أول جواب ريدة..

[imported_أمير الأمين]

المشاركة الأصلية كتبت بواسطة جيجي

حارة والله

غايتو اخير من واحد اخونا كتبو ليهو معاها
"احلام مكوجية "
نحن اسكتو ساكت

[imported_جيجي]

المشاركة الأصلية كتبت بواسطة أمير الأمين

غايتو اخير من واحد اخونا كتبو ليهو معاها
"احلام مكوجية "
نحن اسكتو ساكت

انا والله معناها كنت زريفة
لانو بعد الجواب نمرة عشرة كتبت ليه

وحديث فى الحب إن لم نقله أوشك الصمت حولنا أن يقوله

النصيحة شفيتها من ام كلثوم والزمن داك صاحبتي كانت عاملة فيها البت فظيعة وبتفهم اغاني ام كلثوم وهاريانا بيها

[imported_هشام ديدي]

المشاركة الأصلية كتبت بواسطة طارق جبريل

الحبيبين كيفنكم..
انا في المتوسطة يا الحبيبين شوفتها في درس العصر والناريي دي انطلقت فيني..
العيون غٌلاااااااااد وليهن رموش واقفات فوقن علي السلك الشايك في كتيبة الجيش..
والشلاليف وحات نضري التقول حلاوة لكوم..
الضفيري خاتاهاقدامها فوق صدرها تطلع وتقوم مع نفس الصدر علي بساتم العربية..
ويا حلات الفستان وهو ملصق فيها.. يمين وكتين يصل حتة الخصر دي تقرب تعوعي..
اها بقيت كل يوم وكتين اشوفها اغمض في العيون وافتحن علي الصايداهو أم فريحانة..
وفي الطريق ونحن راجعين أصلو ابقى زي العوير والعوقة أشوف فيها وأصنقع في السماء..
وطارق صحبي قدر ما يتونس معاي وانا شابكو: آآآآآي قلت شنو..
تميت شهر في جنس الحال دة وخلاص غلبني وبقيت افكر في الطريقي الاقولها شي إن شاء الله حتى أقولها «كيفنك»..
تسوي شنو يا ود جبرين.. تسوي شنو...
بس... جاتني.. تنقصى في الواطة وتكتبلها جواب وتديهو ليها في يدها..
أصلو ما لقيتلي حل غير الجواب دة..
جيت من المدرسة يا الحبيبين اشتريتلي فلسكاب.. ومشيت علي دولاب اختي الكبيرة
وسرقتلي منها ريحي.. وتش تش اديت الفلسكاب رشة وجيت قعدت في صالونا..
ختيت الفلسكاب دة في كراس الجغرافية وبقيت افكر: يا ربي الخرابة دي يكتبولها شنو..
قدر ما حكيت راسي دة من كلام الانشاء داك والكلمات الغُلاد غُلاد ديك..
أصلو أبت تجيني..
وقلت كدي بسم الله وكتبتلا:

الى اجمل انسانه رأيتها فى حياتى
الى حبيبتي «وجدان»
مرت الثواني والساعات والشهور وقلبي يحترق (أماني جنس فسو)..
كنت أشوفك من بعيد كما القمر..
لا انت هلال كما هلال الصوم..
انتى مثل النجم المشع جماله يفوق الحدود..
كنت احسب النجوم واكلم القمر.. (أصلو فسو السواد)..
لا أنام الليل وصورتك تظهر لي في الظلام..
كتمت حبك في قلبي حتى لا يعرفه أصحابي في الحلة..
لقد تعبت مشاعري كثيرا وكنت أراك في المرآة..
فهل هذه الحروف سوف تعبرعما بداخلى ..
لان ما بداخلى نار لا يقدر احد بوصفها لك..
أنا اعيش فى حبك وجمالك الذى سحرانى..
افكر فيك بين الحصص وأنا في ميدان الكورة..
يا اجمل واحدة فى الكون فانتى من العطر النابع من جوة الزهور
حبيبتي «وجدان» إن قلبي يتعذب في بعدك عني..
إني أحبك..
أحبك..
أحبك..
المعذب طارق..

قفلت الجواب في الظرف ويديني ديل يرجفن علي بندول ساعة الحيطة..
وبقيت افكر كيف اديهو الخرابة دي وانا قلبي يضرب..
وخايف من البُطان المعاي واحد يختف البت مني ولا كمان يشوف الجواب..
بقيت كل يوم اساسق من الدرس وامشي وراهم والجواب في جيبي..
اصلي ما لقيتلي فرصة اديهو ليها..
ربكم رب الخير طارق ود حومد حسين تجيهو ملاريا واليوم داك كانت ماشة معاها «انتصار» بس..
بس خليتهم مشوا قدامي كدة لامن بقينا في الفسحة ومافي زول شايفني وقلت كدي مشيت عليهن..
خبيت لامن وصلتهن وبقيت ارجف زي الجرو الماسكه السَعَر..
وايديني ديل ماتن ضومة ضومة..
وركبيني ينطاقشن في بعضن متل العجلة وكتين اللستك يكون فيهو كركاسة كبيري..
سلم عليهن بي صوت مبحوح وقلتلا: «وجدان» دقيقة بس..
وغمت ليها الجواب في يدها وتاني غلبني النضم ضومة ضومة..
وقع مني قلم الرصاص ودنقرت رفعته..
وعلي العلي كان قلم الرصاص مبري إبرة بس وقع مني..
بعد أديتها الجواب من الكبكبة العلي دخلت قلم الرصاص بين البنطلون واللباس..
وبقى يطعن فيني ونحن ماشين وهي خجلانة ماسكي الجواب وترجف..
وانا مفشق علي ود الطهور من طعين قلم الرصاص..
لا عرفت أقولها شي لا قدرت أتكلم..
وقلم الجن دة كل ما ليهو نازل تحت ويطعن فيني ..
وكل طعنة شعر راسي دة يقيف علي المغنطيس الكابسو الحديد..
وكل مرة أفشق زيادة لامن بقيت علي البرجل في شكل زاوية منفرجة..
ولابسلي تموت تخلي يشيل ويخم في التراب بس الكـــــــــــلب القام بال وبقى بي كرعينو يدفن في البول..
أصلي لامن وصلت البيت عضام ضهري كلهن يطقطقن من الفنسة..
وإن ما كضبت باقيلي قلم الرصاص قرب يفقشلو حاجة..
.........................................
الغريب بت الهرمة دي ما ردت علي لي يوم الليلة..
لا يبقى دة شاكوشي الأول وانا ماني عارف


تعالوا فتوهو هنا

بعد مراجعه اللكشره..كانت هابطه شويه..ارجو مراجعه بت الهرمه للاعتزار..

وحا...تتلكشر بت الهرمه..مع الامنيات السعيده

[imported_طارق صديق كانديك]

وتش تش اديت الفلسكاب رشة

ليك وحشة ياطارق

مع ال(تش تش) ديل، القصة رشتين ما رشة واحدة آآ ود بت بغداد، باقيلي سِنة القلم لسه مؤثرة

غايتو في ناس هنا كان ما أصبحت الشغلانية مضمونة ومبرشمة، الفلسكاب زايد التشتشة بمسكوها عليهم، الرشيد منهم.

مافي زول شاف العمدة عكود يا أخوانا

[imported_طارق صديق كانديك]

المشاركة الأصلية كتبت بواسطة أمير الأمين

ود جبرين سلامات
اخوك اخر جواب كتبو ( ما تسالنى عن اول واحد)
الجماعة فتحوهو .. قروهو وبعدين رجعوهو صرة فى خيط
مع المرسال... من الوقت داك..بطلت اكتب خالص

أكيييد؟

[عكــود]

المشاركة الأصلية كتبت بواسطة طارق صديق كانديك

ليك وحشة ياطارق

مع ال(تش تش) ديل، القصة رشتين ما رشة واحدة آآ ود بت بغداد، باقيلي سِنة القلم لسه مؤثرة

غايتو في ناس هنا كان ما أصبحت الشغلانية مضمونة ومبرشمة، الفلسكاب زايد التشتشة بمسكوها عليهم، الرشيد منهم.

مافي زول شاف العمدة عكود يا أخوانا

لبيك كاديلاك،
لبيك.

ياخي طارق ده ما كتب جوابو براهو ...
كتب جوابات ناس كتار بالحيل.
يمكن الفرق الوحيد يكون سنّة القلم ومدى حدّة "البرية".

أمّا إذا سألتم عن الرشيد؛ فلا تكفيه ورقة فلوسكاب، للشي الشايفو أنا؛
قول فرِخ فلوسكاب، يملاهو بالأربع صفحات - وإن كان بيكلّفو زيادة بخّات - وبعد داك يتم الباقي نقّة وكبكبة وضحكات نُص كُم .

يا طارق أحمد الله البقيت تمشي زي البرجل، وزيدو حميدي بالوليدات الجبتهم ديل.

بوست يلطّف الروح.

[imported_جيجي]

المشاركة الأصلية كتبت بواسطة عكــود

لبيك كاديلاك،
لبيك.

ياخي طارق ده ما كتب جوابو براهو ...
كتب جوابات ناس كتار بالحيل.
يمكن الفرق الوحيد يكون سنّة القلم ومدى حدّة "البرية".

أمّا إذا سألتم عن الرشيد؛ فلا تكفيه ورقة فلوسكاب، للشي الشايفو أنا؛
قول فرِخ فلوسكاب، يملاهو بالأربع صفحات - وإن كان بيكلّفو زيادة بخّات - وبعد داك يتم الباقي نقّة وكبكبة وضحكات نُص كُم .

يا طارق أحمد الله البقيت تمشي زي البرجل، وزيدو حميدي بالوليدات الجبتهم ديل.

بوست يلطّف الروح.

مدور يعني

دي مخصوص عشان زغت من البوسترات ياعمدة

[معتصم الطاهر]

غايتو ..


ممكن توثيق

أنا لو دخلت البوست دا إلا خلو رجل ..

[imported_البديري]

سلامات طارق وضيوفة الكرام،
اخيراً..ياطارق لقيت لى بوست ليك اقدر ان أقراة وأفهمه وان استمتع به حد التخمة، فحين مُتابعك ومزاملك فى سودانيز اونلاين وسودانيزهوم والان سودانيات، ودا غير بعض قفشاتك مع اصحاب اصحابى على الفيسبوك!
مرا ياطارق لقيت ليك بوست واصل احدى الصفحة كم ودشليون والناس مبسوطين وميتين بالضحك..وانا اخش واطلع واقراء بوستيك ستين مرة واطلع مافاهم ابوالنوم لانك بتكتب بلهجة اهلنا الشوايقة، واخوك علاقتو بها كما علاقتى بالغة الروسية..سطيح شديد!
زماااان ياطارق جمعتنى محادثات مع شهاب شكوكو وسمراء،قلت ليهم عليكم الله كان ماترجموا لى كلام طارق دا..عاوز اضحك معاكم! ماممكن المنتدى كلوا بضحك ومستمتع وانا زى الاطرش فى الزفة..
لكن ياحبيب البوست دا مُتعة بجد والله..متعك الله بالسعادة والبسمة كما رسمتها لنا.
وللاسف ماعندى شئ اضيفو ليك، لان طفولتى ومراهقتى كانتان بائستان،لان بعد وفات والدى رحمة الله علية اتربيت فى كماشة من تلاتة خيلان انصار سُنة محمدية...وقيس على ذلك!..هههههههههههههه

لك التحايا وتسلم على الضحكة النزعتها من وش مُكشر 25 ساعة!gap

[الرشيد اسماعيل محمود]

المشاركة الأصلية كتبت بواسطة عكــود

أمّا إذا سألتم عن الرشيد؛ فلا تكفيه ورقة فلوسكاب، للشي الشايفو أنا؛
قول فرِخ فلوسكاب، يملاهو بالأربع صفحات - وإن كان بيكلّفو زيادة بخّات - وبعد داك يتم الباقي نقّة وكبكبة وضحكات نُص كُم .

إنت شايف شنو؟
يا كانديك والعمدة، أغرب حاجة بالنسبة لي إنّي ما كنت من هواة الحركة دي!، أوّل جواب يصل لبت مني كان كتبو واحد داير يخرب علاقتي بالبت لأنو هو كان حابيها من بعيد وأنا كنت قريب ليها لكن ما أظن كان في شي بيناتنا
يعني فكرة أني أكون محسود دي من زمان متعود عليها، فعليكم الله لو لاقاكم وجدي كلموهو بالحكاية دي

[Anbabtode]

ات يا ود جبرين قلم الرصاص كان H3 والا اي كلام ، والله متعة في الرصد والمتابعة حتى في الشاكوش الغماتي لحد هسي ما حسيت بيه دا

[imported_أمير الأمين]

المشاركة الأصلية كتبت بواسطة طارق صديق كانديك

أكيييد؟

جوابات الكَبر ما محسوبة طبعا

[imported_هشام ديدي]

لا باس طارق ...اريتك عافيه

[imported_طارق جبريل]

المشاركة الأصلية كتبت بواسطة عمك

الاخو طارق

ازيك يادبيب


عارف انا زماااان في الابتدائ في سادسه

كونت بحب بنت جيرانا فاتحين فينا

فشنو كان حنكي انو بمشي اشيل منها كتاب العلوم

واخت ليها الجواب في نص الكتاب

اول شي في الجواب

التاريخ بي الجنبه 1/1/1989 الزمن 10 مساء

طبعن عشره زمان سهر شديد يعني بفكر فيها وكدا

تحيه بحجم الماء في البحار وبحجم حبات الرمال

حبيبتي بحبك بحجم الكره الارضيه من انهار وبحار ومحيطات

طبعن المقدمه دي بكون لاطشها من مجله زهره الخليج

بعد دا بخش في الحنك حقي

بحبك وبحب فستانك الظهري المورد ..عليك الله البسيهو لي كل يوم

اليوم داك شايفك بتدفقي في الوساخه في الكوشه..عليك الله خلي بالك من نفسك

لانو خايف عليك تقعي في الخور الجنب الكوشه داك

بالمناسبه عبود دا شايفو كل يوم بجي بحضر عندكم المسلسل

تاني كان جاء ماتفتحو ليهو الباب عشان هو حاسدني في حبك

عبود دا(عمرو 12 ثنه) ود جيرانا برضو

واخوك المره الفاتت شايفو كان بحدر لي في الدافوري

الظاهر عرف حاجه عن قصه حبنا...انت ياحبيبتي ماتكلمي زول بي حبنا دا

لانو العوازل كوتاااااار

اسمعي ناس الروقه قالو ماشين عيد ميلاد شيراز ماتمشي معاهو لانو انا مشاكل شيراز

(ديل بنات جيرانا طبعن وانا كنت مشاكل شيراز دي)

والختام سلام

لمن الاقيك في الدكان بتاع عليش يوم صرفه السكر( دا السكر ايام بصرفو بالبطاقه التموينيه)

سلام ياحبيبتي

ملحوظه: مرسل ليك مجله سمير العدد الجديد جبتو ليك امبارح عارفك بتحبيها

طبعن ملحوظه دي لازم اكتبها في اي جواب (بحس بيها حاجه مهمه شديد لو مافي ملحوظه كانو ماكتبت جواب)

يعني لو كاتبتها زي لمن اكون شاكي قميص وبنطلون بث من غير حزام



الموهيم دا البتزكرو من الجوابات




طارق بيع لي البوستن دا ياااااخ لزيز جنس لزوزيه

دي مافي الجواب عشان مايتخلط عليكم الاختساس

ماك نصيح شي

[imported_طارق جبريل]

المشاركة الأصلية كتبت بواسطة أمير الأمين

ود جبرين سلامات
اخوك اخر جواب كتبو ( ما تسالنى عن اول واحد)
الجماعة فتحوهو .. قروهو وبعدين رجعوهو صرة فى خيط
مع المرسال... من الوقت داك..بطلت اكتب خالص

قلت لي شاكوش مع سبق الاصرار