يا غربة .. يا غشاشة .. يا بكاية .. يا مستهبلة /
تغرينا بي درهم قروش وراه قنطار بهدله /
جيناك سنة .. أو قول سنين بنكمله /
نبني البيوت في العاصمة وبي كوم أثاث بنجمله /
وكروﻻ حاره نرسله أصلو التنقل مشكله /
ونكمل الدين بي مهل والسمحة جاهزة نحصله /
غير القروش اللي اﻷهل عبر الشهور حا نرسلا /
والباقي يدخل في البنوك ونشوف دباره نشغله /
ناس فكرت تجني العلم تبدأ الدراسة تواصلا /
أحلام كتيره وشيقه وآمال كبيرة نأملا /
لكن حساباتنا الغلط في كل عام بنرحله /
مرت سنين من العمر بنعزها وبنفضلها /
والحسبة وصلت طاشرات يمكن نعيش وندبلا /
وتعال نحاسبك يا وهم من غير رقم أو أمثله /
كان للقروش نجري ونحوش لكن تقول بنشاكلا /
ما راضية تقعد في الجيوب وتقول حرامي بينشلا /
لكن بترقد في الضهور بديون تقيله متلتلة /
ممحوقة ما بتقضي الغرض وأقل حاجة تكملا /
كملانه سفرة وحق وزن ومجاملات مستفحله /
ضرائب أبعاج المشي وإلزامي حمدي نحوﻻ /
يا ريت يكون هم القروش يا غربة فيك هو المعضله /
لكن تعال شوف الهموم الما إفتكرنا نقابلا/
سجنا كبير فيهو الكفيل سجان قيوده مكبله/
أشغالو شاقة ومؤلمه ودايما تكون مستعجله/
ما عاد يكفيها النهار تحتاج ليالي مليله /
أمراض كتيره بدت معاك عايزه الفحوص مستعجله /
ناس الضغط والسكري ومرض القلب مع الكلى /
ومصران وقرحة وإكتئاب ونفوسنا ما متحمله /
وبنينا فيك كيمان لحم تحت الهدوم متندله/
وأكيد يكون أكل المعلب والمجمد عاملا /
عدم الرياضة والكونديشن ﻻبد يكون ليهم صــــــلة/
وكمان تعال لمعادلة ما قدرنا أصلا نعدﻻ /
سجن العيال جوه الشقق وفراق اﻷهل والعائلة/
جيب العيال بي جيبنا مال وجيوبنا غيرو مميله/
وصغارنا صبحت بالزهج متوحشة ومتجفله /
ﻻ قادرة تلعب في خلا وﻻ ضل شديره يضللا /
ﻻ قادرة تدرس بي نفس شان الدروس مترهله/
تلقي الولد غالبو الكلام والبت كبيرة مريله/
كل الضغوط سوا ما قدرنا حتى نقللا /
في كل طرف تلقي القرف تلقي الخيوط مداخله /
يا غربة أديناك كتير أدينا خاطرك يسهلا
خلينا نرجع بالفضل نلحق حياتنا نعدﻻ /
آمالنا فيك بدري إتنست إﻻّ الرجول متوحله
وبقينا زي أهل القبور ﻻ البره عارف يدخلا/
ﻻ الجوه يرجع لي ورا يحكي الحقيقة يوصلا /
لكن خلاص هان الخلاص عندك نزل مهما علا/
وإن شاء الله نحيا نودعك وتكوني ذكرى نغازﻻ /
يا غربة .. يا بكاية .. يا غشاشة .. يا مستهبله
