«لاركو» و«كلوب» و«جزمة زيزي» في العمارات

[طارق جبريل]

يا الحبيبين ونحن في الثانوي العام قاعديلنا في حجار قدام بيت ناس بابكر الشايقي..
انا وبابكر وخالد الغنماية والخرابة عوض ود كريمة.. قوم يا بابكر الجن وهو كان بيدرس مع
أولاد العمارات ونحن نعافر في امتدادنا دة.. قوم اضهب واتظارف وقول لي أولاد العمارات
نلعب معاكم مباراة ودية ونجيكم في العمارات.. اها اتاريهو ولاد المصارين البيض ديل عندهم فريق هناك
وعندهم كدارات وفنايل ولباسات وشراريب كمان.. وبوكو خجلان مننا.. البيجي الدافوري لابسلو عراقي
واللابسلو بنطلون مشروط من لااااورا واللابسلو فنيلة حمالات ومعاها لباس ساوينوا من باقي الدمورية
حق المرتبة.. اها يا الحبان قام قالنا نشوفلنا طريقي نجيبها علي الاقل فنايل.. قوم يا عوض ود كريمة
قولنا نشتري صبغة هدوم وكل زول يجيبلو فنيلي ونصبغن فشان نكون مجيهين قدام ولاد المصارين البيض ديل
اتوكلنا علي الله شلن من هنا.. وفريني من هنا وقرش من هني شلناهن وجبنالنا صبغة من السوق الشعبي..
ومشينا علي نيمة خادم الله وجبنالنا كانون وطشت ولعنا الفحم وكل زول جابلو فنيلي.. الناقصة كُم
والمجحمطة.. وإن كان لي أنا جبتلي عراقي قدييييييم ومهلهل وكفيتو لامن بقى جنب صُورتي..
سخنة الصبغة في علبة نيدو كبيري وقلنا كدي جلغناها في الفنايل في الطشت وبي عود نيم
صوتناهن زيييييييييييييين.. لامن اتلونن.. وكتين شريناهن في حبل بين النيمتين لا عرفناهن
بنو فسو (بنفسجية) لا عرفناهن كُحليات..
المهم يا الحبيبين جاء الخميس واتغدينا غدايا بدري.. الماكلو سخينة.. الماكلو لوبي عفن..
والضاربلو فاصوليا بيضة.. وقلنا كدي اتلاقنيا ولبسنا فنايل الجن دي..
وأصلو إن بقى للكدارات.. أحمد كلوب اتشنط في الكلوب حقو.. الخير فططت لبسلو كبك مصوفن
وعوض كريمة شوف عيني لابسلو جزمة زيزي حقت محاسن أختو.. وأنا لابسلي كبك الرجلين فيهو شمال..
وخالد اللارا جابلو كدارة ما فيها سنتيميتر الا وهبشو النقلتي.. بس علي وشوش المجارمة في الافلام المصرية
والنعيم فينا لابسلو «لاركو»..
والعجب الشراريب.. أصلو مافي شرابا متل اخوهو.. ووحدات مصوفنات ضومة ضومة ومقدقدات
والاصابعين مارقات منهن علي جنى التمساح وكتين يمرق من البيض..
قلنا كدي اتوكلنا ومشينا كداري علي العمارات ونغني ونصفر والماكلين اللوبي النغمات تمرق منهن من لاااااتحت
لامن وصلنا العمارات إنكان نلقالكم القيامي قايمي.. الميدان يلمع ومحددنو بالجير.. وشوف عيني عندهم عراضات
وبي شبكاتن.. قادر الله..
والناس منتظرننا والمتفرجين بي كراسيهم.. وكمان الحكم لابس اسود في اسود.. وبُطان العمارات حلات الدنيا عليهم
لابسلهم فنايل حُمور ولباسات بيُض وشرابات ليهم زيقين حُمور علي التلتوار.. وكداراتم تلمع في الشمس..
وفوق دة ودة كمان عندهم مدرب... صلاتي علي محمد.. سالمناهم ودخلنا نسخن نتجارى كدي وكدي
وهم مرصوصين مع بعض ويسولوم في حركات زي ناس البوندسليغا..
نحن اتلمينا وقلنا لازم نغلبم الحناكيش ديل.. بهناك المدرب صاقعلهم: باص/خانة وافتحوا اللعب
وهني انا اقول لي ود قطبي وياسر البزار: انتو المهاجم البتشوفوا فرفارة قنطروا لي وانا (...) أم حلتو..
بدينا اللعب يا الحبيبين والكوف وكاع اشتغلت.. شي عفيص وشي قريص في الضهر وتحت تحت: احي أنا..
واتاريهم بالمشجعين حقنهم.. لكن ربكم رب الخير البيغسلوا العربات في العمارات كلهم جوا يشجعوا فينا
وكمان الغفراء حقين السفارات وشابكننا ليك: اركب... قشو ... ماهن مغبونين الخرابين
يا الحبيبين قشيناهم ليك خمسة واحد ونص فريقهم ماشي يعرج.. قاموا قالولنا نحن عازمنكم شاي في بيت
هيثم.. اها مشينا علي بيت هيثم دة لقينا الكراسي منظمات والزهور دي ماليي الدنييي..
وحاتكم ورود يفتحن النفس.. باقي نحن في الامتداد غير «صباح الخير» مانا عارفلنا ورود شي
وقال كدي احمد كلوب مرق رجلو من الكلوب بالله الريحي علي التركين المعفن وبي دودو..
فسراع فسراع حصلناهو لامن رجعها تاني..
وعلي التعترو خالد اللارا لابسلو لباس دموريي وجاء يتمطى إن كان نسمع اللباس قال كررررررررررررررر
نان تاني هو قام من بوكانو..
وجابولنا البستي كولا وشويتين جابولم كيك وترامس ألات شاي..
بي لبن يشهنك تتصور جنبهن..
وحات نضري الكبابي بقينا نشوف وشنا فيهن..
والمساكين شغالين: يا هيثم ناولني السكرية.. أمجد جيب الكيك من جوة.. حاتم شوف الطربيزة في الصالون..
ونحن معاوية طمبل باي شابكنا: دسيسين ياخ.. عضة زي العضة..
مشينا متنبلين لي بيوتنا يومين باقيلي ما اكلنا ..
ووكتين جونا في حلتنا داك أصلو يوما كان برااااااااااااااااهو