ضل راجل ولا ....؟؟؟؟؟؟؟؟

[جانيت]

مرافي موضوعك جميل وشيق جدا والكلام فيه ما بيخلص
الرجل في حياة الواحده مهم جدا وما نقدر ننكرة
بس ما نقدر نقول ضل راجل ولا ضل حيطة وخصوصا لو هو المتنازل عن دوره
المثل ده في كتير من النساء كسروهو وبقى ما عنده معنى
يعني واحدة زوجها يتوفى ويخلي ليها كوم عيال وهي بدورها تربيهم وتكبرهم وتعلمهم احسن تعليم وتعيشهم عيشة كريمة ومن غير راجل في حياتها
ده مش كسر للمثل ده
ولتصحيح المعلومة المثل ده بيتقال للمتزوجه العاوزة تنفصل عن زوجها ما للعايزة تتزوج يادوب
اما العايزة تتزوج يادوب دي يحلها الله من نقة الحواليها بيقولوا ليها امثال تانيه دايرة
ليها بوست كارب

[مرافي]

المشاركة الأصلية كتبت بواسطة خالد الصائغ

سلامات مرافي

ضل راجل و لا ضل حيطة

من أكتر الأمثال البتكرس لي ثقافة الإختزال السلبي للمرأة في ظل مجتمع محفوف ببنية وعي تناسلية متطرفة و حادة الحواف و ما بتقيم المرأة خارج دائرة البايولوجي

و المرأة المسكينة و المغلوبة علي أمرها عشان تتصالح مع نفسها و مع مجتمع بيتعامل معاها بالمفهوم ده
بتلقي نفسها بوعي أو بدون وعي مهمومة في المقام الأول بالشأن التناسلي و كأنو ده دورها الوحيد في الحياة

يعني الزواج بشكل الهدف الإستراتيجي الأول في سلم أولوياتا عشان تحصل علي تقييم إيجابي ينأي بيها عن دائرة المصطلح اللزج (البايركس) و يشعرها بي قيمتا الذاتية و الإنسانية

ما داير ألوم المرأة هنا و أقول إنها بتساهم بشكل أو بآخر في ترسيخ مفاهيم الإختزال السلبي للإنساني فيها

لكن أقدر أقول أنو المرأة مطالبة في ظل تزايد حركة الوعي بالتعامل بإيجابية مع الواقع السلبي المحيط بيها بدلا من الإنهزام و مسايرة الركب.

العزيز خالد الصائغ

والله الحمد لله هناك بعض النساء باتن يغيرن من هذا الواقع السلبي

فما بات ظل الراجل هو كل المرام...

فهناك بعض النساء اللآئي..صرن يحققن احلامهن من غير ضل راجل..

او بمساعدة الشريك...ولكن مثل هؤلاء الرجال قلة...

تحياتي علي مرورك الغالي...

[مرافي]

المشاركة الأصلية كتبت بواسطة أبوجهينة

مرافي
سلام و تحية

ولكن مايحيرني هو لماذا ضل الراجل وليس الراجل نفسو؟؟؟؟

أصلاً المثل لا يستقيم عقلاً
لأن ما كل راجل عندو ضل
و لا كل الحيطان توفر الفيء و الضل
و ضل الراجل المقصود به في المثل هو القوامة .. من توفير العيش الكريم للمرأة و حمايتها و تربية الأولاد و إلخ ...
فكم من رجل تزوج و لكن لا ضلاً رقد بقفاه أو قدامو و لا حتى بقى تعريشة راكوبة أم رقراق... صَيْ ساااكت و صقيعة.
و ضل الحيطة لبعض النساء أحسن .. حيث أن ضل الحيطة المقصود منه هو بيت بلا زوج .. فقط جدران توفر الإستظلال بالضل.

دمت

العزيز ابو جهينة
تحياتي

لأن ما كل راجل عندو ضل

وشهد شاهد من اهله
بس يارييييت اخواتنا الما اتزوجن
يعرفن انو ما كل راجل عندو ضل[/color][/font][/size]

[مرافي]

المشاركة الأصلية كتبت بواسطة فتحي مسعد حنفي

أبو جهينة قريت كلامك دا للحجة وقلت يمكن تشرح لينا معني المثل فكان الشرح0 كالآتي: علي المرأة في وضع وسن معينة أن تقبل بالزواج من أي رجل مهما كانت نواقصه من كبر سن أو شنا بدلا من العنوسة وبقاءها بين جدران خالية وأهي برضو بتكون سيدة متزوجة يقال عنها فلانة زوجة فلان مش فلانة بت فلان...
غايتو الواحد ما عارف يقول شنو

الغالي فتحي

بالمناسبة كويس انحنا المرا ما بتنسب فيهو لزوجها بعد الزواج

بتظل فلانة بت فلان

وفلانة مرت فلان دايما بكون عند اهل الزوج

لكن عند اهل الزوجة بيكون فلان راجل فلانة
برضو احسن من ما يقولو فلان ود فلان.

[مرافي]

المشاركة الأصلية كتبت بواسطة نبراس السيد الدمرداش

مرافئ و المتداخلين مساءكم سعيد

عمو فتحي مالو اسم ابوي احسن اكون فلانه بت فلان معززه مكرمه ولا فلانه زوجة فلان و انا اشرب المر لكيعاني
نظرية تانيه سمعتها من حبوبتنا الشفه عتيق (يا بناتي جيبوا ليكن حوار من حمار , الحوار يقعد يونسك و الحمار يبرطع يخليك)مع الاعتذار لكافة الرجال
و دي ممكن تكون نوعا ما اخف من ضل راجل, لانها قايمه على مبدأ المنفعه من الزواج و هي الانجاب

الغالية نبراس
والله دي النظرية السايدة عند الحبوبات والامهات
يابتي عرسي جيبي ليك جنا ينفعك في كبرك
وكأنهم لخصو حتمية الزواج بس من اجل الانجاب فقط ...!!!!!
عشان كدا صار ضل راجل والسلام طالما في حوار
مع العلم في نساء يظلن في الضل دا مع زوج لا ينجب
دا يقولو عليهو شنووو؟؟؟؟؟

[مرافي]

المشاركة الأصلية كتبت بواسطة فتحي مسعد حنفي

يادوب كدا فهمت..أتاريك عقاب حلب وأنا أقول نبراس دي الوحيدة الواقفة معاي ضد الصهاينة
ناس ود عثمان..كدا من الليلة حنعمل سوا حلف تيراب الحلب البجيبو للناس الجرب

يا اخوانا ما تشوفو الحلب ديل بيبرطعو لي في البوست كييييف!!

[مرافي]

المشاركة الأصلية كتبت بواسطة سمراء

[color=#0000FF]

مرافى مسأءتك طيبة ،،،
حقيقه موضوع كبير ، ومعانيه اكبر بس حا اختزلو ليك فى كلمات بسيطه ،،،وهو نحن دائما الموروث بحكمنا بى قوانين اشد من القوانين الدينيه ، بمعنى انو الواحده لو اتزوجة الدين بحلل ليها الطلاق فى حالة تعثر الحياة ، لكن المجتمع بنكر عليها الحق ده ، وبنشوف المطلقه بتمر بى عوائق كتيرة بخلقه المجتمع حولها ، مع انو اى بيت او اسرة بكون فيهو مطلقة !! يعنى عادى ..
نظرة المجتمع للمرأة للاسف نظرة دونية ضيقه جدا ، بقوم يجرده من ابسط الحقوق ، وبديها للراجل مهما كان (شكلو ) العام ..يعنى المتعلمة وغير المتلعمة ، فى الحد السوا ء امام ظلم المجتمع ، وبتكون ناقصه طالما ما اتزوجة ، ويفترض ان تتزوج باى راجل المهم بس تكون اسمها ...متزوجة !! ودى المشكله ....
بعدين ليه ضل راجل ! ليه مايكون امان راجل ...حب راجل ...ليه بس ضل ...والسلام
مجتمعنا بجرد المرأة ...او خلينا نقول ...العلاقه الزوجية عموما من اى فهم عميق ...لى اداء واجب بدون اى فهم ...غير الشكليات والبتكون وراها مآآآآسى ....[/color]

[align=center]الغالية سمراء
تفتكري ايه البيخلي الواحدة تتزوج اي زواج المهم راجل والسلام
غير المجتمع!!!!
تفتكري ايه البخلي الواحدة تعيش مع الزوج وتتحمل كل الم وحسرة...
غير المجتمع!!!!!!!
الواحدة تتزوج خوف المجتمع
تنجب خوف المجتمع وهي عارفة الاحسن ما تنجب لسوء الزوج!!!!
تتجرع الامرين وتعيش في الضل برضو خوف المجتمع!!!!!
ارحمنا يا مجتمع..!!!!![/align]

[فتحي مسعد حنفي]

المشاركة الأصلية كتبت بواسطة مرافي

يا اخوانا ما تشوفو الحلب ديل بيبرطعو لي في البوست كييييف!!

برطعة الحلب دي بتجيب ليك الزباين الجايين يشمتو فيهم..يعني برطعة بي حسن نية..تمام خيرا تعمل شرا تلقي..أها خليناك تبرطعي براك..وبعدين انتي مش متزوجة وبي وليداتك مالك ومال الحيطة والرجال ولا راجلك ما قاعد يقرا الكلام البتكتبيهو دا

[AMAL]

سلام يامرافي

رايك شنو في راجل ضل

بس ماضل ضحي

يزوغ منك في اقرب لفة

ويخليك في الصقيعة

راجل ضرا
ودفا
ووفا


وياضلنا الممدود علي ....

[مرافي]

المشاركة الأصلية كتبت بواسطة محمد أبوعاقلة

النسوان ديل خلو بالكم زي الدايرات يقولن
ضل حيطة ولا راجل حيطة ...
يعني إن لقنو حيطة يقولن إخير ضلها !!!
هي عينن دي متين إتملت !!!
بالقليل إعتبرنو ضل راجل ... وبالسترة يمرقنو حيطة ساي ... ومايلة كمان !!! والبتتّكل عليها بتاكل بردلوب !!!
وإن بنسمع طربقتن دي كان من زمااااان جابننا بردلوب !!!
نقناقات جنس نقّة !!!
وفي النهاااااية ... كل واحدة بتختار ضل حيطتا براها ... زي ما هو اختار راكوبتو
وفي منهن يخلنو حيطة قصيرة بحركاتن ديك (كل يوم تشيل منو طوبة وتجي على راسو طوبة) فـ طوبى لهم الجوز !!!!
دا لو ما هدّتو من ساسو وجننتو في راسو !!! وارتاحت من خلقتو دي !!!
المرا النجيضة بـتشممو فُلّها عشان تكبّر ضلها ... دا إن لقتو راجل هلهلي طبعن !!!!
القضية يا زولة .. قمرية دايرة تبني عشها قشة قشة
ما تقعدن تعملنها ليها حيط ومداميك وقعاد ضللة !!!
وإن جينا مسكنا ضل الراجل ذاااتو تعملنها لينا دا باهت ... ودا رمادي ... ودا رقراقو كتير ... ودا سجمي ما عندو ضل حتى لو كان انسان شفاف ..
بعدين احنا البندق البيبان ... وعلى هذا الاساس نقوم نتقدم لفتاة الأحلام الساعة تسعة صباحا او تلاتة العصر لقياس ضلنا المرسوم على رمل المسافة وشاكي من طول الطريق ...
عشان ما تجن تشتكن من ضلنا في الليل دا على حساب حسرتكن !!!
هي الوجعة إن بقت في الضل امرها هييييين ... الكلام على اللون الأساسى البمنح اللوحة ازدواجية القراية داك عارفاهو ؟؟؟؟ ياخ البفتح الضوءبين خطوط الريشة والخط الاضافي برضو ما عرفتيهو ؟؟؟؟ ياخ الجاي من شبكة الزول العريس قتا ليك .
ياخ القناعة بتغنيك عن دا كووووولو ...
ياخ لسه في ضهب ما لاقيات طريقة يقيلن في ضل راجل من سموم الدنيا دي !!!!
وفي منهن إن لقنو فيييي عضمو دا .. يختارن النار الضلها يحرق ...
وكدا يعني

والله يا ابو عاقلة الحيط زاااتا خشم بيوت
في حيطة جالوص مهتريء!!!
في حيطة مبيضة...
وفي حيطة في السلك ولونا pink
انت ياتا فيهن؟؟؟؟؟؟

[مرافي]

المشاركة الأصلية كتبت بواسطة رأفت ميلاد

سلام يا مرافى

الموضوع (مثل) نصه بقول المرأة (ضل حيطة ولا ضل راجل) .. بالظبط مثل تفسير (مدام) حنفى .. (ده لقب خواجاتى)

مشكلة المثل ده ما فيه راجل على الإطلاق ولا يصل عالم الرجال .. ده مشكلة نسائية 100% وهى (العنوسة) .. والعنوسة هى مشكلة المرأة أمام المرأة .. فلن تجد المرأة عندما يتأخر قطار زواجها تشنيع إلا من أختها المرأة .. فزواجها يكف عنها ألسنة النساء .. فقيل المثل بأن المرأة يجب أن تقبل بالزواج ولا تفكر فى التفاضل فيشمت فيها النساء ..

يعنى الموضوع ما فيه أى جندرة .. ونحن الرجال بنقول للراجل الما عرس (عرفا ود الكلب)

هو كان ما الجندرة دي
كان النسوان دارن( ضل الحيط )اقصد الرجال

يعنى الموضوع ما فيه أى جندرة .. ونحن الرجال بنقول للراجل الما عرس (عرفا ود الكلب) [/
يعني انتو برضو من جماعة ضل مرا ولا ضل حيطة
تحياتي لكريم مرورك...

[نزار حسن علي]

الكريمة
مرافى

قلنا شنو المودة والمحبه والرحمه يا ناس

[مرافي]

المشاركة الأصلية كتبت بواسطة nagwa

أرى ان الموضوع تحول بين الاعضاء من خلال الردود على إلى وجهات نظر مختلفة

موضوع اكثر من رائع وفيه من الصراحة والجرأة


المثل خاطى مية بالميةوهذا مثل شعبي تداولته جداتنا لتظل المرأة محافظة على زوجها ولو كانت معذبة ومظلومة ومهانة ولا يجدون لها حلا إلا تصبيرها



عندما يتخلى "بعض" الرجال عن مسؤلياتهم تلقى بالمسؤلية على المرأة
وإذا لم يكن هناك ظلاً للرجل ؟ أعتقد أن ظل الحيطة أفضل بكثيرماحيطة بس لو ناطحة سحاب
وتحياتي

[align=center]اشكرك اخت نجوي
والله انا المستغربة ليهو حتى في التصبير
عايزننا نتعلق بالخيال وهو الضل
لانو الضل عمرو ما يبقي الاصل ودايما مقترن بحركة الشمس
مرة الضل طويل ومره قصير ومره مافي !!!
فياتو ضل عايزنو لينا نقعد فيهو...
فهم قصدهم راجل... ضلو ولا ريحتو بس الزمي الصبر
واقعدي في ضلاً زايل
شكري [/align]

[تحفة حوا]

كل قفة وليها شيال
وعلى قدر أهل العزم تأتي العزائم
والطيبون للطيبات
وبقولوا ابنك على ما تربيه وزوجك على ما تعوديه (يعني المرأة السبب فمافي داعي تشتكن )
بعدين نحنا النسوان جننا نقة لا الراجل الطيب والهدي والرضي يعجب ولا الهراش النكدي يعجب
حيرتن الرجال معاكن

ويا ريت نتعلم كلنا من قدوتنا صلى الله عليه وسلم وزوجاته

هل كانت طيبته معهن ضل راجل ؟؟
وانه لعلى خلق عظيم صلى الله عليه وسلم

مرافي مشتاقين

[مرافي]

المشاركة الأصلية كتبت بواسطة بدور التركي

لا ضل ولا حيطة00
هي قناعة00 والقناعة كنز
وبعدين المرأة بطبعها نكارة للجميل
في لحظة غضب ممكن تنسى كل حاجة
وتقلب الراجل حيطة مايلة00 دا لو ما كسرتها00

[align=center]بدور يختي انتي معانا ولا مع الضلD:[/align]