النور ياصديقي الجميل
الاجازة في عيد رمضان زي ما اتفقنا ولا عندك كلام تاني
حسب تصوري وجاهة استخدام خاصية التجاهل ليست فقط حكر علي اهمية وجدوى الحوار مع الطرف الآخر، وانما ايضا من اسبابها الوجيهة مثلا انك تكون بتتضايق جدا جدا من اسلوب زول في الكتابة، يعني ممكن مايكون عندك معاهو اي حوار من اساسو ولكن رؤية حروفو وهو بيتحاور مع الآخرين واسلوبو بيضايقك شديد ويعمل ليك وجع قلب، يعني مثلا مثلا لو جا امين حسن عمر قعد يكتب هنا انا شخصيا حا اعمل ليهو تجاهل طوالي بدون اي تردد، حيث اني ماعندي اي استعداد يجيني ضغط وانا في السن دي
ولا ازيع سرا لو قلت ليك اني عامل بلوك لي كم نفر كده في الفيس بوك واقسم لك بالله اني ولا بعرفهم ولابيعرفوني ولاعمري شفتهم وهم ممكن جدا يكونو ماسمعو بي من اساسو، كل علاقتي بيهم انو في اصدقاء مشتركين بيناتنا واحيانا بشوف بعض تعليقاتهم في بوستات الاصحاب المشتركين فيرتفع ضغطي واصاب بالتهاب القولون، فآثرت السلامة وبلكتهم من حيث لايعلمون
المهم شخصيا ماعندي اي اعتراض على خاصية التجاهل ولكن اعتقد جازما انو اي زول يفعل خاصية التجاهل ضد زول ويقوم بعد داك يكلمو يقول ليهو انا عامل ليك تجاهل دي بتكون جرسة منو ساي