[imported_عبد السلام]

عندنا صاحبنا حلبي خواااااااف بخاف من ضلو بجي يكورك لينا ويتونس معانا في الشجرة برة الشارع لكن دخول نهااااائي ما بفكر فيه
أها بدينا نقنعه حبة حبة لأنه كنا عاوزينو يشرح لينا انجليزي لحدي ما يوم وافق يدخل لكن نصة نهار بس .. بالليل ما معانا
أها التلاتة قاعدين في السرير وقدامنا تربيزة وهو في نصنا بشرح
فجأة كدة سكت وبقى ماسك القلم لي فوق وفاتخ خشمو مترين ويرجف ونحن نقول ليه مالك يا محمد وهو زي الميت لا قادر يتلفت لا قادر يقفل خشمو ولا حتى يحرك لسانه ذاتو
بقينا نهز فيه يا ود الناس مالك في شنو ؟ بعد تلتلة وتعب أشر لينا بالقلم على كرعينه تحت التربيزة وبالصوت ما قدر يقول أي حاجة غير أآآ أآآ
أها صاحبي دفر التربيزة وعاين لمكان كرعينه يلقى ليك يد صغيرونة ماسكة كراع الحلبي .. طبعاً ولا اتردد مسك اليد وسلاها من تحت السرير
يقوم يطلع لينا أخو صاحبي الصغير
أتاريهو عارف الحلبي خواف وجاء براااحة براحة دخل تحت السرير وقبض كراعه
طبعاً بعد الحادثة ديك تاني نهائي ما جاء بي شارع البيت لكن قطع شك اليوم داك بكون قطع وضوءه