يا أخي الكُبر دآ حاجة ثقيلة بشكل

[imported_عبدالله الشقليني]

أيوة يا الحبيب راعيت الكُبُر...

[بابكر مخير]

أمس ولا أولة أمس شفتا ليا جزء صغير مسرحية سخيفة وما زالت متلازمتها تشعرني بالغثيان والحزن والإستهجان....
كان في مؤتمر صحفي لوزير مالية السودان وهو في الحقيقة الواحد ما محتاج يوري وزير مالية ياتهو بلد لأنهو الحصل ما ممكن يكون في مكان غير السودان..
بلد من بعد حكومة الإستقلال ربنا ما كتب ليهو ناسن في الحكومة تشوفهم كلهم يفرحوا إلا في بعض الحكومات الديمقراطية منها نفر يفرحك بي شوفته ويعجبك في قولهو ويراضيك بحسن تصرفهو وبعد كل ثورة نأمل النفس بذلك "يا ريتكم يا مناسيب قحت تعوضونا الفات"...
بتذكر حكومة سيد صادق الأخيرة كان حوله كوكبة من الناس الحلوة وطيبة وكريمة ذيها وذي حكومة قحت الحالية. عدد من الكفاءات "حسب ما يفهم البعض، بأنه الشهادات الأكاديمية" وكان عدد منهم يسكن في سكنه الخاص ورئيس وزرائهم يركب عربيتهو الخاصة ودي حاجات عادية جدن. عمنا أزهري ما غادر بيتهو الخاص ليسكن القصر ولا دكتور التجاني الماحي ولا غيرهم..
أمس عاااارف أخونا وزير المالية زعل ولييهو حق أنهو يزعل في الهجوم الغير مبرر العليهو من الزول دآك.. لكن كمان يا سعادة الوزير..
ما تنسى حقيقة أنهو الهجوم كان موجه لوزير المالية يعني موظف حكومة وواجبه الحفاظ على المال العام وعدم التفريط في صرفهو في أمور خاصة ... قول معاي؟!
أزعل يابا ومعاك ناس شكرا من حقكم تزعلوا..
لكن قولتك أنك تتكبر علينا بأنك تنازلت وقبلت المنصب وحسيييي دي ممكن تسيبهو دي ما حلوة لأنهو حواء والدة وتتفشخر لينا بأنك بي عربتك وبي بيتك وإن شاء الله يفتح عليك أكتر ويبقى قصرك يعني إحنا المساكين ديل ناس كداري ساكت شوفوني؟؟
يا أخونا ولساتني بأسأل..
هل حنرتقى لمستوى أننا نفرق بين الخاص والعام
وأننا نستشعر المسئولية "أكيييد الوزير ذكر أنهو قبل بالتحدي برغبتهو" لكن كمان دي ما معناها يا ن خ ر آ في زيركم يا نروح ما نجيلكم أو أنا كدآ والما عاجبهو بمشي وبخليكم تتبشتنو"..
يابا....
قالوا: إن خاطبكم
والما بيلحقك
و...... القافلة تسير....
للسيد الوزير.. أبقى قدر المسئولية وأركز
لي ناس شكرا..
قالوا من تحبه ناصره ظالما أو مظلوما "تفسير القولة يتلخص في السند والدعم والنصح والتقويم"

[بابكر مخير]

الإحتفالات بالأعياد والأيام العالمية تكاد تكون يوماتي..
لمن إتولدنا كانن ياهن الإعياد الدينية لكل الديانات السماوية وندر نسمع بعيد ميلاد لكن كانت ياها السماوية "المولد، الكريسماس" وبعدهن جآ عيد الإستقلال قبلهو رأس السنة. وكتنا دآك كانت ياها هيئة الأمم المتحدة وهي طبعن إتولدت بعد الإنتصار في حرب التحالف على هتلر واليابان والدوتشي. ووقتها كانن ياهن حوالي خمسين وهم الهيئة محظور في الأمور السياسية وبعدها لمن إنشرت وبقت مية وكمين دولة توسعت إهتمامتها يعني إتصور أولن تبادي السنة هي 365 يوم وفي الكبيسة 366 يعني الأمم المتحدة بتحتفل كل سنة بعيد ميلاد دولة يعني مية وكمين مرة (ما أفتكر في دولة نالت إستقلالها في يوم 29 فبراير من أيتها عام عشان تحتفل ويحتفلوا معاها) بعدها عندك الإهتمامات توسعت وبقت الأمم المتحدة إنشغلت بالتعليم "اليونسكو" والعمال والصحة "دبليو اتش او" والبيئة والريف والحضر والحيوان والغابات والمياه والإنسان وحقوقهو والمرأة والطفل "بالجد ما عندي فكرة إن كان هناك لجنة لي حقوق الرجل أم لا" وكدآ تكون الأمم المتحدة تملكت كل ال 365 يوم واليوم ال 366 دآ إحتفاليتهو جانبية ذي ناس الحب الفلنتاين...
قول ديل أيام السنة الأمم المتحدة ملتها بالتب إحتفالات وكمان لسة في أيام بتحتفل بيها الإمم المتحدة ذي يوم مكافحة الجراد، القضاء على الجراد، وإعلان العالم خالي من الجراد..
قووووووووم كمان قول حتى الأعياد الدينية، مش ياهن تلاتة دينات معترف بيها. عندك قول الإسلام عيدين أصليين وإحتفاليات المولد والحوليات والحسينيات وكربلاء وإنقضاء البلاء ورفع الدعاء والشيعة والعلويين وعند المسيحين عييك كم من قديس للأرثودوكس والكاثوليك والبرتوستانت المرمون وأهلنا الأحباش ديك كل إسبوع مناسبة وإحتفالية يوحنا وفاسيك وعيييك..
كان زمنا للعيد حلاوة عشان ندرتهو لكن حسي لمن مسخوهو...
لكن برضك في أيام جميل أنهو يحتفلوا بيها ومنها ؟؟
عيد الأم
عيد الطفل
ويوم المرأة...
كدي سؤال؟؟
ليييه ذي ما يوم شم النسيم الناس تأكل فسيخ وبيض مسلوق
الناس ما بتأكل تفاح في يوم المرأة العالمي...
قوله تعالى: (وَلاَ تَقْرَبَا هَذِهِ الشَّجَرَةَ فَتَكُونَا مِنَ الظَّالِمِينَ)

[بابكر مخير]

شوف بقآ..
التأريخ دآ الولوج في دهاليزهو توهان عدييييييل..
أخي الحبيب المحسي متحفنا بي بوستيهو بتاع "ملخصات كتب سودانية" وأحلى حاجة أنهو بينزل ليك مش اللينك عشان تتعب وتتوه.
لا عديل كدي يخت ليك حاجة كدي ويقول ليك ربط وإتا تلقى روحك في وسط الجنان تقطف منها ما تشاء بأريحية..
تاني وتالت والف ليك الشكر يابا...
أمس كان كتاب "السيف والنار" وطبعن دآ كتير من المؤرخين السودانيين بياخدوهو أهم مرجع وهو من المراجع المفضلة للذين لهم كره لحقبة مشهودة من تأريخ السودان...
ما بقول ليكم الفيهو شنهو لكن فيهو دحض لأفكار يدعي أهلها أنهم الأحسن وفيهو كلام يوري ناسن أصولها شنهو وفيهو حديثا يفرح القلب ويفرج الغم..
دآ كلهو فيهو بس المشكلة بينقري ككيف..
ذي كيفن تكون قراية الآية الكريمة "لا تقربوا الصلاة..." ولا كيفن تشيف الكباية المليانة لي نصها وعلى قول أهلنا الغرابة (أئن أبتراعي) ياتهو نص الفاضي ولا المليان...
برضك كان أمتعنا بكتاب "تأريخ حياتي" بالأجزاء التلاتة والذي عانيت كثيرا في الحصول عليه..
ذي ما قلت.. أنا ما بنزل مقتطفات للأعضاء لأنهم عندهم ال (access) ولي التانين بنزل ليهم اللينك..
وبقول ومع أني متحفظ عليها الكلمة لكنهو الحبيب المحسي بيستحقها عن جدارة..
شكراً

[بابكر مخير]

[COLOR="Magenta"]شوف مع أنهو مسجل غياب
لكن إمتاعهو ما بينقطع...
الطيب "طيبون" بشير رسل ليا ضمن كم من زملائنا ناس الشرطة الفيديو دآ..
أنا نزلتهو في اليوتيوب بي إسم...
"الشرطة السودانية كما كان ماضيها وستكون من جديد نخوة وشهامة"
التحايا ليهو ولكل أعضاء المنتدى من ضباط الشرطة وظنيتهو وللحكمة كلنا مرافيد الإنقاذ....
[[youtube]https://www.youtube.com/watch?v=eIi-7Md7at8[/youtube]/COLOR]

[imported_عبدالله الشقليني]

شكرا جنابو بابكر

[بابكر مخير]

المشاركة الأصلية كتبت بواسطة عبدالله الشقليني

شكرا جنابو بابكر

الحبيب
أشكرك أنك عرفتني بهذا اللقب الجميل المفخرة في حال أنهو مربوط بالبوليس.
أتذكر بعد خلصت الصيدلة ومع الوالد عليه الرحمة نتفاكر في أيتها خط حأمشي فيهو وكانت شهادتنا الأكاديمية تدر كم من المال حتى لو لم ترهق نفسك بالعمل (فمن أنواع الفساد) لأنك ممكن تأجر شهادة المجلس الطبي المعترفة بأنك صيدلي لي زولن يكون مريش ويفتح بيها صيدلية ويجيب لهو (الغريبة أنهم إتنين كانوا أنجح البشر في تسير أموررالصيدلية الخاصة وهم من أبناء الجنوب ليك كمساعد صيدلي وميزتهو أنهو بيقراء إنجليزي والأدوية جلها مكتوب عليها باللغة الإنجليزية والشخص التاني اليعتمد عليهو في تحضير الطلبات للإجزخانة (وهي طبعن ياها الصيدلية) وحفظ الأوراق مما جميعها مالية أو تشغيلية هو من المسيحين الأقباط وبرضك ميزتهو أنه بيكون أقلهو قراء في مدارس تبشيرية لو ما كمبوني عديل وإنجليزيتهو جيدة ..
ممكن برضك يكون السؤال لييييه ما من أهلنا ناس البحر واللغة الإنجليزية كانت تعلم وتعبيرا مجازيا "من المهد للحد" من الوسطى والثانوية والجامعة والسبب الأساسي "مااااااااا بنرضاء بتلك الوظائف وعلى قولة أقرع ونزهي.. ما أهو ساكن وماكل وشارب لييييه أشتغل ليا عند زول وعيييييك من عنطزتنا الما بتغب علي زول..تانين إحنا ظاتنا أهل البحر بنثق في أخوانا الإتنين ديل أمتر من ناسنا بالجد يعني...
وغير العمل في الصدليات كان هنا عمل للصيادلة راتبه بالدولار وهو العمل كممثل طبي..
المهم الإتنين ما كان عندي فيهم كبير غرض وفضلت العمل في القطاع الحكومي (ما تعرف هل هي إرث متوارث فإن لم يكن كل أهلي ناس عمل عام فأغلبهم دون شك وحتى ديك الما إشتغلوا حكومة عديل عملوا تحت الشعب السوداني بالإشراف على مؤسساته "ذي أهلي الشايلين مسئولية سير الأحفاد وعلى رأسهم الأن العميد قاسم بدري" ولا نزعة وطنية ولا غيرة على الوطن. وقد كان فأشتغلت في وزارة الصحة ولكن أغوتني بعض المؤثرات فعملت في شركة أدوية وصرفت الراتب بالدولار ووركبت عربية مجان وبي بنزينها ولكن والطبع يغلب التطبع.
رجعت للميري "المثل بيقول: إن ما ضقت الميري، إتمرمغ في ترابهو" والميري هو العمل للحكومة والمرة دي كان ميري بالجد، يونيفورم وكسكتة ودبابير كمان..
المهم في اليوم دآك الإتقبلت فيهو للعمل في الشرطة 1975 ومع الوالد كان قال قولته المشهورة ليا: تعرف يا بابكر، السمكة لمن شبعت في البحر تلبت علي الشاطئ عشان كمان تشبع هناك. لكنها ماتت، يعني خلاص شبعتا من قولة يا دكتور وعايز تتلب لي قولة يا جنابهو..
سبحان الله تذكرتها يوم أستشهد معايا إتنين من الزملاء في القوات النظامية وقلتا أها يا بابكر بقيت فعلن ذي السمكة...
أتذكر جداً خالتي عديلة بابكر بدري كانت تقول ليا "سيد القميص" وما كنت فاهم القصد ولمن سألتها قالت ليا.. ما هو جناب المفتش الإنجليزي زمان لمن ما يكون في المكتب بيخلي قميصهو ودي علامة على عظمة المكتب...
كان عندنا مربية لي مدينة بتي وأصلها أريتري وتتكلم عربي ممتاز، كانت بتقول لي مدون؛ بت جنابهو التقيانة (غايتهو ما عارف هل كن بتقصد مدون اللسة عمرها ما تم سنة ولا قاصداني بيها أنا )...
جنابهو دي شكلها تركية ولا فارسية
لكن شايف في العربي عندها تفسير شوية مقبول.. واحد أنهو جنابية يعني مع بعض مصفوفين ود ليها تقارب مع طابور القوات النظامية وتانين أنهو في جناب فلان أو تحت كنفهو...

[بابكر مخير]

النوابغ علماء وهم بين البشر العاديين شواذ
ليهم صعبة تفهم وعشان كدآ أسهل شئ تصفهم بالجنون...
من أحدى كرامات شيخنا المحسي..
"لحظات باقية - ادريس جماع"
في بيت؛
خلق الزهرة تفنى لتعيش الثمرة
والبيت دآ؟!
أخدني في بحرن واااسع وسرحة بعيدة في الربط بين البيت في القصيد وببعض مما أعرفه... شوف كيف زهرة نبتة الخشخاش شايلة في أحشائها البوبي "الثمرة" والهيا في الأخير بطلع منها أحد أكاسير الحياة .. بلا وجع ولا ألم عليك باللقاح وتصح وتصبح بلا وجع... فالمورفين كان ذي ما البندقية رفيق الجندي الأمريكي في حرب فيتنام كم أستعمل كمسكن لالام من الإصابات ومهدئ للنفس برضه مما أثمر عن كم هائل من مضطربي الأنفس... الصور بالتسلسل.. الزهرة 2 النبتة 3 الافيونة البتطلع منها الأفيون...
كان فنان وشاعر ونطاسي وإنسان فكيف ممكن يتوصف بألجنون...
والمجانيين هم الما فهموهو.....

[imported_عبدالله الشقليني]

كتب الشاعر إدريس محمد جماع:

من دمي أسكب في الألحان روحا عطرة
ورؤى النفس وأنداء الأماني النضرة
وشجوني وحياة بالأسى مستعرة
خلق الزهرة تفنى لتعيش الثمرة
*
لقد انتقيت الدرر من المعاني ، إنها لحظات سوف تبقى ، لأن الحياة بزخمها نحن لها صدى
*
شكرا جزيلا يا دكتور بابكر
*

[بابكر مخير]

من الأجدر بقيادة البلد ...
شوف بقآ؟؟
حتى وإن!!
جابهو عِليم ومعلم
فاهم ولا فِهيم
شاطر منجضها
قيافة وفايت الناس مسافة
أصل وفصل
ود مشايخ ناس تبروقة
أهلو ناس علم أقل واحد من دكتور بروفسير وأستاذية
زول شربة دايمة ودخانتهو كترابتها عامة
وإن أصلهو في المسجد صلاتهو أوكاتها قايمة
حِبيب وبيعزف عود
معرس وقدر ما الشرع أداهو
مطلق ووالد ولا حتى لو أرمل وما هو والد
خليهو يكون..
تعيشي، رباطابي ولا جعلي
شايقي، دنقلاوي أو حتى بني عامر ولا نوباوي
قبطي أو حتى مسلم ولا خليهو كافر
جنا سبعة ولا تمآ التسعة
عمرهو لسة في العقد الثالث أو فوق الستة ومثلث الثالث
شديد معافى ولا مكركع ونظرهو ما في
حتى لو شنهو دآك ويييين في كل البلد ودىك
ما في وما في وما في فايدآ
ما إحنا ناس اللآ بيعجبه العجب ولا الصيام في رجب
وإحنا كل واحد شايف نفسهو هو الأحسن
الأفهم، الأقدر بقيادة هذا البلد
ديل إحنا الذكور منا
الإناث والسيدات حقهن بيعرفنو براهن...
وما تستبعد والعياذ بالله يكون ديك عندهم رأي براه(ن/م)

ويبى السؤال؟؟
سوداني أنا
أم سود الأناني أنا..

[بابكر مخير]

المشاركة الأصلية كتبت بواسطة بابكر مخير

من الأجدر بقيادة البلد ...
............
ما إحنا ناس اللآ بيعجبه العجب ولا الصيام في رجب

بي فخر بقول أنا سوداني وهذا إعتراف ضمني بأني لا أعفي نفسي
ولا أحب الأحباء من الإخوة والأقارب والأصدقاء ولا عادل عسوم من كل حرف سبق...
لا حمدوك عاجبنا ولا سيد صادق مالي عينا..
لا كيزان ولا شعوعين ولا بعث ولا حتى مؤتمر كان التأمري الفات ولا الحسي في قحت...
سوداني أنا
ولا هي
سود أناني أنا

[imported_عبدالله الشقليني]

كلام يا عوض دكّام !!

[بابكر مخير]

المشاركة الأصلية كتبت بواسطة عبدالله الشقليني

كلام يا عوض دكّام !!

أخي الحبيب..
ياهو دآ حالنا..
الما بيسوى على البيسوى يتطاول
والجاهل ذي رقبة الزرافة زهوا يتمايل..
قريت ليا موضوع قبل شوية..
حاولت أفهم منهو تلاتة كلمات ورا بعض ولكني ما لقيت فيهو المفيد...
ومش موضوع خلط التواريخ. الأدهى هو تزوير الحقائق...
وياهو ذي أنا ما قلتا فوق...
"لا حمدوك عاجبنا ولا سيد صادق مالي عينا"
عليه الرحمة عوض دكام...

[بابكر مخير]

الطبع والتطبع...
طبعنا حسب ما إحنا شايفين نفسنا وبعض شعوب العالم المحبة للسلام والبعض من الناس اللئام...
نتميز بالشجاعة والكرم والحليفة بي الحرم وقدح الأكل البنقدمهو قبل ما نسلم..
وذي ما تقول دآ in general.
بنطايب، حتى في سلامنا بناخد دقايق، الله يسلمك، الله يابارك فيك، الأهل، البلد ودي طبعن المقبلات وهي نفسها عندها صحانة جانبية ما عندك حكاية الأهل دي ممكن تكون ليها ذي كمين صحين، وليداتك والسيدة المدام (ناس البيت دي طبعن حاجة عجيبة جدا أنهو المقصود بي ناس البيت هي الزوجة "سبحان الله" وفي أهل الجهل والتخلف يقول ليك: ولا مؤاخذة الأولاد، جهل وإنقاص من الإعتراف بنعم الله). والمواصلة، الوالد والحاجة (برضك الفهم الذكوري المستبد) ويستمر ليهو في كم مفردة ومزدوجة وزلفة بين أروقة الأسرة ودهاليز أفرعها والصفق الفيها والساق وأصلك وفصلك من ناس مخير للتعايشة والبدرياب كان رباطاب وكان فرع ناس حبصة وولا بت الريف نفيسة وبعد ما يجوب ويصول ويجول في سهول النسب ويمكن يكون يتذكر ليك أيام الحج ووقفة عرفة والمزدلفة...
وتعرف زولك طشآ وخرج من الشبكة وقايلك حاج قاسم مخير عليه الرحمة...
وبالمناسبة لساتنا في بداية طبعنا ما التطبع،،،، ولي قدام.....

[بابكر مخير]

المشاركة الأصلية كتبت بواسطة بابكر مخير

وبالمناسبة لساتنا في بداية طبعنا ما التطبع،،،، ولي قدام.....

كانت زمان ألعاب الشارع الجماعية كتيرة ومتعددة ولكل منها موسم ومناسبة كذلك، الدافوري ممكن كل ايام السنة لكن في الخريف بتكون ممارستهو متقطعة. هذه الألعاب كان جمالها يتجسد في الروح الرياضية التي تغلب عليها وكمية التسامح البترفرف مغطياها وما يفوت أنهو كانت "يونيسكس" حتى الدافوري في الأعمار الصغيرة، بس العقدة الذكورية تظهر عن الأولاد لمن بنت تكون متميزة فهم الموضوع دآ ما بريحهم ويقوموا ينسبوها ليهم وتسمى (محمد ولد).
بعضهن كان يبرع في لعبة "السك سك" فكن يركضن بتميز وقدر ما تجري وراهن ما تقدر حتى تلمس طرف توابها إلا في "الميز"..
سيد صادق يديم ليهو الصحة والعافية مناهو أنهو الديمقراطية في السودان تصل "الميز" وظنيت حلمهو الكبير دآ حيتحقق بعد ما ثورتنا قادتها الكندآكة وقادة للرسن.
الروح الكانت غالبة في أيامنا ديك لمن كان التنافس هادئ وجميل هي نابعة من طبعنا الذي قومه أهلنا في البيوت وكانت هذه الألعاب غير أنهو طابعها مسالم إلا أنه كان هناك بعض من أولاد الحي بأنفسهم مرض ودآ ما شرطن لي الجينات البيحملوها ولا إساءة للتربية التلقوها في البيوت يعني في زول كدآ مثلن امه هي ملآك في هيئة إنسان وأبوه رجل مفكر وأديب والبديهي أنهو ما ممكن زول يكون أديب وإلا هو جامع لأدب الأخلاق وتأدب الكلمة وحتى كل ممن يكبره عمرا في ذآك البيت العامر. وفي تشبيه سوداني قمة في معناهو ولكن بالنظر اليه بعين تانية بيكون شوية صعب، فمثلن لمن زول يكون هادئ والغنماية تأكل عشاهو وما بيضر لا بالقول ولا الفعل؛ بيقولوا عليهو: قاعد ذي الضل وهكذا كانوا.
قلنا في واحديين من أولاد الحي كانوا يضيرهم أن يستمتع رصفائهم من القدرهم عمرا بمنافسة هادئة ورزينة، فيتعدوا عليهم بالقول والفعل..
من اولائك بعضهم نال حظا من العلم وإرتقى من المناصب عليآ وبعضهم عمل قروش وخلق لي نفسهو مركز ومنهم اللقى ليهو مساحة وطلق فيها قلمهو ولسانهو وإكتسب شهرة ومع دآ كلهو..
(بتذكر كنا مرة بنتكلم لينا عن شخص وأنا ما عندي عليهو شيتن مؤكد لكن حامة حولهو الأقاويل والشائعات وهو كان قد تبوء مكانة مرموقة، هنا ولا هناك ما مهم.. المهم تشبيه "كورية" الكان بيعرفهو أكتر مني فقال ليا: الزول دآ قدر ما وصل. ما بيتنسي ليهو حاجات. وتبقى عليهو ذي قصة الطفل المشي مع أهلوا لزيارة ناس ويوقوم في نص الصالون يعمل "أوماية".. أها دي أصلها ما بتتنسي ليهو ولا بتفارقهو. فكل زول ما يشوفهو حيقول دآ ما الزمان خرآ في صالون ناس فلان...) ...
فأيتها زول إن طبعهو لسة ما ظهر. أكيد بيظهر يوم وببقى الطبع يغلب التطبع وحيرجع تاني يضايق الخلق في التمتع بالحياة ويوصف بأنهو الشرير الكان ديمة بفرتق الدافوري..