*** مصطلحات عامّية سودانية ***

[جيجي]

المشاركة الأصلية كتبت بواسطة أشتر

أنا ذاتي أقوم أزنقو معاك موش لو رفع لي إبهامو !!!
طيب نفس اللفظ دا والدارج أكتر أولاد الياباني التاباني ...
أعتقد (عاق) أقرب لمرفوض ..
ولّ شنو يا طارق ؟؟؟

ولا شنو
التاباني يعني عدوتي
والياباني عدوي
يعني انت ولد عدوي وعدوتي ودا دلالة على عدم الرضاء
اها المافي شنو؟ مش كلها اجتهاد في اجتهاد
اه جي جي بالباكستاني شنو؟

[شبارقة]

المشاركة الأصلية كتبت بواسطة طارق صديق كانديك

وصورة العنقريب جميلة ياجميل ماقصرتا كلو كلو بس ناقصلو جردل الليل مريسه وودوبيت ... !!

شكرا ً ليك يا ود كانديك

طيب ... التبروقة التحت العنقريب دي عندها لسان من الأمام (شكلو مستطيل) المربوط فيهو حاجة من الصوف (لونا أزرق في الصورة) عشان يعلقوا بيها التبروقة في الحيطة ... أها الحاجة الزرقاء دي إسمها شنو ؟ والمستطيل زاتو إسمو شنو ؟

ملحوظة : سألنا منو قبل كدة ... تذكر يا أبا عاقلة؟

[جيجي]

غايتوا ياشبارقة بما انه بيعلقوها منها تبقى رقبتها
اقصد التبروقة

[شبارقة]

المشاركة الأصلية كتبت بواسطة أحمد طه

البرطعة دي أقول ليك شنو يعني ، زي الجمل وكتن يقطع عقالو و يجري ، برطع برطع برطع ،،، لكن ما سمعت بالموية البتبرطع في الحلق دي

أما الفنجطة فهي نطّيط غير منتظم ، زي فنجطة الشفع ، أو فنجطة الحمار العاير

سلام يا أحمد طه

نعم ... الفنجطة تطلق على الحمير والبرطعة على الإبل

الفنجطة لا تحتاج إلى مساحات كبيرة بينما البرطعة تحتاج إلى مساحة كبيرة ومريحة

الحمار العاير لا يفنجط بل يكون مسرعا ً ومتحفزا ً وبدون تركيز عشان كده مرات كتيرة بلقى نفسو دخل في أماكن ضيقة أو طرق مسدودة

[بدور التركي]

المشاركة الأصلية كتبت بواسطة أحمد طه

بدور إزيّك ، البرطعة دي أقول ليك شنو يعني ، زي الجمل وكتن يقطع عقالو و يجري ، برطع برطع برطع ،،، لكن ما سمعت بالموية البتبرطع في الحلق دي

أما الفنجطة فهي نطّيط غير منتظم ، زي فنجطة الشفع ، أو فنجطة الحمار العاير

تسلم يا جميل
ما قصرت
يقصر الملح

يا شبارقة زمان وانا طفلة بلعب بالتراب
كنا نلعب لعبة
نمسك يد الزول ونقول له كد بضمة الكاف
الدومة
يعني شنو
الدومة عرفتها
بس ليه يمسكو اليد
وما يفكك إلا يكدها

[شبارقة]

المشاركة الأصلية كتبت بواسطة جيجي

غايتوا ياشبارقة بما انه بيعلقوها منها تبقى رقبتها
اقصد التبروقة

ما دائما ً العلـِّيق من الرقبة ... حبوباتنا كانن بقولن لينا : يوم القيامة بيعلقو الزول من لسانو

[بدور التركي]

المشاركة الأصلية كتبت بواسطة شبارقة

ما دائما ً العلـِّيق من الرقبة ... حبوباتنا كانن بقولن لينا : يوم القيامة بيعلقو الزول من لسانو

والنساء من شعورهن


التبروقة
أظنها اللسان!!

[شبارقة]

المشاركة الأصلية كتبت بواسطة بدور التركي

كنا نلعب لعبة
نمسك يد الزول ونقول له كد بضمة الكاف
الدومة
يعني شنو
الدومة عرفتها
بس ليه يمسكو اليد
وما يفكك إلا يكدها

دي لعبة مؤلمة ... بل هي ليست لعبة أصلا ً وهي ضغط ظاهر اليد بقوة حتى تنثني للأمام في إتجاه باطن الساعد .

أها لما تنضغط اليد يبدو شكلها أقرب للدومة عشان كدة بيقولوا ليك كدها ... لأنو الكد بيكون للدوم عادة ... وبعدين للعضم

[شبارقة]

المشاركة الأصلية كتبت بواسطة بدور التركي

والنساء من شعورهن

وكان ما عندها شعر !! أو حالقة صلعة

[أشتر]

المشاركة الأصلية كتبت بواسطة شبارقة

وكان ما عندها شعر !! أو حالقة صلعة

من العرقوب ...

[أشتر]

المشاركة الأصلية كتبت بواسطة شبارقة

ملحوظة : سألنا منو قبل كدة ... تذكر يا أبا عاقلة؟

ودابعاقلة هو السألك وعملت نايم ليوم الليلة !!!

[أشتر]

البجبوج ...
الطمبجة ...
الطرابيل ...

[شهد]

سلام جاكم يا ناس المصطلحات

ود ابعاقلة كتب :

البجبوج ...
الطمبجة ...
الطرابيل ...

الطمبجة : زيادة الطين بلة
البجبوج : في ظني تشبه الطبمجة . بس "لاقة " يعني نجيضة لمن قربت تخرب حاجة مُبجبجة كدا
الطرابيل :اعتقد الترابيل ..البشتغلو في التراب وكدا المزارعية

[أشتر]

المشاركة الأصلية كتبت بواسطة شهد

سلام جاكم يا ناس المصطلحات

ود ابعاقلة كتب :


الطمبجة : زيادة الطين بلة
البجبوج : في ظني تشبه الطبمجة . بس "لاقة " يعني نجيضة لمن قربت تخرب حاجة مُبجبجة كدا
الطرابيل :اعتقد الترابيل ..البشتغلو في التراب وكدا المزارعية

ود ابعاقلة الكتبو شوية ؟؟؟
الطمبجة صاح كلامك ..
أما البجبوج ما عندها علاقة بالطمبجة إلا في حالة واحدة .. حالة السيولة أو نحو ذلك
الترابيل حقتك دي بقولو عليها الترابلة ...
لكن طرابيلي دي بعيدة عن ترابيلك ...
ثم
مشاقين وكدا ..
يا الطال غيابك سنة وزيادة ...

[wadosman]

المشاركة الأصلية كتبت بواسطة أشتر

البجبوج ...
الطمبجة ...
الطرابيل ...

الطرابيل جمب اهلنا فى البلد
و يقال انها الت ترهاقا...