رضينا، ولٌبّيك، ونعم

[زول الله]

ادب المديح لايستوجب ممارسة أو إلتزام - رأي-
هو سمو روحي ينتج عن نفس نظيفة واعماق شفافة تتذوقه وتذوب فيه
اراك مبتل الدواخل بحب من اصطفاه المولى فهنيئاً لك هذا العلو
صوتك يترجم تصوف دواخلك ويحملها الى سموات سندسية وتحملنا معك
شكراً مبر












اقول قولي هذا واستغفر الله لي .................

[مبر محمود]

المشاركة الأصلية كتبت بواسطة طارق الحسن محمد

اها يا مبر جيتك ولسة بى من دهشة
يازول والله انت عارف مدى دهشتى
فى الاول والان وبرغم انى اول واحد سمع
المدحة لكن اتعاملت مع المدحة زيها
وزى اى مدحة تانية ولم يدر فى خلدى ابدا
انك يا مصيبة انت المادح

برغم انى جيت قريت البوست
ولم اصدق
وقلت دى حركة من مبر
(برغم انه ماعندك )
لحدى مالاقيتك واكدت الامر
فعقدت الدهشة لسانى
يازول انت شكلك درب الكتابة والكتب
والادب دا ممكن تطلقووتتحول لمداح
كبير جدا (وجيبه ) مليان



غايتو برغم كم الاشادات الظهرت هنا
بصوتك وادائك وانا برضى
زيهم واحد وممكن اكتر ومى العزيزة
عاوزة تلاقيك ( وتاكل راسك )
وبرغم راى عزو العلمى والمتخصص
وكم الاغراءات منه بفتح ابواب الاعلام
فانا بفتكر انك تمدح
نعم امدح واطلق عقيرتك بمدح
المصطفى صلى الله عليه وسلم
لكن ......
اشجى نفسك وروح على روحك بمدح سيد الخلق
فى وحدتك او حالة انفلات اصابتك كمثل هذه
الانفلاتة ........
وكفى
كل يوم اكتشف جانب مبدع من روحك الغنية
بكل ماهو جميل
مودتى

طارق يا جميل الدواخل
محبتي الهبطرش ياخ، وشكراً جزيلاً وافراً
علي مساهمتك معي في هذا البوست وذلك بمعالجة صيغة الملف وإنزاله

غايتو ساهمت بشكل او بأخر في ورطتي هذه

[مبر محمود]

المشاركة الأصلية كتبت بواسطة خالد الحاج

مبر يا جميل الخصائل ..
وإن اندهشت لرخامة الصوت وطلاوته فلم يدهشني عشقك الشاخص هنا ..
أبرك الله بود لا ينقطع ومغفرة ورحمة ...
كم أحبك يا ابن عمي فأنت دوما تصنع جواي الفرح .

ود الحاج يا صديقنا في الجنة
ياخ أريتك والوليدات بصحة جسد جيدة، وبعافية روح دائمة .

يوم أمس هاتفني العديد من الأصدقاء
أصدقاء لي، مشتتون في مناطق مختلفة علي كوكب الأرض
ليس من بينهم عضو في سودانيات، ولكنهم جميعاً قراء ومتابعين لكتاباتنا فيها
كان محور حديثهم الأساسي، رفعك لهذا البوست فوق !
جميعهم كانوا مُندهشين، فالذي يعرف فيهم إنني أمدح، يعرف أيضاً إنني أمدح وأدوبي وأغني أحياناً لنفسي فقط او مع نفسي فقط
أما الذي لم بكن يعرف فيهم، فقد كانت دهشته أعظم
غايتو البوست دا أنا جلبت بيهو المتاعب بيدي لنفسي (شوف مداخلة رأفت بالله)

ثمّ .. (الله يطراك بالخير يا الرشيد, حقوق الأسلوب وكدا)
حرّم الزول البِصُر محبتك في طرفو ملك الدنيا عديل

[محسن خالد]

مبالغة، مبالغة، مبالغة
ياخي إنت ولد عسل بالفعل
شكرا يا مولانا
يضحك نهارك

[مبر محمود]

المشاركة الأصلية كتبت بواسطة طارق صديق كانديك

آمنت بالله وبرسوله الكريم ... !!!
في جوف كل سوداني " كما أظن" صوفيٌ نائم .. لا يفتأ يلقى طريقه حتى يتوارى العشق بالحجاب ... !!!
ما أجمل من ان " تعير" الروح في ليلة صوفية وما أجمل السوط .. !!
محبتي

كانديك يا بلدياتنا الشفيف
ويمكن لنا إن أردنا للطف مثلاً، أن نقول: كانديك وكفى !

دعك من كل هذا يا صديقي وأنظر معي للعشق الجد جد
شوف (شيخ صلاح) في المدحة دي ذاتها، قوال ومليان محبه كيف :
يا البي الفضائل إنفرد
تاه فكري فيك لمن شرد
***
أنا حيلي من حبك برد
أرحمني آآآآه كبدي إنهرد

ثم أنظر محبة(حاج العاقب) العجيبة في مدحة أخرى، وأنظر فيها حواره الواثق الجميل مع النبي (ص) :
العاقب يا أخوان حلف
قال لي علي المختار سلف !
مدحي، وبكاي، وهديتي الغير كُلف

سيد عمري، قرّ وأعترف
قال ليّ: أبشر بالشرف
في الجنه، في قصور، في غرف
تسكُن، قريب لي، مو طرف

!!!!!!!
ومنا التعجب فقط يا صديقي !

[مبر محمود]

المشاركة الأصلية كتبت بواسطة aboomer

للاسف لم استطيع ان استمع للصوت
ما عارف الحاصل شنو لكن لم اجد الايقونة التى تجعلنى استمع للصوت
ارجو من الاخوة فى الادارة حل الاشكال مع خالص حبى وامتنانى للجميع واخص الاخ مبر بالشكر الجزيل

سلام ومحبة يا أبوعمر
شكراً كتير علي مرورك وعلي ما خصصتني به من محبة وإمتنان
أنا أيضاً ممتن لكَ

[مبر محمود]

المشاركة الأصلية كتبت بواسطة نسايم

مبر يا جميل ...
انت عارف الحته البتاخدنى ليها الصوفية
امدح بصوت حب في حب الحبيب وانا زي مى
لو حضرت كانت حضرتنى زغرودة وجد في صوت نديان بالحب للمكرم محمد صلي الله عيه وسلم

تحياتي يا نسائم
أريتك طيبة وشديدة، وأمانيك في قبضة إيدك
شكرأً علي ما تركتيه من أثر

[مبر محمود]

المشاركة الأصلية كتبت بواسطة بدور التركي

انت انسان جمييييل جداً
ومواهبك ربانية
يصونك ويحفظك ربي من كل شر

بدور يا "نسمة" منتدانا
ياخ إنتي زولة عالية الذوق والنقاء
حرفك بيننا دائماً ما يصنع السلام والسماح والكلِم الظريف

كوني طيبة وشديدة، وخليك ماسكه في سماحتك دي وأوع تضيع منك

[مبر محمود]

المشاركة الأصلية كتبت بواسطة رأفت ميلاد

هسة بالبمدح ده مبر
ياخ والله صورتك الخاتيها فى بالى ساطت سواطة .. الواحد برسم صورة بمزاجه من وحى الكتابة .. لكن كده لخبتنى مرة واحدة
جميل والله جميل ..

تحياتي يا عمنا
أهو جنس كلامك دا ذااااتو البلاوز بينا

عارف يا سيدي,
عبر المنتديات دي صعب جداً إنك تخرُج بتصور يقيني عن شخصية أي زول .
التواصل عبر القلم صعب جداً، ويتطلب مهارة عاليه، والكُتاب الذين يستطيعون رسم صورة حقيقية عنهم بالقلم هم قِله
بعدين نفسيتنا كقراء وطريقة تعاطينا الشخصي مع الجُمل والكلمات
قد يخلقان شخصية الكاتب جوانا بصورة غير التي هو عليها.

لفته :
ياخ أنا برضو كان عندي عنك إنطباع قديم وإنت برضو سطو لي سواطة عجيبة

[مبر محمود]

المشاركة الأصلية كتبت بواسطة عكــود

سلام يا مُبر،
ويا سلام عليك . .
أدهشتني المدحة والصوت الطالع من جوه الجوه.
وأدهشني أكثر، مناسبتها التي تشي بالتجلّي في ذات اللحظة والصفاء الروحي المتل شُخب اللبن الخاتي السبيبي.
دي ما كانت جلسة . .
كانت حضرة كاملة الأركان و محضورة،
أدعو الله أن تتكرّر مرّات ومرّات.

عكود يا ريّس
لا أسكت الله لكَ حساً ياخ !
فنحن نقتفي أثر حكمتك متى ما سمعنا لكَ ندّاهه
أنده ياخ .. أنده ..
فإن كنت تأنس فيّ بعضاً من مصداقية فدعني أهمس في أذنك قائلاً :
للحكايات المُعتقة عندك طعم ولون مختلفين

[مي هاشم]

المشاركة الأصلية كتبت بواسطة مبر محمود

هسي في زمتك الزول لو عايز يقول فيك كلمة سمحة يقول شنو ؟
في رائي يتوكل علي الله ويقول: مي هاشم، يا زولة يا مى هاشم

يا مي ياخ إنتي في محلك وأنا في محلي وبرضو وصلتيني !
قالت سكة قالت !

المادح..ازيك؟؟
أول شي ..ما في لنك للحفظ؟؟..
وتاني شي..تحدث عن صاحب المدحة وكان جدعتنا بمدحة تانية يكون كويس
ياخ تشكر على الكلام الفوق داك..ربنا يجعل سكتنا المحبة..

[مبر محمود]

المشاركة الأصلية كتبت بواسطة زول الله

ادب المديح لايستوجب ممارسة أو إلتزام - رأي-
هو سمو روحي ينتج عن نفس نظيفة واعماق شفافة تتذوقه وتذوب فيه
اراك مبتل الدواخل بحب من اصطفاه المولى فهنيئاً لك هذا العلو
صوتك يترجم تصوف دواخلك ويحملها الى سموات سندسية وتحملنا معك
شكراً مبر

اقول قولي هذا واستغفر الله لي .................

سلام ومحبة يا زول الله
يا سيدي رايك محل إحترام وإحتفاء عندنا
باقي ليك إنتو الإمور دي بتعرفوها أكتر مني

أسلم يا صديقنا وطب وكن أبداً بخير

[مبر محمود]

المشاركة الأصلية كتبت بواسطة محسن خالد

مبالغة، مبالغة، مبالغة
ياخي إنت ولد عسل بالفعل
شكرا يا مولانا
يضحك نهارك

اوووو عمي الحاج
غايتو يا محسن الناس دي لو عرفت سعة معرفتك بالمديح كان فكت دربي وكابستك إنتَ

محسن يا سادتي
رجل صاحب معرفة عظيمة و واسعة بالمديح السوداني، لغته، ومعناه، وروايته، وأوان نظمه
وله في هذا المضمار كتابات وكتابات
وهو مثلي تماماً مفتون بصورة خاصة بالمادح (علي المبارك) رحمه الله
أنظروا لبعض ما يقوله فيه :

[align=center]يا شيخنا علي المُبارك،
عارفين إنُّو الكعب هجير الليل،
هجير المُحَبِّين والعُشَّاق،
ومَن لم يطلق الشفَافُ قيودهَم حتى استحالت إلى حجول تُنَغِّمُ المسيرَ بأكمله،
منذ أن هبطوا إلى الأرض
وحتَّى عروجهم في السماء.
غُرَّة صلاتك في قلبك،
وقلبك شامة ملاك.
وكت الشيوخ اتسوحروا في درب الله،
حقبوا طبايق أورادن وصرايم إبليس،
ما بناضموا إنسي بلغلغة،
يشيلوا الكلام من قلوبهم ويختوهوا في قلبك.
ضراعك مَدَّ العافية يشولب
وقلبك مَدَّ المحبة يفوح[/align]

_______
مولانا ما أبيناها علا الفيك إتعرفت
يضحك نهارك

[على ماجداب]

مبر .. رمضانك كريم
ومدد ياشيخ .. تلحقنا وتفزعنا

[عماد عبد الله]

لا إله إلا الله ..
يا زول ؟؟ ..
تعرف من كم مافي شي " دهشني " يا مبر ؟؟
تجي تسويها الليلة ؟؟ .. و كده ده ؟؟؟
و انا القايلك زينا و جاي : تمشي في الأسواق و تأكل الطعام !!
أتاريك شيتاً تاني !!!

...........
أكتب عندك :
عدد واحد مريد / عماد عبدالله