كشف حال

[سارة]

الصبح بدرى وكالعادة جرى حصلت البص رقم سبعين بص الساعة سبعة

عشان نحصل الكلية اريتها القراية طايرة يعنى انا ضاربنى حجر دقش بالبلدى

وطبعا عيونى محمرات رغم دعكتهن بالصابون والليفة عشان يفتحوا لكن نقول شنو القسمة والنصيب

جلست فى مقعد جوار النافذة عشان بس اتفرج فى الماشى والجاى يمكن اصحصح ..برضو ما نفع

فى المحطة التانية جلست امامى شابة فى عمر الزهور عمر المنى يعنى قول تمنتاشر بالكتير ونص
شقراء والشعر يلهث خلفها كسنابل تركت بغير حصاد( الله يرحمك يا قبانى )

اول ما جلست هى اعتدلت انا فى جلستى لاعطيها مجال لتجلس طبعا المكان ضيق ولابد من التعاون

الكل عايز يوصل...

دقيقتين بس تقوم البنية شكيت عوجها لى الله تطلع من شنطتها ديك يا العلبة الما خمج وتبدأ فى الميك آب

اى وحات الرسول البنت دى يا الله هوى بجيك وبتسالنى يا الشقية دى شىء احمر وشيتن اخضر وشيتن

سئيلى المولى ما بعرف لونه وداك يا خطيط الحواجب الما خمج والساعة القبلت على الرموش وحات شيخ

البنية بقى طولهن نص مسايرى المسرحاهن ديل والشدوق ديل كان عصرتهن يدفقن لبن. ( نحمدهو على كل حال )

وانا يا ناس الله مقهية فى البنية والنوم طار من عينى ونسيت انه فى البلد دى مافى زول بيشتغل بى زول

لكن وحات الله انا اشتغلت بيها لمن محطتى فاتت وانا ما جايبة خبر وما تسالونى وصلت مدرستى كيف

الله قادر اتذكرت عندما كنت صبية كان همى كل همى واجباتى المدرسية وقمت يوم كدى قلت نمرق من هدومى

وقلت لامى عليك النبى محمد كان ما تخلينى اسوى كحل فى عينى طبعا انا خلصت كلامى من هنا وكانن عيونى

الاتنين مورمات يومين ما بقدر افتحن ( بطلوا الغتاتة وما تسالونى حصل لى شنو ) قالت لى امى لبس البنطلون

قطعتو فى مصارينى كمان دايرة تتكحلى الكحل اليقددن ليكى ..طبعا دا كان اول وآخر طلب

بس الليلة يا اخوانى شفت البنت دى ومسكتنى الغيرة وكمان زعلت لامن عيونى طششن وكت اتذكرت وضعى الحالى

آآآآآآآآآآخ يا امى تعالى شوفينى الليلة عندى كل الحرية وكمان عندى قريشاتى البشترى بيهن الكحل علا يا امى

المرواد بيدخلوهو وين بس قولى لى ؟؟؟؟؟ العيون الاتكرمشن ولا الجفون الاترخرخن؟؟؟؟؟؟؟؟؟؟


آه يا زمن فى داعى لكشف الحال دا ؟؟؟؟؟؟؟؟؟؟؟؟

( سرورة عندها حمى المتنبى )