شهاااااب كراااار

[قيقراوي]

المشاركة الأصلية كتبت بواسطة شهاب كرار

قيقا يا حبيب



أنا لا أملك القدرة على تشويه آراءك يا قيقا، فأنت تكتب وأنا وغيري يقرأون، اعبر عن فهمي لما كتبت بالرد عليه. فإذا كان فهمي مختلا فثق تماما ان القارئ الذي يتابع هذا البوست له القدرة على تمييز ما كتبت انت وما فهمته انا، الموضوع ليس تشويه ولا يحزنون.
وما شجعني على قول "احيي الايجابية" الا عبارتك هذه

حيث فهمت منها انني طرحت رايي وأنت طرحت رأيك وانتهى الموضوع، فنحن لسنا في مباراة كرة قدم، ولأنها كانت خاتمة مداخلتك ولم يأتي بعدها اي تبرير لها فهمت ان هذا هو رأيك النهائي فأعطيتك قبلة على الخد وقلت لنمضي للأمام.


لم أكن اعلم بهذا الا الان ويبدو ان هذا هو سبب سوء التفاهم، حيث انني اعتبر الانكار موقف يقيني ايضا (متيقن انه لا توجد افيال طائرة = منكر لوجود الافيال الطائرة)


ولا على كيفك

---

الشفيف ود القرشي لا يحب اللهجة الحادة فهي تكرمش مشاعره المرهفة
"غايتو محاكاة لي بابكر عباس ساي، كان طلع الموضوع كود وطاتي اصبحت "

ح اعلق على مداخلتك دي بالعموم كقفلة للحتة دي :
انا قاصد في حتة يقين / انكار في سياق المناقشة دي " ايمان / الحاد " .. بدل الفيل الطاير بـ " وجود الله " .. كدا وضحت؟
و بتفق معاك انهم اللتنين ( يقين ) بمعناها العام تماماً عشان كدا قلت الالحاد دين اتسلف!
و دي - في فهمي المتواضع جداً - بتعبر عن حالة الحركة و السكون في ( الشك ) .. دا الجمود القلت عليو انا .. متفقين هنا .. ودا محتوى مداخلتي - على الاقل القصدتو لو تاقصرت العبارة عنو - الاحلتك ليها في بوست " زهرة الغرق " .. ما غيرتو ابداً، و لا ممكن اجي اسي اناقضو.

بالنسبة للعبارة المعترضة على جدوى النقاشات ( الزي دي ) كانت تعديلية للمداخلة، و ما من اصلها. لما غلبني امشي جيت كتبتها كاعتراض على مداخلتي انا زااااتي! بالجد انا بحس انو زمنا كلنا اقيم من اهدارو في انت قلت كدا ، لا لا انا ما قاصد كد و بلا بلا بلا ...


مسألة الشفافة ما فوكا حاجة ..ز لوووووووووول انت في سودانيات
كووولهم هنا شفيفين الا انا عشان يتيم بس حقروا بي

شايف كيف يا شفيف؟
المرة الجاية أسأل .. ياخ انا ما عالم زيكم
نحن عنقالة ساي .. و كلامنا كلام ناس سوق .. ما بهمنا كان وافق نسق جودل و بقى خاتف لونين وشو انشتايني، و كرعيه نيوتنيه .. نلخبت ليكم الماركسية مع الصوفية لمن ما تفهموا حاجة ذاتو!!
فااا شنو؟
ما تلخبتوهو لينا بمصلحاتكم الكبار كبار دي .. سمعتو؟
هذا قسمنا فيما نملك .. باقي نحن ما متاوقين الكتب زيكم كدي .. البنلقاهو بنقراهو .. مافي نسق محدد بقولوا عليو .. النبي ما تتعبوا نفسكم تصنفونا ، بطير ليكم

[Mohammed Qurashi]

المشاركة الأصلية كتبت بواسطة قيقراوي

بالنسبة للعبارة المعترضة على جدوى النقاشات ( الزي دي ) كانت تعديلية للمداخلة، و ما من اصلها. لما غلبني امشي جيت كتبتها كاعتراض على مداخلتي انا زااااتي! بالجد انا بحس انو زمنا كلنا اقيم من اهدارو في انت قلت كدا ، لا لا انا ما قاصد كد و بلا بلا بلا ...

إنت أحسن زول و الله ..
يمين ما أزعلك تاني

[شهاب كرار]

بالنسبة للعبارة المعترضة على جدوى النقاشات ( الزي دي ) كانت تعديلية للمداخلة، و ما من اصلها. لما غلبني امشي جيت كتبتها كاعتراض على مداخلتي انا زااااتي! بالجد انا بحس انو زمنا كلنا اقيم من اهدارو في انت قلت كدا ، لا لا انا ما قاصد كد و بلا بلا بلا

وحاتك يا قيقا انا بريدك عديل كدا

[Mohammed Qurashi]

المشاركة الأصلية كتبت بواسطة شهاب كرار

الحفر في الاساس.
لم يهندس ريمان الهندسة الاقليدية، بل حفر في اساسها وبنى من ذات الاساس بتغيير المسلمات الهندسات اللأقليدية فغيير نمط تفكير كامل.
والاشياء ليست منفصلة على عن بعض، فثورة ريمان في الهندسة جاورتها ثورة الفيزياء ايضا عن طريق ذات الطريقة، ماكسويل حفر في اساس المجال وغير نمط التفكير في الموجات، انشتاين في مفهوم الزمان والمكان، جودل وراسل وفريجه فتحو الباب بالحفر في اساس المنطق والرياضيات نفسه لانواع اخرى من المنطق مثل المنطق الضبابي والكمومي وانواع تانية من الرياضيات، بس البيقومو بيهو دا ما كان منطق دا كان ميتا منطق، متجاوز للمنطق نفسه ويعمل عليه.
الحفر في اساس الدوال والتفاضل والتكامل والمفاهيم الاساسية بواسطة ديراك وغيره وإكتشاف الدوال المتقطعة وتكاملاتها ومشتقاتها ترافقت معاها ثورة ميكانيكا الكم ، يعني شغل ديراك ما كان تفاضل وتكامل، كان حفر في اساس التفاضل والتكامل عشان يتعرف على انواع تغيير تانية غير المعتادة والمعروفة.
دا فهمي للميتا، زابط معاك؟

غايتو بشكل عام كده شاعري زي مسألة الحب و التطور ديك زابط معاي !!
لكن حتكون زعلت لوباتفسكي و بوليا شديد، لأن الإتنين ديل هم البدوا الثورة اللاإقليدية و ريمان جا عمم نتائجهم بس !! ده طبعا ما بينفي عبقريته الشاعرية على قول محسن !! .. بعدين Meta دي في المنطق و الرياضيات عندها فهم محدد جدا .. كدي نجيب كلام الويكيبيديا علشان زابط المرة دي

Metalogic is the study of the metatheory of logic. While logic is the study of the manner in which logical systems can be used to decide the correctness of arguments, metalogic studies the properties of the logical systems themselves. According to Geoffrey Hunter, while logic concerns itself with the "truths of logic," metalogic concerns itself with the theory of "sentences used to express truths of logic."
The basic objects of study in metalogic are formal languages, formal systems, and their interpretations. The study of interpretation of formal systems is the branch of mathematical logic known as model theory, while the study of deductive apparatus is the branch known as proof theory.

في كتاب لـ Geoffrey Hunter إسمه Metalogic لو ماقريته لازم تسكه و تدرسه .. من أمتع الكتب في المجال ده .. و كمان واحد تاني بتاع عمك Douglas Hofstadter و إسمه Gödel, Escher, Bach - An Eternal Golden Braid برضو متعة .. و لكن بتفق معاك في كون التفكير الإبداعي في الأسس هو تفكير متجاوز و مهم رغم إنو أفتكر جانبك الحظ في بعض الأمثلة
يلا .. نمشي لقدام
تصبحوا على خير

[بدور التركي]

توجد تصورات عديدة وأراء مختلفة على قدر عدد البشر
من الممكن ان تتلائم تصوراتنا من تصور أو رأي واحد
وقد تضطرنا بعض الحقائق إلي وضعهاخارج تصورنا
ليست كل النظريات نتائجها مضمونة تماما
قد تظهر في المستقيل نظريات اكثر تطابقا مع الحقائق
او تاني مفسرة لنظرية سابقة


اختلفوا بس ما تتزاعلوا
وقليل من الخمر في كأس المنطق لا ضير


شهاااب
شكرًا على السؤال

محمد خف شوية
لسانك سليط

چيچا
سلام يشرح الخاطر

[بدور التركي]

ياأيا أخوانا
حاسة روحي في حديييقة. جميييلة مليانة ورود وازاهير عطرة
كل ما أحاول اقطف زهرة من أزاهير المعرفة والعلم والفكر والفلسفة
ألاقي نفسي محتارة اقطف اي وحدة
بقيت زي النحلة راكة من زهرة لزهرة


جميييل العلم والمعرفة والعقلانية الشاملة
وفكركم خطييير 

[قيقراوي]

المشاركة الأصلية كتبت بواسطة Mohammed Qurashi

يلا شايف كلامك الفوق ده معيب منطقيا بالحيل .. لأن النقيض منطقيا بيعتمد على قانون الثالث المرفوع (إما أ أو لا أ) .. يعني السلوان ده ممكن برضو يتواجد مع الحب و نقيض الحب هو فقط اللاحب .. شفت كيف !! .. و المنطق الحديث بيعلمنا إنو ممكن نتجاوز القانون المنطقي ده نحو أنواع من المنطق تسمى (المنطق المتعدد القيم Multi-Valued Logic) أو المنطق الشواشي Fuzzy Logic و ده فيه درجات بين الشيء و نقيضه .. ممكن يكونوا إتنين أو تلاته أو لا نهائي زاتو .. فشهاب مثلا ممكن يتحرك في المتصل ده مابين اليقين و اللايقين بلا تناقض منطقي !! خصيصا إنو تطبيات المنطق الجديد ده أثبتت إنه هو الأقرب للواقع و لطريقة عمل الدماغ و بيحل مسائل عمليه بيعجز عنها منطقنا القديم اللي إنت جايبه من زمن إبن حزم ده .. فروق المنقه ياخي .. خليك إيجابي


*

نقول ليكم بقرة " لغة " تمشوا تحلبوا لينا تور ( المنطق ) تاني!!؟
أها و الله صدق بن حزم الاندلسي .. وصدّقته مقولتنا في حالات الاتراح " الشالو من عيونا، يشيلو من قلبنا " مع انها مخاتلة جداً .. وانا لمن جلي يكش لمن اسمعا! ..
كانوا بشحدوا في الله في شنو الناس ديل؟
و لمن يقولوا مواسين : " و الهم آله و ذويه الصبر و السلوان "
الناس ديل طالبين شنو لاهل الميت؟
ياهو اللاحب دا ذاااتو
شفت كيف انو :
اللاحب = السلوان!؟
عاد رفع اكتر من كدا كيف تاني ؟

[بدور التركي]

يا شهاب:
انت عقلاني زيادة على اللزوم
كل شيء عندك خاضع للعقل
وكل ظاهرة في الوجود يجب ان تكون خاضعة للتفسير العقلاني
وانت تقوم بستخدام العقل في حقيقة الوجود
ما هي حقيقة الوجود في نظرك؟
عقلك بقول ليك شنو في الحنة دي؟

[شهاب كرار]

بدور مرحب بيك

ما هي حقيقة الوجود في نظرك؟

لاأدري

[بدور التركي]

المشاركة الأصلية كتبت بواسطة شهاب كرار

بدور مرحب بيك



لاأدري

بل
تدري



معقول العقل دا كله والفكر دا ولا تدري؟
يا. شهاب
الإثبات والنفي لا يجتمعان

[بدور التركي]

معقول يا شهاب
تكون عايش وميت في تفس الوقت؟


بالمناسبة
يا ريت حبيبتك تسجل معانا
أتمنى
تحياتي العميقة لها

[شهاب كرار]

المشاركة الأصلية كتبت بواسطة بدور التركي

بل
تدري
معقول العقل دا كله والفكر دا ولا تدري؟
يا. شهاب
الإثبات والنفي لا يجتمعان

وحاتك يا بدور كل ما عرفت اكتر، أكتشف انو لاأدري دي انسب منها مافي

[بدور التركي]

المشاركة الأصلية كتبت بواسطة شهاب كرار

وحاتك يا بدور كل ما عرفت اكتر، أكتشف انو لاأدري دي انسب منها مافي

طيب
انت عايز تدري
يعني عندك استعداد
ولّ عايز تعيش عمرك الباقي لا تدري
عندك رغبة في معرفة الحقيقة ولّ
عايز تسد دي بطينة ودي بعجينة

[بدور التركي]

صباح خير ملفوف بالمعرفة
ملون بالفكر
مغلف بأسرار الوجود والزمان
والتقدم الانساني الذي يجعل منه وعيا..ذاتا..شعورا..او شخصا
الذي يجعل منه إنسانا يفهم نفسه على الدوام من خلال تواجده
ومن خلال تواجده وتحقيق ذاته ويختار نفسه

يسعد صباح بالخير والعلم والفكر والمعرفة

[أبوبكر عباس]

المشاركة الأصلية كتبت بواسطة بدور التركي

بالمناسبة
يا ريت حبيبتك تسجل معانا
أتمنى
تحياتي العميقة لها

يا بدور يا أخي قصتك شنو؟
قلنا ليك مية مرة نحن ديل ما زيك،
نحن ناس معقدين و الكلام السمح و عديل دا بربكنا و بخلينا نشيل عكاكيزنا،
عليك الله رفقا بالرفاق.
هسع موش شهاب دا أكتر زول ليبرالي و متحرر فينا، تلقى الجملة بتاعتك الفوق دي جهجهتو ليك جهجهة شديدة و جابت ليهو مساعلات ما عندو ليها طاقة