يا سلام يا ود جبارة ياخ

[البدري عبدالله]

السلام عليكم ورحمة الله

شايف المنبر بقى زي سوريا الشقيقة ضرب تقيل مرات بالاسلحة التقليدية ومرات بالاسلحة الكيمائية ..ثوار ..وتكفيريين ..وحزب الله ..وسلفيين ...الخ ، يقيني ان الخلاف الذي يعقبه نقاش هادي مؤسس على احترام وجهات النظر الاخرى ..وتقبل نتائجه ايا كانت بصدر رحب ..دوما تكون نتائجه ايجابية ...اما النقاش الذي يقوم من اجل فش الغبائن والانتصار للنفس فنتائجه دوما كارثية ..

نرجع لي موضوعنا الاساسي او كما قال الخبير عمر اومو ..
المبدع محمد جبارة معروف كفنان (طمبور) ولكن لديه جانب ابداعي آخر وهو امكانيته الغناء بمصاحبة الالات الموسيقية الحديثة ..والمثال على ذلك الاغنية التي كتب كلماتها وقام بتلحينها وادائها في رثاء الجميل الراحل مصطفى سيد احمد ..
الاغنية مهداة للجميع عسى ولعل تخفف من الاحتقان السائد في المنبر ..
[rams]http://www.sudanyat.org/vb/uploaded/2728_1369899207.mp3[/rams]

[مبر محمود]

سلام يا البدري، وهدية من إيدك مقبولة.
صوت ود جبارة جميل فعلاً، بس ياخوي، نفس الأداء دا لو كان بمصاحبة الطمبور كان ح يكون أجمل. هسّع إنتَ بالأغنية دي لفتّ نظري لي إنو نوع الموسيقى ربما يكون ليهو دور في تقييم الخامة الصوتية!

[طارق صديق كانديك]

شكراً ياالبدري على التقاط الفكرة العامة وعلى الهدية

تحياتي

[ماريل]

الاخ البدرى سلامات شكرا ياخ هدية قيمة جدا ..الاستاذ محمد جبارة يمتلك صوت حِنين وقدرة تطريب عالية واحساس بالغناء كل ذلك يجعل منه فنان متميز
انا من رأى الاخ مبر أرى ان خامة صوت الاستاذ ود جبارة تلائم الطمبور فالحنية التى تخرج من اوتار الطمبور تشبه ود جبارة جدا ...
عندما كان الاستاذ ود جبارة يعد لتجربته الاولى بالاوركسترا ناقشته كثيرا فى هذه الفكرة وطلبت منه التأنى حتى لا تخرج التجربة بتقييم يؤثر على تاريخه الفنى الجميل
طبعا هذه الاغنية لم تكن تجربته الاولى بمصاحبة اوركسترا واعتقد انه نجح الى حد كبير فى اخراج طاقات لم نكن نتوقعها وان كانت بداياته لم تفارق ايقاع الدليب
وهو كان يرى انها تجربة تسكن وجدانه لابد له ان يخرجها لكنه للحقيقة اجتهد فيها بشكل جعلها تخرج بشكل جميل وموفق لم اكن اتوقعه
التحية للاستاذ محمد جبارة الفنان الشامخ الخلوق المهذب البار باهله ووطنه هذا نجاح يستحق التصفيق...

[ماريل]

يا سلالالالالالالالالالام ياخ وتانى يا سلام ..شكرا شكرا شكرا ياخ سمعى للاغنية اختلف عن سمعى ليها للمرة الاولى واكيد حيختلف لو سمعتها مرة تالتة
عايزة اسمع وارجع لكن اداء ممتع والله ..كدى نرجع لكلمات الاغنية واجيك تانى..

[عادل عسوم]

السلام عليكم ورحمة الله

شايف المنبر بقى زي سوريا الشقيقة ضرب تقيل مرات بالاسلحة التقليدية ومرات بالاسلحة الكيمائية ..ثوار ..وتكفيريين ..وحزب الله ..وسلفيين ...الخ ، يقيني ان الخلاف الذي يعقبه نقاش هادي مؤسس على احترام وجهات النظر الاخرى ..وتقبل نتائجه ايا كانت بصدر رحب ..دوما تكون نتائجه ايجابية ...اما النقاش الذي يقوم من اجل فش الغبائن والانتصار للنفس فنتائجه دوما كارثية ..

نرجع لي موضوعنا الاساسي او كما قال الخبير عمر اومو ..
المبدع محمد جبارة معروف كفنان (طمبور) ولكن لديه جانب ابداعي آخر وهو امكانيته الغناء بمصاحبة الالات الموسيقية الحديثة ..والمثال على ذلك الاغنية التي كتب كلماتها وقام بتلحينها وادائها في رثاء الجميل الراحل مصطفى سيد احمد ..
الاغنية مهداة للجميع عسى ولعل تخفف من الاحتقان السائد في المنبر ..

وعليك السلام ورحمة الله ياأخ البدري
ابتدارك لخيطك بهذه المقدمة الثريّة لهو من الجمال بمكان...
ولتسمح لي بأن أخص منها هذه الجزئية الباذخة:

يقيني ان الخلاف الذي يعقبه نقاش هادي مؤسس على احترام وجهات النظر الاخرى ..وتقبل نتائجه ايا كانت بصدر رحب ..دوما تكون نتائجه ايجابية ...اما النقاش الذي يقوم من اجل فش الغبائن والانتصار للنفس فنتائجه دوما كارثية ..

ولعلي أهديها الى حبيبنا بكّة ...عساه يجد لها من يتخذها أو تتخذها توقيعا رمزيا لهl
لها
أما هديتك البديعة فهي حقا غاية في الامتاع ياالبدري...
محمد جبارة هذا صديق حميم لأخي الأكبر حاتم ولذلك فهو (زول بيت) كما يقول اهلنا...
والحق اقول بأني قد تلمست في الرجل الكثير المثير مما يجدر بي التطرق اليه بين يدي مفترعك الجميل هذا:
-الرجل يمتاز بخُلُقٍ كريم ورقة في الطبع يندر أن تجدها في غيره من المطربين!
وفوق ذاك فهو من الحياء بمكان للدرجة التي يكاد كل أهل المنطقة يعلمون عنه أنه لم ولا يفاصل ابدا في أجره عندما يرغب شخص في الاتيان به لاحياء ليلة من ليال الفرح...
-محمد جبارة يُعَدُّ من المجيدين للعزف على آلة الطمبور ...ان لم يكن له فوت على كل من يعزف هذه الآلة في يومنا هذا...
-ولنأت الى الحديث عن صوت هذا البلبل الغريد:
لعل التصنيف العلمي يضع صوت المبدع محمد جبارة في خانة ال(سوبرانو)...
والسوبرانو -كما هو معلوم-ينحصر أداء صاحبه/صاحبته عادة في مدرّج ال(دو) فقط...
لكني أجد أن مبدعنا هذا يستطيع (وبكل اريحية) أن يصل بصوته-حتى-الى (مي) التي لا يرتادها الاّ صاحب الصوت ال(باص)!!!
ولمن اراد أن يتبين ذلك قليستمع له وهو يؤدي أغنيته البديعة (تمري المانجض دفيقو)!...
لعلي أختم ياعزيزي البدري واقول:
هذا ال(محمد جبارة) قد ساهم في تشكيل وجدان أجيال...
مودتي ياحبيب

[سارة]

انا طبعا يطرشنى ويعمى جيرانى

التحية لسيد البوست والضيوف

[ماريل]

اختك طبعا لمان تكون معجبة بى حاجة بتغرق فيها..اها انا معجبة بالبوست ده موضوعو وتوقيتو وايووووو شئ يخصو
المهم ياخ وانا بسمع فى الاغنية واعيد السماع لقيت روحى بتحرك على ايقاع السيرة ورقصة (الشقلى) وهى رقصة نسائية تصاحب العرضة
اكتشفت انو محمد جبارة مكتف ومكتف جدا داخل بداياتو وانو تجربتو الجديدة لم تخرج ابدا من الايقاعات التى درج ان يؤديها(الدليب والعرضة او السيرة)
لكن برضو انا متكيفة منو ومن تجربتو الجديدة ..الله يرضى عليك حاول تباصر لينا تجاربو فى المديح عشان الراجل ده ذو تجربة تستحق التوثيق..
كما أشار الاخ عادل ان ود جبارة ساهم فى تشكيل وجدان جيل بحالو وقد صدق واغنية بحر المودة كانت من اجمل واشهر اغنياب السبعينات
يحكى لى والدى ان محمد جبارة كان (راجل وسيم وقيافة وغنااااااااااااااى لكن برضو فى ناس بتجى تتفرج على وسامتو وكان مشهور بانو خلوق ولا يعاقر الخمر)
شكلى كده ح استلم البوست ده ..سميها اعتداء غاشم او سميها مساعدة البعجبك ياخ المهم اختك ساكنة هنا ...

[عادل عسوم]

المشاركة الأصلية كتبت بواسطة ماريل

اختك طبعا لمان تكون معجبة بى حاجة بتغرق فيها..اها انا معجبة بالبوست ده موضوعو وتوقيتو وايووووو شئ يخصو
المهم ياخ وانا بسمع فى الاغنية واعيد السماع لقيت روحى بتحرك على ايقاع السيرة ورقصة (الشقلى) وهى رقصة نسائية تصاحب العرضة
اكتشفت انو محمد جبارة مكتف ومكتف جدا داخل بداياتو وانو تجربتو الجديدة لم تخرج ابدا من الايقاعات التى درج ان يؤديها(الدليب والعرضة او السيرة)
لكن برضو انا متكيفة منو ومن تجربتو الجديدة ..الله يرضى عليك حاول تباصر لينا تجاربو فى المديح عشان الراجل ده ذو تجربة تستحق التوثيق..
كما أشار الاخ عدل ان ود جبارة ساهم فى تشكيل وجدان جيل بحالو وقد صدق واغنية بحر المودة كانت من اجمل واشهر اغنياب السبعينات
يحكى لى والدى ان محمد جبارة كان (راجل وسيم وقيافة وغنااااااااااااااى لكن برضو فى ناس بتجى تتفرج على وسامتو وكان مشهور بانو خلوق ولا يعاقر الخمر)
شكلى كده ح استلم البوست ده ..سميها اعتداء غاشم او سميها مساعدة البعجبك ياخ المهم اختك ساكنة هنا ...

(عدل) ومواساة
تعرفي ياماريل لقد كتبت بوست كااامل عن محمد جبارة في احد المنتديات واحاول الآن أن أتذكرها لأبحث عنه وآتي به هنا (عشان نوع سارة دي تآآآمن زاتو)

تسلمي

[ماريل]

المشاركة الأصلية كتبت بواسطة عادل عسوم

(عدل) ومواساة
تعرفي ياماريل لقد كتبت بوست كااامل عن محمد جبارة في احد المنتديات واحاول الآن أن أتذكرها لأبحث عنه وآتي به هنا (عشان نوع سارة دي تآآآمن زاتو)

تسلمي

طيب كان قدرت جيب لينا(رحل تلوت الليل) خلى شعب سودانيات ده كلو يخر ويآمن
وشوف الحِنية البتدفق لمان ود جبارة يقول(وااااااااااامغستى رحل تلوت الليل)
صوت ود جبارة الغارق فى الحنية مع سلوك الطمبور ونشيج السر عثمان الطيب شكلو لوحة فنية يندر توفرها بالتناغم الموجود فى الاغنية
بعدين ركز معاى فى الحتة البقول فيها:-
بنات بلدى يا ناس بنات بلدى ى ى ى ى ى ى
ياخ قرب يبكى الراجل ده .الزول ده فنان بمعنى الكلمة الزول ده بحس بالكلمات عشان كده بتصلنا بصدق ما عادى...
عايزة اجى بى مزاااااج للاغنية دى يا ريت القى زول ينزلا لينا هنا..

[احمد سيداحمد]

المشاركة الأصلية كتبت بواسطة ماريل

طيب كان قدرت جيب لينا(رحل تلوت الليل) خلى شعب سودانيات ده كلو يخر ويآمن
وشوف الحِنية البتدفق لمان ود جبارة يقول(وااااااااااامغستى رحل تلوت الليل)
صوت ود جبارة الغارق فى الحنية مع سلوك الطمبور ونشيج السر عثمان الطيب شكلو لوحة فنية يندر توفرها بالتناغم الموجود فى الاغنية
بعدين ركز معاى فى الحتة البقول فيها:-
بنات بلدى يا ناس بنات بلدى ى ى ى ى ى ى
ياخ قرب يبكى الراجل ده .الزول ده فنان بمعنى الكلمة الزول ده بحس بالكلمات عشان كده بتصلنا بصدق ما عادى...
عايزة اجى بى مزاااااج للاغنية دى يا ريت القى زول ينزلا لينا هنا..

[rams]http://up.nilelove.org/uploads/1370185039.mp3[/rams]

[سارة]

غايتو سارة تطير عيشتها
يا عادل ياخ تلب لى من دفار حياتى

[ماريل]

المشاركة الأصلية كتبت بواسطة اسمر

[rams]http://up.nilelove.org/uploads/1370185039.mp3[/rams]

شكرا يا أسمر ياخ..انزل نص القصيدة عشان الناس تقدر تتابع كويس وبعدين يمكن اجى راجعة


النص:

وامغستي رحل تلوت الليل
واشقاوتي رحل تلوت الليل
واكتلتى رحل تلوت الليل
واعذابى رحل تلوت الليل مسالكي ضلمة مابتنشق
سكت روح نويرة الفرقة جوة الجوف تسوي البق
مشيت لا زاد اشيلو معاي ولا زولا مع اترفق
ولما بقيت مفارق نجيم الليل مشيا اتفرق
بكيت وبكيت طريف العين متمسح وبالدموع رقرق
اسوو الووب نحاس احزانى جوه قليبى ينقر دق
يلوعنى يوهدبنى واخاف من المصير واشفق
اوادع الناس افوت مجبور يجينى نغيم من الطمبور
واشوف لى جنى وقف صفق يطير لا فوق يطير يندق
واطير واندق

وادنقر فوق تراب اهلى اخم بى ايدى فى رحلى
وادنقر فوق تراب بلدي واخم بي ايدي في رحلي
اقول يا ليل وافارق الدار واجر فوق الوداع مسدار
انوني انوني شاق الواح محال ارتاح
ادخل ايدي في رحلي ترابا فيهو تسوي الكون
تراب بلدي
اشيل منو اشم وارتاح
اشم طيبة اهلي منو تفوح ترد الروح
عويناتن تلوح وتلوح
انين الساقي لما تنوح حسيس البربخ المفتوح
عراريقن طواقيهن طواريهم سواقيهم
اشيل من زادى واتكرف واشوف فيك يا تراب اهلى الحنين الما بتوصف
بشوف فيك صورة ما بتنشاف
واشم ريحة الكليت والشاف
بنات بلدى يا ناس بنات بلدى
بنات بلدي بنات بلدي
طريحاتن مناديلن رقيصاتن شبابيلن
حليلي حليلي يا حليلن
سماح ناسا حلات ناسا بلا السكر
طعم قراصة في قدحا من الدبكر
كواريك شفع المغرب يقلبوا في الجمر قنقر
ولاد بلدي
جبابيدن سنانيرن نقاقيرن طنابيرن
وافوت يا ناسي في دربي واقول يا اهلي وا غلبي
خلاص ريدكم ملك قلبي
منو الغيركم بشيل حبي
تراب بلدي يا ناس تراب بلدي

[زول الله]

المشاركة الأصلية كتبت بواسطة البدري عبدالله

الاغنية التي كتب كلماتها وقام بتلحينها وادائها في رثاء الجميل الراحل مصطفى سيد احمد ..

تحياتي البدري

لا اختلاف على ابداع وتميز محمد جبارة وصوته الطروب الدافيء
هذه الاغنية مختلفة
الكلمات جميلة جداً ومعبرة وواصلة الى اذن المستمع بشجنها
اعتقد ان محمد جبارة لم يوفق في هذا اللحن اطلاقاً
الايقاع (ريقي) سريع وراقص بصورة واضحة ولا يصلح لـ رثاء
يجعل المستمع يتمايل على وقعه -لكن ليس تمايل حزن

الاوركسترا لم تخصم من ودجبارة روعته بالطمبور






اقول قولي هذا واستغفر الله لي...................