السوداني بين المظهر والجوهر والشغل الدُراش

[على ماجداب]

الراجل الكلس ..عكود
عارف أعداد المتداخلين بتثبت إنو الأعوج عندنا رااااااااااقد ومتوفر وإمكن دا البوست الوحيد اللى ممكن تراهن انو اى سودانى ممكن يكون عندو البشارك بيهو فيهو ويبرّد بطنو شويه ..ودا برضو إيجابى فى إستعدادنا لى نقد ذواتنا بسهوله ..
اكتر حاجه كنت مكتوى بنارا هى حكاية الفنشنق وفكرت كتير وصلته لى انو المستهلك هو العامل الصمد فى سلوك العامل وفى جودة المنتج , وسلوك العامل دا بقى مسأله أخطر مما تتصور .. نحن ما بنطالب بى الحد الأقصى من الجوده ودا والله سببو شنو مابعرفو صوفيه والّ تواضع والّ عواره .. الحد الأدنى حتى ونحنَ دافعين قروش بيرضينا ويسر بالنا ودا نتج عنو صناعيه ما مهتمين ..الكلام دا بينطبق على اى شئ (حداده نجاره بناء سباكه ميكانيكا) وبقدر اقول بشجاعه انو الحِرَفْ الجميله دى فى مهب الريح ..

[عكــود]

المشاركة الأصلية كتبت بواسطة الأغبش

أتفق معك إلي حد ما في دور البيئة ...لكن تجد أشخاص نشأوا وتربوا في بيئة واحدة ويختلف أسلوب هندامهم ودرجة إهتمامهم بالمظهر ..

وهو ما يجعلني أطرح سؤال بديل حول أهمية العامل الوراثي هنا ..
فقد لاحظت فيمن هم حولي أن هناك عائلات بعينا تهتم أكثر من الأخري بهذا الجانب ..وحتي لا نرمي الأمر علي البيئة المحيطة حتي الأطفال عندهم في بداياتهم قبل المشيتجد تصرفاتهم تدل علي هذا السلوك ..وليس للأمر علاقة بالوضع المادي للأسرة .. أعرف أكثر من أسرة تشهر كلها بالأناقة والإهتمام بالمظهر وعندما سألت كبار السن ذكروا أن هذا كان سلوك أجدادهم حتي ..وهم لا يختلفون عن الآخرين في شئ ..لا في مستوي التعليم ولا المادي ...
ل أجد غير الموروث الجيني هنا تفسيراً ...

صبّحك الله بالخير يا الأغبش،

عامل التأثير بالوسط العائلي، بالتأكيد ليهو أثر، والوراثة أيضاً.
الرشيد الذكرتو في مداخلتي الفوق دي، ما كان نشاز بين أخوانو، كلّهم كانوا مضرب مثل في الأناقة والنظافة والإهتمام (الزائد) بالمظهر. شقيقه أحمد ورّاق (رحمه الله) كان لا يلبس الجلاّبية مرّتين، و عند غسيلها، تفوح العطور منها وتعم. حتّى شلوخه الأفقيّة، كانت تتوهّط خد ممتلئ، لامعة وتعجب والله.
كلامك صاح بأنّ العامل الجيني مؤثّر، وإن كان هناك بعض الإستثناءات.

كل الود.

[عكــود]

المشاركة الأصلية كتبت بواسطة طارق صديق كانديك

العمدة كيف حالك وضيوفك الكرام

بوست باتع يعلم الله .. !!

الكثير من الملاحظات على مظهرنا .. يفعلها بعض الناس لكنها تسئ الى الجميع لم يترك المتداخلون شئ إلا وطافت عليه أحرفهم ..!!

تظل بعض الممارسات السالبة في السودان أو خارجه تعكس بؤساً في النظرة ليس التواضع والزهد أن نلبس كيفما اتفق وبنظرة عابرة على الشارع العام في كثير من دول الجوار تكاد تلمح تناسقاً عاماً يشرح النفس ثم لا تكاد تنظر الينا حتى رأيتنا بين عراقي بدون ( فنيله داخلية) أو جلابية وسفنجة أو قميص ( مكرمش) وغيرها من السوالب في الوقت الذي لايبدو أن قليل من الاهتمام يكلف رهقاً اضافيا على الناس .. !!
الذي اعتقده أن المظهر بأهمية الجوهر اذ أنه المدخل للتعرف عليك فمتى كان الانسان مرتبا في مظهره بغير غلواء مكلفة كان المتلقى على استعداد ابتدائي للتعاطي معك حتى وان كنت في الجوهر ليس بذي حظٍ عظيم .. !!

في المعاينات حدث ولاحرج .. !!

لك ولضيوفك التحية والمودة

سلام يا ريّس وليك القومة والله،

مداخلتك دي لخّصت أغلب الإتقال فيما يخص المظهر.
متين نقدر نتخلّص من قولة "سيبك ياخي، مضيّقنها فوق كم!"، وزي ما ذكر العزيز ماجداب في مداخلتو، دايماً مبلغ طموحنا يكون الحد الأدنى. وده بينطبق على المظهر، تقديم الخدمة، الجودة و و و.
بعدين ياخي، حكاية السودانيين كسالى الطالقنّها فينا الجنسيّات التانية، ما جات من فراغ والله. ده موضوع تاني وإن كان بيرتبط بالمظهر والكشتة في المشي برضو.

ليك التحيّة.

[عكــود]

المشاركة الأصلية كتبت بواسطة Sahar

ومُترع بزخمٍ من الآراء
مايزيد من فائدة هذا الطرح
هو تفاوت وتنوع الشرائح المشاركة
رجالاً نساءاً وعلي ما يبدو فئات عمرية تجمع مابين اكثر من جيلين او ثلاثة

اتفقت الغالبية على ضرورة التغيير، مع بعضِ آراء بضرورة العودة للقديم
والحق لله عند روية البومات الصور تجد ان درجة الأناقة كانت كأعلى مايكون..

اين الخلل اذاً؟؟

التغيير يتطلب إرادة جادة
عمل ممنهج
و مثل يحتذي به

مداخلة الأغبش الاخيرة، تؤكد على ان وجود الRole Model له اكبر الأثر في خلق التغيير الايجابي..

هو مشوار طويل
ولكني أراها بشائر امل مثل هذه الطروحات

الفاضلة سحر،

عساك بخير . .

ملاحظتك عن شرائح المشاركين/ات في "معضلتنا" جيّدة وفعلاً الهم عام، والوجعة حارقة الكّل.
إرادة جادّة - عمل ممنهج - مثل يُحتذى به.
ده تلخيص مهم لكيفيّة الحل وبيحتاج لمشاركة أكثر من جهة واحدة. بس الأسرة عليها الدور الأكبر وبيتكامل مع أدوار جهات أخرى، من إعلام، مدارس، شارع وخلافو.

بشائر الأمل هالّة، والحالة الآن أقلّ سوءاً ممّا كانت عليه وقت إفتراع البوست (2006)، بس ما زال عازّة مشوارها طويل.

كل التقدير.

[عكــود]

المشاركة الأصلية كتبت بواسطة همس الشوق

موضوع شيق جدا ومهم يا عكود وكل المتداخلين

فعلا الانسان السودان محتاج لوقفه مع المظهر الجوهر موثوق منه لكن الانطباع الاول هو الذي يقيم الانسان

عندي مواقف كتيره وحكاوي بجيكم تاني

سلام يا همس الشوق،

الوقفة محتاجنّها والله فيما يخص المظهر وسلوكيات سالبة كثيرة في سلوكيّاتنا.
وبرضو ما بنتّكِل على الجوهر و إنّو موثوق منّو، لأنّو الجوهر ذاتو بقى موضِع تساؤل.

و في إنتظار جيتِك تاني.

تسلمي.

[عكــود]

المشاركة الأصلية كتبت بواسطة مبر محمود

تحياتي يا بلدياتنا..
مداخلتك دي ناقصة شي ياخوي
كان المفروض ترفق معاها صورة لقشرتك بالبنفسجي، وتكتب تحتها نموذجاً

سلامات يا الفقيِّر،

قال لي إنت عاقل
ومافي لزوم تشاغل


صاح ممكن يكون نموذجاً لما يجب أن يكون، لكن ياخي القميص كان بمبي وجاب العين للكاديلاك!
ذكّرتني الأصفر بتاع الجيلي وحاة الله!

حكاية بنفسجي دي، ممكن نضيفها للرولز رويس وسلمى.
وينك يا الرشيد!

أضحك الله صباحك.

[عكــود]

المشاركة الأصلية كتبت بواسطة على ماجداب

الراجل الكلس ..عكود
عارف أعداد المتداخلين بتثبت إنو الأعوج عندنا رااااااااااقد ومتوفر وإمكن دا البوست الوحيد اللى ممكن تراهن انو اى سودانى ممكن يكون عندو البشارك بيهو فيهو ويبرّد بطنو شويه ..ودا برضو إيجابى فى إستعدادنا لى نقد ذواتنا بسهوله ..
اكتر حاجه كنت مكتوى بنارا هى حكاية الفنشنق وفكرت كتير وصلته لى انو المستهلك هو العامل الصمد فى سلوك العامل وفى جودة المنتج , وسلوك العامل دا بقى مسأله أخطر مما تتصور .. نحن ما بنطالب بى الحد الأقصى من الجوده ودا والله سببو شنو مابعرفو صوفيه والّ تواضع والّ عواره .. الحد الأدنى حتى ونحنَ دافعين قروش بيرضينا ويسر بالنا ودا نتج عنو صناعيه ما مهتمين ..الكلام دا بينطبق على اى شئ (حداده نجاره بناء سباكه ميكانيكا) وبقدر اقول بشجاعه انو الحِرَفْ الجميله دى فى مهب الريح ..

سلام يا علي وعساك بخير ياخي،

الفِنِشِنق، الجودة وتكريب العمل ديل مشكلة كبيرة والله.
عادي تلقى المفتاح القصاد اللمبة، يولّع اللمبة البعيدة، أو يكون شغّال بالعكس، يعني تضغطو لا تحت، يطفي، لا فوق يولّع. مع إنّو في كل الدنيا العكس هو الصحيح.
وأهو كلّو بيمشي.
من النادِر جدّاً تلقى ليك بيت، مهما كان فخم ومصروف عليهو، توصيلات السباكة كلّها صحيحة (غايتو أنا ما لاقاني، حتّى ولو حمّام واحد!). وده بينطبق على الحدادة، النجارة، الكهرباء، البلاط، الميكانيكا وباقي الحِرف. عشان كده، الحِرفيين الأجانب سحبوا البساط بكل سهولة من المحليّين. ده زيادة على إحترام الوقت والإلتزام به، و إن صبّت مطرة يكون الجو جو فول وماهو جو شُغُل.
المستهلّك دورو مهم في السلبيّات دي، لكن السلوك هو الأساس.

تسلم ياخي ومداخلتك غنيّة بالحيل.

[زهير ابو سوار]

يا جقلاب ..
صبحك الله بالخير ..
تعرف انا المعيار عندي في إناقة الرجل اول شئ اعاين لي نعليهو ..
بالجد دي حاجة مهمة ...

[عكــود]

المشاركة الأصلية كتبت بواسطة زهير ابو سوار

يا جقلاب ..
صبحك الله بالخير ..
تعرف انا المعيار عندي في إناقة الرجل اول شئ اعاين لي نعليهو ..
بالجد دي حاجة مهمة ...

سلام يا أب سوار وأسعد الله صباحك،

تلميع النعلين مؤشّر جيّد فعلاً، من باب إنّو الواحد ما دنقر يلمّع نعليهو إلاّ بعد ما إتأكّد من الفوق في الأوّل.
أعرف البعض في السودان، لا تفارقهم فوطة تنظيف النعلين أبداً، والله يسترنا مع عجاجتنا وفرناغتنا ديك، والعجب لو صبّت مطرة بالّليل وطيّنت الدنيا.

[طارق صديق كانديك]

المشاركة الأصلية كتبت بواسطة عكــود

بس يا ريت كمان لو تجرّوا النمْ شوية في الشغل الدُراش و خدمة الزبائن،
و "الفِنِشنق"!

صباح الخير ياعمدة

في شأن الشُغل الدُراش لدي مسألتان أجدهما أساسيتان وثالثة لاغنى عنها* .. أعتقد أن ( اللباقة ) ضائعة عند كثيرين فتجد أحدهم يلقمك حجراً دون أن يلقي بالا لمايقول على شاكلة :

يعني أنا كضاب ماقلت ليك كيت وكيت .. أو قوله .. ياهو داك ماشايفو .. ؟ وغيرها من طرائق الحديث التي لا تراعي الآخر ولا تسهم في قبول المتحدث أو المتحدث عنه ..!!

والثانية أعتقد أن العزيز (مواطن) أشار اليها في غير هذا المكان وهي ( فكرة تضخم الكرامة ) عندنا اذ نثور ثورة عارمة متى شعرنا أن الآخر تحامل علينا ولا أبرئ نفسي اذ يفقدنا الشعور بالمساس بنا كثير من الهدؤ فنحرق الأخضر واليابس في ثورة الغضب حتى أصبح الآخرون يعرفون السوداني بشدة الغضب .. !!

أما مسالة (الكسل) فتلك قضية حقيقية وان كان التعميم فيها كغيرها من المسالب مخل وغير صحيح .. ولكن هي ظاهرة وموجودة باطمئنان بيننا دعنا من حديث التندر الذي سوقه بعضهم علينا .. تظل مشاهداتنا الخاصة ترصد الكثير .. في شكل تقديمنا للخدمات وتعاطينا مع المراجعين .. !!

خالص التحايا

* ده اذا ما جاء بلدياتنا مبر محمود فرض علينا قميص ولا بنطلون نموذجاً

[همس الشوق]

المشاركة الأصلية كتبت بواسطة عكــود

سلام يا همس الشوق،

الوقفة محتاجنّها والله فيما يخص المظهر وسلوكيات سالبة كثيرة في سلوكيّاتنا.
وبرضو ما بنتّكِل على الجوهر و إنّو موثوق منّو، لأنّو الجوهر ذاتو بقى موضِع تساؤل.

و في إنتظار جيتِك تاني.

تسلمي.

صباحاتو على الجميع

الجوهر يا عكود انا القصد منو انه نحن جوهرنا أنصع من جنسيات كتيره .. ولكنها تفوقنا في نصاع مظهرها ... كل الجنسيات العربيه تحديدا بتخلص في مظهرها .. بإعتبار أنه هو الوجاه لشخصيتها ... وهي حقيقه ... مظهر الانسان يشكل نسبه مئوية في شهاداته .. وفي كثير من الأحيان لا تعني الشهادة شي بقدر المظهر والثقه بالنفس ... والطموح ...
يكفي انه السودانيه في هنا مجرد مع تتصل على اي طلب وظيفه بقولوا ليها لوسمحتي رسلي (c.v) مع صوره ... تفتكر لو كانت لبنانيه بقولوا ليها رسلي صوره ؟؟؟؟

[عكــود]

سلام يا كانديك ويسعد صباحك،

ذكرت تلاتة أشياء "نتميّز" بها.
الريق الناشف وبعض قطامة، ودي حدّث ولا حرج. أغلب المتعاملين مع الجمهور تنقصهم مهارة معاملة الزبائن، والزبائن ديل ما شرط هم البيشتروا سلعة.
مرّة في صالة القدوم، قدّروا لي جمارك تلفزيون بـ 82، و أنا إفتكرتها بالجنيه. مشيت الشبّاك مدّيت ورقة التقدير و الجنيهات للضابط (أب دبّورة). بالله ساعتو الكورك، أنا قلت لدغتو عقرب: أدفع 82 دولار، إنت ما بتعرف تقرا؟
طبعاً طوّال تلبّستني الحالة التانية الجات في مداخلتك وقال عليها مواطِن. ثُرت ثورة عارمة وما حلاّهو منّي إلاّ ضابط برتبة مقدّم غاية في التهذيب ومعرفة معاملة الجمهور!
هنا أعتقد الغلطة مُشتركة، أي نعم هو غلطو كبير وطريقتو إستفزازيّة، لكن أنا برضو (و إن كان غير مطلوب منّي) كان ممكن إتعامل بطريقة أفضل. مثالي ده بيكون صادف كل القرّاء الكِرام، فالبلد مليانة و الأمثلة على قفا من يشيل.
قد لا يكون التقصير من الضابط أب دبّورة، فالمسألة مرتبطة بسستم متكامل، غابت عنه أهميّة التدريب واكتساب المهارات اللازمة لتأدية الوظيفة. هذا الضابط ربّما لم يتلّقى أي وسيلة تدريبيّة لمعرفة كيفيّة معاملة الجمهور، وليس بالضرورة كورسات. و بما أنّه خريّج جديد (ملازم)، قد يكون مفهومه عن الضابط، المفهوم السلطوي وليس الخَدَمي.

الكسل (دون تعميم) في ظواهر كثيرة بتؤيّدو، وما علينا إلاّ أن نُمعن النظر حولنا.

تسلم يا طارق، مع التحيّات للفقيّر.

[جيجي]

ايام الجامعة كان عندنا ناس مسمنهم ناي تلب بضم التاء وتشديد اللام وضمها معا وتسكين الباء
والتسمية جات من انه الواحد بتلب من سريره طوالي في شبشبه وعلى الجامعة من غير حمام والملابس مكرفسة والغبشة والشعر منكوش مع انه مافي مبرر للحاجة دي
اما الجماعة المتهندمين ناسي الفير اند هاندسم-دا اسم كريم ليلي رجالي بخلي شكل الوش نظيييييييييف طول اليوم- فالتنافس بيكون في قمته والقشرة بيهم مهمة
اما اذا صاحباتك شافوك ماشة مع واحد اول تقييم بيكون بالرجلين فعلا وديك يا انتقادات لمين يكرهوك ليه
اما حبوبتي المتفلقصة فبتلبد ليك ولو شافتك خارج نطاق نظريتها بترجعك من خشم الباب وما بتخليك تطلع الا وانت مطبق نظريتها البتقول
اكتر شيء بيقلل من هيبة الرجل لبس الشبشب والمرة لبس الحذاء الواطيءاو الزحاف وتقصد المن غير كعب-داطبعا منقول بنفس تعابيرها-

[همس الشوق]

مره في المكتب عندنا جاءتني السكرتيره قالت لي في واحد سوادني بره عايز يقابل الأستاذه .. سألتها لي شنو ؟؟؟ قالت لي بفتش عن وظيفه ... طوالي قلته ليها عليك الله مجرد ما الاستاذه تفضى دخلي على طول .... بعد فتره طلعته بره .. بصراحه ما عجبني شكله .. اشعس ... أغبر ... ما مهندم و كالعاده شبشب مع البنطول .. صدمني جيت راجعه ... بعد شويه جاتي السكرتيره تضحك ... قالت لي تعالي شوفي السوداني نام في الكنبه ...... بجد في اللحظة ديك حسيت لو الأرض تخسف بي .. يا كسوفي .... وبعدها جاءت الاستاذه طالعه لقتو نائم سألت سألتها قالت ليها دا منو النائم دا ... قالت ليها دا سوداني عايز يقابلك ... لي شنو قالت الاستاذه ؟ بفتش على شغل ... ضحكت ضحكه سخريه وقالت ليها صحي خليه يكمل نوم في البيت بعدها يفتش شغل .. وختمتها والله السودانيين ديل.... وبعدها أردفت السكرتيره قالت لي انا وصيت زميل لينا مصري اسمه محمد .. وصيت محمد يكلمه يقول ليهو هذب شكلك شويه لمن تفتش على شغل ... بجد قالت لي بالطريقه دي مافي حد بقبله ... اتخيلوا شعوري انا كيف ... قلته ليها والله يا منى اقول ليك شنو .... لا ونسيت أقول ليكم انه شهاداته طاويها زي حلاوة قصب ( في زول بعرف حلاوة قصب) في ظرف بني .. قلته ليها شفتي الشهادات الطاويلها دي إحتمال كبير تكون من جامعه الخرطوم .. وإحتمال الشخص دا يكون ماستر او دكتور ... بس نعمل شنو ...

ودا المضيع حقنا في التنافس ....


ومن جهة تانيه مره انا كنت قاعده في مكان السكرتيره جاءني واحد مصري من حيث لا ادري قمت على حيلي واهلا واتفضل ... يعني بالميت تديهو مدير بنك او شركه كبرى بدله فل سوت ورايقه جدا منظر نضيف وانيق شنطه فخمه .. وهو بي ثقه متناهيه ممكن اشوف الأستاذه ؟ قلته ليهو اكيد اتفضل اشرب حاجه لحدي ما الاستاذه تخلص ... ومن ثم سألته ممكن أعرف سبب الزياره ... قال لي وبذات الثقه والله بدور على شغل وكنت عايزا اشوف الاستاذه وهنا كان بفتح في الشنطه وبطلع في السي في .. ولو شفتو السي في .... خبره في الامارات ما عندو ... قربته أقول ليهو يا قوم لف

الحكاوي كتيره ومؤلمه والله

[همس الشوق]

فيما يخص التعامل مع الجمهور او خدمة العملاء كما يسمونها فنحن بصفاتنا التي يعرفها الجميع غير مطابقين لهذه المهنه ... نحن ناس سخنين وعندنا خدمة الجمهور مرتبطه اتباط لصيق بالذل سبحان الله ... نحن طبعنا حار وتربينا تريبه ناشفه شويه ما فيها لين ... وحتى الطبطبه هي في إعتقادي دبلوماسيه في التعامل نحن نعتقدها ( دهنسه ) أو تحنيس
فنحن شعب غير قادر على التعامل ... حتى في مفرداتنا مفرداتنا خشنه ولا تصلح للتعامل ....
صدقني يا عكود المسأله ما مساله كورسات في كيفية التعامل لا المشكله في المجتمع .. التربيه ... لابد من إعادة النظر في تربيتنا ....