شفط رصيد !

[الفاتح جبرا]

كنت جالساً مساء يوم أمام جهاز الحاسوب أكتب مقالاً عندما إستدعاني إبنى ذو العشر سنوات قائلاً :
- تعال يا بابا شوف التاس دى كوووولها ما قادرة تجاوب على السؤال ده !
- سؤال شنو؟
- حيوان بيقول باع وبيضبحوهو فى عيد الضحية !
نظرت إلى شاشة التلفاز فوجدت حساء تتمايل (ليه ما تعرف) وهى تردد فى ذات السؤال بلهجة شامية غنجة بينما يظهر السؤال نفسه مكتوبا على شريط اسفل الشاشة يتبعه عدد من أرقام الهواتف للإتصال بالبرنامج (وكده) بينما هنالك ملصق خلف المذيعة الحسناء كتب بخط عريض يوضح قيمة الجائزة وهى خمسة آلاف دولار !
- آلو ناخد إتصال ..مين معانا
- معاكى أبوعبدالله من السعودية
- ويش الإجابه يا أبوعبدالله
- البقرة .. البقرة .. طال عمرك !
- شكراً ابوعبدالله .. آلو كمان ناخد إتصال آخر
- مين معانا بدو يشترك
- معاك مصلح
- من فين عم تتصل يا مصلح
- من اليمن
- طيب ويش الإجابه يا مصلح؟
- التور .. التور !
وتمضى الإتصالات الخاطئة وفي كل مرة كان إبنى يلتفت ناحيتى ضاحكاً من سذاجة المتصلين الذين لم يستطيعوا إجابه هذا السؤال (إن كان يصلح أن يسمى كذلك) !! وما عرف إبنى أن هذا البرنامج هو في واقع الأمر هدفه الأساس هو أكل أموال الناس بالباطل إذ ليس هنالك جائزة ولا يحزنون !
فالمشاهد عندما يري سهولة السؤال وأن جميع المتصلين لم يستطيعوا الإجابه علية ومن ثم الإستحواذ على مبلغ الخمسة آلاف دولار الذى يسيل له اللعاب سوف يقوم بالطبع بمحاولة الإتصال بأحد الأرقام الموجوده علي الشاشة ليأتيه الرد (وهو فرحان لعدم إنشغال الخطوط) :
- قناة (أكسب واربح) ترحب بكم وتتمنى لكم حظاً سعيداً .. للتحدث باللغة العربية أضغط الرقم واحد وللتحدث باللغة الإنجليزية أضغط الرقم إثنين !
- (يضغط الرقم واحد) !
- (تااااني) قناة (أكسب واربح) ترحب بكم وتتمنى لكم حظاً سعيداً .. معذرة أمامك أربعة أشخاص بعدها سوف نقوم بإدخالك إلى الأستديو على الهواء مباشرة !
- موسيقي
- (بعد ثلاث دقائق ) .. عزيزى المتصل ..أمامك ثلاثة أشخاص فقط !
- الموسيقى مرة أخرى
- (بعد دقيقتين) .. المتصل ..أمامك شخصين فقط !
وأنت تتابع البرنامج :
- آلو مين معانا
- معاك عويس من مصر
- أيه الإجابه يا عويس
- الجاموسة .. الجاموسة
- شكراً يا عويس
تعود للتركيز في محادثتك :
- (بعد خمس دقائق ) .. عزيزى المتصل ..أمامك شخص واحد فقط !
هنا تقوم بمتابعة البرنامج متمنياً ألا يقوم هذا الشخص بالإجابة الصحيحة .. وبالفعل تكون إجابته خاطئة (السمكة) .. تنتظر أن يقوم أصحاب القناة بتحويلك إلى الأستديو لكنك تستمع إلى تلك النغمة التى تعرفها جيداً والتى تستمع لها دائماً عند إنقطاع المحادثة (تيت تيت تيت )!!
كل القصة .. مذيعة جميلة .. جائزة دولارية يسيل لها اللعاب .. سؤال ساااهل .. متصلين (كمبارس) مهمتهم الإجابة الخطأ .. تأجير خط إتصالات ... ومتصل غبى (تفوت عليهو الحاجات دى كوولها) تخصم من رصيده 15 دقيقة دوليه هى قيمة المكالمة !
ما جعل (العبد لله) يتذكر ما تقوم به هذه القناة من إحتيال على المشاهدين هو ما تقوم به (الشركة القومية للكهرباء لدينا) من (أكل لأموال الناس بالباطل) فقبل يومين (قطعت الكهرباء) بالحى الذى أسكنه .. إرتديت ملابسى للذهاب إلى مكتب البلاغات كالعادة لتبليغهم بذلك إلا أن زوجتى وهى تعطينى (هاتفها) أخبرتنى بأن (المسألة) بقت (ساااهلة) وما عليا إلا الإتصال بالرقم 4848 لأقوم بإخبارهم بمسالة الإنقطاع ، قمت بالإتصال ليأتينى صوت أنثوى (مسجل) :
- السلام عليكم .. الشركة السودانية لتوزيع الكهرباء المحدودة ترحب بكم في مركز خدمات الزبائن الموحد وتسعد بخدمتكم .. (تتبعها الترجمة الإنجليزية .. مش ممكن المتصل القطعت ليهو الكهرباء ده يكون خواجه وما استحمل الحر والسخانة؟)
- للتحدث باللغة العربية أضغط واحد .. للتحدث باللغة الإنجليزية أضغط إتنين (تتبعها الترجمة الإنجليزية .. مش ممكن المتصل القطعت ليهو الكهرباء ده يكون خواجه وما إستحمل الضلمة؟)
- (ضغطنا واحد) !
- (الصوت الأنثوى) : نرجو أن نلفت إنتباهكم أن هذه المكالمة مسجلة لأغراض الجودة !
- الموظفون مشغولون الآن الرجاء الإنتظار
- (موسيقى)
- الموظفون مشغولون الآن الرجاء الإنتظار
- (موسيقي)
- الموظفون مشغولون الآن الرجاء الإنتظار
- (موسيقى)
- الموظفون مشغولون الآن الرجاء الإنتظار
- (موسيقى)

(فجأتن) إنقطعت (الموسيقى) أعلاه قبل أن أستطع التحدث مع (أحد الموظفين) .. إلتفت إلى زوجتى وانا أمد لها هاتفها باحثاً عن هاتفى قائلاً :
- موبايلك ده قلنا ليكى تعبان غيريهو ... أهو هسه قطع قبال ما نتكلم مع الناس ديل
- (بعد أن إستعلمت عن رصيدها) : ووووب عليا سجمى .. الناس ديل شفطوا رصيدي كووووولو
بالفعل القصة إتضح إنها (شفط رصيد) وليس خللاً فى جهاز (المدام) كما تخيلت ! عليكم الله فى أكل لأموال الناس بالباطل أكتر من كده ؟ بالله (جهة واااحدة) تحن علي أفراد الشعب السوداني الفضل ده مافي ؟ إى زول عاوز (يشفط)؟ هو فضلت فيها حاجة تتشفط ما خلاس بقينا علي الحديدة و(الضحية ذاااتا بقت بالأقساط) .. فى أى مكان في العالم خدمات الشركات دى بتكون (مجانن) وبيقولوا ليك (إتصل علي الرقم المجانى الكذا) الشفط ده لزومو شنو؟
وكت الكلام جاب الكلام عاوزين إفتاء من (هيئة علماء السودان) فى قصة العداد القاعدين نشتريهو بقروشنا وبيقوموا يأجروهو لينا (هو ذاااتو ده) ومش لزمن محدد ..سنة .. سنتين .. تلاته .. لا .. إيجار مدى الحياة .. ما مشروعية هذا الأمر ؟ هل يعد أكلا لأموال الناس بالباطل أم هو حلال بلال أيها العلماء الأجلاء دام فضلكم !

كسرة :
تقطعوا في الكهرباء علي كيفكم وقروشنا (مقدما عندكم) ما قلنا حاجة .. أها لمن يحصل عطب وعاوزين نوريكم ليهو بدل ما تشكرونا ... كمان جابت ليها (شفط رصيد)ا !!

[البديري]

سلامات اخى الفاتح
والله قرات " آهاتك " ماعرفت اضحك ولا أبكى ! ياتينى احساس باننا محكومين ومكبلين من قِبل " مافيا " وليس حكومة ومؤسسات ٠٠٠
انّ لله٠٠٠٠٠٠ !! اعان الله المواطن

[بابكر مخير]

العجبني يا (عمُّ)
أنه إبنك عمره عشر سنوات...

____________

قطع التيار الكهربائي
له حكمة...
زيادة في تعداد بنو الأمة الإسلامية،،،
وأبقآ صاحي

[الفاتح جبرا]

المشاركة الأصلية كتبت بواسطة بابكر مخير

العجبني يا (عمُّ)
أنه إبنك عمره عشر سنوات...

وكمان بت عمرها سبعة سنين (شفتا كيف) يا عم بابكر ؟

[سمراء]

يا استاذ جبرا المواطن السودانى من يقول بسم الله ويفتح عيونو من الصباح ببداء مراحل الشفط اليومية !
يفتح الماسورة ...شخخخخ....شفط من امو
يفتح الغاز عشان يزبط راسو بالشاى ...صمت رهيب من الانبوبة
يتوكل يقول يتخارج للعمل، تمد المدام والعيال يدينهم لمصاريف ...شفط اتوماتيك
يتخارج وهو مشفوط نص كم ...
اهاااا
يركب المواصلات يتشفط من الكمسارى ...وبالباقى كمان !
ينزل المكتب تبداء مراحل الشفط النفسية والمعنوية من المدراء والحكام ..

والعجب لو زول عندو معاملة فى واحدة من الوزارات ..عيييييييييييييييييييك
الله يرحمو
امش جيب لينا الورقة الفلانية ......شفط
امش ادفع الرسوم الفلتكانية .....شفط انما ايه
......الخ
الخ
الخ

الداخل ارض السودان
مشفوط ياولدى .....مشفوط

مع الاعتزار لنزار قبانى

[نبراس السيد الدمرداش]

صبحكم الله بالخير

وفي نوع شفط تاني
تجيك رساله
لقد ربحت معنا جائزه قدرها كذا الف دولار او سياره الرجاء الاتصال بالرقم كذا
لمعرفة كيفية الاستلام و الرقم يكون ثريا و في سقط لقط و عييييييييك لا جائزه لا رصيد

عمتي بتحتج على قطع الكهربا دا شديد(موش شالو قروشهم اليخلو لي كهربتي)

اما الشفوطات التانيه كان الله في عون العباد

[الفاتح جبرا]

المشاركة الأصلية كتبت بواسطة نبراس السيد الدمرداش

عمتي بتحتج على قطع الكهربا دا شديد(موش شالو قروشهم اليخلو لي كهربتي)

أوعا يا نبراس عمتك دى يكون عندها ضغط !

[سارة]

الفاتح يا جميل

شفطة عدوك ان شاء الله...بس نقول اللهم لا تمحننا لا تبلينا
ونسال الله ان يشفط رصيدهم..ويطفش بعيرهم..وفى الاهتمام
ما يلقوا اليعيرهم..اللهم اشفطهم كما شفطونا..واوصل كهاربنا
حتى لو قطعونا...اللهم نسالك ان ترد لهم الشفطة بالشفطة
والنطة بالجكة يا الله ...ان نططوننا وشحطتوننا فجككهم يا الله
جكة لا يرجعون منها ابدا.

[الفاتح جبرا]

المشاركة الأصلية كتبت بواسطة سمراء

يا استاذ جبرا المواطن السودانى من يقول بسم الله ويفتح عيونو من الصباح ببداء مراحل الشفط اليومية !

شفطوني الحبايب وقالوا ليا أنسي ! (العاقب محمد حسن)
شفطوني ليه ليه .. (النور الجيلاني)
شفطتك وقالو لي شفطك حراام (عثمان حسين)
شفطوني فى حبك عزالي لو تدري (محمد أحمد عوض)
شفطوك .. حيروك .. إنتا ما بتعرف صديقك من عدوك (محمد وردي)
الشفط دااا آآييا .. واللغف دااا آآييا (حنان مسكول)!!!!!!!!!

[الرشيد اسماعيل محمود]

شافط فؤادي وما عليك..
يا أستاذ جبرا..
كأني بهم (هؤلاء الشافطون) أدمنوا الاستماع لحنان مسكول حين تصدح:
"الشفط دة آآآيا"..
غالبية المؤسسات العامّة والخاصة علي السواء، أصبح القائمون علي أمرها يعانون فقراً في الحياء، واذا لم يستح المرء، فإنه بالطبع سيفعل ما يشاء..
أها الدبارة كيف..؟!
المواطن ليس مغلوباً علي أمره، بل علي كل الأمور..

تحياتي لابنك ذي العشرة أعوام.
قلت لي لسّع شباب..

[ناصر يوسف]

أستاذنا الفاتح جبرا
ياخي أنا مشفوط ــ هي بسم الله ـــ مبسوط منطلة قلمك هني ده يعلم الله
حبابك تب والبيت بيتك

قلت لي شفطوك وشفطو سمعتك ؟؟
ياخي يعلم الله حكاية الشفط دي بس بتذكرني بتاع عمي لابوليص الما قادر أحفظ إسمو داك .. الكُشُك العملوه في الأحياء داك ... أيواااااااا

كُشُط شفط الفشطَ الشامل ــ وضف عليها الشافط

ياخي خليهم يشفطو .. ويا الشافطين أشفطو أدونا نشطف ونديكم

وهو ظاتو ده إن لقو عندنا شيتاً ممكن ينشفط ...

من فترة والحيكومه شاغله بنظام شفط النفط من آبار النفط شَفِط بالجد ... وأسلوب الشفط بيدمر العيون البترسب فيها النفط في باطن الأرض .. لأنهم كانو عارفين حتي تاريخ يوم الإنفصال بتاع الجنوب من الشمال ..

تقول لي شفط رصيد ...

أها يا أستاذ الفاتح ...

دي بالله بي كم كرت ؟؟؟ لووووووووووول
ذكرتني قصة زميلك الجاب ليك علبة السجاير داك ههههههههههه

[الفاتح جبرا]

المشاركة الأصلية كتبت بواسطة الرشيد اسماعيل محمود

شافط فؤادي وما عليك..
تحياتي لابنك ذي العشرة أعوام.
قلت لي لسّع شباب..

شافط فؤادي وما علييييك .. أنا ليا روح مشفوطه بييييك !!

تحيتك وصلت وكذلك لأخته ذات السبع أعوام !!

[الفاتح جبرا]

المشاركة الأصلية كتبت بواسطة البديري

سلامات اخى الفاتح
والله قرات " آهاتك " ماعرفت اضحك ولا أبكى ! ياتينى احساس باننا محكومين ومكبلين من قِبل " مافيا " وليس حكومة ومؤسسات ٠٠٠
انّ لله٠٠٠٠٠٠ !! اعان الله المواطن

أهلين البديري .. بالله شفتا الشفط ده كيف؟

[أبوبكر عباس]

المشاركة الأصلية كتبت بواسطة الفاتح جبرا

[B]هو ما تقوم به (الشركة القومية للكهرباء لدينا) من (أكل لأموال الناس بالباطل) فقبل يومين (قطعت الكهرباء) بالحى الذى أسكنه .. إرتديت ملابسى للذهاب إلى مكتب البلاغات كالعادة لتبليغهم بذلك إلا أن زوجتى وهى تعطينى (هاتفها) أخبرتنى بأن (المسألة) بقت (ساااهلة) وما عليا إلا الإتصال بالرقم 4848 لأقوم بإخبارهم بمسالة الإنقطاع،

سلامات الأستاذ الفاتح جبرا،،
ألف مرحب بيك معانا في سودانيات وسعيدين بهذه الطلّة البهية.

يا أخي، بالنسبة للقنوات التلفزيونية بيكونوا متفقين مع شركة الإتصالات لإستثمار الخط التلفوني وبحماية القانون، وفي البلدان المحترمة شركة الإتصالات بتوري المتصل تكلفة الدقيقة من المكالمة.
هل أنت متأكد انو جزء من أجر المكالمة على الرقم 4848 ، بروح لناس الكهرباء؟ لو كلامك دا صحيح، موش ممكن نقاضي شركة الكهرباء وشركة الإتصالات؟

[Sana Mursi]

الفات كله كوم والجاي كوم براه لانهم حيستخدموا شفاط بقوة مليار كيلو واط بعد ضياع %50 من بترول الجنوب الا اذا حصلت معجزه !!!!!!
ولسه ياما في الجراب يا حاوي