وكما اتفقنا وطيبان علي نشر مجموعة رسائل ست الدار حتي يتسني للبعض الإطلاع عليها فكل ماهو منشور علي الشبكات العنكبوتية تم نشره كما كتبه حميّد سابقا ً ..سأقوم بنشرها علي اجزاء حتي نتمكن من قراءتها بتأني ..
1
.
( جواب أول )
بسم الحاضر والمستقبل
ست الدار بت أحمد تكتب:
ليك يا الزين ود حامد شوقنا
أما بعد ،
المبعوتة المنك .. وصلت
ورُح فكيت الطلب الفوقنا
وباقي الدين يا الزين خلصتو
قدر الفضّل .. مصروف راشد والتومات
والجايات من جاي .. لا جاي
زي ما قت لك قبال ده
شهر إتنين حا نطهر راشد
شهر إتنين المدرسة تجـّز
الله يبعد العارضي تجينا
وراشد حالف ما يطّهر
إلا أبوهو وعمتو تحضر
وإلا يجيبو الغنايين
شان الشوق بت سرنا ترقص
قتلو نجيب المداحين
طنطن .. أنا جاي من الحج
وعارف راشد لما يطنطن
كل الدنيا الفيي تطنطن
غايتو بشر .. بس ربو يهون
ما كلمتك بالتومات
أول البارح جني يرطنن
قالن نحنا الخواجات
اتبسملت.. مرق حصلت
لقيت لك جعفر زارد البيت بالخواجات
يبقى حداشر وخواجية
ناس البلد الكسرو عليهن
صدو يقلبو في إيديهن
عدمانين من إسم حكيم
والا خبيراً للمشروع
علماء آثار .. فضلت في آثار
ما خموها الجونا قبلكن ..
شن خلولنا بلا حجار
الله يصرف الخواجات
بينات جعفر والمحجوب .. والمحجوب والخواجات
طقت حجي .. العمدة طفاها
باقي الناس الجات للفرجي ..
قنبو قيلو شبعو لحوم .. والخواجة يصور ساكت
صوّر بت الجنفاوية طالعي تكسر في واقود
شافع الحلب اب ضلعاً بره .. و ايدو تدمّم وجارلو عـُوُد
والخواجة الكلو لـُقـُود وكنا نصوّر في البوبار
ويا بوبار العمدة وبذخو
سته خرفن وتيس انسلخو
.
