قَالْ شنو "دفع الله ودْ حسَبْ الرسولْ" .....؟!

[imported_عصام عيسى رجب]

..... وتاااااني:
"هذا زمنُ الحقِّ الضائع
لا يعرِفُ فيه مقتولٌ مَنْ قاتِلُهُ ومتى قتَلَهْ
ورؤوسُ الناسِ على جُثثِ الحيوانات
ورؤوس الحيواناتِ على جُثثِ الناس
فتحسّسْ رأسك ...!!!"
فتحسّسْ رأسك ...!!!""
صلاح عبد الصبور، مِنْ قصيدته (الظِّلُّ والصَّليب)
(1)
يا خي بالجّدْ كِدا، الجماعة ديل لِقوا راحتهم أكتر مِنْ اللازِم ْ....!!!!
أمبارح وأنا بفتح إيميلي، لقيت رسالة مِنْ صديق، وكانتْ عِبارة عن مقال للكاتب رشيق القلم وخفيف الروح: الفاتح جبرا ...... عنوان المقال: "جابت ليها إستحياء ..."، وهو – أي المقال – مكتوب في شهر مايو الفينا دا ....... ولِمَنْ لم يقرأ المقال، فهو بتكلّم عن إجابة "نائب البرلمان السوداني جِدَّاً" المُوقَّر: دفع الله ود حسب الرسول الْبَشير، مِنْ أهَلْنا "الجموعية" زي ما عرّف نفسو، في الحِوار الأجرتو معاهو جريدة "الصحافة" في 4 مايو 2012 م .....
قال شنو سيادة النايب في دفاعو عن نفسو إنو ما عدو للمرأة، حسب ما أوردها الأستاذ الفاتح جبرا في مقاله، قال وهو بكامِل "قواه العقلية": أنا أتحدى أي زول يقول كدا، أنا متزوج ثلاث نساء الحمد لله، ما زي واحد عمرو 60 سنة ماسك ليه في مرة واحدة وما بستحي ....!!!!!
(2)
طبعاً الْبِحيِّر هِنا مُش الإجابة ..... الْبِحيِّر جَدْ، هو إنو رد فعلك يكون شنو لما تقرأ ليك إجابة مُعتبرة وغاية في العبقرية زي إجابة سعادة النايب ودْ حسبْ الرسول .......!!!!! تضحك، تبكي، تنَطِطْ، أو تعمل زي ما قال "عادل إمام" وتمسِكْ ليك أقرب عامود كهرباء وتكَنْكِشْ فيهو بكُل قُوَّتك وتكورِكْ بأعلى حِسَّك: أخُوياااااا .......!!!!!!!
لا وفال ليك سِيادتو يِحمد سِيدو: عضو في "البرلمان" منذ بدايته وموجود في كل دوراته ويعمل أستاذاً بجامعة إفريقيا العالمية في كلية التربية، والآن عضو في لجنة العلاقات الخارجية ......!!!!
هِنا طبعاً ما عندك غير تلجأ، وبإخلاص تام، للدعاء الحااااار وتقول: يا مُثَبَّتْ العقل والدين، ثّبَّتنا و ثّبَّتنا و ثّبَّتنا كمان ..!!
بالله إتخيّلوا معاي إنو الزول البيرمي الدُرَر دي "أستاذ جامعي" (يا ربي تكون دي منسوبة لأهلنا "الجموعية" مع كامل محبّتنا ليهم .....؟!)، لا، ومِنْ دون كُل "الْكَلالي" كُليَّة التربية .....!!!! يا لطيف ألطُفْ .......
وعشان عضو في "البرلمان" من بدايتو، ما غريبة إنو يكون هسَّه عُضو في لجنة العلاقات الخارجية ......
وإن شاء الله ياااارب ما تكون اللجنة دي هي المسؤولة عن التواصل مع البرلمانات العالمية وكٍدا .... الله يستُرْ ....!!!!
قادرين تتخيّلوا معاي سيادة النايب ودْ حسبْ الرسول وهو خالِف كُراع فوق كُراع وقاعِد يحاضِر بي فُتوحاتو دي في ناس الكونغرِس الأمريكي أو أعضاء البرلمان الأوروبي أو ......
وبدون ما الواحد يسرح هنااااك بعيد في أمريكا وأوروبا، تعالوا معاي قريب في سودان "الما مليون ميل مُربّع" دا، وإتخيّلو حال الطلبة البيدرسهم "بحر العلوم" حضرة الأستاذ النايب، وبيلقي عليهم مِنْ علمو النافع الواسع، مِنْ عَينة: (الراجِلْ أصلاً ما مَصمَّمْ لي مّرَة واحدة ......!!!!!!) .......
الغريبة إنو بيدرِّس في كُليّة التربية، شوف بالله موارِد البلَد وعبقرياتها الْفّذََة ومواهبها الضخمة بتضيع كيف ......؟!
بالله دا لو كان بيدرِّسْ في كلية الطِبْ أو أي كُلية عِلمية تانية عندها علاقة بدراسة تكوين جسم الإنسان والبيولوجي وكِدا، ما كان جَهْجَه ليك الطِب والعلوم جَهْجَهةْ الجِنْ ....!!!! ......
أكيد كان سِمعنا بنظرية نشؤ وإرتقاء جديدة لَنجْ وحَقَّتْ الليلة، تقول لينا إنو الإنسان مش كان أصلو قِرد وبّسْ: قِرِدْ وضَبْ ودِيكْ عِدَّة كمان .....!!!! ونظريّات فريدة ما أنزل الله بها مِنْ سُلطان .....
سُبحانك اللهُمَّ غايتو الناس لما تفتري ويَضربا الهوا، بِتِتْجدَّعْ وبِتْبدِّعْ ..... زي ما قبل فترة كدا أتحفنا "الخالْ" إياهو (الخالْ إذا نبّشْ الْقُبور .....) بعزف نشاز يصُمْ الآذان عن شاعر نبيل حبوهو السودانيين قدُر حُبُّو ليهم وأكتر، وشاعر جميل فارق الفانية قبل ما يزيد عن عقدين مِنْ الزمان ..... قال أيه: الشاعر الشّريف دا عطّلْ بي قصايدو مسيرتنا ...... و .....
"وين الْمسيرة عشانْ يعطِلا ليك قصيد .....؟!
الْحاَلْ أمامك شُوُفُو كيف ....!!
ناقصالا شاعِرْ شان تقيف ....؟!
مَ هِيْ واقفة مِنْ يوم "يونيو" داااك
واقفة .....؟! أهَهْ ....!!!!
يا ريتا كان وِقْفَتْ وبَسْ
دي إدَّحْرَجَتْ لي عصْرَها الحجري البعيييد ......
صِبحَتْ خَرابه ومَهزَله
طِيشْ الأُمَمْ
شُكراً جزيلاً يا بَهَمْ ......"
(3)
غايتو أنا هسَّه مقتنع تمام الإقتناع إنو بلدنا دي مش ممحوقة ومنزوعة البركة زي ما بقولوا ..... لا، أكيد نحنا الأُخوة السودانيين ديل عاملين عماااايل أكبر بكتير مِنْ الكبائر ..... وإلا ما كان يكون عِقابنا في الدُنيا قبل الآخرة، إنُّو يكون نصيبنا مِنْ النُّوَّاب والحُكَّام والمُستشارين وكُلْ الكورس والديكور والجوقة والْهَلُمَّه دي ناس زي حضرة النايب ود حسب الرسول .....!!!!
وطبعاً مِنْ تجلِّيات حضرة النايب المُحترم، والبسببها جاتْ تُهمة عداء المرأة، إنو حضَرتو صاحب مُبادرة إلغاء الفنانة المصرية "شيرين عبد الوهاب"، قال أيه: سقوط الأندلس كان وراهو "زرياب" الْمُغنِّي، ونكسة 1967 م بسبب "أم كلثوم"، وسقوط "هجليج" وراهو "شيرين" بأثَر تَقدُّمي أو بأثَر لم يكُنْ أصلاً ......!!!!!
الله بسألك ما شايف أمريكا، مليانة لحدَّها فنّانات وفنّانين: شِيْ "ليدي قاقا" وشِيْ "سنوب دوق" وشِيْ "ريانا" و .... وبعد دا كلو هسه كان قالت ليكم رفعنا عنكم الحظر تتجاروا ليها زي الـ ..... ولا أقول ليك، هي دايرة ليها رفع حظر، ما الجري حاصل حاصل ومِنْ زماااااان 30 يونيو دااااك ........
ما قلنا ليكم الجماعة ديل لِقوا راحتهم أكتر مِنْ اللازِم ْ....!!!! و ..... هاااااتْ يا زمَنْ .....
..... شكلها كِدا عايزة ليها كَسْرة زي كَسْرات الكاتب الْجميل: الفاتح جبرا، مُشْ ...؟! طيِّبْ هاكُمْ:
" .... تجيني،
يجيني معاكْ زمَنْ
أمتِّعْ نفسي بالدهشة ....!!!!"
الله يرحمك يا عُمر الدوش، هو في دهشَة أكبر مِنْ كِدا .......!!!!!!!!!!

الخميس 15 مايو 2012 م

[imported_اسامة عبدالماجد]

الأخ عصام ..
سلامات ..
حمداً لله على سلامة العودة .. ويبدو أننا نعيش في سودانيات موسم عودة النوارس ..
ليس هناك ما يدعو للدهشة فالناس على دين ملوكها .. وهذا بشيرهم كلما سقط أحد حواريه ثنّى بأرملته .. وشاعرنا درويش في زهده الرجولي يقول : (سقطت ذراعك فالتقطها). فدع هؤلاء الناس في شأنهم ولقد لخصهم الطيب صالح في مقولته الشهيرة : (من أين أتى هؤلاء). أمسح عنا رهق الحياة وكدرها الذي يسببه لنا هؤلاء الناس ومارس إبداعك معنا وأكتب لنا شعراً حتى نستطيع أن نستنشق رحيق الحياة.. ويكفى أن يكون توقيعك تلخيص لكل هذه الحالة:
(ندفعُ اليأسَ بالأُغنيات
ونُداري كآبتَنا
بالجميلِ من الكلِمات
ونُحِبُّ على قدرِ ما نستطيعُ الحياةْ).
"نزيه أبو عفَش"

[imported_طارق صديق كانديك]

طفقت أقرأ " وأدي ربي العجب" مبتسماً للصياغة الساخرة ويحز الحزن عميقاً في الخاطر للحال الذي استعصى على أي صياغة .. !!

شكرا عصام فقد أسمعت

لك احترامي

[عكــود]

سلام يا عصام،

كتابة مثل هذي، تجم عصب العين وتفش "بعض" غصّة علقت بالحلوق منذ أمد.

قراءة حرفك في سودانيات تعجب؛
فلا تحرمنا منها.

كل المودّة.

[ناصر يوسف]

عصام عيسي رجب

فرح بعودة قلمك
وفرح بما نثرته هنا
أو كما قالها العمدة عكود
فشيت لينا غبينة يعلم الله

فضلاً لا تغيب

[imported_عصام عيسى رجب]

الصديق اسامة،

صدقني الواحد لو بي مرادو ما يكتب غير النشيد والغناء ..... بس كيف السبيل الى القصيدة والجماعة ديل جايطين البلد فوق وتحت ....؟! ديل ما ينفع معاهم شاعر الا من ناس الحطيئة وانت ماشي .... أدعو لينا وادعو عليهم اكتر واكتب .....

[imported_عصام عيسى رجب]

الصديق طارق،

الجماعة ديل أحسن حاجة الزول يتفشى فيهم بالطريقة دي ما دام ما قادر يلم فيهم ويعضّ الواحد منهم في نص راسو ..... قال ايه: مصمم .... الله يصمم ......!!!!!

[imported_عصام عيسى رجب]

الحبيبين عكود وناصر،

شكرًا على المحبة، وربنا يقدرنا ملازمة القلم والحرف العنيد:


حاجة فيك
خلتني ارجع للقلم
وأتحدى بالحرف الألم
واضحك مع الزمن العريض
وانسف متاريس الطريق
واعرف متين أبقى المطر
وافهم متين اصبح حريق ..... هاشم صديق

[imported_منعم ابراهيم]

سلامات يا عصام كتابة متغلغلة ، ساخرة ، لا صراحة النائب دا تحفه ..

نقر الرخ قبة البرلمان فوجدها مليئة ببيض التماسيح ... إلا صاحبنا علي الحلف بيضة ديك .. لا تتكرر أبدا

[imported_مكي محمد الحسن]

اقتباس:
المشاركة الأصلية كتبت بواسطة عصام عيسى رجب
(1)
يا خي بالجّدْ كِدا، الجماعة ديل لِقوا راحتهم أكتر مِنْ اللازِم ْ....!!!!
أمبارح وأنا بفتح إيميلي، لقيت رسالة مِنْ صديق، وكانتْ عِبارة عن مقال للكاتب رشيق القلم وخفيف الروح: الفاتح جبرا ...... عنوان المقال: "جابت ليها إستحياء ..."، وهو – أي المقال – مكتوب في شهر مايو الفينا دا ....... ولِمَنْ لم يقرأ المقال، فهو بتكلّم عن إجابة "نائب البرلمان السوداني جِدَّاً" المُوقَّر: دفع الله ود حسب الرسول الْبَشير، مِنْ أهَلْنا "الجموعية" زي ما عرّف نفسو، في الحِوار الأجرتو معاهو جريدة "الصحافة" في 4 مايو 2012 م .....
قال شنو سيادة النايب في دفاعو عن نفسو إنو ما عدو للمرأة، حسب ما أوردها الأستاذ الفاتح جبرا في مقاله، قال وهو بكامِل "قواه العقلية": أنا أتحدى أي زول يقول كدا، أنا متزوج ثلاث نساء الحمد لله، ما زي واحد عمرو 60 سنة ماسك ليه في مرة واحدة وما بستحي ....!!!!!




السلام عليكم أخي عصام
الاقتباس ده حسب ما جاء في صدر المقال عن هذا النائب...بدور أعقب عليهوا في عجالة لو سمحت لي فقد قرات هذا المقال علي صفحات سودانيز أون لاين اليوم.!!
1. إمكن قاصد ناس دائرته (إذا كان فاز في االدائرة ما بالتزوير)
2. شخصي الضعيف (مدرسى- معلم - مربي ..سميني كيف تشاء) إذا درسني شخص مثل هذا قطع شك ما حا أتفاخر به يوماً ( مع الفارق في نظام الجامعة التي تدرس بها - يعني مثلاً في كندا هنا انت بتختار المواد التي تريدها لإستيفاء التخرج كذلك الاستاذ والزمن) يعني ما قبل التخرج قطع شك ما بكون استاذي.
3.الكتب الكلام الساخر ده إنت؟

[imported_الهادي أحمد علي]

عصام أيها الحبيب

لأن يتزوج المرء أو لا يتزوج ،
لأن يتزوج مثنى وما فوق ، بمسوغات قانونية أو فقهيه أو غيرها ، فذاك شأنه كإنسان عادي له في حياته الخاصة خطأه وصوابه.

أما أن يظهر وهو يسوِّق تجربته وهو في موقع الراعي المسؤول ، بإعتبار أن تجربته تلك هي الحل ، فتلك هي الخيبة ، كيف وصل نواب البرلمان لمقاعده حتى نستطيع أن نحاسبهم ؟ هم يا صديقي وصلوا بضراعهم ، وتمكينهم ، وقوة عينهم ، وخج الصناديق ، وهز الوسط ، وبالتالي هم من يحاسبوننا لا نحن ، ويعيبون علينا تقصيرنا وقلة حيلتنا وباءتنا التي لم تمكننا من نصرة النساء ، بأن نتزوج منهن أكثر من واحدة ، تخيل؟ لا عجب فهؤلاء القوم نسخ متكررة ، يلبسون السفاري سوت ، ويختارون الألوان الداكنة ، حتى صاروا متشابهون شكلاً وأخلاقاً. و يتزوجون الأرامل تقرباً لله وكيّةً في الاربعينيين والخمسينيين الذين ينامون كالرُهبان.

ذكرني مقالك هذا بأحد أعمامي ، وهو رجل لم يؤتى سعة في العلم أو الجسم ، وبالرغم من ذلك كان مزواجاً ، و فوق ذلك كان يعاقر الصبوح ويبهج بها روحه كل مساء بدون إنقطاع ، وفي يوم من الأيام ذهبنا لقريةٍ مجاورة لحضور زواج أحد المعارف، وما أن "تسترت البنيات في ضرام الدلاليك فتنة وإنبهارا"* ، وما أن لعبت السِنّه في رأس عمك جيئةً وذهابا ، حتى همس في أذني (وكنت قريباً منه) : جماعتكم ديل ما عندهم عزبةً أستأجر فيها ، فقلت له يا حاج والله فعلاً أنت أستعجلت ، فضحك قائلاً : والله بَدُور اللَجُر! قلت له : ما في ليك طريقة ، فقال لي والله إنت زويل حاسد ، قايلني زيّك؟ أرجو أن لا تكون غبينتك وغبينة عكود وناصر والجماعه الفوق ديل حساده ساكت! والله ليس لنا إلا أن نضحك على بلايانا وشرها ، تخيلت عمي هذا نائباً أو رئيساً يحاول رتق نسيجنا الإجتماعي بطريقته.

وتأتيك الأخبار بمسؤول يحدث الناس على شاشات الفضاء الرحب ، والعالم كله بيسمع ، بأن الكرسي دا أخذناه رجاله وحُمرة عين ، والداير يقلعه يتفضل ! ودون ذلك لحس الكوع ! هذا كلام في أمور يتم تداولها في دول الطاغوت والإستكبار (في نظر جماعتنا) سلمياً. وحلايب والفشقة غابت عن الأطالس ، أُسودٌ علينا و على الضعفاء والأطباء والصحفيين ، ويجفلون من صفارات الطائرات التي تضرب ضواحي الشرق ، والشرق تضربه الأمراض والفقر وأطلال المدارس والشفاخانات هجرها الناس وسكنها البوم وتراب السفايات ، وحسب الرسول يشبه الخضر ، يشبه كرتي ، يشبه علي محمود ، يشبه نافع ، يشبه كله ، وكله تطاول في البنيان وتطاول في اللسان وقلة في الإحسان.

تقرأ عن مسؤول يأتيك وبمنتهى العنصرية ، ليقول في ما معناه أن تردي التعليم في ولايته يرجع إلى الفلاته! لأنهم لا يحسنون العربية؟ تخيّل ! وتصوَّر ليس وسط الزهور ، ولكن وسط عجائب الأمور ، وهذا الخراب! هل التعليم لابد أن يكون بالعربية وحدها؟ وهل هذا المسؤول ليس مسؤولا عن الفلاته؟ من الذي سلط علينا هؤلاء الناس ، نحن لم نك نعرف قبائل أصحابنا وجهاتهم. هل تتذكر من دفعتك من هو الفوراوي ، أو الفلاتي ، أو النوبي ، أو النوباوي ، أو البجاوي ، أو الزغاوي،،، هم قطعا موجودون لكن لم نك نهتم. هؤلاء الناس الآتون من وراء اللاوراء يضربون السكينه والمودة والرحمة التي عشنا عليها في مقتل.

مسؤول مالي يقول عليكم بالتسبيح والتضرع إلى الله لتخفيف الضائقة الإقتصادية ، ورفع القوة الشرائيه للجنيه السوداني! الذي صاروا يحذفون منه صفراً كل عامين ، هذا المسؤول وهو مسؤول عن المال الذي يُبدد ويُنهب أمام ناظريه ، لِمَ لا يقول علينا بتقليل الإنفاق والصرف البذخي والتخلص من الكادر الحكومي المترهل الذي لا عمل له إلا تضييق حياة الناس الإقتصادية والنفسية.

ففيم الدهشة يا صديقي

* من شعر المجذوب بتصرف
[

[imported_عصام عيسى رجب]

يا منعم يا حبيب، كيفك

معليش راجع ليك بعد مسااااافة كِدا

الحاصل إنو لما نزلت البوست ورديت على بعض الأصدقاء المداخلين، حاولت أواصل الردود، بس كلما أخش الموقع ألقى نفسي برا تاني ..... قلت أديها صنة يمكن الموقع يجن شوية، أها والصنّة الياها ......

[imported_عصام عيسى رجب]

كيفك أخوي مكي

بلحيل أنا كاتب المقال، بس بيني بينك ما فهمت تماماً سؤالك، وكِدا

لما يكون زي ناس سيادة النايب دا، نايب في البرلمان، ما عندك طريقة غير تتصدى ليهم بأي طريقة كتابة وأي وسيلة ممكنة .... أو زي ما قال "مالكوم أكس": By any means necessary ....!!!!!

[imported_عصام عيسى رجب]

هادي يا صُنو الرَّوح

رُوح يا شيخ، ربنا يخضِّرْ قلَمك شقيقش ما تكتب .....

بالله كتابة بهيّة زي دي، نزلها في بوست لحالها .....

وأكتب يا خي، أكتب، عامل قلَمك الأخضر دا التقول نجيلة، زي ما قال محمود ود مصطفى محمود ......