر الكثير فشاب الشعر ووهن الجسد وذبل الرأي.. بعضهم يقول العبرة في الخواتيم. لكن مع الحاصل دآ أنهو الخواتيم حتكون ثالثة الآثافي.. |
| الساعة الآن 06:44 PM. |
Powered by vBulletin® Version 3.8.8 Beta 2
Copyright ©2000 - 2026, vBulletin Solutions, Inc.