من أفواه البسطاء - لا المجانين - خذوها

[الوليد عمر]

......

" بـــــــِــــسْ "




جدنا (الصّديق ود البشير) كان زول عندو نظرة ثاقبة فى الناس و ما عندو مدسّة تب ، لو أخد منك موقف بشمَّك برة و جوة ، أها صدف أنو كان بينسج فى راكوبته ذات ضحوة كدا و كانت الراكوبة بجوار الدرب طوالى ولأنو جدنا كان فوق ما كان شايف المارين فى الشارع منو ، أها مرّ بيهو واحد من ناس الحلة ما بدورو كلو كلو ، سلم عليهو : "جدى الصديق سلام عليكم " ، رد جدنا الصديق بعد ما عرف الزول من صوتو : " الزول منو ؟ خِــدِر ؟ " ، " أيوا دا أنا خدر" ، فما كان من جدنا الصديق إلا أن رد بالحرفين أعلاه.



يا منعم بوستك سمح ياخ.

......

[الزوول]

(أمي ...والله بقت تلبس من الحبل)

كتبها الأخ الأصغر لأخوه الكبير لائماً

لتأخره في ارسال المصاريف

[زول الله]

(إن سِلِم العود اللحم بيعود)
هذا المثل قالته "حبوبتي" الله يرحمها وكنت في حالة يأس من فقد شيء عزيز
وإتعلمت منه التمسك بالأمل
وشغال بيهو لي يوم الليلة

عبدالمنعم ياخي دا بوست بنكهات عجيبة جدا
حقو الواحد يجيب ليك "مرضي نكهات" من احدى الزقاقات المجاورة






اقول قولي هذا واستغفر الله لي...........

[خالد الصائغ]

(و الله يا يحيي إنتا لو إمتحنوك براك ... تجي الطيش)

استاذنا سليمان في سياق قرفو المتواصل من أخوه يحيي الذي جلس لأربعة سنين متواصلة بذات الفصل و ذات الكنبة.

[عبدالمنعم الطيب حسن]

المشاركة الأصلية كتبت بواسطة اشرف السر

بوست مميز بحق اخي عبد المنعم...

وأدلي معكم..


(عدم الموضوع في البلد دي بقى لينا برنامج)



ياسر علي الزين في قمة قرفه من الأوضاع،
مجيباً على سؤالي له عن أحوال الشباب في 24 القرشي....




(أكان شفت البيت، تقول يا ليل)



ذات نهار وبمعيتي حافظ وناصر ومهند، نرتشف الجبنة، إمرأة في أواخر الستينات، ضاحكة السن وسريعة البديهة، جلست مع ست الشاي لمعرفة بينهما، وانتقل حوارنا لموضوع بنات الزمن دا، فتحدثن هي بلسان الممعنين في الهرم، فقلت لها مداعباً "إنت لسه شباب"، ضحكت وردت بالنفي أنها ليست شابة، وإني أيام شبابها
(أكان شفت البيت، تقول يا ليل)...
فهمت المعنى وفهمه مهند..
وما زال حافظ وناصر يبتسمان
لبراءةٍ تخصهما

اشرف السر
شرفت البوست ياخ
وعدم الموضوعية البقى برنامج دا في البلد كلها
من 24 القرشي لعند 1989 حوش بانقا
البلد كلها تغرق في اللامبالاة وفقر الخيال وفقر الفقر

[عبدالمنعم الطيب حسن]

المشاركة الأصلية كتبت بواسطة سيد احمد محمد علي المامون

..

.. صاحبنا .. ( العطا ود احمد ) .. يعمل في مجال ( جلط ) البيوت (بالكرك ) .. في البلد .. سافر مصر .. وغاب ( اسبوعين ).. وبقي يتكلم مصري .. لما رجع .. زار كل البيوت للسلام .. في الطريق قابلته ...( العاجبة) ..
.. اتلومت .. يا العطا مشيت للناس دي كلها .. مالك ما جيتنا ...
.. العطا قال ليها .. والله يا خالتي العاجبة .. بيتكم راح مني ...


.. قال ليهو ..

.. الغبا اليغباك .. درب .. (محارتك ) لسة فوق حيطنا ...

ابو السيد اضحك الله سنك ....
قلت لي اسبوعين ورجع يتكلم مصري وزار كل بيوت الحلة للسلام ياخ عينة والله
ذكرتني زملينا في مصر اول التسعينات اسهل حاجة تمشي ليبيا من مصر ،
15 جنيه من المنصورة لي بنغازي ولاتحتاج تاشيرة وكلها كم ساعة
المهم عادي الطلبة الواحد يخفس ليبيا يومين تلاتة ويرجع وكان شيئا لم يكن
ولا في زول يعرف كان في ليبيا ام الزقازيق

المهم واحد صاحبنا مشى ليبيا قعد اسبوع وجاء راجع ،
جاب الحلاوة ولبس جلابتو ولمن زملاهو قال ماشين مشوار قال لهم اتفضلوا
انا بجوني الضيوف يتحمدلولي السلامة
حدثني زميله في السكن قائلا :
زولك قعد تلاتة يوم مافي زول جاهو !!!!

[عبدالمنعم الطيب حسن]

المشاركة الأصلية كتبت بواسطة الوليد عمر

......

" بـــــــِــــسْ "




جدنا (الصّديق ود البشير) كان زول عندو نظرة ثاقبة فى الناس و ما عندو مدسّة تب ، لو أخد منك موقف بشمَّك برة و جوة ، أها صدف أنو كان بينسج فى راكوبته ذات ضحوة كدا و كانت الراكوبة بجوار الدرب طوالى ولأنو جدنا كان فوق ما كان شايف المارين فى الشارع منو ، أها مرّ بيهو واحد من ناس الحلة ما بدورو كلو كلو ، سلم عليهو : "جدى الصديق سلام عليكم " ، رد جدنا الصديق بعد ما عرف الزول من صوتو : " الزول منو ؟ خِــدِر ؟ " ، " أيوا دا أنا خدر" ، فما كان من جدنا الصديق إلا أن رد بالحرفين أعلاه.



يا منعم بوستك سمح ياخ.

......

جدي ابوعركي ودالنويري مشهور بالعبارات اللاذعة
وكان مابتلفت للردود
في يوم ما كان ماشي الزراعة وسايق حمارته وولدها الصغير وماشي معاهم برجليه
- اهلنا لا يركبون على ظهر الحمارة الوالدة لتوها يقولون ان ضهرها لين -
ينتظرون يومين تلاتة ليفعلوا ذلك
المهم جدي كاش الحمارة وولدها الدحيش الصغير
ساله واحد شليق عمي ابوعركي الدحيش دا لقيتو وين
سريعا رد جدي
( لقيتو واقع )


الوليد الامير
شكرا لمرورك العذب والاضافة الحراقة
وتسلم

[سارة]

عبد المنعم وضيوفه الكرام
هذه البوست رائع جدا ونحن من سكانه ولكن لا تخجل من المشاركة بالقليل
فالحرمان منها أقل{ دا من تاليفى بتصرف}

وحات رب البيت ما تبارينى ما كفاية نقة الدنيا فى الجنه
داير ترازينى
دى زوجة عمنا

عندنا عمن لينا الله يطراهو بالخير ..نقناق زى مهند الرباطابى دا ومرات مرات
راسو زى الحجر تقول حافظ حسين بس البغيظ مرات بيعمل فيها هو ضد الدبيل
يعنى ما بعرس فوق مرتوعشان خاتى بالو فى بنات الحور.المهم زوجته الجميلة خايفة ربها شديييييد فى بيتها وفى دينها ..وهو كل مرة يلمح ليها انا ان شاءالله بتعوض ببنات الحور فى الجنة..اها يوم قاعدة فى مصلايتها بعد كملت صلاتها ودعاها قالت ليهو يا ابو احمد انت الرجال ليهم بنات الحور فى الجنه والنسوان
ليهم منو؟؟ قال ليها المرة كانت بقت صالحة ودخلت الجنة لاخر ازواجها
نطت من مصلايتها لامن جدعت سبحتها
وحات رب البيت ما تبارينى ما كفاية نقة الدنيا فى الجنه
داير ترازينى

[عبدالمنعم الطيب حسن]

المشاركة الأصلية كتبت بواسطة الزوول

(أمي ...والله بقت تلبس من الحبل)

كتبها الأخ الأصغر لأخوه الكبير لائماً

لتأخره في ارسال المصاريف

الزوول
تسلم يا امير
وهذا زميلنا كريم الدين في المنصورة وكان احد اقاربه غير المباشرين من المغتربين يرسل له المصاريف الشهرية ،
وهكذا هم السودانيون ، وصاحبك المغترب في مرة حصل منه تاخير شديد ودبرس كريم الدين ،
وارسل برقية الي قريبه في المملكة جاء فيها


( السيد فلان اذا لم تصلني المصاريف خلال اسبوع فانني احملك المسؤولية كاملة )

[عبدالمنعم الطيب حسن]

المشاركة الأصلية كتبت بواسطة زول الله

(إن سِلِم العود اللحم بيعود)
هذا المثل قالته "حبوبتي" الله يرحمها وكنت في حالة يأس من فقد شيء عزيز
وإتعلمت منه التمسك بالأمل
وشغال بيهو لي يوم الليلة

عبدالمنعم ياخي دا بوست بنكهات عجيبة جدا
حقو الواحد يجيب ليك "مرضي نكهات" من احدى الزقاقات المجاورة






اقول قولي هذا واستغفر الله لي...........

خلف الله
كيف انك يا صديق ،
حبوبتي امنة بت احمد ود ابعركي واحدة من اعظم نساء المنطقة ربت الايتام وعاشت مستورة وماتت قبل سنوات قليلة مخلفة حزن ما زال ساكنا فينا ،
كانت اعظم اوقاتي اقضيها في حضنها الدافي ، اول ما اصحي من النوم ، اشيل ابريقي وانظف اسناني بالقرب من غرفتها وتجيب لي اختي شاي الصباح مع حبوبة ،
وتضفر في ضفيرتها وترسل الحكاوي عبقات ،
لقد ربتي هذه السيدة الكريمة مع امي
انا تربية حبوبات ،
احزن لحال ابنائي الان وهم بعيدون عن الاسرة الكبيرة الممتدة
ولكنها ضريبة الغربة ندفعها صاغرين ويدفعها اباءنا


خلف
هل من عودة هل ؟

[عبدالمنعم الطيب حسن]

المشاركة الأصلية كتبت بواسطة خالد الصائغ

(و الله يا يحيي إنتا لو إمتحنوك براك ... تجي الطيش)

استاذنا سليمان في سياق قرفو المتواصل من أخوه يحيي الذي جلس لأربعة سنين متواصلة بذات الفصل و ذات الكنبة.

خالد الصائغ
سلام وتحية
جلس لامتحانات الشهادة السودانية 7 مرات ولم يتوفق ابدا في دخول الجامعة لدراسة الطب ، او اي كلية اخرى
اخيرا اشتغل ممرضا وان ظل متاففا ويردد
( نحن المفروض نكون دكاترة لكن برضو اهو الواحد دكتور الا شوية بس )

[عبدالمنعم الطيب حسن]

المشاركة الأصلية كتبت بواسطة سارة

عبد المنعم وضيوفه الكرام
هذه البوست رائع جدا ونحن من سكانه ولكن لا تخجل من المشاركة بالقليل
فالحرمان منها أقل{ دا من تاليفى بتصرف}

وحات رب البيت ما تبارينى ما كفاية نقة الدنيا فى الجنه
داير ترازينى
دى زوجة عمنا

عندنا عمن لينا الله يطراهو بالخير ..نقناق زى مهند الرباطابى دا ومرات مرات
راسو زى الحجر تقول حافظ حسين بس البغيظ مرات بيعمل فيها هو ضد الدبيل
يعنى ما بعرس فوق مرتوعشان خاتى بالو فى بنات الحور.المهم زوجته الجميلة خايفة ربها شديييييد فى بيتها وفى دينها ..وهو كل مرة يلمح ليها انا ان شاءالله بتعوض ببنات الحور فى الجنة..اها يوم قاعدة فى مصلايتها بعد كملت صلاتها ودعاها قالت ليهو يا ابو احمد انت الرجال ليهم بنات الحور فى الجنه والنسوان
ليهم منو؟؟ قال ليها المرة كانت بقت صالحة ودخلت الجنة لاخر ازواجها
نطت من مصلايتها لامن جدعت سبحتها
وحات رب البيت ما تبارينى ما كفاية نقة الدنيا فى الجنه
داير ترازينى

اهلا وسهلا بسارة ،
وجودك ومشاركتك في البوست اسعدتني ،


وهذه زميلتنا في الجامعة قالت مخاطبة الشلة
( غايتو انا بعد ما أرَيِّح في الجنة شوية واستقر ، بطلع افتش ليكم نار نار )

[عبدالمنعم الطيب حسن]

- 14 -

( محمد بابكر دا راجل صاحبنا ومحاسب الجمعية لكن قوليهو مرة واحدة الجميل قاليك 6 في 7 بكم )

المساعد الطبي في شفخانة حلتنا المرحوم الجميل مخاطبا احد العمال المرضى الذي ارسله محاسب الجمعية الزراعية وقال ليهو
خلي الجميل يديك كبسولات مضاد حيوي .

[عبدالمنعم الطيب حسن]

- 15 -
( عارف عليك الله غسِّلْ معاك الموية )

مغترب قال لود اخته عارف عمره 10 سنوات ياعارف شايف الكوز داك املاه موية من الزير ،
وتعال غسل ايديك قدامي وامشي املاهو تاني وتعال غسل الكوز قدامي وبعد داك امشي
التلاجة جيب لي موية عشان اشرب ،

وهنا تدخلت اخت المغترب -خالة عارف-في خارطة الطريق هذه واضافت العبارة اعلاه

[عبدالمنعم الطيب حسن]

- 16 -
( سَوِّتن خمسين والله تلقاهن مية )

مغترب بسيط وقد اخذته معي من اطراف الرياض الى سنترها ،
وقد بدا يتجاذب معي اطراف الحديث سائلا عن منطقتي وعندما اجبت
قال لي وين دي ما سمعنابا في الخريتة ،
اوضحت انها على بعد خمسين كلم شمال الخرطوم بحري
فرد بالعبارة اعلاهو