جرة السلك الموصل بين سقاطة باب الشارع واليد الخارجية هي صاحبة الاذن بالدخول

[رأفت ميلاد]

الكلام ده كتبه لى عابد عقيد .. بقى لى هاجس .. وكل يوم بكبر فى راسى أكتر من أمبارح ..
بديت أشوف المناظر حولى فجأة .. كأنى حضرت بالأمس .. حتى منزلى وفراشى بدأ لى غريباً .. وصل بى الحال لتأمل وجهى فى المرايه لفترات أبحث عن شكلى القديم .. وجدت شخص أمامى لا أعرفه .. 15 سنة ما هينة ..
أسمع جرة السلك واضحة فى منامى حتى "تك" بتاعة فتح السقاطة .. أكاد أكون فرزت شكل الداخل ..

بديت هنا بدون مدخل وليس لى مخرج .. سأواصل إذا تذكرت ماذا حصل .. سأكتب بالدارجى أو بالفصحى وزى ما تجى تجى ..

يوم فى عيد الضحية .. بحماقة سودانية .. جارنا ناصر وعلى أبو مرتو و وزوج أخت مرتو المغترب .. كلهم ضبحوا أول يوم فى العيد فى بيت واحد .. نسوان المربوع كلهن بقن فى خدمة التلاتة خرفان والرجال فى الكشتينة .. تلات وجبات دسمة وبالليل طعمناها من عجبة ..
مشينا البيت لقينا الحرامى لمه الحبل .. وبقيت بهدومى اللابسن ..

تانى يوم وصلتنى الهدايا .. عندى قميص جابه يسرى أول العطايا .. خفيف ما لقى حظه فى اللبس فى برد البلد دى .. أمبارح نكشت ساعة فى نص الليل .. لقيته ونمت مرتاح وما صحانى صوت الصقاطة

[أبوبكر عباس]

المشاركة الأصلية كتبت بواسطة رأفت ميلاد

أسمع جرة السلك واضحة فى منامى حتى "تك" بتاعة فتح السقاطة .. أكاد أكون فرزت شكل الداخل ..

.. خفيف ما لقى حظه فى اللبس فى برد البلد دى .. أمبارح نكشت ساعة فى نص الليل .. لقيته ونمت مرتاح وما صحانى صوت الصقاطة

الاستاذ رأفت
كل سنة و إنت طيب،،
الصقاطة الثانية (بالصاد) بارده...!

[رأفت ميلاد]

المشاركة الأصلية كتبت بواسطة بابكر عباس

الاستاذ رأفت
كل سنة و إنت طيب،،
الصقاطة الثانية (بالصاد) بارده...!

يا بابكر عباس
تعود الأيام بالصحة والسلامة ..
والصقاطة ياها السقاطة القاصدا .. رغم الصقط بدا ينزل والليل بدا يطول .. وقربنا من البيات .. والله يكضب الشينة ..

يا بابكر ما تعفينى من أستاذ دى ياخ عشان أقدر أتمطى .. والحكى فى أوله .. دى حاجات بتجى مره مره ..

تحياتى

[أبوبكر عباس]

المشاركة الأصلية كتبت بواسطة رأفت ميلاد

يا بابكر ما تعفينى من أستاذ دى ياخ عشان أقدر أتمطى .. والحكى فى أوله .. دى حاجات بتجى مره مره ..تحياتى

انت يا رافت ميلاد..
أقباط أم درمان ديل عندهم سقاطة بالسلك؟ و الله انا كنت قايل بيوت الاقباط دي فيها سورين و مقفلة بالجنازير من شدة ما هم محافظين...

كل المنى لك

[خالد الحاج]

آه يا رأفت يا أخي..
وجعت قلبنا .. نحن برانا علي الهبشة ..
كنت قايل أنا براي الكاتلني الحنين
المؤلم يا رأفت أن الزمن لا يعود .. أخشي عليك من حلم بعيد المنال وقيل محال..
أمسك في قميصك قوي..
الناس اتغيرت يا رأفت ...
قال لي أحد الأصدقاء بعد مراقبة "لصيقة" : إنت تاني ما بتنفع تعيش في السودان .
قلت ليه ليه هل أنا صرت سيء لهذه الدرجة ؟
كان رده : لا
بس انتوا بقيتوا محنطين ودواخلكم تحمل الحاجات السمحة بتاعة زمااااان !!

وكلمة زمان دي جراها مسافة يا رأفت ...

الشكية لله يا صاحب..

[رأفت ميلاد]

المشاركة الأصلية كتبت بواسطة بابكر عباس

انت يا رافت ميلاد..
أقباط أم درمان ديل عندهم سقاطة؟ و الله انا كنت قايل بيوت الاقباط دي فيها سورين و مقفلة بالجنازير من شدة ما هم محافظين...

كل المنى لك

يا ود عباس نحن فى المسالمة ما عندنا بيت .. عندنا حوش جواه سبعة عوائل عمرى ما شفت بابه مقفول وحاكى فى الواطة .. يعنى السقاطة صدت .. ونحن بسمونا أولاد البلد عشان ملونين زى شفق المغارب ..
الأقباط بقسموهم تلاتة .. "أقباط حاف كده" وديل هجرات قديمة غالباً فى شمال السودان .. مناطق القولد والمحس عموماً .. أتوا مع فتح مصر فى زمن عمرو بن العاص .. وهربوا أمام جيوش عبدالله بن السرح .. هجرتم لى أمدرمان والى عطبرة وبورتسودان زمن الإنجليز .. حلب زى القاعدة معاى دى ..
الفئة التانية "الأقباط النقادية" وهم هجرات حديثة نوعاً من منطقة "نقادة" فى صعيد مصر .. بلبسوا جلابية قصيرة زى الأنصار وعمة متر .. وبدأو الهجرة أغلبهم هروب من التار .. أتوا فقراء وإستقروا أغلبهم فى شندى .. مهنتهم كانت صناعة الفراد والفسيخ .. عصاميين وصاروا من أثرياء أمدرمان ..
الفئة الأخيرة الهم نحنا "الأقباط أولاد البلد" من جزئين .. الهجرة الأولى من كردفان مع جيش المهدى .. وهؤلاء أهلى .. والجزء الثانى من القضارف .. عندما نزع الخليفة كل ممتلكاتهم لتمويل الحروب .. وبعثوا بهم الى الخرطوم .. نزلوا فى منطقة المقرن عدة أيام .. كان يمكن بيعهم عبيد لولا أجارهم جدنا الأمير يوسف خليل "مخائيل" لدى الخليفة .. ومُنحت لهم منطقة المسالمة ونًصب يوسف خليل أمير عليهم ..
بالمناسبة أتوا من منطقة حول القضارف معروفة بالمسالمانية .. ومن هنا أتى إسم المسالمة وليس كما يعتقد الكثيرون نسبة لإسلامهم ..
هؤلاء إنصهروا معنا بالزواج وكانو لبنة المسالمة .. ومؤخراً إنضم لهم الفئتين الأخريتين .. وديل هم الما عندهم سقاطة ..

الأقباط أولاد البلد بالمناسبة كلمة مشذبة لكلمة عبيد الأقباط

وقع ليك

[رأفت ميلاد]

المشاركة الأصلية كتبت بواسطة خالد الحاج

آه يا رأفت يا أخي..
وجعت قلبنا .. نحن برانا علي الهبشة ..
كنت قايل أنا براي الكاتلني الحنين
المؤلم يا رأفت أن الزمن لا يعود .. أخشي عليك من حلم بعيد المنال وقيل محال..
أمسك في قميصك قوي..
الناس اتغيرت يا رأفت ...
قال لي أحد الأصدقاء بعد مراقبة "لصيقة" : إنت تاني ما بتنفع تعيش في السودان .
قلت ليه ليه هل أنا صرت سيء لهذه الدرجة ؟
كان رده : لا
بس انتوا بقيتوا محنطين ودواخلكم تحمل الحاجات السمحة بتاعة زمااااان !!

وكلمة زمان دي جراها مسافة يا رأفت ...

الشكية لله يا صاحب..

خالد كل سنة أنت والعائلة بخير
كله فات أضانى .. وكمان هبشنى منه سوء .. لكن نسوى شنو .. لسة الشوق وما فاقدين الأمل ..
نحن فى كل الأحوال وصلنا لتسليم الراية وحالنا وصل للعمل ليه سبيل وحرسه .. القدرنا فى .. وبحفظوا لينا الجميل .. وعضهم بعيد لى بعيد .. كان نمشى نجاور السمحين الفاتوا ..

يا خالد قال أحد الفلاسفة .. الحقيقة هى أن لا تُؤمن بما يجرى حولك .. إذا تغير ملوكهم .. حتماً سيتغيرون ..

الله فى

[معتصم الطاهر]

فى كلام بقع ليك فى جرح ..

و فى كلام بيوقِعـَك فى جرح ..

و فى كلام بِـيـقَع فى جرحك .. مرات يعورك ومرات يشفيك ..

أها يا رافت .. رجعت الأسمها بلد .. و لقيت البلد ما ياها .. أقل حاجة .. الناس دايرة تفسَر كلامك ...

و كلمة بحبّك .. بقت داير منك شيتا غلط

و كلمة أريدك .. معناها دايرك ..

الناس قفلت بيوتا و فتحت عيونا .. على غلط الناس ..

وبدل الكلاّب ربوا الكِلاب ..

كلامك يا رأفت مسكنى من محل بتوجعنى ..

[أبوبكر عباس]

المشاركة الأصلية كتبت بواسطة رأفت ميلاد

.. حلب زى القاعدة معاى دى ..
...
الأقباط أولاد البلد بالمناسبة كلمة مشذبة لكلمة عبيد الأقباط قع ليك

وقع لي تب...
لكن ظهر لي سؤال تاني:
إنت الحلبيه الحرة دي كيفن أدوها لي ود البلد المشذب ده؟!

[رأفت ميلاد]

المشاركة الأصلية كتبت بواسطة معتصم الطاهر

فى كلام بقع ليك فى جرح ..

و فى كلام بيوقِعـَك فى جرح ..

و فى كلام بِـيـقَع فى جرحك .. مرات يعورك ومرات يشفيك ..

أها يا رافت .. رجعت الأسمها بلد .. و لقيت البلد ما ياها .. أقل حاجة .. الناس دايرة تفسَر كلامك ...

و كلمة بحبّك .. بقت داير منك شيتا غلط

و كلمة أريدك .. معناها دايرك ..

الناس قفلت بيوتا و فتحت عيونا .. على غلط الناس ..

وبدل الكلاّب ربوا الكِلاب ..

كلامك يا رأفت مسكنى من محل بتوجعنى ..

يا معتصم "هبشك الما ضراك" .. مدام هبشتك الدنيا بخير .. إنتوا أقرب من الواقع مننا .. مصالحكم مربوطة .. وتواصلكم دائم .. والبحر الجديد بتقدروا تتنفسوا فيه أحسن وبتعرفوا لغة سمكه ..
يبقى الأمل موجود .. بقيتوا رابط فى النص .. المحنطين داخل الكهوف بتعبير خالد والهلكانين داخل جهنم .. عليكم تقودونا بى عمانا .. وتصبوا الموية الباردة فى نارم ..

أنتم خير الأمور

تحياتى

[عادل عسوم]

المشاركة الأصلية كتبت بواسطة رأفت ميلاد

الكلام ده كتبه لى عابد عقيد .. بقى لى هاجس .. وكل يوم بكبر فى راسى أكتر من أمبارح ..
بديت أشوف المناظر حولى فجأة .. كأنى حضرت بالأمس .. حتى منزلى وفراشى بدأ لى غريباً .. وصل بى الحال لتأمل وجهى فى المرايه لفترات أبحث عن شكلى القديم .. وجدت شخص أمامى لا أعرفه .. 15 سنة ما هينة ..
أسمع جرة السلك واضحة فى منامى حتى "تك" بتاعة فتح السقاطة .. أكاد أكون فرزت شكل الداخل ..

بديت هنا بدون مدخل وليس لى مخرج .. سأواصل إذا تذكرت ماذا حصل .. سأكتب بالدارجى أو بالفصحى وزى ما تجى تجى ..

يوم فى عيد الضحية .. بحماقة سودانية .. جارنا ناصر وعلى أبو مرتو و وزوج أخت مرتو المغترب .. كلهم ضبحوا أول يوم فى العيد فى بيت واحد .. نسوان المربوع كلهن بقن فى خدمة التلاتة خرفان والرجال فى الكشتينة .. تلات وجبات دسمة وبالليل طعمناها من عجبة ..
مشينا البيت لقينا الحرامى لمه الحبل .. وبقيت بهدومى اللابسن ..

تانى يوم وصلتنى الهدايا .. عندى قميص جابه يسرى أول العطايا .. خفيف ما لقى حظه فى اللبس فى برد البلد دى .. أمبارح نكشت ساعة فى نص الليل .. لقيته ونمت مرتاح وما صحانى صوت الصقاطة

غاااااايتو؟!
عالم قاعدة على ال(هبشة)
عليك بال(كركدي الأبيض) يارأفت ياأخوي
الأبيض مش اللحمر ياخواجة
جعل الله أيامك كللللها أعيادا
مودتي ياجميل

[رأفت ميلاد]

المشاركة الأصلية كتبت بواسطة بابكر عباس

وقع لي تب...
لكن ظهر لي سؤال تاني:
إنت الحلبيه الحرة دي كيفن أدوها لي ود البلد المشذب ده؟!

ذكرتنى يا بابكر لامن مشينا طلبنا الحجة من أهلا .. كان معاى أبوى وأمى وأخوانى فقط .. ولامن خطب شقيقى سليمان رحمه الله تهانى إبنة نديم عبدالله أسود وخالها فهمى سليمان رحمهما الله .. وهم أصلاً جنوبيين .. كنا أيضاً فقط العائلة نفسها .. الغريب من الحضور كان فقط اللواء طلعت فريد رحمه الله صديق فهمى سليمان .. تانى يوم من الخطوبة أتى عمى "محنبك" وزعلان وقال: "الأولى سكتنا ما كلمتوا زول قلنا أقباط حرين .. التانية دى ما عبيد زيهم زينا"

والله أخدنا المرة يا بابكر بإيدا وشديدا هى .. كانت معنكشة شديد .. أخوك ما لقطة ..

وبرضوما ختتنا الملاسنة .. السودان ياهو السودان .. والعنصرية مأصلة .. كان شوايقة كان أقباط .. ده تضرب بيه ده .. أقلب ليك فى الملف ده ..

قالوا بعد النميرى لغى الإدارة الأهلية .. يوم البنطون قاطع من الحصاحيصا لرفاعة .. بعد ما عدى ظهر واحد من أولاد أبو سن فى القيفة .. بدا الناس فى المعدية وفى القيفة ينادوا .. رجع البنطون وشال ود أبوسن .. واحد أخدرانى من الشباب المثقفاتية بدا ينقنق "عالم ما بتحرر .. قدر ما الثورة تنصرم راجعين لى ورا .. والطائفية والتسلط ووووو .." .. والناس سااااكتة ..
ود أبوسن ضاق بعد ما صبر .. قال ليه .. "يا ود الخالة .. العمودية دى تب كرهناها .. بس لصقت فى الواحد زى قولة يا عب .. أصلها ما بتطلع"

[معتصم الطاهر]

رأفت سلام

و نا العامل فيها بعرف الأقباط وأصحابى من الاقباط
دخلت بيوتم و رقصوا فى عرسى ..
و سكنت مع فراتسوا فى بيت النمل ..

لكن سؤالين
1- الوداهم الغرب عشان يرجعوا مع المهدى شنو ؟
2- السبى فى القضارف ليه - زمن الخليفة - ؟ والوداهم شنو و مافى مهنة بمتهنوها هتام
3- من وين ليهم السمرة ؟

[رأفت ميلاد]

المشاركة الأصلية كتبت بواسطة عادل عسوم

غاااااايتو؟!
عالم قاعدة على ال(هبشة)
عليك بال(كركدي الأبيض) يارأفت ياأخوي
الأبيض مش اللحمر ياخواجة
جعل الله أيامك كللللها أعيادا
مودتي ياجميل

على الهبشة بس ياعادل ؟!
ده العيد .. فى الغربة دى يجيك زى الموت .. يقلب كل المواجع .. أنت قايل بدون الأبيض والأحمر ده فى نوم ..
جانى قريبى د. فؤاد عبدالله بقطر من السودان .. جهزتا ليه البيرة الباااردة .. وطلعت قزازتى من تحت السرير بيييضا .. بدل بلح عنب .. قال لى أصلوا مافى منكم أمل

كل سنة وأنت والأهل بعافية

ما تجرب لينا بتاع البركل الحر .. تفش مغصتنا وباصى لى ذنبها .. نحن شيالين تقيلة

[عابد عقيد]

رأفت والجميع كل عام وانتو بخير

مالك علينا كاتمين الحنين ومقطعنو جوانا

جيت قلبت علينا المواجع ..

تسلم يا رايع