في أيام وأوقات الشدة..
منقول وعن الرواة أن عمر بن الخطاب في سنيين المجاعة أوقف حد القطع والله أعلم بذلك).. ومنقول أيضا أن الرسول كان يضحي بكبشين واحد لآل بيته والاني للمسلمين... الحبيب بورقيبة عمل الحكاية دي برضك؟؟ الكرونا هذا الوباء.. غسيل اليدين بصورة متواصلة، لبس الكمامة، التباعد هذه من المتطلبات الأساسية للتصدي لها.. كما يوصى بأن يكثر الناس في شراب السؤال.. وهنا السؤال ونحن في هذا الشهر الكريم؟؟؟ |
http://www.sudanyat.org/vb/uploaded/851_1619693582.jpg
مّا نَعى الناعي كُلَيباً أَظلَمَت شَمسُ النَهارِ فَما تُريدُ طُلوعا علم شامخ رفرف في سماء شرطة السودان سعادة الفريق عبد الله حسن سالم كان لي معاهو الله يرحمه حادثتين.. في 1977 أعددت دراسة عن ظاهرة تعاطي البنقو في العاصمة القومية وكان محتاج فيها لي تفرغ. طلبت من مديري المباشر ووافق ورفعها لي مدير المباحث وكتها ولكنه ما وافق فما كان من ديري المباشر وأخي لاحقا دكتور حاكم إلا أن عرض الأمر على سعادة الفريق عبد الله فوافق ووجه بأن تقدم في المؤتمر العربي الثالث الذي عقد في الخرطوم وقد شرفني شيخي وأخي دكتور حاكم بأن أخذ هذه الدراسة كمرجع في طرح الدكتوراة بتاعهو. الصورة الفوق لي سعادتهو ومعه من ضمن ممن في الصورة دكتور أيا تونج وزوجها أرثر تونج مدراء المجلس الدولي ضد الأدمان والكحول منظمي المؤتمر.. التانية كنت لقضاء أمر ما في مباني رئاسة الشرطة وإذا بي وجه لوجه مع سعادتهو وفي حينها أظلمت الدنيا أمامي وتمنيت لو إتفجت الواطة وبلعتني ولا الأقيهو وفي ذهني قصة شقيق الرائد بيرم حين أمر سعادتهم بي إيقافه لأنهو ما كان لابس الكاب وأنا دآك وكتها قاصي القميص نص كم والبنطلون شارلستون ما دآك جراب البندقية البتفصل عن عابدين عوض والكآب كان وارد مصر ما البتصرف من المخازن. وبهتا أنهو بعد حيتهو التحية العسكرية مدآ ليا يدهو مصافحا وكتها وقعت الطامة الكبرى حسب تقديري؟ وأنا لابس الساعة في اليد اليمنى مع المصافحة بيد اليسرى مسك الساعة وقال ليا: ذي الأنانيا 😳 وإبتسم وأنا في وكتها شفتا في تلك البسمة "يوفُونَ بِالنَّذْرِ وَيَخَافُونَ يَوْماً كَانَ شَرُّهُ مُسْتَطِيراً".. بي قدرة قادر ووصلت المختبر وجري فوق للمعمل وأمني النفس بلحظات هدوء وسكينة وأن يجف فيها عرقي المتطبب كشلالات نياجارا قبل أن يراني أحد لأني وقتها كنت أشبه بالموتى من للأحياء المرعوبين. وحدث ما حدث؟؟ هول وصاقعة وقعت في رأسي دخل فراش رئيسي المباشر وقال ليا: سعادتهو حاكم عايزك ضروري.. أووووبس ومعناها الفاس وقع في الراس.. دخلتا وكان هناك نفر من قادة الأدلة منهم سعادة العقداء محمد يوسف وعمر ساوي والحكمدار عبد الرحيم عبد القادر والذي تحت نضارتهو السوداء شفتا حزن دفين على ما سيحدث لي.. بادرني شيخي حاكم قائلا: يا مخير المدير قال عايزك. ليييه عندك فكرة؟؟.... إرتخت عضلاتي أرجلي وتخلت عن مسئوليتها في دعمي على الوقوف وتنهدت متحشجرا وحكيت القصة بحذافيرها وهنا شعرت الأخوة من قبل هؤلاء الحضور حين تعاطفوا معي على الخير والوعد الجميل بأن فترة الحبس ستكون في غرفة المناوبة وبأنهم سيتعاونوا معي في أن أتسرق مرة مرة كدآ للبيت وفي حالة الوهن التي كانت أوضح من شمس السودان الساعة إتناشر ظهرا وفي فصول لا فيها مطر ولا حتى سحابية واحدة. وجه سعادتهو حاكم عمنا يحي كبير السواقيين أن يأخذني بعربية الإدارة ويستنى وطبع الإفتراضية أنهو حيجيبني للحبس "الإيقاف".. وصلتا وفي مكتب مدير مكتب المدير العام شايف خواجات وحاجات وكميرات ودنيا. إفتكرت أني حانتظر الي أن يفضى ليا سعادتهو وياخدني سولو لكن مدير المكتب قال ليا: أدخل المدير مستنيك 🤔... الله يعني حتكون محاكمة معروضة في وسائل الإعلام.. تماسكت وحييت وقبل كدآ كنت ملصتا الساعة بلا أنانيا ولا بلا حركات مسلحة... قال سعادتهو: يا مخير الجماعة الخواجات ديل بيعملوا في انسايكلوبيديا عن أزياء الشرطة في العالم، فإتا ياخدوا ليك صورة عن لبس الضباط وشوف من صف الضباط والجنود نفرين كمان عشان يصوروهم.. إنزاح الهم وكان أن تمت المهمة ووضعت في انسايكلوبيديا وشفتا منها صورة عند أحد الضباط في شرطة دبي عام 1990... http://www.sudanyat.org/vb/uploaded/851_1619693657.jpg |
الجار قبل الدار
قالوا قصة المثل دآ: أحدهم ضاقت بيهو فقام عرض على جارهو في البيت الهو ساكن فيهو بمبلغ أكتر من السعر. قام الجار واجهو بحقيقة السعر. فرد صاحبنا المتضايق وقال ليهو: أنا في الحقيقة ختيت فوق تمن البيت، كمان تمن حسن جيرتك... أيام الطفولة عشنا مع الوالدين في أمدرمان وبين الأهل من أنصار الإمام المهدي وخلفاءه ودآ. ما بين حي الأمراء شرق يعني بالعربي الفصيح "العباسية" فكنا من السعداء بأننا ننسب للعباسية تلك البقعة الجميلة ومن بعدها لحي الأمراء غرب وهي ممكن تسميها العرضة غرب وكذلك منطقة زاخرة بالعظماء والمشاهير.. أيام الصبا عشنا مع الوالدين في الخرطوم شرق شارع عثمان دقنة وهي منطقة سكن موظفي الدولة من مدنيين وعسكريين وشرطة وقوات نظامية. كان الوالد حينها كبير الصيادلة في وزارة الصحة. وكذلك فترة زمن كان الوالد في مشواره، البدء في إنشاء كلية الصيدلة جامعة الخرطوم حسب توجيهات الزعيم أزهري. ثم إنتقلنا للسكن في 10 شارع الجمهورية حين أصبح الوالد عميد لكلية الصيدلة وهناك تنوعت جيرتنا ما بين موظفي الحكومة وأساتذة الجامعة حيث تناوب العديدن منهم وكان أن حظينا نحن الأبناء بكم من الصداقات. صعب أن أقول من كان أقرب الي القلب فهم كلهم كانوا إخوة وأبناء خالات وأعمام مما وثق عرى الصداقة فقد كن الأمهات كالأسرة الواحدة وكان الأباء كإخوة أشقاء للوالد.. كان مستر أحمد عبد المجيد (طبيب الأسنان وله مؤلفة عن سرطان الفك) والخالة حياة قريبين لنا كالأم والاب وذريتهم كانوا أشقاء.. غيب الموتى بعض من الأفراد من الأسرتين الشقيقتين وفضل البعض الأخر يعيش تلك الأيام الجميلة والذكريات الحلوة. الي أن جاء الناعي لينعى وفاة أخي الأصغر سيف اليزل أحمد عبد المجيد.. إنا لله وإنا اليه راجعون وله الرحمة والمغفرة الرفيق قبل الطريق "إذ يقول لصاحبه لا تحزن إن الله معنا" وهنا يذكر أننا في الحياة دي ذي الماشين لينا في طريق والمشي فيها للزول براهو موحشة وصعبة فأحسن أنهو يكون بي رفقة. والرفقة أنواع.. رفقة درب جمعتك بيها ظروف خارجة ذي ما تقول المدرسة وهناك ترافق ليك زول ولا شلة. رفقة حياة ودي هي في الأصل شراكة بين إتنين فيها متطلبات ووفاق وتنازلات وهي قدر ما قوية إلا أنها بسمك الخيط إن شداها طرف إتقطعت. رفقة واجب وهي قول مثلن بين الدياشة رفقة بين صاحب العمل والشغال معاهو ودي بتربطها المصلحة ولا رفقة كدآ براها ناتجة من إعجاب أو رغبة ودي عمرها محدود :eek: |
أخونا أحمد طه
فرع ليهو بوستن ظريف وتداخلتا فيهو.. وحفاظن على حقوق ملكيته على بوستيهو وحتى ما أكون ضيف ثقيل.. بواصل الحديث هنانا... الساعة دي يعني أقول عشقتها وبقت معاي مدة وليها ذكرى عزيزة ............. وأنا في لندن لمن هاجرتا ليها (لاجئ) فكرت في الجمعية بتاعت مكافحة المخدرات وسط الجاليات العربية (أنسان) وكتا بساكيك في الموضوع مع ناس ويستمنستر وتشيلسي وكينغستون... إستمرت ذي كم شهر. مرة وبتونس مع بنيتي زوبة مالك عن الموضوع وهي لاحظت الساعة. فقالت ليا: يا خال كدي ساعتك دي بشكلها العجيب دآ. ختها ولو عندك ساعة تانية ألبسها.. ما سمعت رأيها وما ظنيتني كنت ناوي لو لا أنهو تاني يوم الصباح وأنا ماشي أتلويق مع الخواجات عن موضوعي. ضربتا الساعة دون قصد في درابزين السلم وإنكسر قزازها فرجعتا ولبست الساعة التانية وهي كانت هدية من أخي الحبيب عبد الوهاب مكي. أول ما وصلت المكتب المفروض أخد منهو الموافقة على الجمعية قابلني "جون بيفرلي" وهو المسئول وأخبرني بالموافقة وقد كان "أنسان".. |
إن قلنا نصنف الكُبر وسط الطبقات الإجتماعية التلاتة.
العليا والوسطى والدنيا نلقاهو متربع في العليا وخانة البرجوازية برتياح. ما بيهم إن كان هي ولا هو من ياتهو درجة إقتصادية، عامل من البروليتاريا جيوبهو خاوية ولا تاجرن مريش خزاينهو راوية ولا حتى خوجة، دكتور، مهندس ولا محامي سمعتهو واسعة وصيتهو داوي.. لمن تكبر تلقى الناس تديك مقامن عالي ورفيع وتعاملن وديع!؟ في الجلوس يقدموك للكرسي المريح. إن كان للباص ناوي الركوب تلقآ الخلق ذي البدي قاردات (bodyguard) متلببينك وبرفقة ماسكنك وكأنك لوح يماثل قزاز الكريستال خايفين عليك من الإطاحة وبعدين كسر الرجل ولا الحوض وطولت في المشفى الرقاد. حتى في الأكل بيكون منقى بي عناية، يدخل ساهل ويخرج برتياح وإن كان البطن كركبت قدام الجميع يقابلوها بي سماح حتى لو العطر من بين الثنايا منهو فاح.. يا أخي دآ حتى العالم كلهو بيقدم هذه الشريحة (المكلفة) في البداية. شوف حت لمن بدوا اللقاح ما قالوا أولن شطرن تكون غني ومرتاح ولا مليونيرن مرطبن سواح وماشي في البلاد سواح. قالوا من هم فوق الستين ويعني ناس السبعين وتمانيين ولي المية فبراح. عربات التسلآ وذاتيت القيادة ما ياها أصلن تتوافق مع قدرات الكُبار، الريموتات مقصودة بي الإتآ قاعد وتدير الأمور من بعيد ما تحتاج تتحرك وإتا تبقى ساكن ودي أصلن حقت الكُبار وشوف في التقنية بتاعت التلفونات ممكن تكبر في الفناطي (fonts) لمن الشاشة بالكآآآد تشيل حرفين.. يابا هو شنهو الما عملوهو جديد وما المقصود بيهو راحة الإنسان.. مش ياها دي عيشة البرجوازية.. بلا شيوعية بلا لمة.. بتذكر أيام القراية في تشكوسلوفاكيا. نقوم الصبااااااااااح ويكون عندك معمل بيبتدي الساعة ستة صباحا وقدام الكلية كان في حانة وبتفتح من بدري وكل يوم من دآك الوكت تلقى العمال بيضربو ليهم بربور وشوت بتاعت إسلوفوفيتسا يروقوا بيها بعد شفت المساء وهم في طريقهم لي بيوتهم وكان بتذكر متوسط العمر ياهو ما بين العقدين الخامس والسادس.. لكن كمان للحق كانوا برضك برجوازيين لي ناس العالم التالت مرتاحيين. لا هم سكن ولا تعليم ولا علاج.. إبقو طيبين وما تشيلو همن كبير الكُبر فيهو الكتير من المزايا والماضاقهو ربنا يديهو الصحة والعافية ويضوقهو. لكن كمان ما أكضب. فيهو كتير من الأوجاع ما بتنعرف إلا لمن الزول يضوقهو |
اقتباس:
و لذيذُ الحياةِ أنفَسُ في النفس و أشهى من أن يملَّ و أحلى و إذا الشيخُ قال أفٍّ فما ملَّ حياةً ، و إنّما الضَّعفَ ملاّ آلةُ العيشِ صِحّةٌ و شبابٌ .. فإذا ولّيا عن المرءِ ولىّ (المتنبي) |
اقتباس:
القصد يابا الطموح والعزيمة والإصرار عوامل إن إتوفرت الشيخ ما بيقول أفٍّ لكن بيرجع بالحياة ويركب آلة العيش وصحة الشباب.. يعني يبقى مكينيكي ويغير الشنابر ويعمر المكنة واللهم أننا صايميين يا "كوكي" ولا شنهو... وإن شاء الله أحمد طه يكون عارف أننا بعض مرات الصواميل براها بنتحلج وياهو دآ الكُبر ظاااااااااتهو ;);) |
اقتباس:
بتذكر الجلوس في المراحل الدراسية الأولى، الكتاب والإبتادائي.. في الفصول أنهو كل إتنين بيشاركوا جلسة وهي المعروفة بالكنبة وتتكون دكة للجلوس، ملحق بها تربيزة مستطيلة من طابقين العلوي في منتصفهو المحبرة والسفلي بتحشر فيها شنطة القماش الفيها كتبك.. كانت الكتابة بريش رأسها من الحديد ومقبضها خشبي تغمس في المحبرة والتي أخذت الإسم من سائل الحبر وهي على مفهوم شجرة التبلدي يخزن الحبر فيها. بعضهم من أبناء الحلتهم متيسرة كانوا بيجبوا معاهم تبلدياية من القزاز ملئ بحبر "الباركر" الفاخر وبدل الريشة حقت الذينا كل شوية تغمس الريشة في المحبرة كان ياهو قلم التروبن طبعن فكرتهو أنهو مستودع لحفط الحبر السائل (قلم النافورة) يسهل إنسياب الحبر لرأس القلم الذي هو بنفس شكل راس الريشة ويعجل عملية الكتابة ودي كان نقطة إيجابية للمرتاحي أسياد أقلام الحبر.. وقصة الريشة ليها ميزة وفي نفس الوكت نقص؛ الريشة إستعمالها بجود الكتابة لأنهو الزول لابدن يتعامل معها بمهنية عالية وإلا مليت الكراس والكنبة وهدومك بالحبر وجلوطآ الدنيا وعليه أبو لسانيين (واحد من الأسماء التي تطلق على سوط العنج الذي يستعمل كأدة للعقاب، يعني لو قالوا ليك نضف الحتة وإن شاء الله ألحسها مش أخف).. من الأشياء البتذكرها أنهو الكراسات كانت أنواع مخصصة لإستعملات ما يكتب فيها على الأسطر والسطر هو خط يمتد بالعرض من ذي نص سنتمتر من حافة الصفحة. بتاع اللغة العربية مخطط وبين كل خط وخط ذي قول سنتمتر وكراس الإنجليزي تلقى الكراس مسطر بي خطين بيناتهم ذي قول أقل من نص سم ويفصلهم ذي سم من الخطيين اللاحقات، كراس الرسم صفحة بيضاء دون خطوط وبتاع الحساب دآك التقول قميص كاروهات مربعات سااهي. والكراسات مختلفة غير الغرض كمان النوعية، في كراسات ورقها ذي الكّرِب ووحدات التقول دمورية وفي ديل بالذات يستوجب التعامل معاهم بحرفية عالية ومهنية متميزة لو كنت بتكتب بي ريشة لأنهو ذي البزرعو والحرف غير أنهو بيبقى bold كمان بيكون ليهو ظلال. ناس التروبن ما بيعانوا من دي المشكلة... وعلي الهامش كان عندنا جدي مجذوب مالك وهو أصلن قاضي شرعي لمن نزل المعاش فتح ليهو "مكيتبة" كدآ في طرف بيتهو وما من ناحية الشارع النسبين رئيسي، لا في الزقاق الذي بالكاد أتنين يمشوا فيهو متلاصقيين الكتفين (يعني فكرة تخالط الحبكانة! الظروف الهندسية للزقاق ظاتها ما بتسمح) فكنا نتمول من هذه المكتبة والتي كانت لينا أطفال العائلة من تلاميذ، ذي التكية (طبعن التكية هي المكان الذي تقعد فيهو وترقد فيهو ودون ما تدفع مقابل المادي "شيخ بابكر بدري في كتاب تأريخ حياتي ذكر تكية الزبير باشا في القاهرة"). رحم الله جدي مجذوب ورحم الله زوجته الخالة عديلة (الست) فهو كان من عندهو بيدينا لكن في أكتر الأحيان كانت الست بتسهل لينا "سلب" المكتبة غير أنهو أسطى يوسف كان في كتير من الأحيان يقف سدا ضد الروبري (robbery) التي كنا نمارسها بتلذذ.. إييييييييك كانت أيام |
اللّـهُمَّ وَأَسْأَلُكَ بِرَحْمَتِكَ وَطَولِكَ وَعَفْوِكَ وَنَعْمائِكَ وَجَلالِكَ وَقَديمِ اِحْسانِكَ وَاِمْتِنانِكَ اَنْ لا تَجْعَلَهُ آخِرَ الْعَهْدِ مِنّا لِشَهْرِ رَمَضانَ حَتّى تُبَلِّغَناهُ مِنْ قابِلٍ عَلى اَحْسَنِ حالٍ وَتُعَرِّفَني هِلالَهُ مَعَ النّاظِرينَ اِلَيْهِ وَالْمُعْتَرِفينَ لَهُ في اَعْفى عافِيَتِكَ وَاَنْعَمِ نِعْمَتِكَ وَاَوْسَعِ رَحْمَتِكَ وَاَجْزَلِ قِسَمِكَ يا رَبِّي الَّذي لَيْسَ لي رَبٌّ غَيْرُهُ لا يَكُونُ هذَا الْوَداعُ مِنّي لَهُ وَداعُ فَناءِ وَلا اخِرَ الْعَهْدِ مِنّي لِلِقاءِ حَتّى تُرِيَنيهِ مِنْ قابِلٍ في اَوْسَعِ النِّعَمِ وَاَفْضَلِ الرَّجاءِ وَاَنَا لَكَ عَلى اَحْسَنِ الْوَفاءِ اِنَّكَ سَميعُ الدُّعاءِ .
|
اللهم آمين يالله . نسال الله ان يبلغك مرادك بقدر روحك الطيبة ، ويحفظك بحفظه الجميل وهو القادر علي ذلك .
|
شوف بالله مع الكُبر كيف تشوف كتير.
آلتين عشتا تطورهم بصورة مذهلة.. التلفون بتذكر زمان كان تلفونا ياهو دآ الأسود مكون من سماعة يربطها مع الجهاز الأساسي سلك كهربائي مغطى بنسيج قطني وكان حسب ذاكرتي أنهو السلك دآ يصبغ عليه لونيين الرمادي والأخضر، أما السماعة الجسم الأساسي فهن مصنوعات من مادة تشعر بأنها خليط بين البلاستيك والسيرميك وعلى واجهة الجسم الأساسي قرص معدني فضي اللون وفيهو فتحات في مقاس أصبع اليد. (ما أكتر وصف الصورة تحت). بعد التلفون دآ وعلى نفس الشكل لكنهو من البلاستيك وألوانهو عديدة، شئ أخضر وأحمر وحتى البمبي "السيكسي" فيهو. عشنا وعايشنا طيارة الداكوتا والفوكرز والكومت والكونكورد والطيارات العسكرية عشنا كمان البنطون والقطر البيمشي بالفحم وعربات الكآرو البجرها الحمار والبجرها الحصان أو البغل. عشنا وشفنا تمثال غردون وكمان برضك لمن إتشال وكذلك كتشنر وإتعاملنا بالتعريفة المقدودة في نصها وكان بتجيب شئ والقرش المرسوم فيهو الفارس الراكب جمل والطرادة الحمراء وهي قيمة المشوار من الخرطوم لأمدرمان وبي العكس وركبنا الترماج.. ومن بعدها أنتقلنا لمعايشة العربيات من ديك البدوروها بي المنفلة لغاية سيارات التسلا. عشنا والحمد لله دآ كلهو لغاية ما حسي إحنا ظاتنا بقينا للحركة محتاجيين منفيلة ما الركب إلا ركازات (دكتور أبراهيم العجب وهو دكتور عظام مشيت ليهو قام صرف ليا دواء شراب لكنهو معبء في إسكوانات كل واحدة ذي بوصتيين والدايمتر ذي أقل من نص بوصة وهو من أولائك الداترة الحلويين ذي ناس علي كوباني ودكام وحسن نور الجليل الله يرحمهم وهو ربنا يطيل في عمرهو يحفظ ليهو صحته وعافيته، نظرتا ليهو بأن أكل الكوارع ما بيفيد، قال ليا خلاص قول دي شوربة كوارع وبتسندك) https://www.youtube.com/watch?v=lkLgdzQIgeg و [youtube]https://www.youtube.com/watch?v=gQyL1p0P-ZE[/youtube] |
السماء بضيائها والجنة بنعيمها والنجوم بعددها والشمس والقمر. فيهن وفيهم الجمال والكمال، خلقن وخلقوا رحمة ومغفرة، فرح وسعادة، من عند الإله عز وجل أجر بعد حساب كما فيهن وفيهم، الحياة والممات والبزخ.
لا يكتفن ولن ولا يكتفوا ولو الي يوم الدين بل يقولن نريد نحن فهل من مزيد.. اليوم صعدت روح كان ضيائها يملاء ويفيض، تغيب إنسان أقل ما يوصف به؛ أنه عزيز، غادر دنيانا الفانية ملاك حيث كان دوما بين الملائكة أن يكون. دكتور إدريس أحمد الحاج لا بكائي ولا دمعي سيشفى غليلي ولا كلامي وأسطري يعرضا حالي. شقيقي الحبيب، أخي وصديقي، مطببي ومعالجي. كنت دوما في دعائي لك وتمنياتي الصادقة لك بالشفاء. إن لم يستجاب لي ذلك فيا رب الكون وربي، يا صاحب العيش الأبدي، يا الله ويا واحد، يا رحمن ويا رحيم، يا قوي ويا لطيف بإسمك وبإسم كل من ترتضيه من الخلق أجمعين. ألهم أنت ربه وخلقته وأنت رزقته وأنت هديته لدينك الحنيف وأنت قبضت روحه وأنت الأعلم بسرها وعلانيتها. جئتك اليوم طالبا الشفاعة له أن تغفر ذنوبه وقدر إحسانه جازيه إحسانا وقدر خيره أغدق عليه الخير في جنات النعيم. [youtube]https://www.youtube.com/watch?v=NmI8y5x6cYA[/youtube] |
"fragility" كلمة بالإنجليزي عكست واقع الإنسان مع الكُبر..
العاطفة تعكس هذه الكلمة. تشوف مشهد في التلفزيون قدر ما كان عاطفي دموعك ترترت، تسمع خبر محزن وعيونك تنزف سيل منهمر من الدموع والغريبة أنهو يقولوا ليك: مع الكُبر العيون تدمع دون سبب وذلك ناتج عن جفاف العين وما علينا هم أدرى في علمهم. الشدة في الجسم برضها تعكس معنى هذه الكلمة. مع الكُبر لا بينفع تجديد ولا بينفع إعادة تجميع ولا ترميم وإن الزول حاولهو ياهو شوية سنين وترجع ريمة لي قديمها وكأنك يا باذيد ما غزيت. قلتا تزرع سنون يبتدي الفك يضعف ما هو طبيعي الكالسيوم في الجسم دوبك بسند العظام الأساسية نا كرعين وحوض. أها يقولوا ليك المسامير الماسكة السنون إنحلجت وإلا تزرع فك كامل بي ضروسهو. وقصة العظام والكبار قصة. بس أبقى ينكسر عضم لن يكون هذا نهاية القصة علاجه، لا بل بداية السفرة التي قد تؤدي لعالم الأبدية المنشود. هذا الكسر يجبر على تقليل الحركة وبعض مرات يعيق الحركة ويجعلها مستحيلة مما يعني الرقاد في السرير ودآ ياها موية في الرئتين وتقرحات و و و و.. هشاشة وضعف ووهن، هن ياهن ال fragility مع ومن وبي الكُبر |
من الخرطوم لأمدرمان وبي العكس وركبنا الترماج..
..... دكتور مخير لك كل الحب ... عيد سعيد .. وكل عام وانت بخير وربنا يحميك ... و يحفظك من كل مكروه ... قلت لي .. .. القطر البمشي بالفحم ... انت جوفك ياكل اللهيب ... وانا جوفي بياكلو اللهيب ... ده قطر .. ( زروق ) .. ام واحد غيرو .. ...!! ما حا اقول ليك ...انت حضرت زمن .. الريال المجبدي ... ولا الخمسه قروش الميري ... لكن اكيد تكون ضمن الشباب الذين كانو يقفون امام مبني البوسته ... ليسمعو الاغاني التي كانت ثبثها الاذاعه السودانيه عبر ... مكبرات الصوت https://www.youtube.com/watch?v=8OlFcn-PYOc و .. اذا الرجل الظاهر في الفيديو هو الامام عبدالرحمن المهدي .. عند افتتاح Electric Tram علي جسر النيل الابيض .... قطع شك انت موجود معاهو ... معناها ياحبيب .. انت ركبت من محطه .. ( برمبل ) ... ومريت .. ( بالضبطيه ) .. عند .( سبيل سلاطين باشا ) ... ونزلت عكس اتجاه الترماج في ( الكشات ) .. ...!!! ... كل الحب ... |
[QUOTE=سيد احمد محمد علي المامون
بابكر دعوه لتنشيط الذاكره [/QUOTE] ود المأمون الحبيب من ذاكرتي والغريبة أنها ما طرأت على ذاكرة أيتها واحد من المؤرخين لي أمدرمان أن ذكّرَ إجزخانة أمدرمان (لصاحبها الصيدلي إبراهيم قاسم مخير وقد أفتتحت في ما بين 1938 او 1940) وهي أول صيدلية في السودان يملكها ويعمل فيها صيدلي سوداني وهي في الناصية الشمالية المقابلة لقهوة ود الأغآ وغرب نادي الخريجين وجنوب أوقاف المسجد الكبير بأمدرمان. كانت هن إتنين إجزخانة لطفي ولم يكن هو صيدلي وربما كانت الأولى وموقعها شرق (التمنة) بتاعت البوليس وجنوب حي العدني ومقابلة الجزء الشمالي من الجامع الكبير وكان له السبق أيضا في إفتتاح أول مخازن أدوية في كوستي وسنار.. أوقاف الجامع الكبير في أمدرمن كان فيها دكاكيين متنوعة من أبرزها "أرونط" وهو يبيع المشاريب الروحية.. سودان زمان فات العلمانية أشواط ;) |
| الساعة الآن 07:56 PM. |
Powered by vBulletin® Version 3.8.8 Beta 2
Copyright ©2000 - 2026, vBulletin Solutions, Inc.