نَـضَـمـي ومَـغْـنـى

[azzam_farah]

جزيرة عِبْدِلا
د. محمد بادي

انا أخو البت اللكعت قرن الخمره النازه على وردان الصبوه الراكزه
الجنْيات الهازا صدورن لازا و رَق النص زي خيت الشلا
بالحيل آ جني.. إي والله
**********
الجنيات الحزمو الجبه وعرق الشتوي عليهم نايا وصبا
قول ما دِله رجالا حصدوا الحبه
عيشمْ هادو الكان مُتْعبا
ومِنو كتير في الواطا إنكبا
والباقي مصوبر واقف قبا
الحمُد آلاف
الشّكَر آلاف
العيش الرقد أصناف أصناف
الولد الكان عزَّام.. ضياف.. حلاف
الرزق الجانا مَدلا
الحلق الجاف إتْبلا
بالحيل آ جني ... إيي والله
**********
الوادي الجانا متقَن
مد جناحو الطايل شرقًَا وغربًا
القبلي بروقو على القلعات إضربن
الدُكن البِعدن قربن
فوق صنقور المحله الطالت كبن
قول للمحله بيوتك خربن
قول ما دِله.. الحلق الجاف إتبلا
بالحيل آ جني إيي والله
**********
مرحاتنا شرابهن يوت ما غبن
شبعانات في الشِقل أب شوك ما شبن
الحُمْل ولدن وربن
حلماتن تقلن.. جرن.. فوق سيقانن كبن
اللبن العاتم في ضرعاتن جَبْن
المغصه إن كان ضرعاتن خربن
القرعة آ وليد.. السعن آ بنيه
القربة كمان.. كبوها المَيه
المغصه إن كان ضرعاتن خربن
شوفو النعمة السالت فوق قيزان الرمله
ناس البندر لبن الشاي بالعمله
سمح الخمج الفوق أسيادو
سمح العز المن أجدادو
الجنيات المشو ما عادو
كان بالرِد أكان إتنادو
غرب حامد وشرق بله
كانوا بحلبو الضرع الدلا
كانوا بحضرو الخير القدحو مَعلا
الجنيات ما كفرت بنعمة الله
بالحيل آ جني إي والله
**********
ذات في يوم والغيمة تهتف مطرًا نقع فوق نوار الطلح الفقع
ريحة البَرم إن جاتك عطرًا فايت خُمَر الفوق أردافا مجدع
شفنا الوادي يقشقش في دمعات الليل
والتِعِل الشايل بدا يتفقع
تلب حامد فوق مخلوفة أب زور وإتربع
طلق الرسن أب زمه وسوا خبيبا بدع
هَود في رقاب الصي
لاقوهو تلاتة زبيدية
خالفين سيقانن فوق السنكيت
ورقاب ألبل بيناتن مرخيه
محجوبات بالخرز الفصلو السوميت
كل واحد درقة وسيف وطبنجية وباقي جرابن مليان دلميت
الجنيات إتقبلو وضاقو الحاره وضاقو المره وكان حجازن صقر الجو
حامد كان عارفين ضاقوهو رجال قَبالكن شوفو أرزاقكم أخير من ضو
حامد عوج الطندب.. آ وليدات
عوج الطندب نار القصب الهبلت ما بتعدلو
شوفو شلوخو مطارق رقدن وكل تلاتة يمين سياف إتقبلو
حامد راضع مخ التُرك البقْبق مِن ضرب أهلو نهار ركزو تمام وإتْعدلو
حبوب القارح ما دِله.. ولدًا ما ختالن زَله
شن قولك فيهو عليك الله
بالحيل آ جني إي والله
**********
وين مراتع الدرت الباسط دايما ببكي عليهن
وين بنوت الحلة البكّر عصرا بدري يسون في شاهيهن
بعد الليل ما يِهَود ونحن نهَود.. عاد أماتن ينادن ليهن
نمشي على القيزان نتقادم.. أقيس الخطوه مع التاتاي ومشيهن
والله البعد الحاصل ما نساني.. وحاتكم في قمراتنا بشوفو وشيهن
إلا النضم أب غنه اللهج السكر وين بلقاهو؟
بنات الريل الدوب ليهن
الخوف يا ناس كان يبقى الشوق الحاصل بينا معشعش فيهن
مُقَنع سابل وين بلقاهو؟
طرفًا زابل وين بلقاهو؟
وعينا بتدنقر من واليهن
الوجنات الشَعن بقن
ود العين النايم زَرقَن
مو زايغ.. رسيان وميقن
زولن كان خدران ومحقن
منّ الشوفه عروقو يطقن
كان الدنيا بِصح تتخلا
كُنا بركنا معاهن في رملات الحله
إلا كمان بنشوفا مذلا
الجنيات الغابت جابت
إنت الجيب بس قايلو قميص أفرنجي وكرتونات كرملا ؟
لا لا وحاتك حاشا وكلا
ديل يوم عادوا إتلافو الجاهل بحقوق الله
ديل كم لحقو البشهق ضايق.. وداوو العِلا
الولد الجاي حقايب سفرو تقال.. تقال مِن جنس كتاب ومجلا
الحكمة النضم إياهو الكان.. الحكمة الولد إتوضا وصلا
عادة البلد الدخلت فيهم سكنت.. سكنت ماب تتخلا
نحن كمان طارين الحِله ودرنا الطلا
نشيلا معاهم فرحا وميتا
حلات الموت كان في عِبْدِلا
حلات الموت كان في عِبْدِلا


[youtube]http://www.youtube.com/watch?v=UR4s6DqoWLs[/youtube]

[azzam_farah]

فارس الحديد

للشاعرة / زينب بت عبدالرحمن
قيلت في / البخيت بابكر ضحوي

ما حرسو الجري صدرك موشح بالدمي

ما بخاف فارس الحديد إن حِمي
***********************
يا فارس الإلوف الإنت كَـفـيــتِـن
وكبست الدروع وشلعت خوداتن
ما بخاف فارس الحديد إن حِمي
***********************
فارسنا البخيت التم شكراتن
صديت الخيول و قمحت ركباتن
ما بخاف فارس الحديد إن حِمي
***********************
من قومت الجهل ليهو الخوف ولا قسمو
متبون في المحاصه الدود كتر عشمو
ما بخاف فارس الحديد إن حِِمي
***********************
تدخُل فوق بكانن النحاس خلف شتمو
وركز البخيت الفال والنصر ختمو
هو ما بيخاف فارس الحديد إن حِمي
***********************
من قومت الجهل الخوف وُلوو كارو
والهوي والشرق إتْـصَـنَـطـو أفعالو
هو ما بيخاف فارس الحديد إن حِمي
***********************

العوق أب صفوف فالو البخيت شالو
ومضروب في الوِجَنْ ولا جاني بشمالو
ما بيخاف فارس الحديد إن حَِمي
***********************
ما حضروا معاك أخوانك السلاط
قمزوا الخت علي خيلاً بجن غايرات
ما بيخاف فارس الحديد إن حِمي
***********************
تدخل فوق بكانن حرابو مُنْشَبِكات
جاء مرهون علي جفونو الدمي سايلات
ما بيخاف فارس الحديد إن حِمي
***********************
ما حضرو معاك أخوانك الديدان
قمزو الخت على خيلن بِجَنْ ريقان
ما بيخاف فارس الحديد إن حِمي
***********************
وكت الشوف يشوف سدرك يزن دلهان
سوالن جهاد حمزة وعلي وعثمان
ما بيخاف فارس الحديد إن حِمي

[youtube]http://www.youtube.com/watch?v=jlPdUyj09eg[/youtube]

http://www.youtube.com/watch?v=2aVMg...eature=related

[أبوبكر عباس]

سلامات يا عزام،،
أتمنى يا عزام أن تقوم بشرح الصور الجمالية الفي القصيدة "النضم" كلها.
مرات بجيني إحساس انو مواضيع القصيدة دي غير مترابطة!

تلب حامد فوق مخلوفة أب زور وإتربع
طلق الرسن أب زمه وسوا خبيبا بدع
هَود في رقاب الصي
لاقوهو تلاتة زبيدية
خالفين سيقانن فوق السنكيت
ورقاب ألبل بيناتن مرخيه
محجوبات بالخرز الفصلو السوميت

- في حوار قديم مع الفنان سعد البنا وجديد مع الغوث محسن خالد، تكلمنا عن إستعمال ود بادي لمفردة "تلب"، ود البنا بيقول: التتلب فوق ضهر ألبل ما بجي، لانو التتلب دائما من فوق لتحت! وكان أحسن يستعمل: "طرز فوق مخلوفة أب زور"
و التتطرز بمعنى القفز، بمارسوهو مع الجمل "التباب"، الجمل البقوم سريع أول ما مسكتا الرسن أو الزمام، وختيت يدك في طرف المخلوفة.

- "ورقاب ألبل بيناتن مرخيه" معناها انو الزبيدة ديل راكبين ومُريحين في المرعى وبتونسوا وماشين بمهلة.
لكن "محجوبات بالخرز الفصلو السوميت" دي زمن طويل كانت غالباني؟؟
في زول قال لي: الزول دا داير يوصف ألبل ديل بالعريس الرابطين ليهو حجاب في يدو بالخرز والسوميت وطبعا في ألبل بربطوا الحجاب في رقابن.

[azzam_farah]

سلامات يا بابكر

تلب حامد فوق مخلوفة أب زور وإتربع

كلام ود البنا صحيح لو إتْشرحت كلمة [تلب] بِمعناها الظاهِر.. بس لأن الحِكاية شعر، أنا بشوف د. بادي، لامِن إسْتخدم [تلب] أدانا مجال نسرح فوقو بِخيالنا شِوي. د. بادي بِشكِر فوق [حامِد] البطل.. وعلشان [التِتِلِب] أبدًا مِن فوق لِتِحِت.. يبقى حامِد لامِن [تلب فوق مخلوفة أب زور وإتْربع] أكان مِنَوِخ جملو (يعني الجمل بارِك) والتِطرّز (القفز) مِن تِحِت لِفوق وده بحكي قًصر القامة، وقًصر القامة مو مَشكر ولو قِياسًا على الجمل. أو كمان -ودي صورة أجمل- يِكون عاوِز الشاعِر يحكي عن طول وضخامة حامِد القابل وحدو تلاتة زبيدِية كل واحد عِندو [درقة وسيف وطبنجية وباقي جرابن مليان دلميت]
ـــــــــــــــــــــــــــــ

محجوبات بالخرز الفصلو السوميت

ظني الحِجاب مِن العين

[طارق صديق كانديك]

مساء الخير عزام وضيفك بابكر

ركوب ( ألبل) كما نعلم يتم وهي ( باركة) أجدني أميل الى الصورة التي طرقها د. بادي وشرحها الأخ عزام جهة كونه ( أي د. بادي) يفاخر بحامد وهذا الفخر يسوق الذهن الى صورة جمالية أخرى في طول قامة حامد كما تفضل الأخ عزام .. لذا يناسب ذاك التصور أن يقول ( تلّب) وليس ( طرّز) .. !!

لكما تحياتي

[azzam_farah]

طارِق صِديق كانديك
كيف حالك؟ علك طَيِب

شُكرًا على المرور

إحْتِراماتي،،،

[أبوبكر عباس]

ظني الحِجاب مِن العين

أيوة حجاب من العين،
لكن قصة حجاب من الخرز والسوميت في ألبل ما شفتها.

[azzam_farah]

بابكر عباس

أيوة حجاب من العين،
لكن قصة حجاب من الخرز والسوميت في ألبل ما شفتها.

بس الخبر الجَيِد إنك شُفْت الإبل!

الخرز هو زاتو في رقبتو هو "الحِجاب" وزينة ها "الحِجاب" أكان السوميت

محجوبات بالخرز الفصلو السوميت

[زول الله]

تحية كبيرة لك يا أخ عزام على هذا الرفد الشيق الجميل

اجد هنا:
ما حضروا معاك أخوانك ..الخ
قمزوا الخت علي خيلاً بجن غايرات
وهنا برضو:
ما حضرو معاك أخوانك ..الخ
قمزوا الخت على خيلن بِجَنْ ريقان
وديتها جاي وجاي ابت تقع
ماحضروا معاك هل تعني انه حارب وحده في عدم تواجد اخوانه ؟؟؟؟
قمزوا الخت ؟؟؟؟؟
رغم ان الأغنية هي من المفضلات المثيرات لغريزة العـَرضة والسيطان
لاينقصها عندي شيء إلا عدم إستيعاب معاني ماورد أعلاهـ
تحياتي









اقول قولي هذا واستغفر الله لي ................

[azzam_farah]

زول الله (كُلنا)
كيف حالك؟ علك طَيِب

ما حضروا معاك أخوانك ..الخ
قمزوا الخت علي خيلاً بجن غايرات
وهنا برضو:
ما حضرو معاك أخوانك ..الخ
قمزوا الخت على خيلن بِجَنْ ريقان

هل تعني انه حارب وحده في عدم تواجد اخوانه ؟

نعم وحده.. لكن الشاعرة/ زينب بت عبدالرحمن عاوزة -حسب ظني- تقول البخيت بابكر ضحوي أكان براهو في ها العركه، براهو بس مو مِن قله أخوان، أكان براهو حَيثُ أن الأمر لا يسْتحِق أن يُسانِدوهو أخوانو [السلاط] [الديدان]

- السُلاط: الأشِداء
- الديدان: جمع دود: وهو التمساح (الدود في الصعيد هو الأسد)
- قمــزوا: قفزوا (يعني زي يقول ليك: [رِكِب الشارِع])
- الخــت: الخط وهو تقسيم إداري "ناظِر خط" "شيخ خط"


إحْتِراماتي،،،

[سمراء]

اقتباس:
المشاركة الأصلية كتبت بواسطة azzam_farah
سمح الخمج الفوق أسيادو

سمح العز المن أجدادو

والله وماطالبنى حليفة ياعزام !

البيتين ديل من دكتور بادى بخلّن جسمى كلو يقوم شوك شوك !
وحقيقة ، سمح العز المن اجدادو

وده برجعنا لى زمن اعتقد انو مابعيد ..عشان الناس تتغير خارطتة بالطريقة القبيحة دى ! والناس تنسّي الاصول الاتربو عليها ، وكما نعلم السودان زاخر بالاسر العريقة ، والقبائل التقد عين الشمس ، وسمعنا وقرينا وشفنا الكثير ..من فخر وشجاعة وكرم ....الخ من الصفات اليفترض تتوارث عبر لاجيال

بس للاسف ...كل الصفات اندثرت وراء حوائط الحضارة والزيف العالق فى اذهان البعض !

[azzam_farah]

سمراء
كيف حالِك؟ علِك طَيبة

والناس تنسّي الاصول الاتربو عليها

مــا بِكـون -حـليلُـم- نِـسـوهـا يا سمرا!
بِكون ما إتْربوا عليها بعيـدة مِنْطَمرا
مين.. بِيضهب في المويـة والخمرا؟
ود الأصـول مِتْل الماسِكلو في جمرا

إحْتِراماتي،،،

[azzam_farah]

غِناء/ ميرغني المأمون وأحمد حسن جمعة

كلِمات/ أبو صلاح

الليل الليل.. يا جمال الليل
طيبك عبق..
وهوي يا سمحة وطيبك عبق
سنك براقا يسوي بق
وترنعي تشبهي مهر السبق
فوق اردافها صديرها انطبق
الليل الليل.. يا جمال الليل

فوقك عهود..
وهوي يا جاهلة وفوقك عهود
براءة وطه وياسين وهود
لي شلاخك وقفن شهود
ازهر فرعك جوز النهود
الليل الليل ..يا جمال الليل

تتفدعي..
وهوي يا حبيبة وتتفدعي
فوق لدروعك تتجدعي
بجيوش شامك لي تفجعي
في يوم توب صدري تمزعي
الليل الليل.. يا جمال الليل

ما مشية المهر الوحيل
ما السحاب ما الظل في الرحيل
اصلو غير يتنى النحيل
يمشي خطوة اتنين مستحيل
الليل الليل.. يا جمال الليل

طرفك كحيل..
وهوي يا حبيبي وطرفك كحيل
صدرك عالي وخصرك نحيل
من اردافك دائما محيل
تحكي سحيب الضحى في الرحيل
الليل الليل.. يا جمال الليل

محياك قمر..
وهوي يا حبيبي ومحياك قمر
ميل فرعك شال الثمر
طايل ديسك يندح خمر
من العلقم هجرك امر
الليل الليل.. يا جمال الليل

يا نسيم الروض قابلا
بالتحية ان كان تقبلا
قال لي حاسب لا تقبلا
تبقى عاشق والغيبة لا
الليل الليل.. يا جمال الليل

جدية الخدور..
وهوي يا حبيبة جدية الخدور
بخلاف شوفتك انا شن بدور
وصفك رق وقلع الصدر
شعرك ظلمة ومحياك بدر
الليل الليل.. يا جمال الليل

تتجلى نار..
هوي يا حبيبي و تتجلى نار
قنديل وجهك يطفى الفنار
ساكنة قليبي وما ليكي جار
سكني روحي معاك بالايجار
الليل الليل.. يا جمال الليل

يا خفيف الروح يا الرزان
فرعك المصقول خيرزان
انت كالميزان كاللبان
الليل الليل.. يا جمال الليل

[youtube]http://www.youtube.com/watch?v=JGfEfHgZKi0[/youtube]

[بله محمد الفاضل]

سلام قريبي عزام

معك سطراً بسطر فقد حُرمنا من كامل الاستمتاع
(قراءة واستماعا)
في لملمتك للفريد في الغناء...

تحياتي واحترامي

[azzam_farah]

etta james
I'd Rather Go Blind

Something told me it was over
When I saw you and her talking
Something deep down in my soul said, Cry Girl
(cry cry)
When I saw you and that girl walking around
(whoo)
I would rather, I would rather go blind boy
Than to see you walk away from me Child no
(whoo)
So you see I love you so much that I don't want to watch you leave me Baby
Most of all i just don't, I just don't want to be free
no
(whoo whoo)
I was just
I was just
I was just sittin' here thinking, of you Kiss and your warm embrace yeah
When a reflection in a glass that I held to my lips now baby
(yeah yeah)
revealed these tears that are on my face
(whoo)
And baby, baby
(baby baby baby)
I'd rather be blind boy
Than to see you walk away
walk away from me
yeah
(baby baby baby)

http://www.youtube.com/watch?v=YApNirMC9gM