فرفشة وخستكات ..للخروج عن المألوف!!!

[أبو أماني]

بعض الناس حازمين صارمين لا يبتسمون أو يقهقهون إلا لماما والبعض تبدو على ملامح وجهه القسوة والحزم والصرامة وتفاجأ أحيانا عند التقرب منهم بشخصية مرحة تبطن عكس ما يظهر عليها..البعض الآخر يكون حازما صاري الوش ومكشر وفي أعماقه ميل غريزي ليعيش لحظات يتحلل فيها من كل الرسميات دون جدوى.. أما أنا والحمد لله فقد جبلت على الميل الغريزي للمرح والطرفة وفي وجداني المثل الشعبي الشهير .. تنقد الرهيفة محل ما بتقت..وانتسب بذلك لمجموعة ناس ..أنام ملئ عيوني عن شواردها.. وهنا مربط الفرس في السعي من جانبي لكيما أفترع لكم هذا البوستر بمسماه اللا ملتزم ..

والقصد من إنشائه خلق لحظات خفيفة الظل كما أتمنى للبعض ممن يعانون من الملل والرتابة والجدية وأخص به على وجه الخصوص طيورنا المهاجرة أميالا وفراسخ بعيدا عن بلد الحب والأمان .. دار بني سقدان.. أولئك المغتربين عن الأوطان ممن تمر بهم لحظات يدفعون فيها ما تبقى من عمر نظير لحظات حًنان تحت شدرة نيم في نص الحوش المرشوش.. وتكية (نفاس) فوق ضهر عنقريب هبابي من غير لحاف.
سافترع لكم ضربة البدايةعسى أن تعجبكم وليساهم الكل بما عن له من خستكات .. ولكم حبي .. نلتقي بعد لحظات..وتشاو!

[أبو أماني]

[frame="7 80"]كانت أول قصيدة نظمها في حياته من أجل محبوبته فقط ننوه لأنه كان مسطولا عندما هبط عليه الوحي..[/frame]

أموت و استنشق ريحه
شعرك و ريحة انفاسك ..

و انفخ حبي الكاتمو سنين
في رئتيك الداخل قفصك ...
و بي أنفاسك أسكر طينة
و اكون مسطول ..

مسطول مصلوب في صليب
و بُعدك عرض و شوقك طول

و القى الطير اتلمى
و حلّق فوق راسي

قطع قلبي و نقر حبي
و ياكل و ينخر في احساسي

و انتي هناك ماسكاها مجلة
مجلة حواء او سيدتي بتقري في برجك

و برجك قال ليك ابعدي من محبوبك
فترة عشان في الآخر تكسبي حربك

و سني ظنونك ..
و صدقي كل الظن الظنو
إنو اظنو في لحظة اخونك

و جهزي شكك
و طلعي شوق الشك شكيهو
شوق الزول العاش مجنونك

و جيبي مسلّة و طعني قلبي
عشان يتذلّ و منك يتوب

و احفري حفرة
و اوئدي فيها الريدة الطفلة

و انسي القصة
و مشطي شعرك و امشي الحفلة

و شيلي الدم النازف مني
و اعملي أحمر لي شفتيك

و من قلبي المحروق و اتفحم
اعملي ماسكرا لي عينيك

و حتى الحَفِر الغبّر يدك
ينفع بدرة على خديك

أصلو الريد الجد بيعلم
البيريد لازم يتألم

ووجع الريد مصحوب باللذة
و انتي مكانتك عندي أعزّة

مكتوب لي اتذله بحبك
و انتي في ريدك رمز العزة

و انتي كيان صهيوني في حبك
و انا مستوطن ساكن غزة

عذبي قلبي و سوي سواتك
لا بتزحزح لا بتهزة

[النور يوسف محمد]

بسم الله الرحمن الرحيم

هذا البوست ..
لا بل هذا الرجل .. أعاد لى توازناً ما

ووجع الريد مصحوب باللذة
و انتي مكانتك عندي أعزّة

وخلينا نجى على مهل

[Hassan Farah]

التحايا العذبة لابوامانى والنور يوسف...
اليكم شوية فرفشة...

http://www.youtube.com/watch?v=v9aev...eature=related

http://www.youtube.com/watch?v=UmWwu6vLIIY&NR=1

[أبو أماني]

اقتباس:
المشاركة الأصلية كتبت بواسطة Hassan Farah

التحايا العذبة لابوامانى والنور يوسف...
اليكم شوية فرفشة...

http://www.youtube.com/watch?v=v9aev...eature=related

http://www.youtube.com/watch?v=UmWwu6vLIIY&NR=1



حبائبي العسولين النور وأبو على يا أخي والله طلتكم بالدنيا بما فيها..إنتو ما أصلكم ناس سمحين مكملين السماحة على حدها وسماحتكم دي مسحت بكبريائي المصطنع البلاط خلتني أتطاول لزمالة وصداقة ناس قمم شماء زييكم كدي..وأأو وعشان تتفهم صح..! waw وهي تعني واحلالي بلهجة الشايقية.. والله بختكم لقيتوا ليكم زول يتغزل فيكم باللغتين.

النور عارفك زول جاد.. (يوسف الحكيم)! لا كين أكيد فهمتنى فعليك الله أخلع الماسك ده وورينا حاجة فيها..إنسلاخ أو إندياح وأنا عارف معزتك لي فحا تلقاني واقف منتظر!.

أبوعلى يا أخي أحبك مووووت .. الهدية ظريفة زي صاحبها .. ونقل هل من مزيد؟ لكم حبي ولنا لقاءأت ويلا..تشششاااووو

[النور يوسف محمد]

بسم الله الرحمن الرحيم

تعرف يا ( أبو أمانى ) ..
من المشاكل التى تزعجنى أحيناً , هذا الإطار الذى يضعوه لك الناس ..
يقوموا يلبسوك قميص ( لقمانى ) ولا يسمحوا لك أن تخلعه ولو لدقائق ..
يعنى حتى بوستات الفرفشة الزى ده يشوفو دخلتك عليها غريبة ..
زمان فى بوست ساهرون بتاع أخونا أحمد زين , كن نقعد نتونس فيهو , دون قيود أو كرفتات ..
وين ( غطس ) ما عارف ..

أخونا كيشو إستطاع الجمع بين الحكمة وخفة الدم ..
ولا تخلو له مداخلة من نسمة وقفشه محببة ..
وكذلك القادم ( جنابو) الطيب بشير , ايضاً تشعر فى كتاباته الملاحة والطرافة والدم الشربات بالطبع + الرصانة التى تكتسى بها حروفه ..
بعدين بالمناسبة شايفك وديت الطيب ده بعيد وافتكرنو من جيل إكتوبر ..
ياخى الزول لساااااه فى نضارة حسنو فى عز الشباب ..
وبالمرة أرشحو ليك كضيف قادم وبنجيبوا ليك ( بالتعليمات )
طبعاً نحنا بقينا هنا تلاتة بوليس هنا . وحسب الأقدمية ( بابكر مخير , أنا , وجنابو الطيب )
ويبدو إنو المنتدى سيشهد استقطاب لقبيلة الشرطة فى الأيام الجاية ..
بس لو الكلام ده حصل حا نكون أخطر من الأسايطة ..
نفتح لينا بوست ونرفع القزاز ونغليى السعر
الدخول ليهو بى سر الليل

غايتو بابكر عباس لو اتوسطت ليهو بابكر مخبر ومبر وعكود بنديهو نقيب م

[معتصم الطاهر]

وجع ... وجع .. سيد الفرحة رجع ..

أبو أماني
و سلام يا عمك .. ( مسألة احترام ليس إلا ) ..

سؤال .. فى المناسبة

ما هي علاقة بين السفاهة و ميزات الضباط ..؟

[أبو أماني]

صديق يداعب صديقه ويكايده إذ قرر الزواج..

ندماً تنحسر الكلمات على شواطئ النسيان ... ليبقى القليل منها ليعبِّر به عن ما في دواخله ... لا تتسع نفسي إلاَّ أن تقول لك .. إنت ركبت الماسورة يا صاحبي
اصلها بتبدا كدا .. حنك .. كلمة حلوة .. نظرة .. بسمة .. عزومة بارد .. وانت جوووووووووة الجك .. ودقست واتلحست وأي شي ... وحنكوووك يا فاااااااااااااااااارة ..
وفي الآخرة طلعت ونزلت وخساير وعدم فهم .. وكلووو دا تحت مفهوم الحب ... والبقية مكشوفة ..

وفي ناس خاشين على تقيل ... انا بتقدم ليك وبعقد عليك .. وانا وانا وانا وانا وانا .. وما ادراك انو هو ولا واحد من الآنات دي !! وغايتو في الآخر بقولوا في خطوط جوية تونسية حنيـــــــــــنة نبقى ماشين عليها

بعد دا كللللللو .. ليه الناس بتقرأ ؟؟؟ انا تعبت من القراية ... ممكن أستقيل ؟
************
تشششاااووو وإلى لقاء آخر..

[قيقراوي]

بردلووووووووووب

ما قريت اي حاجة
جابني الشوق بس و الله
ابو اماني كيفك ياخ و العيال؟
و الله شوق لمن غلط ذاتو!
حولتنننننننننن!!!
طولت الغيبة ياخ!






-------

اها بعد دا نمش نقرا و بجيك صاد ... ضاد
اكان الله اراد

[جيجي]

بوست لذيذوني زي الناس اللذيذونيين الفيه ديل جت عليهم

[الزوول]

حباب أبو أماني
تعرف الطرفة لما تجيء من الزول الجاد المركّب وش التجهم والجدية بتكون مضحكة جداً مهما كانت عادية بالنسبة لباقي الناس
وطبعاً التحليل الفوق ده هو تعريف الطرفة نفسها
فالطرفة هي الفعل أو القول غير المألوف والذي يخالف ما يتوقع المرء حدوثه أو سماعه
كأن يتزحلق أحدهم فجأة أو يقول شيئاً غير مألوف
زماااان وأنا صغير ، أيام بيوقفونا ستاند باي لخدمة الأباريق و تموين الكبار بما يلزم من ماء وشاي وتمباك
جانا واحد قريبنا من حلة قريبة ، من النوع المركب وش الجهامة المخيف
قريبنا ده كان متدين جداً
وفي نفس الوقت كان بيحب الكوتشينة بدرجة مبالغ فيها
اليوم داك .. أبوي وأصحابو اللابسين وش الجدية والتجهم
دوّروا كشتينة من بعد الفطور
وكانت مسخنة جداً
...
بعد شوية أذن الضهر
قاموا من الكشتينة وصلّوا ...على مضض
بعد شوية العصر أذّن
وقفوا الكشتينة وقاموا صلّوأ ... على مضض أكبر
بعد شوية المغرب أذّن
وقريبنا ده في قمة الإندماج
قام ... خت الكشتينة وربّع ايدينو
وبدون ما يشعر ، قال:
(انتو يا جماعة ..الصلاة دي مالا بقت لنا في رقبتنا كدى)
طبعاً أنا لو ما جريت وفكيت الضحكة بره البيت
كان انجلدت جلدة ما حصلت
...

[أبو أماني]

اقتباس:
المشاركة الأصلية كتبت بواسطة النور يوسف محمد
بسم الله الرحمن الرحيم

تعرف يا ( أبو أمانى ) ..
من المشاكل التى تزعجنى أحيناً , هذا الإطار الذى يضعوه لك الناس ..
يقوموا يلبسوك قميص ( لقمانى ) ولا يسمحوا لك أن تخلعه ولو لدقائق ..
يعنى حتى بوستات الفرفشة الزى ده يشوفو دخلتك عليها غريبة ..
زمان فى بوست ساهرون بتاع أخونا أحمد زين , كن نقعد نتونس فيهو , دون قيود أو كرفتات ..
وين ( غطس ) ما عارف ..

أخونا كيشو إستطاع الجمع بين الحكمة وخفة الدم ..
ولا تخلو له مداخلة من نسمة وقفشه محببة ..
وكذلك القادم ( جنابو) الطيب بشير , ايضاً تشعر فى كتاباته الملاحة والطرافة والدم الشربات بالطبع + الرصانة التى تكتسى بها حروفه ..
بعدين بالمناسبة شايفك وديت الطيب ده بعيد وافتكرنو من جيل إكتوبر ..
ياخى الزول لساااااه فى نضارة حسنو فى عز الشباب ..
وبالمرة أرشحو ليك كضيف قادم وبنجيبوا ليك ( بالتعليمات )
طبعاً نحنا بقينا هنا تلاتة بوليس هنا . وحسب الأقدمية ( بابكر مخير , أنا , وجنابو الطيب )
ويبدو إنو المنتدى سيشهد استقطاب لقبيلة الشرطة فى الأيام الجاية ..
بس لو الكلام ده حصل حا نكون أخطر من الأسايطة ..
نفتح لينا بوست ونرفع القزاز ونغليى السعر
الدخول ليهو بى سر الليل

غايتو بابكر عباس لو اتوسطت ليهو بابكر مخبر ومبر وعكود بنديهو نقيب م



غايتو يا سعادتك وبدون أدنى مداهنة أو مسح جوخ أقولها لك وبكل الصدق كلما تقربت منك أكثر كلما تساميت في نظري أكثر وأخشى أن تطول فترة التلاقي فنلتقي وقد إرتقيت في نظري لمرتبة نبئ.. يا أخي إنت وبابكر مخير حيرتوني عديل كدي تصدق أمام أي منكما بحس إنني كتاب مفتوح فدوما تفهموني صاح .. كلامك الفوق ده قرأته وأنا أهجس بأن لديك جاسوسا بداخلي!..أحمد زين وكيشو هما فاكهة هذا المنتدي ومعينه الذي لا ينضب أعيب عليهما الشح الأدبي.. فتواجدهما متواتر وشبه غياب.. لهما كل العتبى..أما جنابو ده فأقول ليك خليهو تب بجيهو ليك وعلى فكرة أنا عارف أنو (نونو) مازال يحبو في المهد خاصة لو قارناهو بتوت عنخ آمون طبعا عارفه منو! هوي بابكر ما تحمر لي قائلني ماشايفك؟..أنا قلت حاجة اسع..؟

أما إقتراحك بإستضافته بالمائدة فقد لاقى هوى في نفسي .. هواء شنو؟ عصار عديل يازول أقول ليك قولة؟المليجي معلق يلهط في المائدة أكتر من تلاتة أربعة شهور إنتهز فرصة غيبتي وقعد يرعى، أسع كان شفته ما بتعرفو سوى ليو جضوم ونتؤات تانية حامياني! وكمان (سارة) ماقصرت مدياهو برطمانية بعر وارد حي القمائر قالت بيفتح الشهية .. عملت ليو مناشدة وكان صهين لومني كان ما عملت زي حكام سيحة وطلعت ليو كرت أحمر (سبة بلا سبب)..أأأي..بث.. هو إت قائل هتاف الجمهور طول السنين الفاتت دي شاقين حلاقيمهم .. التحكيم فاااااشل.. من شوية؟؟.

أبهجتني ملاحظتك حقت البواليص التلاتة في المنتدى يارب زيد وبارك كمان ذكرتني قصة الفرسان الثلاثة ذ ا ثري موسكيتيرز.. من روائع الأدب العالمي.. يااااه ..يا زمن .. لك حبي

[أبو أماني]

اقتباس:
المشاركة الأصلية كتبت بواسطة معتصم الطاهر
وجع ... وجع .. سيد الفرحة رجع ..

أأبو أماني
و سلام يا عمك .. ( مسألة احترام ليس إلا ) ..

سؤال .. فى المناسبة

ما هي علاقة بين السفاهة و ميزات الضباط ..؟



يا أخي لا.. ما بصدق معتصم شخشيا نزل من علاه لأديم بوسترنا المخستك ده؟! وووواااااو.. يا دا الهناء يا أخواتي زغردي والنبئ يا بت يا دوسة ..بس يا فرده جلطتها مرتين الأولى قلت لي يا عمك ! وإت عارفني زي جوع بطنك أنا دفعة أزغر زول فيكم قصدي جنابو بقول كلامي ده على مسئوليتي ولو إني عارفه بيرفع ضغط بابكر مخير ويعمل لفتحي مسعد كوما..اما الجلطة التانية يا أبو الشباب كونك تدردق لي قصة السفاهة والميز .. يا خلف الله والله عذبتنا معقولة أخسر حبائبي الضباط وسعادتو النور يوسف من شويتين لفت نظري بصورة إن دايركت لأنهم بقوا تلاتة وكمان حذرني دايركتلي إنهم ماشين في زيادة..! يعني يا معلم لو ذات يوم الموقع فتح معاك ولقيت مارشات عسكرية .. و..قرآن .. إتذكر كلامي ده .. وكمان كان ذاعوا البيان الأول وطلع النور يوسف في رئاسة المجلس صدقني أول خطاب تأييد حيكون بتوقيع المليجي .. ودقي يا مزيكة.. يلا تشششاااووو تحياتي لك وأسرتك الرائعة.

[أبو أماني]

اقتباس:
المشاركة الأصلية كتبت بواسطة قيقراوي
بردلووووووووووب

ما قريت اي حاجة
جابني الشوق بس و الله
ابو اماني كيفك ياخ و العيال؟
و الله شوق لمن غلط ذاتو!
حولتنننننننننن!!!
طولت الغيبة ياخ!






-------

اها بعد دا نمش نقرا و بجيك صاد ... ضاد
اكان الله اراد



الله لازم يريد ياقدع ..ولازمن تجيني صاد وضاد وكل حروف الهجاء إت قائل روحك هيين ولا مكطوع ليين؟إت يابا جوه الضلوع متوهط وحتى خلال غيبتي دي كلها ماغبت من خيالي ولا لحظة ولا خلااااس نسيت أيام طفولتنا بحضن سودانيات؟.

جد ليك وحشة يا ظريف ويارييييييت يا أ أأ ااارييييت ..إنتا تعرف حنيني إليك ياااا ريتك .. لك خالص مودتي يا عثل..

العزيزة جيجي .. يا أخي إنتى عثل ينقط وأي جمال قدامك قرد ينطط.. أسكتي عليك الله ما تخلي الواحد فينا يفك آخرو ..لكي مودتي الصادقة .. يلا تشششاااووو

[أبو أماني]

اقتباس:
المشاركة الأصلية كتبت بواسطة الزوول
حباب أبو أماني
وبدون ما يشعر ، قال:
(انتو يا جماعة ..الصلاة دي مالا بقت لنا في رقبتنا كدى)
طبعاً أنا لو ما جريت وفكيت الضحكة بره البيت
كان انجلدت جلدة ما حصلت
...




تعرف يا .. عكود .. لو سمعت بزول الضحك شرطو .. يكون آخر زول كلم المرحوم هو (زووولنا) ده .. بس حقيقي يازول أنا وقفت كتير في آخر سطور ديل كدي عيني في عينك..وما ترمش في ذمتك فكيت الضحكة جووه البيت ولا بره آل إيه؟ آل كان إنجلدت !.. (كان؟) يا .. ما تخليني أقول عليك! .. روح يا عم تلقى آثار الجلدة ليوم الليلة باينة .. بس مافي طريقة نشوفها! وإنت عارف كده كيويس عشان كدي مالي إيدك! .. لك صادق مودتي .. يلا .. تشششاااووو