لاول مرة يعترف المصريون: الغش فى الامتحان فى السودان جريمة امن قومى

[imported_Hassan Farah]

لاول مرة يعترف المصريون: الغش فى الامتحان فى السودان جريمة امن قومى
https://www.youtube.com/watch?v=L891QhMW7Kg

[imported_عبد السلام]

كلام يفرح من الوزيرة المصرية وكلام مسئول جداً من المذيع الواعي
مش زي ناسنا القش ديل لحدي هسة مافي تصريح بوري المشكلة

آمنت بالوعي والتطور المصري .. درس في السياسة والإعلام للسودانيين

الإخوان حسن وعبد السلام

لكم التحية

موش عيب في حقنا أن نمرر للشعب المصري عبر وزيرته معلومة مضحكة مبكية زي دي (السودان يعتبر التلاعب بالإمتحانات جريمة أمن قومي) .... ومصر ما زالت تحتل جزء عزيز من الوطن .... عيب والله عيب.

[imported_عبد السلام]

سلامات منعم
موضوع حلايب دة أنا عندي ليه رؤية مغايرة
أول حاجة المفروض مواطن حلايب هو اللي يفتي في مآل حلايب
الواضح إنه الحكومة السودانية ما موفرة ليه أي حاجة بينما كل خدماته الأساسية لحدي مدارسه من مصر .. إذا المواطن الحلايبي قالو عاوز يبقى مصري ما من حقي أنا الساكن وسط السودان وما شفت حلايب ولا عارف عنها أي حاجة أجي أفتي ليه في مصيره
ثانياً ما سمعنا بمقاومة شعبية في حلايب للعدوان المصري ولا سمعنا بانتهاكات حقوق انسان من قبل المصريين في حلايب بل شفنا مواطنين حلايب طالعين الشارع ومحتفلين بفوز السيسي وشايلين صوره وأعلام مصر في الانتخابات
ثالثاً كل الحكومات المرت على السودان ما حلت المشكلة الحدودية بالتالي نحن الشعوب ما حنقدر نساهم في حلها
رابعاً إثارة مشكلة حلايب عندنا كشعب بتعبر عن احساسنا بالنقص عن المصريين واحساسنا باستحقارهم لينا لأنه حلايب تعتبر منطقة فقيرة جداً بالنسبة للفشقة الغنية بالموارد الزراعية المحتلينها الاثيوبيين ونحن ما شغالين بيهم
كاودا محتلة .. أب يي ما معروف مصيرها .. عشرات المناطق في غرب السودان في أيدي الحركات المسلحة .. دة كلو ما شغالين بيه وبس حارقانا حلايب !

طبعاً كلامي ما بيعنيك انت وإنما وجهة نظري في موضوع حلايب .. لأنه احتلال حلايب دة ما بنسمع بيه إلا في الإعلام بينما المواطن الحلايبي ما ظنيته بعاني من أي مشكلة بل قد يكون مستمتع بالخدمات المصرية

المشاركة الأصلية كتبت بواسطة عبد السلام

سلامات منعم

كاودا محتلة .. أب يي ما معروف مصيرها .. عشرات المناطق في غرب السودان في أيدي الحركات المسلحة .. دة كلو ما شغالين بيه وبس حارقانا حلايب !

قصدت أقول عيب أن تكون مشكلة تسريب إمتحانات جريمة أمن قومي .... ونتعامل ببرود قومي مع إحتلال أراضينا ومنها حلايب .... تناقض واضح وبين ورسالة سالبة من المسئولين السودانيين للشعبين

[imported_عبد السلام]

نحن ما عندنا جيش
لكن عندنا تعليم

أي زول شغال برة مع عرب بعرف إنه تعليمنا في السودان أفضل من كل الدول العربية
الجيش ترا الفوقه اتعرفت والسودان بتسلل مننا حتة حتة وكمان بقى مشغلينو مرتزقة تحت الطلب
لكن التعليم مفروض نعضي عليه بالنواجذ لأنه ما فاضل لينا حاجة غيره نفاخر بيها وسط الأمم
دة إذا كان لسة بساعدنا على المفاخرة

[imported_ود الخير]

سلام عليكم اخ عبد السلام

بما إنو الجيش دا طالع من رحم التعليم السوداني ،، فما حانكون عادلين لو تفاخرنا بالتعليم ووصفنا الجيش بالمرتزق!!، كل العالم جيوشوا بتدخل في اتفاقيات ،، سواء اتفاقيات دفاع مشترك أو اتفاقيات حسب مصالح وسياسات الدولة ،، فهنيئاً لينا ان نفتخر بالتعليم والجيش ,,

[imported_عبد السلام]

سلامات ود الخير

الجيش لحقو فساد الحكومة لكن التعليم لسة فيه أمل
نفاخر بالجيش كيف والسودان بتقطع حتة حتة وكمية من المناطق المفترض يحميها الجيش حالياً مستعمرة بواسطة دول وحركات مسلحة !
فكرة إنه الجيش طالع من رحم التعليم دي ما وقعت لي لأنهم مؤسسات مختلفة تمام الاختلاف ومافي أي علاقة بيناتهم .. كونه العساكر اتعلموا في المدارس السودانية دة ما بخليهم جزء من منظومة التعليم وإلا فلنفاخر بأفراد حكومة الإنقاذ لأنهم طلعوا من رحم التعليم برضو

[imported_قرقاش]

المشاركة الأصلية كتبت بواسطة عبد السلام

سلامات منعم
موضوع حلايب دة أنا عندي ليه رؤية مغايرة
أول حاجة المفروض مواطن حلايب هو اللي يفتي في مآل حلايب
الواضح إنه الحكومة السودانية ما موفرة ليه أي حاجة بينما كل خدماته الأساسية لحدي مدارسه من مصر .. إذا المواطن الحلايبي قالو عاوز يبقى مصري ما من حقي أنا الساكن وسط السودان وما شفت حلايب ولا عارف عنها أي حاجة أجي أفتي ليه في مصيره
ثانياً ما سمعنا بمقاومة شعبية في حلايب للعدوان المصري ولا سمعنا بانتهاكات حقوق انسان من قبل المصريين في حلايب بل شفنا مواطنين حلايب طالعين الشارع ومحتفلين بفوز السيسي وشايلين صوره وأعلام مصر في الانتخابات
ثالثاً كل الحكومات المرت على السودان ما حلت المشكلة الحدودية بالتالي نحن الشعوب ما حنقدر نساهم في حلها
رابعاً إثارة مشكلة حلايب عندنا كشعب بتعبر عن احساسنا بالنقص عن المصريين واحساسنا باستحقارهم لينا لأنه حلايب تعتبر منطقة فقيرة جداً بالنسبة للفشقة الغنية بالموارد الزراعية المحتلينها الاثيوبيين ونحن ما شغالين بيهم
كاودا محتلة .. أب يي ما معروف مصيرها .. عشرات المناطق في غرب السودان في أيدي الحركات المسلحة .. دة كلو ما شغالين بيه وبس حارقانا حلايب !

طبعاً كلامي ما بيعنيك انت وإنما وجهة نظري في موضوع حلايب .. لأنه احتلال حلايب دة ما بنسمع بيه إلا في الإعلام بينما المواطن الحلايبي ما ظنيته بعاني من أي مشكلة بل قد يكون مستمتع بالخدمات المصرية

عبسلام يامدهش..
دائما تمحنى ..وتخلينى اعيد التفكير ..وحات الله كلامك ده كله منطقى ..لكين حلايب دى ماحقتنا بى رماده وبى خبوبه وبة فقرها ..اهى حقتنا وخلاص ..
يعنى هسه لو جونا مثلا الامركان واحتلوا الخرطوم وريحوا ناسها ..وجرت انتخابات وكلهم صوتوا لصالح اميركا ..خلاص نسكت .؟
الحقونا بى الراى ياناس ..؟



نكته على جنب ..عندما ادلهمت الامور فى بلد ما جلس الريئس مع مستشاريه يسال عن الحل ..قال احدهم ..نعلن الحرب على اميركا فلوهزمناهم ..اهو يكون ربنا فرجها ..ولوهزمونا برضه يكون ربنا فرجها لانهم ح يستعمرونا ياكلونا ويشربونا ...وتم انته باقى النكته ..

ودى كلام دى..

[imported_عبد السلام]

المشاركة الأصلية كتبت بواسطة قرقاش

يعنى هسه لو جونا مثلا الامركان واحتلوا الخرطوم وريحوا ناسها

يكونوا ريحوني من اللوتري البقدم فيه كل سنة ويقولوا لي ما عايزين معاك



_______
أنا رؤيتي للوطن مختلفة عن مفهوم الولاء للعقارات

غايتو شعبتو الموضوع ساكت .... واحد بلدو محتلة يقوم يقول للمحتل تسريب الإمتحانات يعتبر عندي مشكلة أمن قومي .... دا منتهى السفه .... أما التعليم والجيش وهلماجرا .... دا ما عندو علاقة بهذا السفه البين والواضح .... ياخي دا إستفزاز لمشاعرنا غير عادي.

[imported_عبد السلام]

أكيد يا منعم من حقك تربط بين الوزيرة وقضية حلايب ومافي زول بلومك

لكن أنا بربط بين تصريح الوزيرة المصرية الكلو اعزاز واحترام وتقدير للشهادة السودانية وبين تصريح الوزير الأردني القال ما حنعترف بالشهادة السودانية وما أشار لخطأ أولاده وبين تصريحات المسئولين السودانيين اللي لحدي هسة ما فيهم زول قال كلمة مفهومة
نعم .. الوزيرة المصرية هي الوحيدة القدرت تفهمنا نحن السودانيين أصل المشكلة

أنا لا هاميني رأي الأردنيين ولا المصريين .... ولآ أ ي شيئ آخر أنا الهاميني حكاية الأقرع ونزهي البيسوا فيها الكيزان ديل.... جريمة أمن قومي ... جريمة أمن قومي يا عبد السلام ..... جريمة أمن قومي ... وحلايب محتلة .... طيب كدة المصريين ديل موش ليهم حق يضحكوا علينا .... والعالم كلو ح يضحك علينا .... أو يكون معنى جريمة أمن قومي أشياء أخرى لا نعلمها نحن معشر البسطاء مثل ما عجزنا أن نفهم مسألة الدفاع بالنظر عندما مرمطت إسرائيل كرامتنا وأمننا القومي أكثر من مرة.

الإدانة الكاملة مطلوبة من الجميع لمثل هذه التصريحات .... و .... إتلهي يا حكومة وكفانا مهازل.

[imported_ود الخير]

المشاركة الأصلية كتبت بواسطة عبد السلام

سلامات ود الخير
وعليكم السلام أخي عبد السلام ، ونشكر ليك المعومات القيمة التي نكتسبها من مداخلاتك وبالأخص في مجال الانفرماتيك

المشاركة الأصلية كتبت بواسطة عبد السلام

فكرة إنه الجيش طالع من رحم التعليم دي ما وقعت لي لأنهم مؤسسات مختلفة تمام الاختلاف ومافي أي علاقة بيناتهم .. كونه العساكر اتعلموا في المدارس السودانية دة ما بخليهم جزء من منظومة التعليم

الاستاذ في المدرسة بيجي الصباح وبيقول للطلبة اليوم حا ناخد الدرس الاول في من مادة كذا !
والمعلم في الجيش برضو بيجي ويقول لطلبته : اليوم نعلمك الدرس الاول من دروس (كذا) ! وبتشعر بانه فعلاً الشخص القدامك دا معلم وللمهنة دي برضو أخلاقياتها وآدابها ،، وبعدين العساكر ديل تجربتهم في الخليج قديمة شديد ، ومثبتين وجودهم ، زيهم وزي المدرسين ، والمحاضرين في مدارس وجامعات الخليج

تفكير او انشاء هيئة للفساد والمفسدين في العهد دا والله دي وحدها كافية بأنو في منهج أو باب من أبواب المقرر ناس التعليم ديل ما بيدرسوهو للطلبة ! وإلا كيف يقبل الناس بقيام هيئة زي دي ! وفيها اتهام واضح لذمم الناس وضمائرهم ,
ربنا يصلح الحال أخي عبد السلام ،، ويولي من يصلِح,,