ارمى الدمعة فوق الدمعتيين يا عين
وبعد الليلة داخراها الدموع لى مين
رحيل محمود
رحيل كل الغيوم الدامعة متواسرات
رحيل كل الشهور العامرة بالخيرات
رحيل الطينة من طرف الجزر يومات
رحيل الخضرة قدام منجل الهدام جفاف وممات
رحيل البادية فوق برقا وراء نجيمات
رحيلك مو رحيل اجيال !!!!!
رحيل بلدا تمام وكمال
ويالعرشت فوق نخل السواقي الشال
واتمددت فوق النيل من الشلال و لشلال
وياالهاجرته فوق ريش الرهو رحال
تظل مرسوم علي باب الليالي سؤال
بعد عشعشت في خاطر الغبش موال
واتبللت من الموية بين السعفة والبلال
بعد عرقك برق في ترابنا حد ما شال
واتمددت غادي وجاي جنوب وشمال
بعد الحال
منو البقدر يجيب غربال
يغربل روحك المدسوسة في الاجيال
وفي نفس الدغش مبثوثة في الشتلة ونداها السال
بعد الحال
منو البقدر يطاول حرفك المعقود
علي برقا حرير وهلال
مسطور فوق رقاب البرد
فوق الصخرة والتمثال
بعد الحال
رحيلك يالمشرشر في مداخل الدنيا كالاوصال
رحيلك هزه في العقدة
ومجامع الروح كما الزلزال
*عذرا ود بادى *
*عذرا حبيب نورة فقط اتسأل من قتل محمود؟؟*
|