صدق أو لا تصدق!.. أبو أماني بالفضائية السودانية!

[أبو أماني]

المشاركة الأصلية كتبت بواسطة فتحي مسعد حنفي

عفيت منك يالزين..
تصور أنا هسع متخيلك زي الزول الماسك الخيوط في مسرح العرايس ونازل يرقص فيها حسب مزاجو..قدرت تلعب بالناس ديل وتوديهم البحر وترجعهم بدون ما يشربو والخوف من الجاي المافي زول لسة عارفو لكن أنا باقي لي الناس ديل في الآخر حيعملوا منظمة انتقامية ويشوفو يردوا ليك المقالب دي كيف...غايتو أنا شايف انك تنسحب من البداية وتلبد عشان صاحبي هاشم دا ما حيرتاح الا اذا قلب البورد دا كلو عليك..
الله ينصرك علي الحاقدين..

حقيقي مشاركتك أبهجتني رغم .. جنوحك لتفكير صاحبك هاشم وإتهامه لي بحاجات كتيرة .. الله يسامحه .. بس يا ريتك تدرك يا توحة .. إنو صاحبك المسكين غيران مني .. أأأي والله العظيم غيران عديل كدي!! .. تعرف في شنو؟ تصووور إنو أسمح مني وأوجه مني وأظرف مني وأعترف على رؤوس الأشهاد إنو أكبر مني وحتى في المراحل الجامعية صابقني .. بس رغم ده كلو لما نجي للمجتمع أخوك الفقير لله تعالى .. بيتفوق عليو من الجنسين .. وهو ما بيهتم بي حكاية أصدقاء يهتموا (بالزين) كتير .. لكين لما يكون في جنس لطيف وجيكس في وجودي كان صاحبك بيأكل نيم .. تقول لي شنو؟ تقول لي منو؟ .. كمان تزامن معها مقلب مهندز من بيت الكلاوي .. صار صديقي اللدود الودود (الحميم) كمن يحمل أسفاره سنة للحول .. بالله يافتحي مسعد أخوك ما ختتري؟ .. أنا خليني في ناس كده شمتانين بي تحت بس كاطعنوا في السوداء .. منو القال ود مخير ده؟ .. ناس بتاعين مشاكل!! تشاو وشكرا على الطلة البهية

[أبو أماني]

المشاركة الأصلية كتبت بواسطة بابكر مخير

زين المدعو أبو أماني
عابدين الملقب بأبرامي
مأمون أو كما نادتهو حبوتو...

لك المحبة شايلا لونها من البحبوك، بيضآ (هشومي) وقمحي (لون بنياتي) وأسمر (قالوا لونك كدآ).
والتقدير فقد ولفتا بين القلوب في نبيشتك وإتا تضحك والضحكة الكبرى هي الكانت علي هشومي..
والشكر على أنك فكيت لينا هشومي، الكنتا دايمن بشوفو جاااااااااااد (مش الشباب كانو قايلنو عسكور) وداااااااايمن زول غزل رفيع ونسيج للكلام التقول مصنع دمور وفي السياسة متمكن التقول حسن عبد الله دفع الله(ما بتم الإسم يقوم ينطآ ليا في زمارتي).........
ما كنتا أصلن قايلوا صاحب قفشة ، متصورو دايمن رسمي ما بيحمل الهبشة،،
الحبان الإتنين وكلكم وأصلوا وما تعتر ليكم قشة

بالله لو جد ورينا الساعة كم
لو ياهو جنس دآ
خلينا النلحق ما عندنا مواضيع كتيييييييييييييييييييييييييييييييرآ لغيناها أمس لي اليوم
بالليل،،
دآ، ماشي وين
ماشي وين

عارف ما في زول بيفهمني غيرك .. وما في زول ينصرني غيرك .. وكان ما قلت كلامك ده وحاة خوتك الذادي وعتادي .. كت تاني مريت على سودانيات مرور الكرام ولا فارقتها فراق الطريفي .. أما هاشم .. أصبر ليو ساااااكت .. كان ما وريتو شدر أب عشة .. ما أبقي الزين هي مأمون.. هي .. عابدين .. يا ربي ياتو فيهم الفي الورق الرسمي .. الله يطريني ليو .. آآآآآي .. زين العابدين .. هوا ده .. إبن ال... أما حكاية أبو أماني رامي فادي فاطمة وناجي فدي كنية أولادي وإفتكر لا تثريب عليا فيها .. مالم يكن لأبي مهييد رأيا آخر!.. نجي لراجل شادية أختي وهي أسلوب التعريف لحمواتي عند أهلنا الشايقية .. نجي ونكاية في هاشم طه لآسماء الدلع والتحبب والتي يطلقها عليا كل من هب ودب من الأحباب والصحاب .. نبداء .. باللزرق ، واللزيريق .. وخيت الشلة ودي أسما يطلقنها الحبوبات تحببا في هذا الشاب الأبنوسي الجذاب الذي يذهب الألباب .. أما الأصدقاء .. فحدث ولا حرج .. المسميني المضيقها .. والمجضمها .. وود أب زهانة .. كناية على الفنطازية وأنا أفلس خلق الله جميعا .. وهناك لقب يأتيني من صديق عزيز على قلبي جدن .. يطلقه عليا فيثير حنقي عليه وأسكت .. لن أقول لكم من هو! ولكني أشير لأن لقبه هذا يضج بالعنصرية المقيتة .. فهو أبيض اللون وغالبا ما من البلد دي .. وأنا سوداني أسمر اللون بتراب الأرض التي اعزها واعتز بها .. من سلالة قوم قيل عنهم .. عرب ممزوجة بدم الزنوج الحاااارة .. ديل اهلي .. هشومة .. هشومة .. أغني ليك .. قنبلة ؟.. ولا أخير .. وراء .. وراء .. وراء .. الحبيب بوكو لك خالص حبي

[تحفة حوا]

ح نحتفظ بي هدوءنا ورصانتنا الى ما بعد السهرة
وأرجى الراجيك يا ابو اماني
يا حليلك شماتك كتار
والصقر كان وقع كترة البتابت عيب

يا سيد القيافة وفايت الناس مسافة

دي نهاية النفخ والفشخرة
لكن سؤال مهم ؟
الناس دي ما كانت ح تجيب خبر وكلهم ما بحضروا التلفزيون
وريتم لييه وكلمتهم بالسهرة ؟

معزتي وتقديري

[فتحي مسعد حنفي]

يالزين خسمتك بالخلقك وسواك كما انت.خسمتك توريني السمسمية حقتك دي بتجيبا من وين.عشان انا قايم السودان والكلام عندي كمل

[النور يوسف محمد]

بسم الله الرحمن الرحيم
العزبز أبو أمانى
(من باب الوِلف الأدروبى)
..............................
نعلن تضماننا الكامل مع أخينا هاشم
وسنجلس فى المصاطب الشمالية مساء اليوم
بالرغم من مريخيتنا الدفينة
ولن نشجع اللعبة الحلوة
وسيكون شعارنا ( التحكيم فاشل .. التحكيم فاشل )
لكن بينى بينك .......... نفسك طويل
سنة ... سنة يالـ ................................

[رأفت ميلاد]

أبو أمانى إذيك

تعرف يا هاشم الزول ده أنا أول من لاوز منه .. كان جديد ودخل شمال دخلة كده ماياها .. حاجة فى العمر كدة .. دخلت ناوشته .. قام بلعنى ونصبنى الأب الروحى ليه ولا حاجة تشبه كده ..

عرفته زول ماهين وأنا أتشوطنت عليه أقدمية وكده .. زوغت ليك منه زوغة الله أكبر .. لكن بعد فرش ورقه بنصلح ليه القعدة
.

[wadosman]

[align=center]

المشاركة الأصلية كتبت بواسطة رأفت ميلاد

لكن بعد فرش ورقه بنصلح ليه القعدة
.

ههههه

قعده شنو التصلحوها...؟

انت و صاحبك هاشم كلكم دقسوكم...[/align]

[فخري الزين]

اشاعه ... اشاعه ... يا زينكو

[مواطن]

روفي مساءاتك ورود ..
أصلو أشـتر .. وإنت نفعتـك الخبرة .. شوف مثلاً فتحي فقسـو من أول سـيرف ..
دلوقـت صحـصح .. الزول ده رجعـتو باقي ليّ قاسيـة وستكون تبعاتها وخيـمـة جـداً .. ما سمع كلام فتحي وساق فيها ..
ده اليوم التاني ولا في سهرة ولا يحزنون ... الخلو شغلـم وحاضنـين التلفزيون .. الله يكون في عونـم ..
سمعـت ليك بسهـرة تتأجل 24 ساعـة .. هو قايل عندنا قنابيـر .. أصلو التلفزيون ده ما عندو برامج .. أهو الليلة السيد الرئيس محتل التلفزيون من 8 مساءاً بيحتفل قال بإفتتاح كبري أم الطيـور ... الطيرة الماترك يا عابدين .. قول آمين
أقعد بالعافية

[فخري الزين]

المشاركة الأصلية كتبت بواسطة أبو أماني

الحبيب تكعيب .. أبو زنوبة .. ما تسمع لي كلام الخواجة المطرطش ده .. وأنا أخوك تب ما بخذلك .. البرنامح سيعرض بإذن الله اليوم .. وكلها ساعات .. قد أخذلكم في قصة السماحة اليوسيفية الوعدتكم بيها بس ما تلوموني لانكم عارفين جمال يوسف جمال أنبياء وأنا ما نبئ..! أنا مجرد إنسان بسيط عادي يحمل ملامحا من النوع .. الحلوف .. عفوا المألوف .. حباني الله أحمده واشكره بجاذبية تجاه الآخرين من الجنسين مما أثار حفيظة ومواجد العزيز اللدود هاشم فهو يحمل كل معالم السماحة والوجاهة والعلم والثقافة وغيره..ولكني أتفوق دوما وبحمد الله عليه بأني (أمقلبه دائما) ويا ها الحالة الشايفها إنت أسع يا بوكو .. ينعل في سنسفيل الظروف واليوم الأسود الذي جعله طيبا حتى الهبل ليلتقط طعما.. ألقيته له في بحر سودانيات منذ سنة كاملة.. لا والمكيفني يا ود مخير يا أخوي الإجازة الفاتت .. قابلني وعرف نشاطي الإليكتروني عبر الويب وعرض على الدخول لسودانيات .. وأداني اللينك .. وكلمني عن الرواد وعن الحبيب خالد الحاج وأطنب في مدحه وقال لي بكلمه وازكيك .. من ديك وعرفت ليك زولي راقد سلطة .. واتجدعت فيو .. لكين يا بابكر يا خوي هو .. جيديع نصاح !! المصيبة لما تصله ثالثة الأثافي وينجح برنامجي التلفيزيوني .. عاد يوم داك الخواجة أخير ليو يرجع بلدو ويرجع لينا جنسيتنا .. وهيييييئ .. هي .. سيطرة .. أبو رامي ده .. حقو براه ..

نحن راينا طااااير انت رايك شنو يادكتره ....؟

[بابكر مخير]

الحبيب الغالي أبو أماني
قدرما أحاول أن أصف ليلة الأمس وأنا بين الزهول والزهو وسط أصدقائي الإتجمعوا عشان يشوفكا، على غير ما قال هشومي...
دآ،
الزول دآ معانا في سودانيات..
إتبجحتا قدر ما الله أداني قدام الكانو معايا..
لكن يا الحبيب،
للأسف
إتوارت الكلمات وإدستا التعابير،،
وسكت اللسان..
أقول ليك شنو؟؟؟
لو تقبلا مني وفي كلمتين.............
يا زول إبدااااااااااااااااااااااااااااااع

[عادل عسوم]

المشاركة الأصلية كتبت بواسطة wadosman

[align=center]

ههههه

قعده شنو التصلحوها...؟

انت و صاحبك هاشم كلكم دقسوكم...[/align]

نحنا غايتو ماقلنا حاجة

[سارة]

انا من زمان قلت ليكم الزول اب راسا مدقوس زى سرج العجلة دا راقدولو فوق راى

ابو امانى يا مدقس فطاحلة سودانيات

انا السهرة ما شفتها عشان احمد زين قال لى يا سرورة انتى جيتى تشوفى امك العيانة

ما تقومى تمرضى انتى زاتك فبنصحك بلاش منها وانا سمعت كلامو

لكنى مضطرة لرؤيتكم عيانا بيانا اليوم والله غالبي

[معتصم الطاهر]

تفاصيل

ما بنستحمل سهر و جهجهة تانى ..

ثم

اذا شربت شاى مر عشان أساهر و طلعت سهرة فشنك

لأهجونكم هجو الفرزدق و لأكيلن لك كيل جرير ..

[مواطن]

الحبيــب بكـــور ...
أسجل هنا وأقر جاهراً وبملء إرادتي أن الحياء يعتريني بالكلية وأن الخجل يسري في مسامي ويقبض على أنفاسي ، وهـل من سبيل للإعتذار من الأخ أبو رامي ...
حقاَ كانت سهرة ممـتـعـة .. ممتعــة حـد الروعـة .. ألجـم لساني الإندهاش كما فعل بك يا صديقي .. ،
لك العتبى يا أبو رامي ومثلك من يعـتب.