انا الكتلت الشيخ الشريف
يوماتي امرق اصلي الصبح حاضر مع شيخ شريف الشريف في مسجد الشريفاب الراجل بعد الصبح اتعود يقول درس ودروسو كانت من نوع اي والله العرقي سمح بس حرام فياشباب وياشيوخ ابعدو منو قبال يبعدكم الموت المامنو فوت وكمان مره اي والله النسوان سمحات بس كمان كان الواحده مي حلالك اختاها تب بتجر في ذيله النار النار فاانجو النجاة النجاة ...لمن يوم هبشني ليك في لححمي الحي قال ياشباب الجامعه انتو اهلكم رسلوكم للقرايه والاالمباره وفي الاخر سقوط في الجامعه ووفشل في الدنيا وتجو تلومو الحكومه م وفرت لكم وظائف كان نافعين وجايبين درجات علميه سمحه كان علي الاقل اغتربتو والسفر فيهو سبعه فوائد قلت بس يازول ها انا دا متخرج لي عشره سنه وبمرتبة الشرف الاولي وكمان عملت ماجستير ودخلت عشرين معاينه م اشتغلت قال السفر علي الحرام غلطان انا البصلي وراك عمري كلو ومن صبح الليله دي اخر صلاة معاك
وشدة ما اتغظت سمعت الراجل كلامي اشان ما يكون غيبه في ضهرو وبس الجماعه مسكو نص كلامي ومرقوني كافر لازم يحاكوني بحد الرده علي اعتبار اني قلت ماحااصلي وانا كلامي كان مختلف وبدت معركة اثبات الحادي وكفري علي كافة الاصعده اشاعات وكلام مع ابوي شيخ اللمين ومجالس وناس داخله وناس تهدد بهدر دمي واتلمن علي العطاله والظلم وابوي دا يصدقني والا يكذب الشيخ يتبع |
اول ايام ماكنت برد بس بسمع واتبسم بس لقيت الشغله قلبت جد والناس بقت تتجنبني صحي صحي والغريب ماخليت صلاتي ولا يوم بس بديت اصدق انا ملحد يارب الالحاد دا كدي يعني مابمشي الدين من غير الصلاة مع شيخ شريف الشريف من الشرفاب !
ياناس يا بشر مش الله واحد والنبي محمد هو الخاتم ! الحاجه امي الله يديها العافيه شيخ شريف دا كلامو منزل عندها من يوم قال الولد صبا قعدت تفتش شنو يعني صبا من يوم عرفته كانت تجيب لي كباية الشاي وترميها في الطربيزه وهي تستغفر وزي بسمع حسها المانطق يقول تكفر بشيخ شريف منو انت يافاشل يا معلق شهاداتك وتتقعد في الضلله يتبع |
اقتباس:
حكي طاعم.. وهادي قعدة وكباية الشيخ قدامي:D |
قلت علي الطلاق ما اصلي مع شيخ تاني بعدين اتبسمت علي نفسي
طلاق شنو هو اساسا انا متين عرست مش اول اشتغل بعدين اعرس اشان اطلق يلا صلاتي دي ماله يارب عملت الهوا دا كلو يلا الله في صحي الله راضي بالحاصل دا ؟ استغفر الله العظيم اعوذ بالله من الشيطان الرجيم ومرقت زي عاداتي من يوم علقت شهاداتي اشتغل بياع في دكان اخر النهار امرق لي كم جنيه يكملن اخر النهار هو اساسا مافي زول بصاحب راجل سجمان رمدان ماعنده قروش وعارف الحكومه حيجي يوم تقول ديل شهاداتهم قديمه ما بعاوزينهم ضيعنه عمرنا ولبسنا نضارات وقالو مثقفين تحت تحت بس اخره قعاد ضلله وصبا ! يتبع |
سمعت قال شنو عاملين مجلس لي في المشايخ تبع الشيخ شريف الشريف من الشرفاب لحدهم اها قلت هوي يا ولد يكون دي الاستتابه السمعنا بيها اها وبعديها يدوني كم يوم كان ماصليت مع شيخ شريف يفصلوني ويختمو علي ملحد ملحد ومابعيد يرفعو القضيه دي للمحكمه و...لا حولا انا مجلس مافاضي ليهو ولا بقعد مع رجال شالو نص كلامي وخلو التاني
قلت للحاج ابوي يأبوي هوي ناسك ديل لا يتعبو حالن الصلاة دي مابصليها ياولد جنيت كيف تخالف اوامر الله ابوي ما انا بصلي قبلي في البيت ؟ لا دي مابتنفع تصلي مع شيخ شريف الشريف من الشريفاب يا ابوي ونهرني ياجنا هوي اسكت نكضب الشيخ ونصدق كلامك يا تحضر المجلس ياتشوف لك بيت تاني تسكنو ياعاطل يافاشل منو انت اشان تعارض الشيخ شريف الشريف من الشرفاب ! مرقت الدكان لقاني سيدو صاري وشي مالك خير ياعم الخير من وين يجي من يوم خليت الصلاه مع الشيخ شريف الرزق قل امرق شوف مكان تاني اشتغل فيه والا ارجع الصلاة مع الشيخ شريف الشريف من الشرفاب ! يتبع |
اقتباس:
صح صح كباية الشاي اها دي بركات شيخ شريف الشريف من الشرفاب :D |
الناس في الفريق بدت حملة مقاطعه جاده هسي كان تعبن دا عملو في الحله المن الخمسينات مازاد فيها شي حلة فيها تلاته دكاكين والداير يعرس يخطب ليهو شيخ شريف الطهور الا يحضرو شيخ شريف الزكاة يقسمه شيخ شريف العسكر شيخ شريف ال....اخير بدل النقه امش البحر كان جبت لي سمكه والا اتنين
كوركت للولد صاحبي يوسف مرقت امو مالك ياولد ؟ ياخاله... خلخل ضروسك هوي يا سيف ابعد من ولدي لا تلحقو غضبة شيخ شريف ! ياخاله غضبة شنو شيخ شريف دا انتي قايلاه الله والا شنو! الله يكسر كرعيك المكعوجات ديل امشي امشي ومشيت مسافه اسمع صوت يوسف من بعيد قلت هوي طنشو بس لحقني يضحك قايل اها يا مغضوب عليهم مالك مطنشنا يا زول فترت امك دي تشبه امي تمام ماشي اصيد لي كم سمكه كمان كان ما تبعتني لعنة شيخ زفت دي ومع قولة شيخ زفت دي الا وما اسمع ليك صرااااج كف في وشي من عم علي غفير حواشة شيخ شريف كان ماشي ورانا قلت يا راجل جنيت مالك بسم الله والله كان ماكنت راجل كبير ما اخليك بس امش امش الله يهديك يهديني يا صابي يا مارق من طوع الشيخ اتغميت جد جد جدعت السناره والصراقيل وقلت ليوسف علي الحرام يا انا يا شيخ شريف دا في الحله دي حتعمل شنو يعني ! ح اخليها ليهو وامرق يمكن نلقي لي فريق كافر اسكن فيه مع السلامه واوعا تكلم اهلي كان سالوك وين مشيت ! |
مرقت واول يوم ماعرفت امشي وين والا منو ممكن يكون مامعتقد في انه الشيخ شريف ايده واصله اتذكرت رفعت صاحبنا خمسه سنه ما شفتو بس ياهو كان في وما حصل عليه امر الله
سافرت من دربي ميمم علي جيهات مدني ونزلت البيت ياهو زاتو بس التقول ما ساكنو زول دقيت الباب جاتني حاجه طيبه الزمن ماقصر فيها الشيب والعكاز سلمت وهي في نفس طيبته الزمان دخلتني والتقول عرفتني بس ماعرفتني ...بعد الشاي المنعنع سالتها يا خاله رفعت في البلد والا هاجر قاعد اشتغل محل ابوهو انت ماك صاحبو المن علي جيهات شيخ شريف ؟ اي سمح ادخل لجوه بجي متاخر كمان كان مشيت السوق بتلقي قاعد لا لا برجاه فتران كان مافيها غلبه بنوم ياولدي مافي غلبه البيت ترا فاضي بدور اليسكن فيهو بعد الناس رحلو وفاتوه ! |
يمين بالله الدنيا نورت عدييييل في وشي اشتغلت مع رفعت بعد رحب بي وهو يضحك علي مصائب حلتنا
رجعت اقوم الصباح احصل الصبح في الجامع القريب من بيتهم لا درس صباحي لا حاج يحكم سالت يوم الشيخ عن الصبا الحكوموني بيه اتبسم قال لي يا زول امسك في ربك فرد عوجه بتجيك مافي ومافي زول بقول لزول كافر ساي زولكم دا سامعين بقصصو بس الناس المطلعنو في راسهم سنتين في امان الله وقلت نرجع نوري اهلي حالي يومي الختيت كراعي اسمع الكوراع اوروروك ود حاج اللمين الكتل شيخ شريف الشريف رجع ! كتل شنو ؟بس الناس ماصدقو واكضب !جريت قلت الناس جنت جد يكتلوني بشباشبم يمكن |
ما شاء الله ربنا يغطي عليك
|
شغل جيد يا مها
على مستوى الفكرة ومعالجتك ليها في النص.. ملحوظة: اقتباس:
|
سرد ممتع وخيال جامح
ومن على ذروة الاحداث ننتظر الهطول تحياتى |
اقتباس:
وربنا يحفظك سالما غانما منعما مكرما شكرا سيدي |
اقتباس:
شكرا .. من امس عندي صداع من القصه دي :D اجي اعاين ليها اقول استوب هنا امرق منها الراجل دا قاعد في راسي لسه :) بس يا انا يا شيخ شريف الشريف من الشرفاب داlooool |
اقتباس:
شكرا حيث انا في محنه حقيقيه مع هذا الرجل بعد جريته المهم الله يستر وكدا بالنسبه لبسم الله الرحمن الرحيم التي اعتدت علي بدء كلامك بها وينه ؟ |
مرقني كرعي من غضبة القوم اي والله متين كتل ماعرفت بس قلت كدي النمرق اول من الحله الماده لسانه لجيتي دي ...مشيت اقرب مركز شرطه سلمت علي العسكري وقلت ماعندك مويه يازول ؟
عندي ادخل اشرب مالك جاري كدي ؟ لا لا ماني جاري بس مشيت مشوار طويل بكرعي . سمح ماك ود حاج اللمين الكتل شيخ شريف الشريف ؟وقفت متسمر ماعرفت امرق والا اقعد يمكن يمسكني والا يكون حتي هو من حيران شيخ زفت رفعت راسي لقيتو يتبسم وكورك لمن نطيت يازول مالك اتخلعت كدي ؟ اتخلعت شيخ شريف منو !كان كاتل لي كتيل بدخل محل البوليس ! اي ماعندك محل غيرو كل زول بدور ياخدك بشيخ شريف وانت ؟ لا لا انا ماعندي شغله غير حراسة المحل دا بعدين ود حاج اللمين دا ليهو قريب العامين مافيش وشيخ شريف شن كتلو ومتين ووين وكيف معقول شيخ شريف الشريف يموت! يازول استغفر الله في زول مابموت! اي ..شيخ شريف الشريف من الشرفاب لا وحات شيخ الرضي مات ودفناه شوف عيني دي هسي مسك السجاده شيخ اشرف شريف من الشرفاب يازول ميتو حكاها القاصي والداني ظنيتك مامن جهاتنا دي اها اليوم المات فيهو مرق بعد العشا شديد واتلقي ميت في سريرو ! سمح ود شيخ اللمين كيف كتلو قالو مات بسقطه قلبيه سببه غضبه من الجنا ! والناس جاده في قصة يكتلوني بالشباشب دي ؟ اي اي .. |
اسبشرت خير بااشرف الشريف الجديد دا وقلت قطع شك زول متعلم ومتخرج من الجامعه مابكون زي القوم المصرين يكتلوني رغم انه الله الكتل الراجل ...يوماتي انا ورفعت نفكر ونقدر وندبر عودتي الامنه للحله خاصة انو الحمد لله الحياة ماشه معاي باسطه بس اهلي مابقدر ارسل
لهم فرد جنيه يقوم يعرفو مكاني يجو ينفذو حكم الشباشب المتخيلو دا لمن جا اليوم اللازم نرجع فيه اهلنا اشان نجيب يطلبو لينا ... اهلنا ويكمل منانا نعيش في جنه.. بت خالة رفعت جاتهم من علي جهات رفاعه البت ماشاء الله علم وفهم وسماحه قلت بس نص الدين مقصود مع دي وقلت لرفعت تخطب لي قريبتك دي ؟ نخطبه ليك بس كمان كان ماجبت اهلك مافي من يديك وقررت اعود من دربي وامشي لاهلي كمان كان لابد ولازم نمشي نسمع فهم اشرف في الحصل شنو بس كنت فرحان اكتر من الازم بعد السلام والمطايبه والضبيحه لرفعت قلت الحمد لله عدينا الميس ابوي ما صبر لباكر مواعيد العشاء قال قوم ياجنا وين ياحاج الصلاة مع شيخ اشرف الشريف! لا زي وقعت لي من عربية مكافحة في سرعته القصوي راسي داش وجاني طمام بس قلت اصبر ياولد ياحااج والله ماني قادر بصلي قبلي ياولد هوووووي اوعاك تخت مات شيخ شريف بتعمل الدايره شيخ شريف ذهبت جتته الا روحو قااعده وهي بتسمع في كلامنا دا والا يكون شيخ اشرف حتي هو مو عاجبك لا و...قبل اتم كلامي خبتني رفعت في كراعي لمن قلت اخ ياحااج اللمين اصبر عليهو باكر بشد حالو وبمش بصلي في الجامع الدين دين تيسير هوي رفعت اسكت شن عرفك بدين شيخ شريف وكان خابرو مابتشغل الصابي دا معاك يا يقوم الصلاة والا يشوف بوين جا يرجع يا حاج معقول تطرد ولدك عشان عوائد ؟ اي شيخ شريف ابوي البحاربو بقاطعو حتي ان كانت امي سمح هسي ولدك دا قاصدك في خير و... اول يصلي مع شيخ اشرف ! |
القصة جميلة في مسارها العام. أرى أنّها تحتاج إلى إعادة صياغة.
فكما كنا نشتكى أن الكتّاب الرجال يفسدون الشخصيات النسوية في كتاباتهم بإسقاط ذكورتهم عليها وإخراجها من مسارها الأنثوي الطبيعي. أرى أنّ الكاتب هنا أضفت جواً أنثوياً طاغياً على شخصيات رجالية تدور حولها القصة. فأختلَّ السياق ! أرجو من الكاتبة أن تعيد صياغة القصّة ... - هو مجرّد رأي يحتمل الصواب والخطأ - |
اقتباس:
شكرا ...هنا بتقودني لسوال جدلي هل للكتابه جنس ونوع ؟ بمعني هل في كتابه رجاليه واخري انثويه اظن قصدت انه الصوت السردي انثوي اكتر من رجالي ....او بعض التصرفات م بتشبه مجتمع القريه او الحله وماعاوزه اقيف موقف مدافع عن النص هي رؤيتك اتقبله بكل رحابة صدر |
شكرا يامها جاءت القصة ثرية مشبعة لكثير من التساؤلات حول اثر المعتقد على حياة القرية والفرد بشقيه الجندريين
هذه التساؤلات كانت نتيجة تعاملات وملاحظات كثيفة مع طبقاات ذو ثقافات مختلفة من اهلها وكان اكثرها ادهاشا هي الطبقات الاكثر ثقافة وتعلما اذ مازال المعتقد ضمن الاعراف والعادات التي تشكل ذاك المجتمع بغض النظر عن صحته ام لا هو المتحكم الاول في طريقة تفكيرهم وذي اثر نفسي واضح في كثير من تعاملاتهم ا لملاحظ انه وكيدا في مداخلة الاخ هاني:) ان الرجل هو الاكثرتمسكا بها دون النساء شكرا لهذا النص الواعي يا مها |
اقتباس:
الأنوثة والذكورة واقع لا ننكره ، والمساواة بين الجنسين في الحقوق والواجبات لا تعني أبداً انتهاء التمايز الطبيعي بينهما او انتفاء وجود الفوارق دون أن تعني أفضليةً لأيّ منهما على الآخر. حينما يكتب رجل قصة بطلتها امرأة ... هل يستطيع أن يكتب وهو يتقمص دورها ؟ يفكر مثلها ؟ يعبر عن دواخلها ويقدّمها كما هي ؟ أم أنّه فقط سيكتب عن المرأة كما يعرفها أو يتوقعها أو يتخيلها أو حتى يريدها ؟ والعكس بالعكس ! في متون القصة جاء "القتل بالشباشب" مع أنّ الأولى برجال القرية وحسب القيم السائدة أن يكون الأمر بالعكاكيز أو على الأقل بسكين الضراع. أما الشباشب فربما تصلح لدور امرأة في مسلسل مصري تردّ على من عاكسها في الشارع. جميلة جداً كتابات مها حين تكتب عن النساء وتعبّر عنهن إذ تأتي بسلاسة وهدوء مناسبة لتصل إلى مداها. ولا أحجر عليها أن تكتب عن الرجال أو تتحدث باسمهم ! فلا حجر على الإبداع بل أدلي برأيي ولها أن تأخذ بما تراه :) احترامي للجميع. |
اقتباس:
وشكرا ..تعرفي الواقع في القصه دا جدا حقيقي في المجتمع السوداني حضري وريفي ...مافي سلطة الا سلطة الشيخ حكومة الشيخ وممكن الزول يستغرب جدا كمان صعب تدخل تجمعاتهم لو م كنت عضوفيها ومزيدا من الكيد لهاني:p اي الرجل اكثر تمسك بها من النساء وممكن كمان يكون متضرر بس بسكت ع مضض |
اقتباس:
عادةً يتمسك الرجال بالعادات التي تؤدي إلى استمرار سيطرتهم الذكورية. وما يساعدهم في نفس الوقت على "شيل وش القباحة" نيابة عنهم ! من شيوخ ومعتقدات أما النساء فيتمسكن بما يزيد من إذلالهن وتصغير دورهن وتجد أنّ الواحدة منهن تدافع بشدة عمّا يسيء لبنات جنسهن :) - أضيف هنا: بعض وليس كل - |
اقتباس:
هل المشاعر في النص تخص الكاتب ام النص بالنسبه لي م في فرق اذا كان النص كتبو رجل وعرف يوصل مشاعر صوته السردي الانثوي كمان برضو ممكن كاتبه توصل احساس صوت سردي لرجل ... وتجيد الكتابه خير من رجل الشباشب اتقالت علي سبيل السخريه المره ولانو للضرب بالشباشب دلاله معنويه . |
اقتباس:
ويعني انا والله بشكرك على كلمة بعض التي ارفقتها لانه والله انا بشوف معظمهن بحاولوا الخروج من عنق الزجاجة وان ضللن الطريق:) ودوما يحضرني نذار حين كتب بشعور امراة في ديوانه يوميات امراة غير مبالية يقول ساكتب عن صديقاتى عن الاغلال دامية باقدام الجميلات عن الهذيان عن الغثيان عن موتى غير اموات رهائن تشترى وتباع في سوق الخرافات سبايا في حريم الشرق موتى غير أموات يعشن يمتن مثل الفطر فى جوف الزجاجات[S][/S] |
اقتباس:
لكن الواحد ممكن عادي يفنك بشبشب |
اقتباس:
مرحباً جيجي .... أتحدث هنا عن بيئة القصّة .... لن يفعلها أحدهم :) |
اقتباس:
وسبحان الله منطقة (الشباشب) دي أنا اعتبرتها من أذكى الإضاءات في القصة أو الحكاية.. فقط تحتاج منا إلى الإلمام بالخلفية وهي أعتقاد البعض أن بطل الرواية قد قتل الشيخ بالسقطة القلبية... فهل يعتقد مثل هذا السخف من يحمل العكاز والسكين، أم هو الجاهل الضعيف مستخدم الشبشب، من المتخلفين والأطفال. مؤكد أن أهلنا ناس العكاز والسكين لا يمكن أن يصل بهم الحال لهذا الدرك من التبعية. وأديك مثل عندنا جدنا أعتذر لأخته في موت ولدها وتأخره عن الحضور للعزاء قائلاً... " لو كتلو زول كنت جبت كوكابي وجيت جاري ... لكن كتل الله ما معاه كوكاب". |
اقتباس:
مجتمع القصة مستعد أن يحلف بالله كاذباً لكنه لن يحلف بشيخ شريف إلا بصدق شديد ... ولعلك تذكر حين اعتمد القضاء السوداني الحلفان بقبة شيخ من الشيوخ .... فردة فعلهم على من مسّ أقدس مقدساتهم سيكون عنيفاً .... جداً .... ولن يتركوه للسفهاء بل ستجد علية القوم يتصدون حماية للمقدس فلن يخرج الأمر عن عكاز أو سكين احترامي للجميع |
اقتباس:
قصدت ان القرية تريد تاديبه لانه احد ابناءها وليس قتله والدليل انه في النهاية رجع بيت ابوه عادي |
يا مها..
تعالي تمي حكايتك دي قبال ما احتج علي اسم "أشرف الشريف" من الشرفاب دا:D:D |
اقتباس:
|
اقتباس:
|
بسم الله الرحمن الرحيم
سلام مها ،، وتحية خاصة للأخ هانى ، جيجى ، أبو جعفر سجال الجميل وتناول لطيف لأحداث النص ودلالاته ،، أتفق مع الأخ هانى فى أن ثمة إسباغ وقع على شخوص النص ، محدثاً بعض المفارقة بين المفردة وقائلها ،، ( بالطبع يمكن مقاربتها بشئٍ من العنت :D) ولعل أوضح مثال على ذلك قول العسكرى : ( وحات شيخ الرضي مات ودفناه شوف عيني دي هسي مسك السجاده شيخ اشرف شريف من الشرفاب ) هذه العبارة أنثوية بإمتياز ، ويحضرنى فى هذا المقام تعليق الدكتور منصور خالد عن صيغة القسم الملحقة بقوانين سبتمبر والتى جاء فيها ( أقسم بالله العظيم القادر على أن يسخطنى ) قال الدكتور ( كاتب هذه الصيغة إما إمرأة أو رجل يكثر من مخالطة النساء ) تحياتى والنقاش فى مجمله إحتفاء بالنص ،،، |
اقتباس:
أنا لا أنكر إيمان الكثيرين بالمعطى أو المنهج الصوفي ولكن هذا الإيمان لا يصل إلى دائرة (تبني العبث) من عقلائهم لدرجة قتل إنسان بسبب جريمة وهمية الركن المادي فيها يساوي صفر. ثم هناك قاعدة في دينا العلم والفنون تقول: (قد يختلف الفهم مع وحدة النص)، ومن هنا فإن إختلاف الفهم للنص وارد بشدة. فحين سئل نجيب محفوظ عن هل عكست السينما رواياته قال بأنها عكست رؤية المخرج لها. وليس رؤيته هو حين كتبها. |
اقتباس:
سلامات ي اشرف السر:D يازول الزول دا حكايتو صعبا ابوي قال لي يامها بتتبدلي زات مره فقلت لعن الله الجهل والخرافه ومن وطن لهما :) اها بتمها يا انا يا اشرف الشريف من الشرفاب دا:D |
اقتباس:
سلامات امير الامين |
اقتباس:
غايتو سيف دا لاحقاه لعنة شيخ شريف لاحقاه :) انا غايتو بتفرج عليه من بعيد لبعيد و بتعلم من النقاش ...وشكرا ليك وللجميع خاصة صديقنا هاني ليه اراء حول النص م قاله هنا اكيد ب تعلم من كل الاراء .. بس كمان في رجال عادي بحلفو وحات شيخ فلان او وحات سيدي الحسن |
الولد يوسف تاني يوم الدقش اي والله مع الاذان خبت الباب التقول ديك المهم فتح حاج اللمين وبين استغفر الله وسبحانك ربي لقيتو وانا مارق استعد للصلاة مع شيخ اشرف الشريف بعد سلم اعتذر لرفعت
والله خفت الزول الراسو ناشف دا يعمله مكاجره ومماطله قلت نسوقو الصلاه مرقنا قال لي هوي بس ابقي سامع وابلعو اندهاشك كان حصل شيخ اشرف دا ماياهو اشرف القرا زمان معانا وكان بشتري حلاوة السمسميه من خالتي خيره ..اي والله جاد بس اسمع اسمع دخلنا الجامع من تلاته ابواب زمن شيخ شريف كان فرد باب وكمان سجاد وفرش ..المهم بعد الصلاه قعدو مجلس درس اظن بس مختلف طريقة كلامو او شنو كنت محور الدرس العام بعد حمد الله عي عودتي دعا ربنا يفتح بصيري للحق وانو هو عافي حق شيخ قلت بس انا شنو دخلني بالراجل كان مات في سريرو حاج اللمين قال هوووي اتادب مع مولاك ! اها مرقنا بحمد ورجعنا بخوجلي قلت والله ي اشرف .. المسجد كلو صلحني شيخ اشرف كملت ..جيت راجع عاوز اهلي يخطبو لي كلام عديييل ربنا يسعدك ويهنيك انت ولد كل الناس تتشرف بمرجلتو ووقفتو ضد الباطل ...دحين طلبك عندي بس لا علي النعمه الشريفه ماتفتح خشمك اختي بت شيخ شريف اعز منها في القبائل في ؟ مالك ساكت ساكت اشان رفعت وقبل اتم كلامي ابوي قال والله شرف فوق راسنا قبلنا بت شيخ شريف لولدنا يوسف شيلو الفاتحه ...الجامع دا كلو رفع ايدو في الفاتحه ونص السوره قلت اقيفو هوي ..انا ..عندي باقي كلام رفعت قال لي اسكت ويوسف ماسك طرف العراقي اشان م اقوم بس قلت الله مابيرضي بالظلم فما تظلمونا شيخ اشرف اول من قال اختنا كرمناك واديناك ليها ظلمناك ! لا والله اختك تشرف كل بيت تدخلو علا انا مدي رفعت دا كلمه في اختو يرضيكم اقعد راجل اقوم بلا كلمه !انا يوم مرقت ماصبيت ولا كفرت قلت لا ولا ما بتزعل زول بس الخلق تهمتني زور رفعت قام بواجبي اها بعد كان مامشيت في الجيت عشانو شن فايدة هجتي قبل عامين ..بت شيخ شريف والله ماعليها نضم بس الله يديها قسمه اخير مني ترا العرس الا الاتفاق وانا بدور قريبة رفعت بتمشو معاي تطلبوها والا اشوف لي ناس اخرين ويمكن ما القي اشرف ..يازول خير تب عوجه ماها في ان شاء الله العرس نصيب وين يكون الناس تقول خير ...يقوم معاك حاج اللمين وكم واحد من المشايخ للطلب دحين في الكبيره تلقاني قدامك شيلو الفاتحه بنية التوفيق الفااااتحه... تمت |
اقتباس:
يقال أن أحد العاملين قال للمفتش الإنجليزي أنا مظلوم ظلم الحسن والحسين.. فبادر المفتش للقول: جيبو فايل حسن وحسين. وتماماً مثل هذا الموظف نجد أن (كاتب الرواية) السوداني هو مظلوم ظلم الحسن والحسين. فقد عشت في زمن التلفزيون فيه في حكم العدم والإذاعة لا تتعدى برامجها في معظمها الأخبار والغناء .. ومن هنا أحتفل الناس بالكتاب وعد التسلية اليومية الوحيدة. فراجت سوق الكتب وكانت هناك سلاسل من المطبوعات لم تترك كاتب مصري أو عالمي وإلا ونشرت له.. فقد كانت هناك سلسلة إقراء، وكتاب الهلال، وروايات الجيب، وروايات عالمية، والمختار، وسلسة الأغاني، وعلى ما أظن العقد الفريد وحتى أرسين لوبين كانت له إصدارة اسبوعية. وكانت أسعار كتب هذه السلاسل لا تتعدى الخمسة قروش .... هذا غير الطباعة الحرة لنجيب محفوظ، وإحسان عبد القدوس، ومحمد عبد الحليم عبد الله، ويحي حقي، وكل هذا كان متوفراً على مدار الأسبوع في المكتبات على نطاق أم درمان والخرطوم وبحري. كل هذه الهيصة ودار النشر بجامعة الخرطوم مع إمكانياتها الضخمة في الطباعة والنشر مكانك سر مع مجلة الصبيات، وخطرفات دكاترتها، من مثل (طبقات ود ضيف الله) حيث لم يفكروا يوماً في إصدار سلسلة (روايات سودانية) لتشجيع الرواية السودانية التي تعكس واقع ومعاش الناس .. وأظنهم في هذا كانوا مقتنعين دون وعي بمقولة العقاد (الرواية درهم عسل وقنطار نشارة).. فظهر الطيب صالح من خارج الحدود ثم انتقل إلى داخلها. فبالله عليك هل يعقل أن يكون الطيب صالح هو الموهبة الوحيدة على مدى قرن ونيف من الزمان كانت في معظمه الكتابة مقدرة ومقرؤة وتمثل برنامج يومي للمثقفين. ومن هنا ولكل هذا: باخت كتابة الرواية عندنا، وباخ معها النقد أيضاً فدور النشر من واجبها توفير مصحح يقوم بتنقيح المطبوعة، ويقع عليه اللوم إن كانت هناك أخطاء لغوية أو تعبير خارج السياق. ولا يلام الكاتب على هذا لأنه إنما يتبع ما يمليه عليه خياله. وإلا بانت روايته مصنوعة. |
| الساعة الآن 12:18 PM. |
Powered by vBulletin® Version 3.8.8 Beta 2
Copyright ©2000 - 2026, vBulletin Solutions, Inc.