لمحة عن بعض شعراء الأغنية السودانية

[الزوول]

المشاركة الأصلية كتبت بواسطة شبارقة

قال ليك زمان فى (اللعبة) واللعبة مقصود بيها الحفلة كانن البنات يقعدن على السباتة والسباتات بتكون فى اتجاه معاكس للفنان والضيوف (يعني كانن ياخدن ساتر) ... المهم في لعبة من اللعبات وفي حي القلعة بأم درمان كان الفنان كرومه يصدح ويغني ..أها عمنا أبوصلاح كان واقف في ركن كدي يعاين ساااي في الحفلة وفي البنات بصفة خاصة (ودي كانت عادة الشعراء في الزمن داك) عشان يكّون صورة ويمشي يعكسا في شكل قصيدة جديدة ... أها قال ليك في واحدة من البنات لفتت صاحبتا وقالت ليها : بدور .. بدور ...ها الغبيانة دي .. شوفي شوفي ياهو ده الشاعر أبوصلاح فقامت بدور عاينت لي أبوصلاح زييين وكانت بتسمعبو ولكن أول مرة تشوفو وقامت قال لصاحبتا: ياهو الأجهر ده *؟ (وفي ناس قالوا قالت : ياهو المعمش ده *؟) ... المعنى بدور لم يعجبا شكل أبو صلاح ... في ناس قالو أبو صالح كان عندو حول باين في عيونو وفي ناس قالو ما كان عندو حول باين ولكن كان بيعمش عيونو ... المهم في الموضوع إنو عمنا أبو صلاح أتاريهو سمع كلام بدور ... وبالتأكيد أثـّر على نفسياتو ... (لكن بدور كانت جميلة) عشان كده أبو صلاح قـِبل كلاما وجسارتا عليهو ... ومشى البيت وبدأ يكتب في قصيدتو المشهورة :

العيون النوركن بجهرا
غير جمالكن مين السهرا
يا بدور القلعة و جوهرا

السيوف ألحاظك تشهرا
للفؤاد المن بدرى انهرا
اخفى ريدتك مرة و اجهرا
نار غرامك ربّك يقهرا
يا بدور القلعة و جوهرا
****

* الأجهر: جاية من الشمش جهرتني أو الشمش جهرت عيوني أو عيوني جهرتن الشمش ... والمقصود بها عدم القدرة على فتـّيح العيون من قوة الضؤ والتوهج.

* المـِعـَمـّـِش: الأعشى أو من يعاني من العمى الليلي أو صاحب العيون شبه المغلقة من أثر الضوء ... أو أي زول عيونو دقاق كدي وما بشوفن سمح

....
عاصم حبابك
انت يا خوي عمك ابو صلاح ده مشكلتو شنو مع البنات البيحبطن فيهو ؟
الظاهر الناس كانت مطلعه شمار انو بيكهام زمانو
وبعدين البنات لما يشوفن عمك ... يجيهن احباط.
...
القصة حقت بدور القلعة دي مكررة بضبانتها حسب قول السر قدور في اغنية (شوف العين قالت ده لا لا )
فقد سمعته في حلقات أغاني وأغاني ، يقول ان الحسناء التي اعدت نفسها لرؤية الشاعر الكبير المشهور سالت رفيقتها عندما رأت الضيوف اياً منهم هو الشاعر فأشارت اليه ويبدو انها استهجنت منظره فقالت على الفور وهي محبطة (لا لا )
ووصل ما قالته للشاعر الكبير فكانت رائعته
...
شوف العين قالت ده لا لا
صدت من تيها ودلال
ريدتك ساكنة الجوف خلالا
و الاعضاء امتزجت خلالا
براق سنك شق لالا
وسهمك صاب احشاي قلالا
اسباب الغي و العلالا
ضمرتها والخصر العلالا
نور في نور ياذا الجلالا
وخدانا بالمعه انجلال
في الترنيع ماليك مثالا
علمتي الغصن الرتالا
شوفتك كم عاشق اتالا
يانسام اوصف جمالا
والقامة السيرك امالا
اوصف لي اسباب كمالا
وقول لي ام خد هجراني مالا
النسام شال الرسالة
وفي التوضيح روق رسالا
ذكرني الرطب العسالا
وهاج الشوق والدمعة سال
....

[الزوول]

...

[youtube]http://www.youtube.com/watch?v=BteKoW658u0[/youtube]
...

[شبارقة]

المشاركة الأصلية كتبت بواسطة الزوول

....
عاصم حبابك
انت يا خوي عمك ابو صلاح ده مشكلتو شنو مع البنات البيحبطن فيهو ؟
الظاهر الناس كانت مطلعه شمار انو بيكهام زمانو
وبعدين البنات لما يشوفن عمك ... يجيهن احباط.
القصة حقت بدور القلعة دي مكررة بضبانتها حسب قول السر قدور في اغنية (شوف العين قالت ده لا لا )
فقد سمعته في حلقات أغاني وأغاني ، يقول ان الحسناء التي اعدت نفسها لرؤية الشاعر الكبير المشهور سالت رفيقتها عندما رأت الضيوف اياً منهم هو الشاعر فأشارت اليه ويبدو انها استهجنت منظره فقالت على الفور وهي محبطة (لا لا )
ووصل ما قالته للشاعر الكبير فكانت رائعته

حباب دكتورنا الزوول

واحدة من تأثيرات الإحباط هي الإنزواء ... لكن عمنا أبو صلاح كان يمتلك الشجاعة البتخليهو يقوم يتحدى الإحباط... عشان كدي ترجمو لينا في شكل قصائد جميلة ما زال صداها يرن حتى الآن.

شكرن على أغنية شوف العين قالت ده لا لا وعلى القصة بتاعتا.

[قمر دورين]

أخ شبارقة
تحيّاتي.....
تعرف في حضرة قصائد شعراء كده ومنهم شاعرنا أبو صلاح ما بتكلم كتير
بسمع بس..........!
عندهم كلام عجيب والله......

ومن درر قصائد أبو صلاح أيضاً....

قسم بي محيك البدري
أجسامنا ليه جسمين
لحظك الجرّاح

شكراً لإمتاعنا بهذا البوست الجميل

[شبارقة]

عمنا أبو صلاح كتب أغنية قسم بمحيك البدرى ... وهى من ألحان وغناء كرومة وغناها كمان الفنان الفاضل أحمد وهو من قام بتسجيلها على الاسطوانات وأخيرا ً تغنى بها الفنان محمد وردى في منتصف السبعينيات .... وقالو وردي لم يقدم هذه الأغنية إلا بعدما إستشار الراحل عبد العزيزمحمد داود في لحنها وأدائها

قسم بمحيك البدرى ..............غرامك منو ضاق صدري
حبيبي البى العلىّ تدرى
*************
المحـــى نور ليلة القــدرنصب قوس حاجبو لي غدري
ومعاك في داخل الخدرى فؤادي المالكو من بدري
************
حيـــاتي ونعمـتي ويسرى رضيت لو يرضى بأســـرى
وفرض يا دمـــوعي تنتثرى إذا منو النسيــم يســـرى
************
حمــــام الأيك والقمري يصيح ينبيـــك عن أمـــرى
وبــين عواســـلك السمـــرى روايحى وفاكهتي وخمري
*************
أراك وتــوفى بــنذري دمــوعي الفى الوجــن تذري
حنــانك ما عليك وزري أنا قاســيت الهــوى العـــذري
************
صحــيح لجروحي لا تبرى وهواك برضاي ما جبري
بســيمات فاهـــك التبــرى يا جميل آه كم قللت صبري
************
أخاف يحسدني فيك دهري ويحرسك سرى عن جهري
وحرس قوس حاجبك الشهري جويهرات خــدك الزهري
**************
قبــالك وين أجد فكــرى ومصافحــة اليمين سكري
ببــالك هــل يمــر ذكرى وأمامك شكوتى وشكري

قام الشاعر/ مبارك المغربي بإنتقاد البيت الأول في القصيدة أعلاه و قال عنو في كتابو (رواد شعراء الأغنية السودانية) قال : العاشق لا يضيق صدرو من الغرام وكذلك المحبوب لا يدرى في كثير من الأحيان ما يحل بولهانه ... لكني أنا أعتقد إنو عمنا أبو صلاح أراد أن يلفت نظر المحبوب لكي يعطف عليو ... وعشان ما يجيهو إحباط يا الزوول .

http://www.youtube.com/watch?v=7BiZHnPfRoo

[شبارقة]

المشاركة الأصلية كتبت بواسطة قمر دورين

ومن درر قصائد أبو صلاح أيضاً....

قسم بي محيك البدري
أجسامنا ليه جسمين
لحظك الجرّاح

شكراً لإمتاعنا بهذا البوست الجميل

تحياتي يا قمر دورين

قسم بي محيك البدري جبناها ليكم والإتنين التانيات في الطريق بإذن الله.

محمد وردي في التسجيل القديم كان عندو خطأ في البيت البيقول (بســيمات فاهـــك التبــرى يا جميل آه كم قللت صبري) ... فكلمة التـَبري هي الصحيحة والتـَبر نبات معروف بزهورو ناصعة البياض وده البيقصدو الشاعر إنو الأسنان عند الإبتسام تبدو بيضاء ... وردي كان بينطقا (التـِبري) والتـِبر هو الذهب كما نعلم ... فهل الشاعر يقصد بأن المحبوبة أسنانا دهبية؟ ... يجوز مركبالا أسنان دهب ؟

شكرا ً لك على المتابعة وعلى المداخلة ،،،

[wadosman]

المشاركة الأصلية كتبت بواسطة شبارقة

عمنا أبو صلاح كتب أغنية قسم بمحيك البدرى ... وهى من ألحان وغناء كرومة وغناها كمان الفنان الفاضل أحمد وهو من قام بتسجيلها على الاسطوانات وأخيرا ً تغنى بها الفنان محمد وردى في منتصف السبعينيات .... وقالو وردي لم يقدم هذه الأغنية إلا بعدما إستشار الراحل عبد العزيزمحمد داود في لحنها وأدائها

قسم بمحيك البدرى ..............غرامك منو ضاق صدري
حبيبي البى العلىّ تدرى
*************
المحـــى نور ليلة القــدرنصب قوس حاجبو لي غدري
ومعاك في داخل الخدرى فؤادي المالكو من بدري
************
حيـــاتي ونعمـتي ويسرى رضيت لو يرضى بأســـرى
وفرض يا دمـــوعي تنتثرى إذا منو النسيــم يســـرى
************
حمــــام الأيك والقمري يصيح ينبيـــك عن أمـــرى
وبــين عواســـلك السمـــرى روايحى وفاكهتي وخمري
*************
أراك وتــوفى بــنذري دمــوعي الفى الوجــن تذري
حنــانك ما عليك وزري أنا قاســيت الهــوى العـــذري
************
صحــيح لجروحي لا تبرى وهواك برضاي ما جبري
بســيمات فاهـــك التبــرى يا جميل آه كم قللت صبري
************
أخاف يحسدني فيك دهري ويحرسك سرى عن جهري
وحرس قوس حاجبك الشهري جويهرات خــدك الزهري
**************
قبــالك وين أجد فكــرى ومصافحــة اليمين سكري
ببــالك هــل يمــر ذكرى وأمامك شكوتى وشكري

قام الشاعر/ مبارك المغربي بإنتقاد البيت الأول في القصيدة أعلاه و قال عنو في كتابو (رواد شعراء الأغنية السودانية) قال : العاشق لا يضيق صدرو من الغرام وكذلك المحبوب لا يدرى في كثير من الأحيان ما يحل بولهانه ... لكني أنا أعتقد إنو عمنا أبو صلاح أراد أن يلفت نظر المحبوب لكي يعطف عليو ... وعشان ما يجيهو إحباط يا الزوول .

محيك البدرى

الاغنيه بالتسجيل الاصلى و قصتها كما يحكيها وردى بنفسه..

[rams]http://www.sudanesehost.com/uploads/user_uploads/vipmohdosman2f56/muhiak_albadri_story_song.mp3[/rams]

لينك للحفظ

[قمر دورين]

المشاركة الأصلية كتبت بواسطة شبارقة

تحياتي يا قمر دورين

قسم بي محيك البدري جبناها ليكم والإتنين التانيات في الطريق بإذن الله.

محمد وردي في التسجيل القديم كان عندو خطأ في البيت البيقول (بســيمات فاهـــك التبــرى يا جميل آه كم قللت صبري) ... فكلمة التـَبري هي الصحيحة والتـَبر نبات معروف بزهورو ناصعة البياض وده البيقصدو الشاعر إنو الأسنان عند الإبتسام تبدو بيضاء ... وردي كان بينطقا (التـِبري) والتـِبر هو الذهب كما نعلم ... فهل الشاعر يقصد بأن المحبوبة أسنانا دهبية؟ ... يجوز مركبالا أسنان دهب ؟

شكرا ً لك على المتابعة وعلى المداخلة ،،،

يا سلااام قسم بي محيك البدري من أجمل ما كتب شاعرنا أبو صلاح
وقسماً أنا جادة يا أخ شبارقة في حضرة بعض الأغنيات بسمع أكتر ما بتكلم!
لكن نحاول....
عن التِبري أو التَبري....
قبل كده مش الشاعر أبو صلاح قال العيون النوركن بجهرا....
أها هو زاته بكون من النور حقّها ولمّا شافا ما عارف الساعة ديك
ده دهب ولا زهور ولا شنو...

يلا نحاول نجاوب يمكن تطلع الإجابة صحيحة...
تعرف قد يكون المقصود كما قلت التَبري وليس التِبري أي الزهور البيضاء
لأنه مثلاً في مسدار الهضليم لود شوراني بيقول

الضّو قال ليَّ لا تسافر ملاقي الحَرْ
أبرد وشد على ود البِطيرن فَرْ
قُتْله الراتعة في قفر اللراضي البَرْ
فر بسماها فاق تَبر الندى البِنْشَر
فقال تبر الندى البِنْشَر إذاً فالأرجح هو التَبري والله أعلم!!
لكن مش يمكن برضو الفنّان وردي يكون عاجبه اللون فقام قال التِبري!

كل التقدير أخ شبارقة وبوست يستحق المتابعة

[شبارقة]

شكرا ً لكما ود عثمان وقمر دورين ... ونهديكم أغنية شئ عجيب في غرامك لعمنا أبو صلاح

شي عجيب في غرامك يافريع ياسمين
روحنا واحده وكيف اتقسمت قسمين

http://www.youtube.com/watch?v=9EOw5FKzRjY

أجـسـامـنـا لـيـه جـسـمـيـن..؟!
روحـنا واحـدة و كيف إتقسمت قسمين
شئ عجيب في غرامك يا فريع ياسمين

يا حـبيب انا قلبى علي هواك امين
وفؤادي يعجز عن افكاري في التخمين
حواسي تحسد نظري لحسنكم تضمين
شمالي تاخدو الغيرة اذا جلست يمين
شئ عجيب في غرامك يا فريع ياسمين

يا مـن أسرت فؤادي ملكتو في اليدين
يـا مـلفـت الأنـظار يـا ناير الخدين
يا غايت القصود ما دمنا متحدين
تـبقي الصداقة قرابة و نكسب الودين
شئ عجيب في غرامك يا فريع ياسمين

يا حبيبي فيك اثنين هم للفكر سالبين
هم شـالو نوم عيني و للضمير تاعبين
شئ عجيب في غرامك يا فريع ياسمين

بي وجهك الكوكب يجهرني ساعة تبين
وبي قامتك اليايات الفي الصدير لاعبين
شئ عجيب في غرامك يا فريع ياسمين

من دا المنام ما معاي و لا جزء من ستين
و معاى تلت من عقلي وعندك التلتين
شـايقاني بسمة فاهك در عقيدو متين
لـولاها ما لي صالح في الزلال و التين
شئ عجيب في غرامك يا فريع ياسمين

[شبارقة]

نفس الأغنية بصوت الفرجوني

[media]http://sudanyat.org/files/ageeb_fi_guramk.wma[/media]

(المصدر: أحد بوستات الرائع ودعثمان)

[قمر دورين]

شكراً أخ شبارقة على الإهداء الجميل....
هناك الكثير ليُقال عن أبو صلاح واسمح لي أن أنثر هنا بعض من عطر كلمات كُتبت عنه

يقول الأستاذ محمود أمين العالم :
العمل الشعري بأكمله له دلالات أربع : دلالة لغوية ودلالة موسيقية ودلالة بلاغية ودلالة فنية .وهذه الدلالة الأخيرة ( الفنية ) هي فى الواقع الثمرة الحقيقية للتعبير .
وتتحقق هذه الدلالة الفنية بمقدار تحقق الارتباط الضروري بين هذه العناصر المكونة جميعاً لهذا العمل الشعري من كلمات وجمل ودلالات مختلفة.

هذه الصياغة اراحتنى جداً لأنها تتيح لي رؤية شعر أبو صلاح من خلال تلك الدلالات في إطار بيئته وزمانه الذي ظهر فيه .
لقد امتلك الشاعر أبو صلاح ناصية البيان وخرج منها بمعادلة انتظمت جميع إشعاره ..تلك المعادلة التي حدد أركانها جون كوكتو قائلاً:
(الفن ليس طريقة معقدة لقول أشياء بسيطة ، بل طريقة بسيطة لقول أشياء معقدة )
وليس هناك ابسط من هذه الكلمات التي قالها أبو صلاح في قصيدته ( جوهر صدر المحافل ) حين يصيغ قانونا ًابدياً في كلمات شعرية قليلة :
وبحر الشوق ما ليهو ساحل.

كلمات قليلة إلا أن إيحاءاتها الشعرية والموسيقية تمسك ببعضها كبلاغ فلسفي ... وهذا بالضبط ما قصده كوكتو عندما وصف الفن بأنه ( طريقة بسيطة لقول أشياء معقدة )

تلك سمة رئيسية في أشعار أبو صلاح ... التعبير الفني الذي يكاد أن يصبح قولاً مأثوراً لإيجازه ولاحتوائه على طاقة شعورية كامنة للتعبير عن الفرح المطلق أو الحب المطلق ..التعبير عن قمة الشعور الأسمى .

في ذالك العصر كانت القصيدة ذات منهج وشكل معين وأهم ما كان يميزها هو أنها كانت تعيش حياة غنائية.
لم تكن وظيفة القصيدة أن تكتب لتقرأ.. بل كانت تكتب لتغنى ولهذا جاءت في شكل لا يصلح للقراءة والهمس جاءت وهى تحمل موسيقاها الداخلية ولحنها المستتر. وكان على عباقرة الفن في ذلك الوقت أمثال كرومة وسرور أن يوصلوا ذلك للجمهور ..
فمثلاً قصيدة مثل ( لحظك الجراح) وهى تعد من درر أبو صلاح ...قصيدة (مغناة) ولا يمكن أن تكون قصيدة تصلح للإلقاء الشعري ... لأن شكلها ومنهجها غنائي

قد أخذ بعض المهتمين بدراسة هذه الحقبة على هذه القصائد وصفها الحسي الدقيق وعدوه عيباً ينقص من قدرها الفني ... لأنها حولت المرأة إلى نقاط حسية ملتهبة... ولكن الذي يتمعن في ذلك الشعر يجد إن الشعراء يلجئون إلى الوصف الحسي ليصلوا إلى قيمة عاطفية راقية ... أي تصوير الحب والصبابة تصويراً معنوياً يرتفع به من أرضية وصف العاطفة المجردة إلى القيمة المطلقة ويتجلى هذا في معظم قصائد أبو صلاح .. فمثلاً :

شعرو حاكا الغيم حاجبو هلالو فر بسمو نغيم والبروق لالو
مافى مانع لو قتلي حلالو أفدي جوز تفاح صدرو لولالو

الوصف الحسي هنا يقود إلى النزوع إلى الأعلى إلى الأكمل إلى القبول بالموت إلى الارتفاع للفداء ... وتلك قيم مطلقة ...

المصدر
http://www.sudaneseonline.com/cgi-bi...msg=1165016146

[تحفة حوا]

شبارقة كيفنك
متابعين
احسن حاجة كل اغنية بتكون مكتوبة كمان
شكرا للتوثيق

[شبارقة]

المشاركة الأصلية كتبت بواسطة قمر دورين

هناك الكثير ليُقال عن أبو صلاح واسمح لي أن أنثر هنا بعض من عطر كلمات كُتبت عنه

المشاركة الأصلية كتبت بواسطة تحفة حوا

احسن حاجة كل اغنية بتكون مكتوبة كمان
شكرا للتوثيق

شكرا ً لكما على المتابعة وعلى الدعم ... ونهديكم أغنية أخرى لعمنا أبو صلاح وهي (خلي العيش حرام مادام أرى الموت يحل)

خلي العيش حرام مادام اري الموت يحل
مابين الرميش فوق لي الطريف الكحيل

هـزاز صدرو ميـَّل فـدع الخصر النحيل
بالرجـاج يقـلـّع شـبه المهر الوحيل
النوم مـني فـرّ وقـلبي نـاوي الرحيل
مـن غير المنام طيف الخيال مستحيل

والاني اشتياقي وقـلبي أصبـح وجـيل
تتمـلك محاسنك روحي جيل بعد جيل
والاك الجمال يرفـع لـي قـدرك يجـل
يتمني الهلال ينصاع لي قـديمك حجل

بنقابل الرماح لو كـان تـزيد او تقل
ونخاف مـن ضـمير الأهيف المنفـقل
وبنقـابل المدافـع بالثـبات والعـقـل
ونهاب سيف عيونو اللمعو يبرق صقيل

يالمنـّك معـار تكحيل شويدن الخـميل
علـّمت الغصون مع النسيـم كيف تميل
مخـتارك يحـاكي الشولة دمعو الهميل
والتـختارو لي لاشـك جـميل ياجميل

http://www.youtube.com/watch?v=Zhk-x64II4c

http://www.youtube.com/watch?v=ddtLIg-220g

[شبارقة]

نأخد إستراحة مع سؤال المسابقة التالت ... وبعدين نرجع تاني لعمنا أبو صلاح.

سؤال المسابقة التالت:

صاحب الصورة أعلاه هو عمنا وحبيبنا جعفر بدري الذي تشرفنا بالتعرف عليه عن قرب قبل سنتين إبان زيارته للأخ النور يوسف بالرياض ... وتشرفنا به مرة أخرى هنا في سودانيات بعد أن أصبح عضو معانا هنا ... هو شاعر إبن شاعر ... والده شاعر كبير عندو أغنية حقيبة مشهورة جدا ً فمن هو ؟

[شبارقة]

المشاركة الأصلية كتبت بواسطة شبارقة

نأخد إستراحة مع سؤال المسابقة التالت ... وبعدين نرجع تاني لعمنا أبو صلاح.

سؤال المسابقة التالت:

صاحب الصورة أعلاه هو عمنا وحبيبنا جعفر بدري الذي تشرفنا بالتعرف عليه عن قرب قبل سنتين إبان زيارته للأخ النور يوسف بالرياض ... وتشرفنا به مرة أخرى هنا في سودانيات بعد أن أصبح عضو معانا هنا ... هو شاعر إبن شاعر ... والده شاعر كبير عندو أغنية حقيبة مشهورة جدا ً فمن هو ؟

لم ينجح أحد

يا أخوانا ود عثمان وين ؟