اقتباس:
المشاركة الأصلية كتبت بواسطة شليل
عشان كده أنا بصنفك كاتبي الإسفيري المفضل بلا منازع
عارف ليه لأنك بتتتكلم على لسان الهامش.. تختار شخوصك البنقابلهم بشكل يوماتي وإللي رسم الظلم ظلالو على وشوشم ، لكن بيجالدو ذاتم ويقابلوك بوش مرح ، كإنو مافي حاجه حصلت..
وإنت بالمناسبة في كتابتك الفي البوست دي.. وضَحت لي إنك واحد من أبطال رواياتك..
كإنو مافي حاجه حصلت يا حافظ !
كضباً كاضب واللاي
Oh my gosh..
|
ما أسوأ من الوجع الا التعايش معه يا صاحب
في 2008 كنا في الجنينة, عمال إغاثة زي الليل
جابوا عامل إغاثة فرنسي اسمه ماركو
ماركو دا من اليسار الاوربي ما زي يسار افريقيا علي فكرة ماخد بالك
و بعدين كل الاوربيين وقت يجيبوهم مناطق شدة بعملوا ليهم
ارشاد نفسي كامل قبل و بعد
نحن مرشدنا رب العباد و الحاصل البحصل كل يوم
المهم ماركو دا بعد شهر كدا من وصوله الجنينة كلامه ذاد و بقي يجيب خارجية لكن قلنا إحتمال دا خلقة ربنا و قلة ادب خواجات ساي .....
لكن القشة القصمت ظهر البعير كان في إجتماع بتعمل شهرياً لكل المنظمات العاملة في الحقل الانساني .... ماركو دا خمش ليه طفل من ضحايا الحرب رجله مقطوعة و شغال ورنيش .... خمش الطفل و جاء خاشي بيه الإجتماع .... و في القوم صبت مطره
و هاك يا نبيزة و الفاظ بذيئة بس في البداية كان أنجليزي ووقت قلب فرنسي أنا و كتيرين سطحنا .... نبزنا كلنا ما خلي لينا جنبة نرقد عليها .... في النهاية انهار و بكي .......
المهم جابوا الخرطوم و سفروه اهلها ....
بحكي الحكاية دي مع عماد اللمين ربنا يرحمه
قالت ليه: أصلاً الزول دا من البداية ما كان طبيعي...........
عماد ضحك بحزن قال: يا حافظ ما طبيعيين نحن القادرين نتعايش مع كل القبح دا
