أرحلي يا نور الضلام

[حافظ حسين]

ياحبيب المحبين انا امتحنا كثيرا
وانا امتحنا طويلا
فرحماك ياخالق الحاكمين وياخالق الناس
ياخالق الوحش والسوسنه *

فأرحلي يا نور الضلام فقد أمتحنت كثيراً و عنيفاً

الي شليل و في رواية أخري الفاتح السعيد دون أي القاب أضافية مثل الشفيف, الوريف و الخ من حنك عاضي

* مريد البرغوثي - الشهوات
و شهوة ان نموت موت الله يا مريد

[حافظ حسين]

في البدء كانت لعنة....
لعنة القدوم ليلاً علي أسنة البروق
لعنة الاسم الذي قُدر له هزيمة الظلام...
الإسم التي أطلقته عليها جدتها المنسلة من قطار العمر خلسة....
ذات ليلة وصل فيها غضب الله من الحاح العباد نهايته العظمي, فأرسل عليهم المطر صيفاً ممزوج بالعاصفة و الزيفة, و معه كان الظلام الدامس الذي يصعب علي الأصبع اختراقه..., في تلكم الليلة فتحت نور الشام عينيها في رحم العبث و قررت القدوم و جاءت لتبقي صرف النظر عن الثمن المدفوع...الريح أطفأت كل النيران و النار التي قاومت تكفل بها مطر الغضب مما حدا بالقابلة اخراجها بضوء البرق ... فكانت تبرق فتقطع الأخيرة, مرة أخري تنتظر البرق فتلصق, بهذه العبثية خرج الي الظلام كائن جديد زائداً الأمة المحمدية عدد واحد نفر, و حال إطلاقه صرخات العذاب تحسست الجدة ما بين فخذي الكائن و دون حسرة أو ندم من سلالة:
(إنها أنثي و ليس الذكر كالأنثي, أو الله يجعلها من المستورات, و الخ من عبارات قدوم الأنثي) ....
لم تقل أي من شاكلة الجمل عاليها و انما قطفت قطعة مانجو ناضجة و مضغت لبها جيداً و أمررت لسانها علي فم الطفلة لاجة إياها بلعابها الممزوج بطعم المانجو و دندنت ب:
(حبابك يا نور الضلام حبابك
حبابك يا بنية جعابي حبابك
حبابك و جمالي ما شابك)
بالموال عاليه الممزوج بلجة المانجو سميت الطفلة نور الضلام إلا أن هذا الاسم لم يصمد أكثر من سبعة سنوات, فعندما سئلت في أول يوم دراسي عن اسمها و قالته كما هو متفق عليه برقياً, ما كان من المدير الا أن هز رأسه مرتين علامة المعرفة مردداً:
(نور الشام .... نور الشام)

[حافظ حسين]

و من هنا و لاحقاً سوف أطلق عليها إسم نور الشام ( في حد بعرف أكتر من المدير)...و مسكينة هذه نور الشام فاذا نجت من الزواج المبكر و تدرجت أكثر في التعليم سوف يكون اسمها نور حاف دون شام او ضلام , لكن ما علينا, المهم أندثر اسمها الأول للأبد بمدلوله مع دفن جدتها, التي قاومت هذا الإسم الجديد النكرة و ربما اللعنة و الفأل السي و عندما هزمت هذه الجدة في تغيير الراهن دمدمت بصوت كسير:
(بنيتي لجيتك من جمالي
لكن منو بلجيك من سونقالي*)
تذكر الجميع موال الجدة عاليه حينما صارت نور الشام أو نور الضلام ارملة و ثكلي و اشياء أخري في يوم واحد, تذكر الكل هذا الموال و لعنوا مدير المدرسة سراً و طأطأوا رؤوسهم بعد فوات الآوان ....

* في الموال عاليه جمالي رمز لمصطاد الرقيق, لانهم كانوا يستخدمون الجمال في الصيد, أما سنقالي فحرفياً تعني القدر و عبثيته.... فعندما يموت الطفل يردد الكبار بحزن قائلين (النجي من جمالي .... كيف ينجي من سنقالي)

[حافظ حسين]

ذات يوم جمعت نور الشام صغارها الثلاثة موصية إياهم ب:
(مرفعين الوادي باكل من الصادي
و مرفعين البوادي بأكل الهنا و البغادي)
و قالت لهم لا تخرجوا.....
و بعربي فصيح أردفت:
(الذئاب دوماً تطرق الأبواب ليلاً و تحتال ببنوة العمومة و لكن لا تفتحوا لهم.... و إذا كان لابد من ذلك فقولوا للطارق مد يدك كي نراك فاذا كانت مثل أيدينا فتحنا لك.....)
و قالت لهم أيضاً لا تخرجوا....
وصايا نور الشام لصغارها لم تتعدي الكام الفائض عن صاحبه لان الذئب أتي ضحي بيمناه المصحف الكريم و يسراه كلاش لئيم.... كبر ثم قتل, قتل و صلي, صهل مع حصانه و حرق ....و منذ لحظتها صارت نور الشام ثكلي, أرملة و أشياء أخري منع من ظهورها الخلق السوداني القويم لكنها خرجت الآن مع اسهال مستديم و طفحت بثور جلدية..... فارحلي يا نور الشام أرحلي فقد أمتحنت كثيراً
أرحلي و قولي لله اسمي (نور الضلام) و تمي بقية الحكاية
و هل للحكاية بقية؟!!!

[محمد عبد الرحمن]

ما كان من المدير الا أن هز رأسه مرتين علامة المعرفة مردداً:
(نور الشام .... نور الشام)

يا صاحب حركة إنك تخيلي الواحد مشدوه وريالتو سايلة آي نعم جميلة لاكين ما طوالي كده ياخ

الشحتفة دي ما سمحة

التصوير اعلاه واقعي بي شكل غريب و بيكون رفع راسو لي فوق كدا و اخد صنة كأنما ينقط عليهو الإلهام.

بعدين التحنيك بالمنقا اول مرة أسمع بيهو يمكن ده تحنيك على حسب البيئة.
غايتو دي تصبيرة لحدي ما يجيك البنج ده

[حافظ حسين]

المشاركة الأصلية كتبت بواسطة محمد عبد الرحمن

يا صاحب حركة إنك تخيلي الواحد مشدوه وريالتو سايلة آي نعم جميلة لاكين ما طوالي كده ياخ

الشحتفة دي ما سمحة

التصوير اعلاه واقعي بي شكل غريب و بيكون رفع راسو لي فوق كدا و اخد صنة كأنما ينقط عليهو الإلهام.

بعدين التحنيك بالمنقا اول مرة أسمع بيهو يمكن ده تحنيك على حسب البيئة.
غايتو دي تصبيرة لحدي ما يجيك البنج ده

يا صاحب إن لله من هؤلاء المدراء يغيروا اسمائنا و أقدارنا
أنت عارف الحاجة دي كانت بتحصل في مدرستنا عادي جداً, و خاصة ان معظم الناس ما عندهم غير شهادة لا اله الا الله.... و اي إسم يكون حروفه ما موجودة في اللغة العربية حلال علي الأستاذ يغيره ليك, حروف زي (الجيم المخلوطة بشوية نون زي جمك) .... أظرف حاجة معانا في الفصل بت فلاتة اسمها حاجة أمينة .... طوالي الأستاذه غيرت ليها اسمها لأمينة من سكات بلا حاجة بلا بطيخ..., حكمة الله الاسم عربي للدين بس شكله في حلة ناس الاستاذة دي الا الزول يكبر و يحج عشان يلصقوا ليه حاج/ة ... المهم ما علينا .... أما قصة التحنيك بالمنقا دي غايتو العارفه في البلد أن الطفل بلجوها بحاجة حلوة, منقة, تمرة, سكر اي حاجة حلوة عشان حياته تحلي لقدام و تمشي معاه باسطة و الفعل دا مفروض تقوم بيه إمرأة محترمة .....

كسرة:
غايتو يا محمد أنا المرة اللجتني ما كانت محترمة عشان كدا شايف الحالة براك, و رغم ان أمي مصرة أن بت بلال لجتني بمنقا لكن شاكي المرة دي غشت بدل المنقة لجتني بحنظل أو ملح

[ناصر يوسف]

المشاركة الأصلية كتبت بواسطة حافظ حسين

فارحلي يا نور الشام أرحلي فقد أمتحنت كثيراً
أرحلي و قولي لله اسمي (نور الضلام) و تمي بقية الحكاية
و هل للحكاية بقية؟!!!

ياخي أقول ليك حاجه ؟؟ ،،،





وبس ،،،

[AMAL]

ياصديقي الذي تستهويه سيرة الضو
فيرحل مصوبا سهمه نحو النور
يصيب هذا السهم او يخيب
ويؤرقه الظلام فيتوهم الضؤ ويلوذ باي بصيص
مقدمة قد تكون غير لازمة
ولكن ماهي الصدفة التي جعلت النص محتشدا بمتضاداتي الظلام والنور

لعنة الاسم الذي قُدر له هزيمة الظلام...

و معه كان الظلام الدامس الذي يصعب علي الأصبع اختراقه..

بهذه العبثية خرج الي الظلام كائن جديد زائداً الأمة

سميت الطفلة نور الضلام

أرحلي و قولي لله اسمي (نور الضلام) و تمي بقية الحكاية

[حافظ حسين]

المشاركة الأصلية كتبت بواسطة ناصر يوسف

ياخي أقول ليك حاجه ؟؟ ،،،





وبس ،،،

قول الفي ضميرك خلي لي باقي الكلام
كيفك يا ناصر و شوق و كدا

[البديري]

اووو استاذ/ حافظ سلامات
عاش من شاف حروفك،يا البتنوم واللمبة مولعة

[حافظ حسين]

المشاركة الأصلية كتبت بواسطة AMAL

ياصديقي الذي تستهويه سيرة الضو
فيرحل مصوبا سهمه نحو النور
يصيب هذا السهم او يخيب
ويؤرقه الظلام فيتوهم الضؤ ويلوذ باي بصيص
مقدمة قد تكون غير لازمة
ولكن ماهي الصدفة التي جعلت النص محتشدا بمتضاداتي الظلام والنور

انها جدلية الخير و الظلم يا صديقة
جدلية الحروب التي يوقدها الاشرار
و يحرق لهيبها النساء و الأطفال
حروب العبث
حروبات اللاشئ
نور الضلام أو نور الشام كأنثي مستضعفة كانت أحد ضحاياها
ثكلي و أرملة في نفس اليوم
و قتيلة بالايدز بعد سنوات آخر
تصدقي ما بكتب فسحة
و لا بكتب عشان استعرض مهارات
بكتب الالام و أوجاع يومية
أوجاع اججت اوارها ثاقة الكراهية
بالجد داير اعيش كزول طبيعي بس للأسف الظرف غير طبيعي
داير أعيش و أكتب عن فوح القرنفل
الصبايا المتأبطات ازرع الأحبة
أكتب عن دور العجزة كمحصلة نهائية لقدر الانسان في هذه البسيطة
أعزي في جدة وصلت الثمانين من عمرها لا في شافعة ماتت بالولادة
أكتب عن الفلاح الذي قاوم رأس المال و إنتصر
لا أبكي و أكتب الفلاح الذي قتلته البلهارسيا
أعيش و أكتب عن الحدائق لا المحارق
و صدقيني ما أظن تعيش و نحضر مثل هكذا زمن
لكن العزاء انه سوف يأتي لأحفادنا

[محمد عبد الرحمن]

وصايا نور الشام لصغارها لم تتعدي الكام الفائض عن صاحبه لان الذئب أتي ضحي بيمناه المصحف الكريم و يسراه كلاش لئيم.... كبر ثم قتل, قتل و صلي, صهل مع حصانه و حرق ....و منذ لحظتها صارت نور الشام ثكلي, أرملة و أشياء أخري منع من ظهورها الخلق السوداني القويم لكنها خرجت الآن مع اسهال مستديم و طفحت بثور جلدية..... فارحلي يا نور الشام أرحلي فقد أمتحنت كثيراً
أرحلي و قولي لله اسمي (نور الضلام) و تمي بقية الحكاية
و هل للحكاية بقية؟!!!

الحكاية لم تبدأ بعد يا صاحب
الكل خاسر في هذه الحرب
لا منتصر ولا مهزوم من لم يمت لحظتها بالبارود ماتت إنسانيته و قُبرت مع والد، زوج، إبن، . . . . .
هون عليك يا صاحب إمشي في الأرض بتؤدة و لا تفتح عيون ضميرك على إتساعها، أترك بعض ماء بصيرتك لأيام شح قادمة.
ضغطة زناد تستغرق جزءُ ثانية لكن الرصاصة تجوب الأنحاء لدهور و دهور.


قد أعود . . .

[الفاتح]

مشاركة الأصلية كتبت بواسطة حافظ حسين انها جدلية الخير و الظلم يا صديقة
جدلية الحروب التي يوقدها الاشرار
و يحرق لهيبها النساء و الأطفال
حروب العبث
حروبات اللاشئ
نور الضلام أو نور الشام كأنثي مستضعفة كانت أحد ضحاياها
ثكلي و أرملة في نفس اليوم
و قتيلة بالايدز بعد سنوات آخر
تصدقي ما بكتب فسحة
و لا بكتب عشان استعرض مهارات
بكتب الالام و أوجاع يومية
أوجاع اججت اوارها ثاقة الكراهية
بالجد داير اعيش كزول طبيعي بس للأسف الظرف غير طبيعي
داير أعيش و أكتب عن فوح القرنفل
الصبايا المتأبطات ازرع الأحبة
أكتب عن دور العجزة كمحصلة نهائية لقدر الانسان في هذه البسيطة
أعزي في جدة وصلت الثمانين من عمرها لا في شافعة ماتت بالولادة
أكتب عن الفلاح الذي قاوم رأس المال و إنتصر
لا أبكي و أكتب الفلاح الذي قتلته البلهارسيا
أعيش و أكتب عن الحدائق لا المحارق
و صدقيني ما أظن تعيش و نحضر مثل هكذا زمن
لكن العزاء انه سوف يأتي لأحفادنا

عشان كده أنا بصنفك كاتبي الإسفيري المفضل بلا منازع
عارف ليه لأنك بتتتكلم على لسان الهامش.. تختار شخوصك البنقابلهم بشكل يوماتي وإللي رسم الظلم ظلالو على وشوشم ، لكن بيجالدو ذاتم ويقابلوك بوش مرح ، كإنو مافي حاجه حصلت..
وإنت بالمناسبة في كتابتك الفي البوست دي.. وضَحت لي إنك واحد من أبطال رواياتك..
كإنو مافي حاجه حصلت يا حافظ !
كضباً كاضب واللاي
Oh my gosh..

[الفاتح]

الزول البيحقن زول -رافع إيدينو ومسلًم نفسو -بحقنة ملوثة بأيدز ، بيتساوى عندي مع الزول البيغتصب زوله وينقل ليها فايروس الأيدز ، وبيتساوى عندي مع الزول البيقيف موقف المتفرج

[معتصم الطاهر]

أعجبني القص .. و القص ..

قصيت بوله و بلوع ..
أما قص مرحلة الزواج والابناء و اشتراكهم فى الحرب

روحتنا و وصلت للنهاية