اقتباس:
الليلة من الصباح أنا واقع اعتذارات، بس داير أقول كلام كنت موفرو لي مناسبة تانية، كلام عام يعني، و هو:
النقد، في المتخيّل العام، مفردة تحمل من الدلالات سالبها، مفردة تساوي إعلان حرب و نُذُر خصومة، و لا تستثني ما هو شخصي، و لا تعاف ما هو حاد
أن تمارس النقد - كما فهمتُه و عرفتُه و أؤيده- و شكرا لبعض الكتب، هو:
أن تجلب "ما وراء" الخطاب (يشمل ذلك ما وراء السكون لكونه خطابا) لتضعه أمامه.
و ليفعل النقد ما يشاء
-ما وراء دي، مثل الظباء، فيها إسقاط و ممارسات فظة و خيال يتفتّق-
نجي للمفصّل:
شكرا يا الوليد يوسف ياخ على النصرة، بعد روحي اتسلّت
و ربنا يديم المعروف
يعلم الله، كاتب ليك رد مسهب أهو دة حول موضوع الموظفين في المنظمات و فلول المعارضة و اللاجئين المدّعين، بس تعرف الموضوع دة حاصلة لي بسببه بعض المضاعفات –المحتملة- و ما محبذ الرد ضمن المناخ النفسي دة، خليني كل شوية أعدّل فيهو، بس فكرتو المركزية أقولا ليك باختصار:
لا أحد –يحترم نفسه- و يعتذر عن معرفته، مثلما اعتذر سيّد القمني عن كتبه، كان يجدر به أن ينفيها أو يخطّئها و لكن حب الناس مذاهب كما تعلم، و كذلك خوفهم و "موالاتهم".
عندما أعرف أن ما قلته خطأ، سأعتذر يا وليد اعتذارا كبيرا و ليس صغيرا أو متوسطا، و لكن دة لا يمنع بضع اعتذارات شوف لو بتأدي الغرض –لو ما مرض-:
الأول لي تماضر: تماضر أوضحت أنها ما قصدت الفكرة بهشاشتها تلك، فكرة أن كون الزول شغال ناشط حقوق إنسان معناها أنه مُعادل للكواسة و دليل عليها. كدة متفقين -و معاها موظفي الحزب الشيوعي يا حسن، هو إنت كدة أيدت فكرتي بتاعت عدم التسليم بالظاهر دي- و أنا هسة قبلان احتمال "قراءتي الخاطئة" لمكتوبها، بل، و اعتذر عن ما مسها من تسطيح.
التاني: دة و الله كراعي فوق رقبتي ساي، لكن فهمت أنو طلال عفيفي تأذّى من بعض القراءات التي اعتبرتني أعنيه هو. طيب أنا من الأول شرحت بالعربي دة ذاتو أنو أنا ما بعرفو لأحكم له أو ضده، و أنو أنا بتكلم عن الفكرة بتاعت تماضر كما فهمتها، هسة النقطتين ديل مش واضحات؟ في ناس لكلكوهن لامن جابن الكلب. الواحد تاني يكتب الكلام و يعتذر في حزّتو عن ما استقر في المُتخيَّل، لأن المتخيّل يعمل كمكوِّن تحتي و مفسِّر غصبا عن ماركس و الطبقات
التالت: لِمن فهم أنو موظفي حقوق الإنسان ناس كعبين، و بدون فرز –أبرز من فهم كذلك هو حسن موسى- مع إن منطلق كلامي هو أهمية الفرز بالحبة، و رغم أني اتكلمت في حدود معرفتي الشخصية، لكن بقرأ كلامي هناك و استغرب من نجاح نظرية موت المؤلِّف دي، بل و قتله عمدا للتلاعب بالنص، لا بأس، أها يا أخواننا أنا قلت إنو المعادلة: موظف حقوق إنسان/ معارض/ لاجئ سياسي = ذا سيم. هي معادلة خطأ. نقطة. فل-ستوب يعني.
شكرا يا مصطفى مدثر على التقريظ لا على الستالينية العارمة
و غايتو يا محمد الجزولي أنا ما كنت بحلم بي إجابة أحسن من حقتك دي، قصدي اجابتك أجمل حتى مما تمنيته، مبالغة، أنا مبسوط منك شديد و الله
نوراني الحسن: ذو الكفل؟ يا زول انت بتصطاد وين؟ كان دُرت رفيق قول عوك
عمنا د. حسن: و الله أنا ما تأذيت من كلامك بتاع الكفيل، قريتو مبتسم، شوف: أنا وكت مصر أكتب عن أحوال الموجودات، بكون فاهم أنو و للموجوداتِ ألسُن، و منتظر الصارينو لي كمان، شنو يعني؟ الموت؟ حق يا قولك
و الله كل مرة بنوي أقول أني فرحان بفرحتك بي دي، بس بأجل عشان بعض المتخيّل كمان بيفسر الحاجات غلط، و بقولوا الولد دة فصل و الولد انجذب، و أنا بكون قصدي شريف، لذلك خليها هسة
مرحبا بالدكتور صدقي كبلو، و الله كلامك دة كلو صاح، انت عارف، أنا لافح من كلام سليمان حامد في ندوة نيالا على موقف الماركسية و قضايا الثورة السودانية من الصراع العربي الاسرائيلي –لأنو أذكر برضو قالوا صراع طبقي- و جاء عليهم تشويش ناتج عن نسق الخطاب الشيوعي. الخلاصة: و الله أنا غلطان شديد في حق الأستاذ سليمان، و في حق ما يُعرف في اوساط الشيوعيين بـ "كتاب" سليمان حامد (هو ليه الزملاء بقولوا كدة؟ بيضة الديك قصدهم و لّا شنو؟)
غايتو –و عشان تصدق يالوليد يوسف مسألة الاعتذار- أنا معتذر شديييد للخبطة دي، و تاني بفتح المراجع قدامي و أكتب، مش كدة و بس، أنا أساسا قريت مقال واحد مما كتبه عبد الله في إجازة فاتت في السودان و بتعرف قراية الجريدة في الإجازة، و بالمرة كدة بعتذر لي أستاذ عبد الله علي ابراهيم عن المرّة الاتعبّرت بيهو فيها
أرجو يا دكتور أن يتسع وقتك لمداخلة حول موضوعة الطبقة بالذات لأنني فعلا أود سماع رأيك
أنا فتَرت و الله كما يفتر الحليب، و في ختام هذه المشاركة المليانة اعتذارات، داير أقول معقول في أكتر؟ أنا ما عندي أكتر أو كما قيل في أغنية عندي ثقة فيك، و دة شعار اليوم دة، بكرة أمرو براهو
|
ارى التركيز الان صار على قصة حقوق الانسان والعاملين عليها...
ومحاولة احراج حسبو بأنه اساء لطلال...ليضيع الموضوع الاصلي
وهو جماعة حقوق الانسان واللاجئين .
انا اعرف طلال عفيفي شخصيا ولا اخفي اني معجبة به كثيرا. لانه يؤمن بما يقوم به ومتجرد له تجردا كاملا
وهو شاب انساني ويتقبل الغير بروح جميلة. وطلال مختلف تماما من اناس يجوبون الاسافير ويدعون العمل في حقوق
الانسان وهم كذابون ملفقون...لا توجد انسانية في اي عظم من عظامهم
فحقوق الانسان الان في السودان صارت مثل محل عطور واتصالات
وقد قلت مرة لمولانا اسماعين
من تجربتي ان هناك من يخجل على انه عاطل
فيقول انه ناشط في حقوق الانسان.. تعريف هلامي لا يحتاج لرسالة لاثباته.....
واتمنى من الابن محمد حسبو ان يفهم التاكتك حق الصفائح وقنابل الدخان.
موضوع حقوق الانسان دا اهم كلام يحتاج حقا لتمحيص وتميز...
اقتباس:
|
يعلم الله، كاتب ليك رد مسهب أهو دة حول موضوع الموظفين في المنظمات و فلول المعارضة و اللاجئين المدّعين، بس تعرف الموضوع دة حاصلة لي بسببه بعض المضاعفات –المحتملة- و ما محبذ الرد ضمن المناخ النفسي دة، خليني كل شوية أعدّل فيهو، بس فكرتو المركزية أقولا ليك باختصار
|
امسك الدرب دا يا صاح.. وستجد ان حقوق الانسان دي هابشة من خازن جهنم لاصغر زول..
لأن كثير من فلول اليسار التى كانت تحارب فكرة حقوق الانسان في الستينات صارت ستها الان..
واعرف ان اول جمعية تكونت في حقوق الانسان في السودان لا يوجد بها يساري واحد
وقد قاموا بمحاربتها بكل الطرق لدرجة ان هناك اشاعة انهم اشتروا كتاب المؤتمر الاول المنشور
واختفي من السوق...ليومنا هذا....
وساقوم بعمل مقابلة مع اول مؤسس لجمعية حقوق الانسان في السودان بروفسور مدثر عبدالرحيم..
لأجلاء هذا الامر..
لذلك ركز يا قناص على هذا وسيظهر الانبياء الكذبة..وسينكرك اصحابك عند صياح الديكة.
ثلاث مرات...
وتسلم البطن الجابتك
