زهجنا

[آخـر المواني]

المشاركة الأصلية كتبت بواسطة درديري كباشي الامين

يا آخر المواني .. شكلنا حانلزم الصمت ونرجع نتفرج من جديد

ونبقي اعضاء في حركة فترنا

[درديري كباشي الامين]

اقتباس:
المشاركة الأصلية كتبت بواسطة آخـر المواني
ونبقي اعضاء في حركة فترنا


اهو انت جبت التايهة ياآخر المواني..

يلا سجل حركة فترنا دي في الفيس بوك .. وانا اول الاعضاء


يلا يا شباب انضموا لحركة فترنا

[درديري كباشي الامين]

[justify]
تذكرت كان عندنا زميلنا في الجامعة في الداخلية كان من النوع اليخاف من الامتحانات .. ومن شدة الخوف لا يعرف يذاكر لايعرف ينام .. يمشي ينام يلاقي عيونه فنجلت يقوم يذاكر ينعس يرجع السرير وهكذا ... راح العيادة الدكتور كتب له حقنة فاليوم .. وقال لازم تنام ترتاح عشان تعرف تركز .. ( ادوه حقنة مانفع).. اخيرا انا قلت له انا عندي لك حل .. وكان عندي (ياي) رياضي .. وقلت له تعال اعمل التمارين دي .. وتمارين اذرع وكتفين وظهر كل حركة قريب الماية مرة .. واخيرا سلمني الياي وذهب زحفا نحو السرير منتهي .. وقلت له انا غايتو ما عارف راي الطب شنو لكن يخيل لي الارق والزهج العندك انه سببه الدم متركز في دماغك من شدة التفكير .. لكن التمرين الرياضي خل الدم يشوفلو موضوع تاني وخلى راسك ينام شوية .... ومن ديك بقى كل مساء يجيني ليك ( درديري الياي وينو ياخ) .. صبحان الله انا منها عرفت معنى عبارة العقل السليم في الجسم السليم ..
[/justify]

[درديري كباشي الامين]

[justify] مرات كثيرة نحن نتسبب بحالة الزهج في حياتنا نتيجة للاسئلة الافتراضية التي نشغل بها دماغنا في النهاية تكتشف انك زهجان من ناس ومشاكلهم وفي حياتك اصلا انت ما قابلتهم ولا شفتهم .. مثال :
احكي لك قصة ظريفة بخصوص الموضوع حكاها لنا زميل مصري ..


وقال واحد كان سايق عربية في الصحراء تعطلت منه .. وقدر ما حاول يصلحها ما قدر .. وكل مرة يقرر يسيبها ويحاول يصل الاسفلت على رجليه يتردد ويرجع يحاول يصلحها مرة ثانية .. وهكذا حتى قاربت الشمس على المغيب .. خاف وخاصة بعد ما بدا يسمع صوت الذئاب .. فجاه بعد تركيز انتبه الى انه يوجد بيت جميل على بعد خطوات منه لم يكن يلحظه .. فكر ان يستغيث باهل البيت حتى الصباح ثم يبحث عن وسيلة اخرى . ولكن دار بينه وبين نفسه الحوار التالي ..


- ياعمي روح اطرق الباب على الجماعة قبل ما يجي الليل ..
- لا يعمي افرض هو كان بيت عصابة اكيد حايكتلوك بدلا ما تفش سرهم
-ياخي عصابة مانت كدا كدا ميت مش سامع بودنك اصوات الذئاب . اتوكل واتحرك قبل المغيب ..
-ياخي افرض ساكن البيت كان رجل متوحش ومتشكك .. فظن انه في علاقة بينك وبين بنته او مراته وراح طاعنك بالسكين .
-طيب حاتعمل ايه عندك بديل انتظر هنا لمن تجيك الذئاب تأطعك ..ياخي روح على البيت ما تخافش ..
وقال هو كان يتردد وفي نفس الوقت يتحرك ناحية البيت الى ان وجد نفسه وجه لوجه مع الباب ..
-باعمي ما تطرق الباب انت مستني ايييييه ..
-ياخي افرض الراجل ظناك حرامي وراح على طول ضاربك بالشومة على وشك ..
-ياخي انت في الاول كان ممكن تتحامى من الذئاب بالعربية .. بس دلوأت انت بعيد من العربية .. يعني متاكل متاكل ..
وفعلا طرق الباب ... ولكن افرض الرجال ظنك شحات مؤطع وراح طاردك زي الاوطط القربانة .


وفعلا في هذه اللحظة فتح الباب رجل وقور محترم وما كان من صاحبنا الا ضاربه الم (كف) على وجهه وقال له : مش عاوز من وش امك حاجة .. وراح راجع ناحية سيارته ..
[/justify]

[درديري كباشي الامين]

[justify]
واحدة من مكتسباتنا الزهجية الجديدة هي تلك الوسيلة التعيسة الاسمها الركشة .. بطيئة ومتعبة مع احترامنا لاصحابها وانها اصبحت مورد رزق وفتحت كثير من البيوت .

لكن انا اصلا مش عارف الناس تتحمل الركشات كيف مع شوارعنا العجيبة ..

انا اول مرة اشوف الركشة وامتطيها في سنة 2006 بعد غيبة طويلة من السودان وركبتها من سوق بحري لغاية شمبات الاراضي ... والمطبات والحفر .. وحمدت الله انه ربنا ما خلق مفصلاتنا ( قلووز) والا كان لقطوني ليك يد في شمبات وكراع في الصافية وراس في المزاد .. لانه مع كل مطب تحس بانه صواميلك بتتحلحل .</B></I>

[/justify]

[درديري كباشي الامين]

اقول لك حاجة وبمناسبة الزهج.. والله انا خايف انه الشعب السوداني يكون حلج وفقد القدرة على الزهج .. بيني وبينك الزهج نفسه بقى ميزانية ويحتاج لطاقة يعني مثلا عشان تقول (آآآآآآآآآآآآآآآآآآآآآآآآآآآآآآآآآآآآآآآآآه ه ه ) وهي دي واحدة من ادوات الزهج الاساسية .. اولا محتاج انك تكون مليق ونفسك صحيح .. وبعضوتكم صايمة او قلبت نباتي .. زي ما كان غاشننا زمان في كتب العلوم .. يقولوا انه انثى الانوفلس هي فقط من تشرب دمائنا .. اما الذكر فهو يعتنق الديانة الهندوسية فهو نباتي فقط .. ورحيق الازهار .. طيب بما انه نحن بلادنا تخلو من الازهار .. البعوضة العندنا اما عزابية ... بمعنى فاجرة وقاعدة من غير راجل .. او راجلها كفر بالديانة الهندوسية وقلب على دمنا ( ودقس) جماعة العلوم ..والاحتمال التاني وارد .. وحكاية عزابية غير وارد على الاطلاق .. لانه لو كانت انثى الانوفلس عايشة لوحدها وهارية الناس بالملاريا وسعادة الزوج مغترب في مناطق زراعية وشغال في رحيق الازهار .. كيف قعد تنجب وتملا البلاعات بيض ويرقات ؟؟؟ ... .. اذ1ا دعوة للاخوة المدرسين يعيدوا النظر في مناهج التعليم .. وحكاية انثى الانوفلس هي فقط البتشرب من دمنا مكنة غير مقسمة.. غيروا كتبكم دي وكفاية ملاريا .</B></I>

[درديري كباشي الامين]

في منتدى القرير جاتني هدية تحفة في عالم الزهج


هاك يادرديري مسادير في الزهج من شعراء زهجانين

زهجانين وننعل في نعالنا مما قُمنا
وفي فك الزهج ما لقينا زول يخدمنا
نفكّها بالكِتابة الليها حُمنا وبِعْنا
والزارعنا غير الله الـ يجي يقلّعنا
من الزهج يا أخوانا دائماً ملان شوالي
زهجني الزهج حطّم معاهو آمالي
دوام ينزل معاي ويطلع معايا العالي
زهجاً بي تروسو كمّل جميع اقوالي

إنتو الزهج الشديد ما شفتو فيهو الحبّةّ
قدامي ماشي وبي وراي يـدْبّ
فوق الراس ينطط جواه عامل ربّة
جوطه ولخمه يوت دايماً عليّ منكبة
***
عازم الزهج سندالة ومعاهو القرف مرزبّةّ
بيهو المخيخ اتستّف وأتملى واتعباّ
يا الزهجان تعال من زهجي شيل لك حبـةّ
ادي معاك أسامة فُقراً تقسمو الحبـةّ
مرحب بي الزهج إن كان كِبـرْ وإترَباّ
أصلو أنا في الورود رييّ تب ما غـباّ
حتى الصغير الجاهل الـ لا كبر لا اترباّ
تلقاهو قافلة معاهو زهجان هو مما شـباّ

اهل الدارسلام والله جيتكم غاشيما قطّاع رزق داركم تكرم الماشيعِلّ شنو الزهج يا اخوانا فيكم طاشيبي هادا الحصل بتشوفو هسه طناشي
****
بندور الغنا ودلوكا صقرها خاويعكازا كبير وعجاجة بوخو يلاويفيها السمحة ترقص زي جريو الحاويوالزهجان ركز بي صوتو لينا يكاوي

حباب الراسي أسد القوافي وداعة
قولتك عديلة وبس علينا سماعا
ياكا الكبير سيد الكلام والطاعة
الناس دي بتحب ساكت وساوية الزهج شماعة
حباب فاروق اخويا دخري الحوبة
يا ود الرجال اهل المسيد والنوبة
الحب ما كعب والزهجة ماها عقوبة
ما بتحتاج فهم ومعاهو قلبة هوبة

كل الناس نيام وانا والسهر نتحجىّفارقت النعاس فرق التعيس لي الحجةلي متين الزهج عاقد علي انا لجةّ؟طار عقلي بـ وراهو و جنوني اتلجّا
****
حار بينا الدليل زهجانارح نتسجىّنُم دوبيلنا قول مِْسختْ علينا الفِجةمن رمش البقت عينا بتضوي الفَجةمن برق السحاب برقو وضرب في الفجة

من زهجا ً عليّ قربت أضرب اللجّيِ
قطّعْ في اللحم من غير خدر أو بنج ِ
من رمش البقت، زي سلاح الجندي
تطلق في الرصاص شقيش ووين ما يودي
الزهج الكرب حلق الرجال مو ساهل
يجري وكت يجب ومرات إكون متماهل
أكربو النص عِمم وأسرولنا ليلا ً كامل
لي بلد أم سماح ست الصغير والكاهل
حاشاك الزهج واسمك زهج كاتبنّو
مدّك في الكرم كاسر تقول دافقنو
يا اب ايدا متل عين المزرقن جنّو
كم داويت نصيح ونصحتا فينا الجنّو.

[درديري كباشي الامين]

اولاد المدارس في الغربة ..
اولا تحلل ظروفهم لنحدد الفرق بينهم وبين اطفال السودان حتى نعرف سبب كرههم للمدارس والزهج منها .
اولا بما انه هنا الكهربا لاتقطع والقنوات على قفا من يشيل والساعة عشرة مساء لا تعتبر سهر في قاموسهم .. بل من ينام اتناشر يعتبر مبكر .. اضافة الى انه دوام المدرسة المبكر جدا ويحتاج للقيام عقب صلاة الفجر مباشرة .. كل هذه العوامل جعلت مشوار المدرسة الصباحي هو عبارة عن علقة يومية للاطفال وبالتالي كرهوا المدارس وزهجوا منها ..والغريبة انا لااذكر ايام كنا في المدارس انه صحينا يوما مستخدمين ساعة منبهة .. بل هي اصلا اي الساعة المنبه لم تكن موجودة في حياتنا ولا في بيوتنا ..

لكن الطريف عندي بنتي الصغيرة سمر عمر ثلاثة سنوات اتعودت انه آخذها يومي في المشوار الصباحي .. اولا تتفسح وثانيا تتعود على صحية الصباح عندما يحين دخولها للمدرسة ... لكن الذ حاجة اليوم قالت لي بابا خلاص انا تاني ما ماشة المدرسة عاوزة اقعد في البيت (اكتفت بهذا القدر من التعليم )... يا سلام ؟؟هو انت فاكرة نفسك اصلا قعد تمشي المدرسة ؟؟؟

[درديري كباشي الامين]

عندي ليكم زهجة جديدة لنج وانا حاليا بكتب من نفس المقهى الحضرت فيه آخر ربع ساعة في مباراة ريال مدريد وبرشلونة لانه جزيرتي قطعت عايزين يقرفونا زي الجوالات بس ناقص رسالة تقولك ( لم يعد لديك رصيدا كافيا لاتمام هذه المباراة)..


الولد مسي مسك الكورة من نصف ملعبهم وجاري يترتل ويخيط في ناس ريال مدريد وما فكاها الا في شبكة كازيوس افضل حارس في العالم ... غايتو الولد دا لو كان سوداني او افريقي كان قالوا ابوه فكي .. ياخي يجي جاري جمب المدافعين يصيبهم شلل ما فيهم واحد ود حلال كدا قادر يشنكلوا ياكلو النجيلة ...صحيح نحن بنحب اللعبة الحلوة لكن كمان الحقارة ما نرضاها .. والله رغما عن ميولي البرشلونابية نتيجة للون الازرق في شعارهم ... الا زي ما قلنا الحقارة برضو تغيظ ... وهو مسي ما بقى ليه الا يعمل ليهم لعبنا الزمان ... كان رجال تعالو اقلعوها .. انا غايتو لو كنت مدافع في ريال مدريد بدس لي طوبة في جيبي او على الاقل دبوس افش بيه غلي شوية.. دا ولد شنو دا ياخ .

[سمراء]

ابو الدر يازهجة ...والله موشتاقين
عارف بمنافسة زهجتك دى ، غايتو ان من الله فتح عينى وشق حنكى السنين ده (سابقاً) اسع النصيحه بقى ميت ساى ..اها مامرت بى ذى الزهجة دى !!
يعنى زهجة تخليك قاعد ذيك وذى افخر جردل خلقو الله ! انا لله ياخ !!

عارف الميزة الكويسة فيها بتقوم توفر ليك كمية مابطالة من الحاجات ! ليه ؟
لانى بكون قاعدة وكااااضمة ، بوفر طاقة كلامية لانى مابقدر افتح خشمى اتكلم مع زول
ولا باكل لانو النفس اصلا بتكون مافى وبكدة بتكون وفرة حق الفطور ، وحق الرصيد
ووفرةكهرباء لانك مابتشحن تلفونك عشان تنضم زاتو
ومن ضمن التوفير من جراء الزهجة ، واعتقد انها اهم شى ....بتوفر محاثيثك
يعنى الابتسامات ديك حقت المجاملةوالعبارات الالية ،

ياخ الزهج ده مريح

[درديري كباشي الامين]

اقتباس:
المشاركة الأصلية كتبت بواسطة سمراء
ابو الدر يازهجة ...والله موشتاقين
عارف بمنافسة زهجتك دى ، غايتو ان من الله فتح عينى وشق حنكى السنين ده (سابقاً) اسع النصيحه بقى ميت ساى ..اها مامرت بى ذى الزهجة دى !!
يعنى زهجة تخليك قاعد ذيك وذى افخر جردل خلقو الله ! انا لله ياخ !!

عارف الميزة الكويسة فيها بتقوم توفر ليك كمية مابطالة من الحاجات ! ليه ؟
لانى بكون قاعدة وكااااضمة ، بوفر طاقة كلامية لانى مابقدر افتح خشمى اتكلم مع زول
ولا باكل لانو النفس اصلا بتكون مافى وبكدة بتكون وفرة حق الفطور ، وحق الرصيد
ووفرةكهرباء لانك مابتشحن تلفونك عشان تنضم زاتو
ومن ضمن التوفير من جراء الزهجة ، واعتقد انها اهم شى ....بتوفر محاثيثك
يعنى الابتسامات ديك حقت المجاملةوالعبارات الالية ،

ياخ الزهج ده مريح



سلام سمر
جيل بعدكم في سودانتوب

واحدة قالت نحن نعمل خطة زهج بمعنى كل واحد يجيب زهجه في النهاية نلم الزهج كله ونصرفه لواحد بعداك انشاء الله ينتحر نحن مالنا .. وهكذا ..

[justify]
انا قلت ممكن نعمله زي صواني الغدا في البكيات كل واحد يجيب صينية زهجو معاه .
صيوانات البكا وصينية الغدا كل ناس يجيبوا غداهم .. في ناس خيانة الواحد يكون جايب بامية بايتة ( ملاحظين بقى جني وجن البامية ... الله يجازي الكان السبب ) ويلزق صينيتو وسط جماعة غلابة يتبرا منها ويمشي يمزمز في صواني ناس تانين اغنياء مثلا من النوع المحشي عندهم زي الفول ..اتذكر انا في وفاة خالي عليه الرحمة .. وانه في واحد خاين دبسنا ليك في صينيته فيها صحن واحد اقرع وفيه كمونية بقراصة فقط .. ولا حتى عندها مساعد لوري يعني صحن شطة او اي نوع من الصاجات تساعد في بلعها .. وراح هو انزرع ليك في صينية هو يشوفها من عرس لعرس .. وصادف انا وود خالتي ومعنا اصحابنا تبالينا بهذه الصينية .. ابن خالتي ينقنق ويدعي في صاحبنا محاولين ان يدركنا اي جار جديد بصينية اخرى تخرجنا من ورطة الكمونية لكن دون جدوى .

[/justify]

[درديري كباشي الامين]

انا يخيل لي ممكن ادعي انه انا من اكتشف فكرة الكاميرا الخفية قبل ما تتحول الى فن كوميدي عالمي .. ومن زمان جدا .. كان عندي طبعة غريبة يمكن تكون شقاوة .. يعني مثلا اكون اتكلم مع واحد من الاعمام وقرب منه مروحة تربيزة مثلا شغالة .. انا اتحدث والعب باصبعي على الشبك بتاع المروحة .. تلاقي العم يتحدث معي في موضوع مختلف لكن كل نظره وتركيزة على صباعي .. وبعد شوية يبدا يقطع في الكلام لامن يشاهد صباعي يكاد يدخل للمروحة عبر الشبك . وانا اعمل فيها سارح ومشغول مع الكلام .. الى ان اسمع النهرة المتوقعة ( ياخي ما تشيل صباعك دا من المروحة ياخ بوظت اعصابنا ياخ ) ..

وكان فكرة اخرى نعملها نحن وابناء الحي .. وهي نحضر اوراق الصابون الفارغة من نوع لوكس مثلا ونصنع شكل صابونة من الطين ونغلفها ونضعها في طريق العجلات الحاضرة من اتجاه السوق .. ونجلس في ظل الشجرة نراقب الموقف كاننا مشغولين بالونسة .. نلاحظ صاحب العجلة اولا يقترب من الورقة الملفوفة ثم يتحسسها بصباع قدمه وعندما يتاكد من انها غير فارغة يتكى العجلة ويدعي انها سقطت منه ويضعها مع اغراضه للتنفجر ضحكتنا والتي في الغالب هو لا يعرف سببها لانه الصابونة الطينية ليس فيها ادنى شك في انها صابونة فعلا ( بس كان نفسنها لو نضع كاميرا خفية في الحمام عشان نشوف رد فعل صاحبنا بعد ما يستحمى بالطين)..

هي كلها شقاوات صبا كانت محاولة لمحاربة الزهج في زمن لم يكن فيه سوني او بلايستيشن والتلفزيون قناة واحدة ..

[درديري كباشي الامين]

واحدة من اكبر المزهجات عندما تلاقي الكفر منفس ( مبنشر ) حتى الخواجات تجننهم .. تلاحظ كثير في الافلام الواحد يبدا يشلط في العربية .

وهي حتى على مستوى العجلات .. اذكر في الثانوية كان عندنا مدير صعب جدا .. وحريص على الحضور المبكر ويكون لافي في حوش المدرسة معاه الصول ويصرف لك جلدة سريعة بدون تردد لو دخلت المدرسة بعد الجرس .. يوم ما انا طلعت من البيت متاخر بسبب مشكلة في البيت لا اذكر تفاصيلها .. ولكن زاد الطين بلة انه كفر العجلة بنشر .. واضطريت اقودها راجلا .. وانا في طريق يكاد الدم يغلي في راسي وقررت انه الناظر لو سالني او افتعل معاي مشكلة اقوله ما داير مدرسة ذاتو .. طبعا انا انقنق واتكلم براي واشلت في الهوى وادير حوار في راسي .. وعيني من شدة الغضب كادتا تطلان من فتحة واحدة ( صرة بت كلب) ودخلت المدرسة على هذا الاساس ... تصوروا الناظر والصول الاثنين لمحوني وغضوا الطرف عني .. بس ربنا رايد لنا زيادة ايام في المدارس ما اكثر والله .. تكلت العجلة ودخلت الفصل وحتى استاذ الحصة ما سالني طبعا هو افتكرني صرفت الفيها النصيب من الصول والناظر .

</B></I>

[درديري كباشي الامين]

[justify]
من زمان في حاجة محيراني هل في علاقة بين الشعر والشعيرية غير تشابه الحروف مثلا .. ماتنسى انه الشعيرية في فترة من الفترات كانت احلى اكله عرفها السوداني ... قبل ما تغزو حياتنا الحلويات الشامية والبقلاوة والباسطة .. والقصة اللذيذة بتاعة العربي الدخل حي الصافية في الخرطوم بحري وبعد ما تلفت في باندهاش في الفلل والحدائق وقال عبارته الشهيرة ( هلا هلا زي ديل تلاقي اكلهم شعيرية ساااااااااااااي) وهو لا يعلم انه اولادهم لو عملوا ليهم شعيرية يمكن ينتحروا ..

وبمناسبة الشعيرية والسفاسف وكدا كثير من الماكولات غزت اغانينا بواسطة شعراء الاغتية السودانية .. وعلى سبيل المثال لا الحصر

سكر سكر الكابلي
ويا عسل رايق مصفى عبد العزيز المبارك

[/justify]

[درديري كباشي الامين]

[justify]
اذا رأيت انياب التيس بارزة فلا تظنن ان التيس يبتسم ( يكون خاتي سفة )

حكانا واحد زميلنا في الجامعة صومالي .. وقال عندهم كان القات مباح مثل اليمن ومنتشر في المقاهي والاسواق .. الشعب الصومالي كان مبسوط ومسطول ولا شغال بسياد بري ولا حكومتة ولا غيره ونايمين في الهوى والافيال .. وسياد بري عمل قانون عجيب للنهب المصلح في بلاده وهو انه اي موزة تتباع في الصومال عنده فيها نص ( انا ماعارف القشرة محسوبة ولا النص الجوة فقط ) والصومال كان البضاعة الوحيدة المصدره هي الموز لا بترول ولا غاز ولا اي شئ آخر ودي قاسمه معاهم ما مقصر .. خلونا في قصة التيس .. قال في تيس تعود يجي القهوة والجماعة يرموا له الفيها النصيب من القات .. اها لقمة من دا وورقة من داك ينسطل التيس ويتملي ويمشي يجكس ليه غنماية يقضي معاها باقي يومه .. وفجاه الرئيس ركب راسه واصدر قانون يمنع القات في الاسواق .. وفاق الشعب الصومالي من سطلته ( الفوقة اللايوم الليلة ) سيد بري لا لم في الموز ولا في القشرة ولا في الحكم ... ارجع واقول خلونا في التيس .. المهم بعد ما تم حظر القات في الصومال وصنف من المخدرات .. قال جا واحد مهرب قات من اليمن وواضعه في طيات الملابس ( مستغرب في الغنية البتقول رحلة بين طيات السحاب .. وهل السحاب له طيات مثل البطاطين ولا قمر الدين ولا السحاب عبارة عن ركام فوق بعض ... ماعلينا خلونا في التيس ) .. مر في التفتيش الجمركي عادي جدا صاحب القات ولكن خارج المطار لم فيه التيس بخرمة السنين .. وجري ورا صاحبنا يشيل وينطح في الشنطة .. واخونا يرفع الشنطة فوق التيس يشب ليه في ضهروا .. الى انه رجال الشرطة انتبهوا للتيس ومسكوا صاحبنا واعادوا تفتيش الشنطة ويكتشفوا القات المهرب .. وتتم مكافاة التيس بنصيب وافر من القات بل تمت ترقيته ليعمل في مباحث المطار برتبة وكيل عريس .. ومنها صدر بيت الشعر اعلاه .. لانه ما تستبعد انه واحد من تيوسنا يكون تعلم التمباك ..


[/justify]