وحــشــتيــنا يا ســودانيــات

[شبارقة]

يا سودانيات وناس سودانيات بنهديكم :

بشتاق ليك طيوف مُنسَلة من وجع الحروف
معطونة بي طين الجروف
بشتاق قيام بشتاق جلوس بشتاق وقوف
سلوى وعزوف لهفة وكسوف
ريدة وخسوف دمعة ودفوف
بشتاق كيان جافي وولوف
قاسي وعطوف إحساس وشوف
بشتاق ليكم في كل الظروف

ومشتاقين كتيييير يا عمنا هاشم ليك ولكل أهل سودانيات ... والله وحشتونا ... كأننا بنتعارف من سنين

[منال]

سودانيات حبيبتى الغالية
استقت ليك ساعة المساء فرد الجناح و لملم مصابيح النهار
و الكون شرب لون الجراح و العتمة نامت فى الدروب و الليل لبس اجمل وشاح
فى اللحظة ديــــــــــــك
اشتقت ليك ... و إحتجت ليك

[مواطن]

أسامـة :
يا من نظرت إلى مغارس الفطـن فأحكمت سبرها وإنتقيت حرها ، لك الشكر أوفره . فدعنا نقرأ لك عما قريـب.

شـبارقـة :
يا صاحب التمامية في الطرح والجمالية في القول .. لا تستوعب إطلالتك كلمات شكري .. متعك الله بالصحة والخير ، وأنا كمن أعرفك منذ سنين أيضا.

منال :
كأن حروفك تربض من زمن كيّ تتعـتق .. ثم يفيض المتن سلافاً متدفق ، فأسكرينا أيتها الغـريـدة.

[AMAL]

دي لي كل ناس سودانيات الفقدناهم وعادوا لينا

[مواطن]

الكاتب : آمال
لك جماليـة غير مغلوطـة في إنتقاء ما يشي بروحك الشاعريـة .. ما توردينـه رقيـق .. رقيـق .. أخال مخزونك من الأحاسيس كالسحاب المحمـل بالغيـث .. كل يسـتسـقي ويملأ كأسـه بعـذب نـميـر ..
شكراً على المرور .. أما الفراشـة فتقويمها متروك للأعضاء

[باسط المكي]

المشاركة الأصلية كتبت بواسطة AMAL

كنا في غيهب حزن
مغلولين بطوق من الاسي
ظللنا في ذلك النفق
نمسي ونصبح
سودانيات هي نورنا
وفك اسارنا
وهي الالق

للاحباب هنا ودي
وكثير شوقي
ووعدي بالتواصل

الف حمد لله علي السلامة
ونواصل ونواصل ..
لقدام

[سفيان ابوقصيصة]

سودانيات واحه مخضرة يخشاها النسيم شوقا الي ازهارها وورودها ليعطر (هواه) من اعطافها ويحمله نشرا فواحا الي دنيا الاسافير....
وقد كنا هناك, قيما حملناها من مشربنا سودانيات....
وما زلنا عطشى..وكأس سودانيات بايدينا....

[مواطن]

الأخ باسـط :
لك التحية والتقدير..
نعـم فالمسـيرة طـويلة .. طويلة وعاثرة .. فلنواصل ونتصل كي نصل سـويا.
مني كل الود

الكاتب : سفيان
وقد كنا هناك, قيما حملناها من مشربنا سودانيات....
وما زلنا عطشى..وكأس سودانيات بايدينا....

الأخ سفيان .
لك التحايا العبقة
وسنظل عطشى وكأس سودانيات يرتفـد فما إرتوى أحـد شـرب من حـزن الليل قـط..
وسـودانيات حـزن الليل بأمل فجـر سعـيد .. وهـم البسـطاء .. وبسـاط المهـموميـن.

[طيبان]

تحيّاتي أستاذ هاشم ..
ونحمد الله علي العودة .. واللمّة ..
أصف نفسي بقـــارئ لسودانيات ..أكثر من كاتب بها..
أحب جدا ما يدور هنــا ..
وأري فيها ما يجب أن تكون عليه المنتديات ..

لذا

فقدتها جدا في الغياب ...
نسأل ربنا دوام العافية ..لسودانيات وسيد البيت ..وناس البيت

دمتم بخير ..

[بابكر مخير]

المشاركة الأصلية كتبت بواسطة هاشم طـه

الأعضاء / العضوات .. الأحبـة

دخل الأخ خالد وإدارتنا في معركـة بقاء من أجل هذا الصرح الحبيـب حتى فرضوا كلمتهم ، فله ولهم مني التجلة.
لذا فقد عن بذهني فتح هذا البوســت للفضـفضـة وتسجيــل محبتـنا لسودانيات ..
أرجـو ممن يـرغب في التعبير عن مشاعره خلال فقداننا المؤقـت لسودانياتنا الحبيـبة أن يسجل حضوره وتعاضده هنا، والشكر لا يستوجب بين الأحبة.

حسي يا هشومي
أمانة عليك
سنتمترات ولا حتى نجاملك
كم بوصة كدا
وتقول عشان نسجل محبتنا لسودانيات؟؟؟؟؟
طيب يابا
سودانيات هي خلود وإتا وهن وهم
محبتي لكل واحدة وواحد!!!!
سطح العريضة كلو
ما بيكفي عشان أسجل فيهو قدروا قدر كيف..
عشان كدي
بسكت
وأعيش البيا وفيني

[بابكر مخير]

المشاركة الأصلية كتبت بواسطة هاشم طـه

يا بدور .. يا سـت البنات ..
شكراً والشعور متبادل .. لكن مالك يا بتي بتخلطي الملح مع السكر (كده مداخلتك بقت دِرِب)، حسع بابكر ده حاشراهو مالك ..؟؟

هو غير بابكر دا، مافي تاني بابكرات
في حكايات عن أمي وأبويا، ذكرتا قصة وفيها جا؟؟
سجم الرماد دا، جابو ليهو شنو؟؟؟
وحسي بحكي ليك عن بابكر وبابكر،،،
كان الوالدة لمن خلاص عايزا تأكد الشئ، تقول: وحاة بابكر نعمة حياتي..
آهاااااا
مرة هي وبتاع البصل في جدال عن السعر وأنا كنتا في إجازة للسودان،، صحيت على أصواتهم ومشيت أدعك في عيوني!!
لمن شافني عمنا بتاع البصل، قال: الحمد لله أهو بابكر، نخليهو يحكم بينا.
ردت الوالدة:
هي، بس
بابكر يابا،،
أنا بقول ليك؛ بابكر أب رأس وقعر.........."تقصد والدها بابكر بدري"
؟؟؟؟؟؟؟؟؟
مش حسي إمكن بيسألو عن بابكرن تاني برضو بي رأس وقعر؟؟؟؟؟؟؟؟؟
جايب لينا الكلام،، مالك؟؟؟؟؟؟؟؟

[مواطن]

الغرقان ..
كاتب وقارئ وصاحب رأي جريء .. وإضافة لهذا المنتدى الثر بالإخاء والمودة والتراحـم والتزاحـم على إحتضان الآخر .. مرورك أثري طرحنا ووقفنا للقناعة بسودانيات كمنبر طاهر الثوب عف اللسان ، مساحـة للجميع ووطن مصغر ..
ود مخيـر .
يا دكتـرة .. والله شق على نبأ تركك للعمل وأرجو لك التوفيق فثما تصبو إليه.. بالطبع لا تكفي المساحة المتاحـة للتعبير عما يجيش بصدر كل منا من تقدير لهذا الصرح ولكننا نعتصر الكلمات حتى تدرك لها مكاناً ...
طلتك عسل .. وأريتك عافية

[سارة]

يا سودانيات

يشتاقون لقياكى وتتشتاقين لقياهم

فانتى لجمعهم ام ( مع الاعتذار لشاعر قصيدة مدرستى )

بس سودانيات مدرسة بكل ما تحمل المدارس من فنون وعلوم وتنوع واستاذة اجلاء


لسودانيات ولكم محبة خالصة لوجه الله

[خالد الحاج]

العزيز هاشم
مساك الله بالخير يا زول يا وسيم الروح
لم أكن وحدي..
كانت محبة الناس تغمرني عبر الإيميل والتلفون ولن أعدد أسماء حتى لا يحرجني نسيان اسم لحبيب وهم كثر.

شكرا ليك لوقفتك القوية وشكرا لذاك الشبل مهيد هاشم طه..
قال لي في رسالة : (لا تتأخر في طلب أي مساعدة ولا تتحرج)
حق لك أن تفخر يا هاشم فقد أنجبت إنسانا نبيلا ..

لك وأسرتك محبتي وعرفاني

[مواطن]

الكاتب :خالد الحاج
العزيز هاشم
شكرا ليك لوقفتك القوية وشكرا لذاك الشبل مهيد هاشم طه..
قال لي في رسالة : (لا تتأخر في طلب أي مساعدة ولا تتحرج)
حق لك أن تفخر يا هاشم فقد أنجبت إنسانا نبيلا ..
لك وأسرتك محبتي وعرفاني

الأخ خالد ..
هذا والله ما كنت أخشاه .. أن يصيبني شيئ من التقريظ عن واجب أؤمن بأنه أخلاقيٌ ومبدأيٌ ، واجبٌ ينتخي له أي سوداني أرضعته أمه حليب الشهامة طفلاً كأعضاء سودانيات كلهـم لا أستثني منهم أحدا. فوالله ما أتيت شيئاً يقعـد عنه غيري ، وهل يشكر المرء إن حاول درء رجس حاق بداره ..؟
ومهيـد وأصدقاءه من مهندسي التقنيـة هـم في خدمة سودانيات وهذا موقف مؤكد يرينا كيف أن سودانيات أصبحت الآن خارج نطاق العضوية .. ولها غيورين على إمتداد الأفق الإسفيري.
لك التجلة وللأسرة الكريمة عاطر التحايا.