[أسعد]

وأنا صاحي في أمانة الله، إذ يرادوني حلم اليقظة داااك
وفجاءة القى نفسي كائن من نور واقف قدامي، ذو وجه مضيء ويمتلك اجنحة وتعلو رأسه حلقة دائرية من ذهب ... المهم من الآخر كدة هذا الكائن طلع ملاك... الصراحة انا استغربت وحبيت أتاكد قلت ليهو أنت ملاك من الملائكة؟!، قام هوزز راسه كدة بالايجاب... قمت سألتو عن سبب قدومه لي؟ وقلت ليهو بصراحة كدة لو جايب لي رسالة وعاوز تعملني نبيّ، يا اخوي من أسي دي دربك زراعي، الزمن العلينا الناس لا بسمعوا كلام نبيّ ولا كلام جنّ أحمر، نحن يا عزيزي الملاك اصبحنا في زمن الكجار... قام قعد يضحك وقال لي أيووووة عارف وانا ما جايب ليك رسالة ولا يحزنون... أنا جاي بس أوضح ليك معلومة ... قمت قلت ليهو يعني المعلومة دي كان ترسلها بالواتساب يااااخ، فقعد يضحك زيادة وقال لي انهم محظورين من التطبيقات الأرضية... المهم وفي خضم ونستي دي لاحظت في يدين وكرعين الملاك في أثر حنة شديدة السواد... الصراحة استغربت وقمت سألتو هل دي حنة؟! قام قال لي أيوة دي حنة وقال لي اتزوجت يوم الأثنين الفات، الصراحة ما استغربت في قصة زواج الملايكة لكن استغربت في حتة انو كيف واحد متزوج ليهو يومين وينزل شغل؟!
قام الملاك قعد يضحك تاني وقال لي ياخ البمنعني من الشغل شنو؟! أصلو أنا اتزوجت ولاّ عملت عملية بواسير؟!... قال لي نحن بنكون شغالين حتى في يوم زواجنا، لانو نظام شغلنا بعتمد على ارسال (طيف الشخصية)، يعني الواحد ما بمشي براهو لكن برسل طيفو... قال لي شغلة شهر العسل دي عندكم أنتو يا البشر، وبعدين زاتو يا عزيزي البشري نظام الزواج عندكم اتطور وعاااادي ممكن العريس في شهر عسلو يظهر في العالم الافتراضي ويتداخل مع الناس... قال لي أنت قايل شهر العسل دا غيبوبة؟! قال لي الانسان بكون اكثر فضاوة في شهر العسل وبكون أكتر زول ما عندو موضوع... لذلك عااادي جدا ممكن تلقى العريس يظهر في العالم الافتراضي بصورة متواصلة لأنو عندو تلفونو ومشبك نت وفاضي وما عندو موضوع....
المهم قمت قلت ليهو يا عزيزي الملاك عليك الله سيرة العرس دي كدي ادمسنا منها... اسي انتي جايني لي شنو؟!
قال لي أنا جييك بس عشان اوريك أنو شهر العسل دا هو شهر اللاموضوعية وأنو العريس بكون أكتر زول فاضي....
وقام فوووووووووووووووو طار مني....

غايتو حلم حيرني كلو كلو كلو!!