حباب استاذنا الجميل حسين يوسف مكى ...والف مرحب بى تناغم
مريدى هيا ....هنا
تناغم مريدى هيّا !!
نحن فى وطنا
متحابين ..
نذرنا عمرنا للبلد
الرسم فينا صور
اسلافنا والطيبين
وشان الشهداء يوم ارووا
شعار بلدا مطرّز بى شرف
عازّة لو عارفين
عبق غنواتنا لما يفوح
يداعب فى جنوبنا حنين
يلاّ عشان الوحدة
نتحزّم ونتلزّم
نجدد للصلاة والبين
نكتب فى هامة وطنا
حروف شان يقروها
ناس تانين
تعالو نكمّل المشوار
تبقى الوحدة
لينا شعار
ياعزوتنا ليهو نزين
ننسى الفات خلاص ولّى
يعود الهجر البلد خلّى
نفروش تبروقة فى السهلة
وتتصافح الايدين..
تناغم مريدى هيّا
تمد حلفا شبالها
تصفق كوستى والجبلين..
وتعود مواكب فرحة من بارا
حدائق نمولى وازهارا
إطرب فى نيالا امين..
نخلّى الشين
ونعرف زين
مهر الوطن اغلى
من روحنا والعينين
وانضر من قضية
تدخل بيها سوق
كاسدة ليها سنين
وتجوب مداين الغير
عشان تستجدى ضعف مهين
وكيف تتبع هواك هناك
تأمر فينا ناس خارجين؟
تعال راجع ماك عارف
الدرب بى وين ؟
كان جيتنا بى حلفا
بعد شريان الشمال
تسلك شوف سد مروى
بكلم الغايبين
واعبر للجسور هسة
فرحة شندى لما تزورا
وادلف للمتمة شرق
براك بتكمّل الصورة
شوف توتى راى العين
ياتو انجاز بوصفو ليك؟
مادام جواك حقدا شين؟
واى اسلوب تودر بيهو
افعالا م بتشبه الطيبين
هسع تعال يازول
ايد الناس معاك للحول
ماتاهت خطاوينا
ولا خلينا دعواتنا ولا
اتنازلنا عنه الدين..
وكم مدينا ايدينا عشان
وحدتنا حبل متين
بلا م يدخلو الشُمّات
ومن اسى ننسى الفات
تكون الوحدة جوة الذات
ونعيد مواكب عزّة ليها
سنين ..
حسين يوسف مكى
جدة/ 12/5/2010م
|
