أحيانا تداعبك فكرة ما وتتغلغل عميقا في دواخلك وتسيطر تماما على عقلك المثقل بهموم الدنيا كلها اقتنع عمنا الفاتح بتنفذها فهب مسرعا من سريره وعلا صوته مناديا حرمه المصون
ـ إلبسي ليك اي حاجه كده معقولة بس بسرعة جدا
ـ يا راجل انت جنيت في شنو والاولاد نخليهم لي منو ديل من صباحية الرحمن على سندوشتات طعميه والدنيا مغربت
ـ فكرة جميله جدا بس البسي وانتي حتأعرفي بعدين
وما هي الا لحظات حتي خرجا سويا لاحظت زوجه انه قد امسك بيدها ثم تأبطها في رقة لم تعهدها منذ سنين عده وزاد تعجبها حينما فتح لها باب العربة العتيقة وظل ممسكا به حتي استوت على المقعد الامامي ثم برقة غير مألوفة اغلق الباب وبسرعة اتجه الي الباب الاخر وركب بجوارها وكأنما خيل لها انه قد نظر اليها بنظره غابت عنها عمرا مديدا امسك بيدها ثم قبلها كادت ان تفتح الباب وتولي هاربه
ـ ياراجل الليلة انت مالك ؟؟ والله ما طبيعي في شنو ؟؟
لم يجبها بل امسك هذه المرة بيدها واطال تقبيلها كأنما كان يهمس لها بكلمات استعصت على شفتيه ان تبوحا بها
ـ نزلني هنا انا برجع براي
لم يرد وواصل القياده وكأنه اراد ان يسكن من روعها ثبت عينيه على الطريق , مرت بها الشوارع التي طلما تمنت ان تكون بجانبه ا لكنه في كل مرة كان يعتذر متعللا .
اخيرا اوقف سيارته في جانب قصي من حديقة علي شاطئ النيل ترجل من السيارة ظنت ان هنالك عطلا ما لكنه استدار وفتح لها الباب اتفضلي للمرة الثانية خُيل لها انه قد انحي قليلا تلك الانحاءة التي ربما شاهدتها في احدي المسلسلات التركية مهند ونور .. ابتسمت وقررت ان تجارية عسي ان تصل الي ما اصاب هذا الزوج من تغيير وللمرة الثانية امسك بيدها ودخلا سويا وهذه ايضا المرة الاولي التي لم يسبقها باميال .. ثم استقر بها في ركن قصي حول طاولة عليها كاسات فارغة لكن سرعانما اتاهم صوت :
ـ تشربو اول شنو؟؟ بارد ساخن ولا تتعشو أحسن ؟؟؟
ـ شوف المدام اول
نظرت إليه في استغراب ... المدام؟ لم تسمع منه هذه الكلمة ابدا .. عصير ليمون بارد اكتفت بذلك عسي أن يهدئ هذا لليمون توترها
ـ وأنا كما زي المدام
في ركن اخر كانت هنالك مجموعة من السباب على طاوله
ـ والله عمك ده شدة ما مندمج لمن نسي جوالو الإتملص من جيبو
- يا شباب ماين منو ( خلوهو لي ) ده زولي
اتجه احد الشباب الي طاولة الزوجين وتناول الموبايل الملقي على الارض وعبث به قليلا واخرج جواله من جيبه ودون رقما ثم تنحنح
ـ السلام عليكم ...جلسة في الحرم إنشاء الله .. يا أخ الجوال ده وقع منك ..طبعا ياسيدي مين زيك ولا جايب خبر ... وقبل ان يجبه احد صاح في انفعال
ـ معقول ؟؟؟ أنتي ؟؟ وتسمرت عينا الشاب على الزوجة بينما ألجمت الدهشة الزوج...حرام عليكي انتي قلبكم ده ما فيهو رحمة معقول تواعدي اتنين في وقت واحد ...أنا مستنيك من المغرب وانتي جاياني مع زول تاني ..عليك الله السجمان ده أحسن مني في شنو ... لكن الحق ما عليك الحق علي أنا العرفت واحده زيك فعلا انتي تستاهلي زي العواليك ده ..... واستشاط الشاب وانفعل وارغي وأزبد وبدأت أرتال (الشمارين) في الوفود .. والزوج لم يخرج بعد من اندهاشته ..... غير مصدق ...
ـ دقيقة يا اخوانا ..أدار الشاب رقما من جواله وكأنما كل المكان تحول الي آذان صاغية ورن جوال الزوجه ..... واستجمعت اخر ما لديها امله ان يكون فرجا ومخرجا وبصوت مرتعش
ـ ألو منو معايا ....
ـ منو معاكي ده أنا الواقف قدامك ده عشان تصدقوا يا جماعة .... وكأنما ايغظت هذه العبارة الزوج فهب واقفا
ـ قدامي حسبي الله ونعم الوكيل .. امسك بيدها لكنها لم تكن كتلك الاولي كاد ان يسلخ جلد يدها ... جرها في وحشية ... ولم يسيرا معا ... تقدمها مسرعا الي السيارة انتهرها لتركب.... وانطلق بها ... تراوده افكارا وافكار ... معقول بعد عشرين سنه .... اعوذ بالله من الشيطان الرجيم ... الولد عندو رقم الجوال ... تضاربت وتعاصرت وتبلورات وتبخرت افكار وأفكار .... اخيرا وصلا الي البيت ... هذه المرة كعادته القديمه لم ينتظرها بل فتح باب السيارة واتجه الي الباب وعالج القفل ودلف مسرعا تاركا الباب مفتوحا ... تهاوي الي اقرب كرسي واحكم قبضتية على رأسه الموشك ان ينفجر ... دخلت هي واغلقت الباب خلفها ... وما هي إلا لحظات حتي دق الباب ... انتزع نفسه من الكرسي ... فتح الباب .... نفس الشاب راسما ابتسامه عريضة
ـ انتي تاني ... وأنهال عليه بصفعة قويه تلقاها الشاب بألم شديد لكنه امسك يد الزوج ...
ـ يا عم الفاتح روق الموضوع ما بستاهل انا اشرح ليك .. الظاهر انك ما عرفتني .. أنا ابن صديقك عمار زميل الدراسة والطفولة باين عليك مسحت يا عمو .. انا عرفتك اول ما دخلت الحديقه واستلمت ملفك وعشان الملح والملاح وصداقتك مع الوالد قلت اخارجك .. انا شغال في شركة إسمها ( خلواتكم) لجمع الضرائب يعني بالمختصر المفيد اي اتنين قاعدين في اي مكان عام لازم يدفعوا ضريبة والضريبة دي نوعين الاولي بنسميها ( خلوة آمنة) ودي قيمتها 150 ألف والتانية ( خلوة غير أمنه ) ودي بندي خيار إما ان نسلم الاتنين لشرطة النظام العام او يوافقوا على ترفيع ( الخلوة الغير آمنه ) بأثر تقدمي الي (خلوة آمنه) وهنا بتتضاعف القيمة الي ثلاثة اضعاف يعني 450 ألف والشغل ماشي اخر حلاوة والحمد لله ونحنا عمولاتنا كل يوم زايده ... بي صراحه كل الحصل كان فبركة مني عشان تتخارج ... والله أنا لا بعرف زوجتك ولا مذكر اخر مره شفتها فيها ... ورقم الجوال انا اختو من جوالك الكان مرمي في الارض واستغربت جدا عندك رقمين بس مسجلين البيت والشغل .. نقشت رقم البيت والحمد لله ما كان هاتف ثابت والبقية انتا عارفا ...هنا الكلام عبرات في الحلق وإن مزجته هذه الفرحة التي لم يجد لها اي مخرج لتعبر منه .... ارتمي هذه المرة في احضان هذا الشاب ومسح عينية بقميصه عسي ان يرتد بصيرا
ـ أهدأ يا عمو خلاص الموضوع انتهي عليك الله نادي المدام عشان اعتذر ليها ... وكأنما كلمة المدام اعادته إلي تلك الفكرة التي اراد ان ينفذها ان يخرج بها ان يكسر حاجز هذا الملل أن يهربا سويا ولو إلي ساعات بعيدا عن هذه الدائرة التي يتسع محيطها ساعة بعد ساعة و تأبي ان تفجر ....
ـ يامدام لكن المدام لم تفتها كلمة من الذي دار بين الاثنين ولم تكن في حاجة ان يعاد عليها ... كيف حدث هذا هي لا تدري لكنها عانقت زوجها بصورة احست انها لم تحدث من قبل بكت ... وتمسحت ... تنهنهت
ـ بالله عليكم الله سمعونا ضحكة عشان الواح يطمئن انو الموضوع خلاص انتهي وعادت المياه الي مجاريها ... أيوه كده ..
ـ حصل خير والحمد لله وتشكر وانا حازور ابوك بي نفسي واسلم عليهو وأحكي ليه الحصل لي والله زمان ما شفتو ... قبل ان يودع الشاب اخرج من جيبه الخلفي دفتر ايصالات وبسرعة احترافية حرر ايصالا وناوله للزوج
ـ دي حاجة خفيفه يا عمو 10 الاف ضريبة أسمها ( اصلاح ذات البين ) والحمد لله الواحد يودعكم وهو مطمئن ..............
ـ اخرج الزوج ورقة مالية وناولها للشاب ..... و........
