قصص من الدنيا؛ وبعض حكاوي...!!!

[عبدالمنعم الطيب حسن]

في مكة ونحن طلاب وفقراء جايين من مصر نلقط قريشات يساعدننا في مصاريف الدراسة،
وعليه ساكنين في قمة اعلى جبل في مكة
كون ايجاره رخيس وتاني اقرب للمغارة
مافي حكومة بتصل هناك كوننا عمرة وزايغين
المهم صاحبنا المصري قال الا يمشي يتونس معانا
وقد حذرناه ولكنه اصر..
بعد نص ساعة وصلنا قمة الجبل حيث مغارتنا
بعد ان فاق المصري من الصعود:
دانتوا ساكنين أُريب اووي من ربنا..

[عبدالمنعم الطيب حسن]

ابوالقاسم عبدالقادر ابوالقاسم الشهير بقاسم..
حبيبنا
زارنا في مصر كثيرا، اخوهو نزار صديقنا..وزميلنا في الدراسة والجبهة الديمقراطية...
وقابلته في جامعة قاريونس في ليبيا حيث يعمل..
وتعرفنا على زوجته الليبية حميدة. حيث.
واغترب في الرياض لفترة قصيرة حقق فيها نجاحات مبالغة..وكنا نزوره في بيته الرحيب، في مجمع سكني مشهور..
ما زلت كل ما امر جمبه اتذكر قاسم عبدالقادر..
ولكنه لا يستقر في مكان واحد، روحه الشفافة اكبر من ان يسعها اي مكان..
غادربعدها نحو لندن ووووو
وكنا نتابع رحلة مرضه الاخيرة،
وحتى غيابه الذي هزانا..
فقاسم شخص فريد، حيث ما حل يحل الغنا
والرسم والموسيقى والتلوين..
له الرحمة بقدر انسانيته ولطفه...
..
وذهبنا لعزاء نزار في الاجازة في وفاة والدته ملهمة القصيدة، في بيتهم الكائن في الخرطوم ..
اول مرة اعرف ان عمنا عبدالقادر شاعر
لم بخبرنا نزار بذلك ولا قاسم..
لها الرحمة..

[عبدالمنعم الطيب حسن]

1- البدلة لازم وحتما ولا بد تكون مقاس من يريد لبسها بالضبط..
اي زيادات في طول يدين البدلة او مقاس اكبر للكوت او البنطال، تحول اللابس لشكل كروكي..
2- البدلة البنية تلبس معاها قميص ازرق درجات خفيفة وكرافة زرقاء درجة اغمق من القميص
والبدلة الزرقاء قميص ابيض وكرافة رزقاء لاباس
3- الكاروهات التقيلة انتهت موضتا في البدلة والقمصان
4- اختفت او كادت الجزمة الكلاسيك
واصبحت الاسبورتات الرياضية سيدة الارض الان؟
5- زناتي منور ووسيم وشباب بالبدلة الحلوة دي، ويبدو كمدير مكتمل البهاء والاناقة ...
6- زناتي صاحبنا "وود منطقتنا" نلف في صفحتو براحتنا، الملاحظة لا بد منها في حالة واحد ممتعض وكدة

[عبدالمنعم الطيب حسن]

لن تعلم مدى سعادتي ونشوتي وفرحتي
عندما ارى حرفك النابض دوما بالحب والجمال،
عندما ارى كلماتك احلق بعيدا ابيت الرحيل..
نحن الاسعد بعودتك مكتوبك المليان غناء
المخضب بالثورة وباليقين بانتصار انسان السودان..كلما اتذكرك والا تاتيني صورتك وانت تحمل جيتارك وتعزف وتغني
ميل وعرض كتر اعراضي
انا في هواكم بالعذاب راضي
..
واغنية الفنان شرحبيل
الليل الهادي..
..
كانت لنا ايام، يا ليتها عادت تلكم الايام..
عنكبة يا هو زاتو عنكبة الزمان داك يضحك من اعماقه الطيبة، ويحمل كتابا ويحلم بالممكن والمستحيل وينجب اطفالا حقيقيين..
ود الهادي ابو مظفر ما زال ود الهادي داك الذي يضحكك في اصعب الظروف، ويحمل ذات الابتسامة الطيبة..وذات الكرم الفياض..وعنده ذات الراي النهائي في اي امر تطلب

[عبدالمنعم الطيب حسن]

زيدنا من الشوف بصيرة
بصر واستبصار..
تعريف الاستبصار كما درسنا في كلية التربية
"الاستبصار هو لحظة وصول العقل والفكر لحل المشكلة، الحل الناجع.. لحظة الحل الناجع،،لحظة مفصلية، لحظة تنفيذ القرار على الارض"
لقد حفظت هذا التعريف منذاك الزمن المكهرب بالحرير، اجمل لحظاتنا في الكلية عندما ياتي اشقر مبتهجا ومتوترا من الامتحان، وانا اخد سجارة من بابكر ابشر المهل،، ومجدي الجاك يرمي النكات واي تعليق من عنكبة وحافظ ومحمد الهادي نكتة، وابتسامة تشع امانا وطيبة من حبيب ادم حبيب احمدية..
عارف يا اشقر نحن كنا اصدقاء شديد
شديد خالص، كنت اشد لك الرحال لشقتك في المحافظة،
اكتر يوم ضحكت عندما قابلتك لابس الجلابية والعمة، ولم تكن لبسة مشهورة وقتها، طوال وجودي في مصر لم يكن عندي، ولا املك لا جلابية ولا عراقي..
لقيتك لابس العصر جلابية، وسالتك
على وين العزم؟
-عندي ليلة شعرية في طنطا
- ياود انت شاعر من ورانا ونحن ما عارفين؟
- في طنطا شاعر نعم،
ههههههها...
وتبقى الذكريات ذادنا الاخضر الذي لولاه لاحترقنا..

[عبدالمنعم الطيب حسن]

تصدق لمن وصلت الحفير دي في مداخلتك لمن شهقت..
ساحة الحفير الجنوب بيتونا شهدت مواسم حياتنا كلها..منذ طفولتنا وحتى كهولتنا الآنية..
سبحنا في الحفير لما تمتلي ماء في الخريف،
ولعبنا فيها الكورة في العصريات..وطلعنا شدرة الحفير فرع فرع بحثا عن النبق..
ولعبنا شليل والرمة وحراسا في ليالي الصيف المقمرة..
وكملنا ونستنا بها في صبانا..
وانظف اسناني في الصباح غالبا خارج حوشنا على ضفة ترسها..ودائما
تستقبل صباحاتي بالبشر والبهجات
ولاحقا صرنا نجتمع امام ابوابنا جمب باب عبدالدائم على الشارع العام، الشارع الفاتح في القلبِ، القلب الذي هو مساكن شعبية،،
نجيب كم كرسي ويجتمع اهلنا وجيراننا نصبح على بعض ونستانس وربما ذهبنا للجيلي لاحضار الفول بالزيت الحار والطعمية للفطور.. وبعضا من عدس..
ونفطر في هذه الساحة في رمضان
من عصرن بدري، وهبة يرش الساحة
ويجهز الفرشات واباريق الوضوء
وياتي خالي بلال وينضم اليه صديق عمره عبدالدائم ويكتمل شمل فطرتنا..
انا في الغالب في معظم اللمات دي مستمع اكتر من كوني متحدث..
ففي حضرة اساطين الانس خالي بلال وعبدالدائم وعبدالوهاب، ليس عندي ما اقوله..
واصلا ممكن اتونس مع شخص او دفعة
لكن افقد الحضور حالما كثُر المستمعين..
سرعان ما اتحول لمستمع..
فانا اجيد الانصات اكثر من الحديث الذي له ناسه
اهلي كلهم ناسه، انا زول ما اجتماعي شديد الا في نطاقات الدفعة والشلة والاصدقاء وعلي حنتش، ..
تسلم عوض ياخ، تراك لمست وترا حساسا..
لك حبي وودي الذي تعلم،

[عبدالمنعم الطيب حسن]

حاتم دا متواضع فكرا وموضوعا،
وطموحو أكبر من امكانياتو،
..
هدفو تجيبو في الصفحة المقرؤة دي،
هو الان سعيد، انه
يبحث عن موطأ قلم، في الصفحات الكبيرة..
وقد حققت له المراد..
حاتم دا في عمق الفتيل، هو يتامل في الخروج، ولكن لا تسعفه الامكانيات ولا الفكرة
يستحيل والامر كذللك ان يخت زول في فتيل
المفتل لا يُفتل
..
ثم
ايش جاب لجاب
..
اي داعم للمليشيا عندو كك في راسو
..
..

[عبدالمنعم الطيب حسن]

وانا صبي وابوي في السبعينات
قلت له في نقاش:
واللهِ انا من اللّه خلقني ما شفت حاجة زي دي
ابوي:
هو انتا الله خلقك متين
😂😂

[عبدالمنعم الطيب حسن]

سنة 86 عملنا عملية عيون لابوي للمياه البيضاء عند دكتور عدلي دياب، يعرفه ناس بحري، العملية كانت في مستشفى بحري، الدكتور وصى ابوي ونحن المرافقين على عدم الكلام الا للضرورة وباختصار.. خلال اسبوعين..
وعملوا لابوي ورفاقه عصابة بيضاء ونوموهم يومين..
بكرة الصباح بدري لقيت الحجاج يتونسوا بصوت عالي وابوي بحكي في قصة انا حافظا طويلة شديد ههههه..
قلت ليهو ياج مش الدكتورقال ممنوع الكلام
هسا شوف الحجاج المعاك ديل ماشاء الله صمت رهيب وسكات جد
ابوي: القالك منو والله الصباح الجماعة ديل خرقوا العوائد..(متخيل اكتر من عشرة من كبار السن كل واحد راقد على سريرو ومغمض العينين ويحكي بصوت عالي لضمان وصول الكلام لناس لا يراهم)
بعد شوية ابوي حاول يفك العصابة حول عينه، ياحاج لا لا بعد اسبوعين
فتوقف على مضض،
مشيت الحلة، حكيت لصاحبو عمنا الحبر ود الريح، قصة فك الرباط حول العين..
قال لي:
ابوك مستعجل على الشوف التقول قبل كدة ما شاف..😂😂😂
..
مرة ابوي مشي زيارة لاخوانو في حلتم شرق ام ضوابان
عم الحبر عارف ابوي مسافر, والنظر تعبان
قالي: هسا الزول تلقى يضاوي
😂😂😂

[عبدالمنعم الطيب حسن]

دفعتي، استغل غربتي، وكلم اولاد حلتنا الاصغر انو ما دفعتني وهبط سنتين
الغريبة كل الجيل عارف انو ما صاح لكن بمشوا ليهو..
جيت نازل اجازة ووصلني الشمار..
ولاني ضيف تجنبت المواجهة المباشرة في الايام الاولي، لاحقا في ونسة مباشرة
لقيتو ناكر الروضة والاستاذة ستونة ومعلبات التونة والاناناس التي تذوقناها لاول مرة سويا في الروضة.. واولى ابتدائي وعيك فيض من الذكريات المشتركة، التي عشناها معا في طفولتنا، وهي ذكريات ممتعة وحقيقية، وكان سعيدا بها..
لاحقا في تجمع محضور ببعض اولاد الدفعة
سالته عن تاريخ ميلادو طبعا صغر نفسو سنتين
قلت له:
ما بينا سنتين بس اجازتي الجاية ما القاك تميتا خمس سنين..
نحن رضيانين انك اصغر مننا بسنتين بس اوعاك تطمع كمان اكتر من كدة..😂😂😂

[عبدالمنعم الطيب حسن]

مدربنا في مدرسة تعليم القيادة،
المعلم بتاعنا، كان مصريا قحا، تنبأ لي باني لن اتعلم القيادة ابدا، ولا اشتغلت بيهو، دا اكل عيش يصحبي مافيهوش يمة ارحميني،
المهم هو نفسه اختاري من ضمن السواقين الذين انهوا التدريب قبل موعده باسبوعين وامتحنت سريعا، واثناء فترة الاسبوعين كان معي في نفس القروب سوداني لاحقا عرفت انه طبيب
المعلم بتاعنا سالني عن السكر والضغط، وقد اسهبت (كمثقف) كان يقرأ طبيبك الخاص،
وعطيته برنامج مشي وغذاءات وعييك،،
وكانت مهنتي وقتها (عامل عادي)
و معه صور الاقامات،
بعد كم يوم اكتشف انو السوداني المعاي التاني هو الطبيب وليس حضرتي،
وجاءني معاتبا وزعلان واضاف حتى مهنتك مش دكتور ولا فني حتى
عامل عادي..
لقد بالغت يا زوووول
..
😂😂😂

[عبدالمنعم الطيب حسن]

https://www2.0zz0.com/2024/11/18/08/711337193.jpg

اضغط الرابط
صورتي الخائف عليها

[بابكر مخير]

المشاركة الأصلية كتبت بواسطة عبدالمنعم الطيب حسن

https://www2.0zz0.com/2024/11/18/08/711337193.jpg

اضغط الرابط
صورتي الخائف عليها

هذا الحسن والطلعة البهية

[عبدالمنعم الطيب حسن]

المشاركة الأصلية كتبت بواسطة بابكر مخير

هذا الحسن والطلعة البهية

..
تشكر حبيبنا الدكتور بابكر مخير..
تسلم ربنا يحفظكم..
اهدي ليك الصورة ادناه في نفس اليوم ونفس ميدان تمارين أولادي الصغار مهند والطيب..لفة العمة دي حالتا بدون مراية، والعمامة صغيرة..ههههه


[https://www2.0zz0.com/2024/11/20/17/822971897.jpg

[عبدالمنعم الطيب حسن]

بصراحة مؤيدي المليشيا صفر صغير من شعب السودان..
- اليوم سجلت زيارة للسفارة السودانية في الرياض، ياخ كل السودان هناك، شيوخ وحبوبات وامهات وشباب وشابات، واطفال في مختلف الاعوام وليدات حلوين وبنات احلى،،
ضربت الساعة اتنين منتصف النهار ضربت سندوتش فول وعصير كركدي، وكباية شاي،، حسيت كاني في شارع النيل...انا وانت هنا .
- زميلي وصديقي مصري ومهتم بمتابعة الشان السوداني،، قال لي اي سوداني سالتو لقيتو مع الجيش، طب مين مع الدعم السريع دا
قلت له:
ستة تقدم وسابعهم عرمان..