كلام الكاتب الكويتي ده صح ولا فيهو استفزاز للسودانيين..منقول

[اشرف السر]

كلام الكاتب الكويتي جزء كبير منو صحيح

نحن فاكنها في روحنا...

احسن ناس
أكرم ناس
أشجع ناس
كلما أمينين..
------

للأسف نحن ما شعب... ما زلنا قبائل... ضمتها خرائط السياسة في دولة واحدة...

نعم فينا الكريم والشهم
وفينا الخؤون السارق الجبان
فينا الكريم وفينا البخيل...

زينا وزي بقية خلق الله....

بس عقدة الدونية تجاه العرب...
تجعلنا حساسين لأي نقد يوجه لنا فنقيم الدنيا ولا نقعدها لآي اسكتش في قناة يضحك من السوداني..
بينما نحن نجوز لأنفسنا الصحك من الكل........

[أسعد]

السيد ماهر
مع احترامي لجميع كلامك الوارد ادناه

المشاركة الأصلية كتبت بواسطة ماهر حسن محمد بيك

مع إحترامي لجميع إثنيات العالم
كيف يمكن تقديم الجعليين كعرب مع أن كلمة جعل باللغة العربية معناها الخنفساء السوداء !!!
من ناحية أخرى ورد في مذكرات هدى شعراوي النص الأتي ( أغلب الكتب التي أنقل عنها ضاعت حينما ضاعت مكتباتي المنزلية في القاهرة و الخرطوم و بيروت لأسباب مختلفة .... لذا لا استطيع كتابة النص كما هو أو كتابة معلومات مفصلة حول الكتب التي أستشهد بها) .... ورد في مذكرات هدى شعراوي رائدة تحرير المرأة المصرية كما يصفونها .... أنها ذهبت الى المندوب السامي البريطاني في القاهرة تطالب بالإفراج عن زوجها علي شعراوي ( و كان أكبر منها بما يزيد عن عشرين سنة) .... قال المندوب السامي .... ما ألذي تريدينه من هذا الرجل العجوز !!!؟ ... فردت عليه ... هو زوجي و أريده و لو كان عبدا جعليا.
و الشوايقة ايضا لا يمكن تقديمهم كعرب ... فالشلوخ عادة إفريقية .... لا اعتقد انها موجودة خارج إفريقيا
نظرة العرب الينا لا تهمني بالمرة ... و كذلك نظرة باقي الأعراق .... نحن نعرف انفسنا و نحن من يعطينا قدرنا

أولا المعنى بتاع جعل انت مشيت عزلت الشي البعجبك
مثلا عندك كلمة (خول) في اللغة العربية معناها الرجل الكريم، لكن لو غيرت في التشكيل بطلع ليك معنى تاني
ثانيا استشهادك بي كلام هدى الشعرواي ان شاء الله يكون ريحك في بطنك دي
بينما هو في الاصل كلام طلقيت سااااااي، زي مثلا لمن اتكلم عن الاعراب الموجودة حاليا في الجزيرة العربية واوصفها بان اصولها هندية وتركية ويهودية...
فيا اخوي بلا هدى الشعرواي بلا سلوى كشك.
ثالثا في كلامي أنه تم تصدير الجعليين والشوايقة كعرب للتقرب للهوية العربية، الكلام دا انا اطلقتو ساااااي زي كلام كلام هدى شعرواي العاجبك دا، وكان سألتني سؤال مباشر ح ارد ليك سؤلك بسؤال واشمعنى تم حصر الجنس النوبي على الحلفاويين والمحس والدناقلة؟!

[أبو أماني]

هناك عرب .. وأعراب .. وأعاربة .. ومستعربة الإجابة الصادقة الأمينة للسؤال: أين نحن من هؤلاء؟ فيها .. بيت القصيد ومربط الفرس .. هــذا ولن أزيد ..

[أسعد]

عمنا أبوأماني
كل سنة وأنت طيب
يا اخوي واحدة من ورطتنا المجكنا فيها دي هو البروف الاستشهدت بيهو دا والطيب صالح وبقية مثقفين ذلك الزمن الغابر، لا يمكننا باي حال نلومهم، لأن موجة حركة التاريخ كانت عاتية وشالتهم في دوامتها...
فدحين يا عمنا لو عاوز تستشهد بالبروف، استشهد بي كلامه على اساس انه كان الرهاب الدفقنا مويتنا عليهو.

[أسعد]

واحدة من أهم مغريات الهوية العربية هي اللغة العربية
ولأننا شعب ابو الكلام يحب الكلام ويعشق سماع الكلام ولا يحركه شيء الا الكلام
قمنا انجرينا نحو الهوية العربية وفيها كانت متوفرة كل وسائل الترفيه الكلامية من جناس وطباق وتشبيه والخ الخ الخ من نوع الحركات التي تعطي للكلام رونقا

لو بصح دايرين تتخلصوا من ورطة الهوية العربية، كدي أول حاجة اتخلصوا من جنون وله اللغة العربية المتورطين فيهو دا.

[أسعد]

بلد منذ تاريخ استقلالها ولحدي تاريخ اليوم
انجازتها تدور فقط في علوم الكلام (بحوثات في التاريخ العربي، روايات، أشعار والخ الخ الخ).
ونحن شعب الكلام والهوية العربية أم الكلام
وعليه نكون مداح لاقى دراويش
وطبلنا يدق ويدق ويدق

[أبو أماني]

المشاركة الأصلية كتبت بواسطة أسعد

عمنا أبوأماني

المشاركة الأصلية كتبت بواسطة أسعد

كل سنة وأنت طيب
يا اخوي واحدة من ورطتنا المجكنا فيها دي هو البروف الاستشهدت بيهو دا والطيب صالح وبقية مثقفين ذلك الزمن الغابر، لا يمكننا باي حال نلومهم، لأن موجة حركة التاريخ كانت عاتية وشالتهم في دوامتها...
فدحين يا عمنا لو عاوز تستشهد بالبروف، استشهد بي كلامه على اساس انه كان الرهاب الدفقنا مويتنا عليهو.

الحبيب أسعد..أسعد الله أوقاتك بكل خير وكل عام وأنت رافلا في خيره وأنعامه عليك أنا لن ولم أكن متفقا مع دعاة العروبة ووحدة وادي النيل التي لها مبشرين كثر .. أنا ممن يعتزون بالمنبت والأصل الإفريقي..ولا أحب الإنتساب لهؤلاء العرب الذين قال عنهم حقائقا لا تخطيئها عين كلا من مظفر النواب ونزار قباني وغيرهما بل قال عنهم باريهم إن الأعراب لأشد كفرا ونفاقا.. أستشهدت بكلام منطقي للبروف وهو تحديد من يدعون العروبة أو من ينتسبون إليها أو من كانوا عربا حقيقيون أنا أردت أن يركز القارئ لكلامي على حقيقة إننا مستعربين .. حيث العروبة قد غزت دارنا بفتوحات إسلامية .. ولنبدأ من هنا .. فنحن لسنا عربا أصليون بل مستعربة ولنتعامل من هذا المنطلق .. ورحم الله إمرئ عرف قدر نفسه .. قال عرب قال!!! أي عرب تعني .. من عذبوا أشرف خلق الله وذاق على أيديهم الذل والهوان؟ أم من باعوا لليهود فلسطين ببضع دنانير وبضع أفخاذ يهودية عارية؟ أم من رهنوا خيرات الأمة الإسلامية لأمريكا وربيبتها إسرائيل؟ نحن أحفاد بعانخي .. وترهاقا .. وتهراقا .. هل بين هذه الأسماء أسما واحدا عربيا؟ .. قالها المرحوم خالد الذكر إسماعيل حسن واضحة كالشمس .. عرب ممزوجة بدم الزنوج الحارة ديل أهلي لكنكم لم تستوعبوها!! أو ربما طنشتموها .. بدأها بكلمة عرب إي إنهم من جاءو ليمتزجوا بدم الزنوج الحارة ..التي هي الوعاء المستوعب للدماء العربية الوافدة إليه!! .. وسلاما على سيدنا العباس المفترى عليه .. وسلاما عليكم.

[ماهر حسن محمد بيك]

المشاركة الأصلية كتبت بواسطة أسعد

السيد ماهر
مع احترامي لجميع كلامك الوارد ادناه

أولا المعنى بتاع جعل انت مشيت عزلت الشي البعجبك
مثلا عندك كلمة (خول) في اللغة العربية معناها الرجل الكريم، لكن لو غيرت في التشكيل بطلع ليك معنى تاني
ثانيا استشهادك بي كلام هدى الشعرواي ان شاء الله يكون ريحك في بطنك دي
بينما هو في الاصل كلام طلقيت سااااااي، زي مثلا لمن اتكلم عن الاعراب الموجودة حاليا في الجزيرة العربية واوصفها بان اصولها هندية وتركية ويهودية...
فيا اخوي بلا هدى الشعرواي بلا سلوى كشك.
ثالثا في كلامي أنه تم تصدير الجعليين والشوايقة كعرب للتقرب للهوية العربية، الكلام دا انا اطلقتو ساااااي زي كلام كلام هدى شعرواي العاجبك دا، وكان سألتني سؤال مباشر ح ارد ليك سؤلك بسؤال واشمعنى تم حصر الجنس النوبي على الحلفاويين والمحس والدناقلة؟!

من الذي قال أن كلام هدى شعراوي أعجبني !!! أو بتعبيرك ريحني في بطني دي!!!؟
من حصر النوبيين في النوبة النيلية ( و هي ستة فروع و ليس ثلاثة كما أوردت) ؟
النوبيون ممتدون حتى مالي ... و اللغة السواحيلية حسب ما مر علي حتى الأن بها كلمتان نوبيتان ... ربما لو عشت بين المتحدثين بها ( السواحيلية اللغة الرسمية في أوغندا و كينيا و تنزانيا) لوجدت كلمات أخرى ... و اللغة السواحيلية خليط من عدة لغات و وجود كلمات نوبية فيها يدل على تواجد نوبي في تلك المنطقة
أصول القبائل الموجودة في الجزيرة العربية لا تهمني كسوداني .... ليكونوا من يكونوا ..... فهذا لن يزيدني أو يزيدهم شيئا
كلمة جعل لها معاني أخرى ... هل لك أن تضع أي من المعاني الأخرى كإسم علم ؟
كلمة جأل بلغة الدينكا ( كما قال أحد الأصدقاء ) معناها رجل .... و أغلب الناس يعلمون العلاقة بين الدينكا و الجعليين ........ الجعليين ينادون الدينكا بالخؤولة

[azzam_farah]

أسعد.. كيف حالك؟ علك طَيِب
تعود الأيام والقابلا على أُمْنياتك إن شاءالله

تقول:

(...) واشمعنى تم حصر الجنس النوبي على الحلفاويين والمحس والدناقلة؟!

ده علشان عرب الشِمال النيلي (رباطاب/شوايقة/جعليين) + شكرية وبطاحين وكواهلة... إلخ، نكرو أصلهم النوبي، ونكرانُمْ ده هو المخليهُم لغاية يوم الليلة ولا باكِر يِلِفو في معضلة الهوية صينِية.. وطبعًا مُسْتعرِبي السود(ان) بتصدِمو ايما صدمة لامِن يِرِكو في دار العرب (الجزيرة العربية) وسِيمَاهُمْ فِي وُجُوهِهِم مِّنْ أَثَرِ الزنوجه ذَلِكَ مَثَلُهُمْ فِي السودان وَمَثَلُهُمْ فِي إفْريقيا..

قبل خمسة آلاف عام مِن ميلاد السَيِد المسيح كان النوبِيون في البِقعة الجُغرافِية المُمتدة شِمالاً مِن أسوان إلى سوبا جنوبًا، هذا ما تُفيد بِهِ مراجِع التاريخ التي أغفلتها عمدًا كُتب التعليم الحكومِية -كان حتى عام 1994م يبدأ مُقرر مادة التاريخ لِلصف الثالِث الثانوي العام مِن الباب الثاني وهو بِعِنوان " دخول العرب السودان " والباب الأول يتحدث عن الحضارة النوبِية، لم يكُن مِن ضمن المُقرر- هذا الإغفال هو ما تسبب في أن إنسان السودان غَير مُتصالِح مع نفسِهِ البتة.

التاريخ الذي يرضَعهُ النوبي.. بسيط جِدًا.. فحواهُ.. كان النوبِيين بَين النيل والصحراء .. فجاء العرب لغزو بِلاد النوبِيين بعد أن سقطت بِأيدَيهُم مِصر، لم يفلحوا في ذلِك، طُوال عهد الخليفة الراشِد عُمر بِن الخطاب، ثُم إستمرت المُحاولة في عهد الخليفة الراشِد عُثمان بِن عفان، فلم تُفلِح مُحاولاتِهِم أيضًا، فكانت إتفاقِية البقط عام (652م) عم السلام، فدخل العرب بِلاد النوبِيين بِموجِب هذِهِ الإتِفاقِية، وظل النوبِيون على الدين المسيحي (600) عام بعد إتفاقِية البقط، ثُم دخل النوبِيون في الدين الإسلامي عام (1252م) فتصاهروا، فأنتج التصاهُر النوبي/العربي عن هجين اليَوم الذي هو كُل السودان الشِمالي.

أي جُزئِية في هذِهِ الفقرة غَير مفهومة لِشعب السود(ان) الشِمالي الذي يدعي صفاء عِرقِه العربي.. هذِهِ الفِقرة أكدها عُلماء فطاحِلة وأساتِذة كِبار:-
- أكدها أُستاذ مادة التاريخ في جامِعة الخُرطوم الدكتور/ يوسُف فضل (الجعلي المُشلخ H) في كِتابِهِ [تاريخ السودان القديم].

- وقال مِثل هذا القَول نعوم شُقير في كِتابِهِ [تاريخ السودان] الذي حققهُ الدِكتور/ مُحمد إبراهيم أبوسليم.

- وقال بِذلِك أستاذ مادة التاريخ بِجامعة الخُرطوم الدكتور مكي شِبيكة في كِتابِهِ [ السودان عبر القُرون] (الرباطابي/الجعلي-مشلخ سُلُمْ).

- وقال بِذلِك الأب الإيطالي الدِكتور فانتيني في كِتابِهِ [تاريخ المسيحِية في الممالك النوبِية القديمة...].

- وقال بِذلِك العلامة البروفسور/ ويليام آدامز صاحِب الكِتاب الوثيقة [النوبة رُواق إفريقيا].

- وقال بِذلِك الدِكتور/ مُحمد إبراهيم بكر في كِتابِهِ [تاريخ السودان القديم].

ثُم تحالُف الفونج مع العبدلاب وخربوا آخِر معاقِل مملكة النوبِيين وأقاموا أول مملكة إسلامِية الشكل في السودان.. مملكة سِنار..

إن تشبُثِ سود(انِيين) الشِمال في عِقال العرب لأمرٌ يدعو لِلعجب.. فكما قال دكتور منصور خالِد فيما ما معناه في كِتابهِ [السودان أهوال الحرب ... قِصة بلدَين].. فتجِد السوداني أسَود مِن حبة البركة ويُصِر على عُروبِيتِهِ.

أنظُر إلى المسيرِية.. هُناك مِسيرِية يُعرفوا بِالمِسيرِية الحُمر مُقابِل مِسيرِية يُعرفوا بِالمِسيرِية الزُرُق لن تجِد أي فرق بَينهُما البتة.. الفرق الوحيد هو إنكار الأول لأصلِهِ الإفريقي الفاضِح.

سادتي.. يؤسِفُني أن أقول: إنكُم تكْذِبون عِندما تتحدثون عن العِرق.. نعم تكْذِبون

وتجِدُنا قد تآمرنا بِلَيّل على اللَون "الأسَود" وإذا إضطررنا إلى وصف أسَوَدٍ مِنا، نعتناهُ بِالـ"الأخدر" وإن لم تُسْعِفنا هذِهِ "الخُدْره" في تحديد "زولنا" لقمناهُ بِالـ"الأخدر بِالحيل" وإذا بان كذِبُنا وبعض النِفاق إسْتدركنا الأمر "ياخ الزول الأخدر شديييييد داك".. أها عاد بنمشي وين مِن " الأسَود " وبِتين بنصل "لين" ذلِك اللَون.. الشئ تقول عمى ألوان.. كبندول الساعة.. نتأرجح.. نتأرجح لِشطٍ لن نبلغه أبدا.. التناقُض الذي نعيشهُ فاضِح.. واضِح.. ناضِح.. نعيش الخيال واقِع.

أريد أن أتراجع عن وصفي: [إنكُم تكْذِبون عِندما تتحدثون عن العِرق] واسْتبدلهُ: إنكُم في شأن نجر الأصل مُبْدِعون! لأن الكذِب يُمارس في أمورٍ تغيب علَيك لِحين حقائِقُها.. فإذا جاء وقتٌ إنكشف لك الأمر وعلِمت إن الكذِب قد مورِس.. أما ما يحدُث في بِلادِنا شئٌ آخر.. شئ غَير الكذِب.. فأنت ترى رجُل أسود فاحِم.. يا زول كُحْلي عديل وبرغم ذلِك يظل مُصنف "عربي حُررر بس أخدر بِالحيل" هذا إبداع سَيِدي ولَيس كذِب!

ــــــــــــــــــــــــــــ
مرقنْبو قربنو
(1) بَيت الإمام مُحمد أحمد المهدي :
أ . تزَوج الإمام المهدي مِن مقبولة بنت البآسي نورين مُحمد بِن الفضل -سُلطان الفور فرع الكنجارا– بِن عبدالرحمن بِن أحمد بِن بكر بِن موسى بِن سُلَيمان سولونج أول سلاطين الكيرا ومؤسِس سلطنة الفور. أنجبت لهُ عبدالرحمن المهدي الذي أنجب / الصِديق الذي أنجب الصادِق المهدي (رئيس حِزب الأمة وأمام الأنصار). مقبولة بِنت مُحمد بِن الفضل إبنة عم السلطان على دينار ود البآسي زكريا.

ب . تزَوج الإمام المهدي عائِشة بِنت إدريس الفلاتِية وأنجبت لهُ زهراء وقمر التي أنجبت سارة الفاضِل محمود عبدالكريم زَوجة الصادِق المهدي (رئيس حِزب الأمة وأمام الأنصار).
ومِن حفيدات عائِشة بِنت إدريس الفلاتِية :
- آمنة، زَوجة بابو نِمر علي الجُلة ناظِر عموم المِسيرِية.
- هُدى، أم رشيدة وزيرة دَولة بِوِزارة التربِية والتعليم بعد إنتِفاضة إبريل 1958م.
- زهراء الفاضِل محمود عبدالكريم، زَوجة سِرالختِم الخليفة، رئيس الحكومة الإنتِقالِية عام 1964م.
- مرضِية، زَوجة حماد بقادي ، ناظِر عموم الحوازمة.
وتزَوج الشيخ إدريس الفلاتي مِن زينب بِنت الإمام المهدي ولم تنجِب مِنهُ وخلفهُ علَيها بعد وفاتِهِ الخليفة شريف حامِد مُحمد إبن عم الإمام المهدي وأنجب مِنها.

ـــــــــــ
المراجع:
- الإعلام بِالأعلام–البروفسير (شيخ العُلماء)/ عبدالله عبدالماجِد إبراهيم.
- طبقات ود ضيف الله.
- مَوسوعة القبائِل والأنساب في السودان–دكتور/ عَون الشريف قاسِم.
- صُور مِن حياة السَيِد عبدالرحمن المهدي–جراهام وإزماي توماس.



يتبع أكان لقيت فرقه

[أبو أماني]

ما أروع ما جمعت من حقائق ومراجع وأنت تعري لنا الزيف والخداع الذي نمارسه مع أنفسنا مع سبق الإصرار والترصد .. أفبعد كل ما قلت أجد من يتطاول منافحا بكيان عربي.. نعم جاءنا الإسلام وبالطبع العرب معه فأعتنقنا الإسلام وأدمّنا اللغة العربية حتى بتنا (حوارا تغلب على شيخه)!! ولكن وبعلم الجميع ذاك لا يعطينا أي حق في التمسح بالعرب!! .. والتنكر لآصولنا الإفريقية! .. الأ هل بلغت؟ اللهم فأشهد!

[أسعد]

حبيبنا عزام
كل سنة وانت طيب ياخ

أول حاجة يا حبيب خلينا نتفق علي حاجة، أنو أي حدث تعدى 300 سنة لا يمكن نعتمد فيه على اقوال مؤرخين أو باحثين مهما كانت نتائج اقوالهم عن تلك الاحداث. بمعنى انو ناس نعوم شقير ويوسف فضل وغيرهم يمكننا الاستناد على اقوالهم بس تقريبا لحدي ما قبل الحكم التركي في السودان، أما ما قبل ذلك من احداث تم افتراضها من قبل هؤلاء النفر فهو يعتبر ضرب من ضروب (ضنب الككو)، لذلك ارجو منك رجاء مشفوعا لو كان لي عندك خاطر انك ما تمسكني ضنب الككو دا.

تاني حاجة يا حبيب انت عارف وانا عارف وربك عارف انو التاريخ دا عندو شعفوفة لمن تقوم بتخلي العالي واطي وتخلي الشمال يمين، وكدليل على ذلك بلاد العم سام والتي عندما اكتشفها كولومبوس وتأمل سكانها الاصليين اعتقد انه وصل بلاد الهند، الليلة كان لقيت ليك اثر ريشة هندي احمر في امريكا تعال كحلني بيها بالشطة. بمعنى أن حركة التاريخ مسحت وجود السكان الاصليين وباتت امريكا كأنها بلاد أوربية منذ بدء الخليقة. القصد من كلامي دا انه حركة التاريخ اب شعفوفة قام بطمس العرق النوبي ومسح وجوده من حضارته واستبدله باعراق لا تمت بصلة للعرق النوبي، بمعنى أنه لا الجعليين ولا الشوايقة ولا الدناقلة ولا المحس ولا حتى نوبة مصر لهم علاقة بالعرق النوبي، وإن كانت لهم علاقة بالعرق النوبي فربما تكون بمقدار علاقة الجعليين والشوايقة بالعرب
عليه يا عزيزي خلل الهوية السودانية لا يكمن في ادعاء الجعليين والشوايقة العروبة فقط، بل يكمن ايضا في ادعاء الدناقلة والمحس والحلفاويين انهم نوبة، وادعاء الغرابة ان اصولهم سودانيين، وادعاء البجة انهم سودانيين، بينما اسياد الحق وأهل البلد الجد جد والنوبة الاصليين في نفس الوقت يعتصمون بجبل يأويهم من الورطة الجابناها ليهم دي.
دا من ناحية
من ناحية تانية
مسألة عقدة اللون دي ياخ كونك تخصص بيها المستعربين فقط دون المستنوبيين ياخ حركة ما حلوة منك، اسي عليك الله موش ياهو اللون الخلا ديل نوبة شمال وديل نوبة جبال؟!
يا اخوي مسألة عقدة اللون دي ورطة انسانية اكتر من انها سودانية، وبالتالي ورطة بتدور لها مناضمة براها

[أسعد]

السيد ماهر عشان نكون محددين نقطتنا خلافنا
انت استنكرت قصة تصدير الجعليين والشوايقة للهوية العربية، وبالمقابل انا استنكرت ليك حصر العرق النوبي (في السودان) على الدناقلة والمحس والحلفاويين.
أها انت كدي اثبت لي ليه تم حصر العرق النوبي على الثلاثة ديل، بعدها أنا بجاوب ليك ليييه تم تصدير الجعليين والشوايقة للهوية العربية.

[azzam_farah]

أسعد

أول حاجة يا حبيب خلينا نتفق علي حاجة، أنو أي حدث تعدى 300 سنة لا يمكن نعتمد فيه على اقوال مؤرخين أو باحثين مهما كانت نتائج اقوالهم عن تلك الاحداث. بمعنى انو ناس نعوم شقير ويوسف فضل وغيرهم يمكننا الاستناد على اقوالهم بس تقريبا لحدي ما قبل الحكم التركي في السودان، أما ما قبل ذلك من احداث تم افتراضها من قبل هؤلاء النفر فهو يعتبر ضرب من ضروب (ضنب الككو)،

وإشْمعنا 300 سنة؟
ليه مثلاً ما 287 سنة!
أو 341 سنة!

إنت يا أسعد حقو تقول: أنا أسعد ما بعتمِد قَول أي مؤرِخ بتكلم عن تاريخ عمرو أكتر مِن 300 سنة.. وبِكِده تكون مسحت علم كاااااامِل بِالصلاة على النبي.. تكون مسحت بِقولا، كل التاريخ الإنْساني المعروف والحيتعرِف وآثارو.. الغريبة -وده بِثبِت عشوائِية قَوْلِك- إنك قُلت:

وكدليل على ذلك بلاد العم سام والتي عندما اكتشفها كولومبوس وتأمل سكانها الاصليين اعتقد انه وصل بلاد الهند

والمعروف إنو كولومبوس إكْتشف أمريكا الشِمالِية في 1498م، يعني قبل 516 سنة، وإنت حددت ليك سنة لإعْتِماد أي تاريخ، حددت 300 سنة لِورا، وغير كِده مِسيك ضنب كَكو ساي!

ــــــــــــــــــــــــــــــــــــــــــــــــــ ــــــــــــــ

تاني حاجة يا حبيب انت عارف وانا عارف وربك عارف انو التاريخ دا عندو شعفوفة لمن تقوم بتخلي العالي واطي وتخلي الشمال يمين، وكدليل على ذلك بلاد العم سام والتي عندما اكتشفها كولومبوس وتأمل سكانها الاصليين اعتقد انه وصل بلاد الهند، الليلة كان لقيت ليك اثر ريشة هندي احمر في امريكا تعال كحلني بيها بالشطة. بمعنى أن حركة التاريخ مسحت وجود السكان الاصليين وباتت امريكا كأنها بلاد أوربية منذ بدء الخليقة. القصد من كلامي دا انه حركة التاريخ اب شعفوفة قام بطمس العرق النوبي ومسح وجوده من حضارته واستبدله باعراق لا تمت بصلة للعرق النوبي، بمعنى أنه لا الجعليين ولا الشوايقة ولا الدناقلة ولا المحس ولا حتى نوبة مصر لهم علاقة بالعرق النوبي، وإن كانت لهم علاقة بالعرق النوبي فربما تكون بمقدار علاقة الجعليين والشوايقة بالعرب

ده كلام ما صحيح ولا عِلْمي أبدًا.. وتصاهُر الفُرس مع العرب لم يُماهي العرقين، وتصاهُر النوبيين مع عرب البقط لم يُلغي عرق أحدهما.. الفحص النووي أثبت ذلِك (راجِع الرابِط أدناه-الهامِش).

وإذا كان الحلفاويين والمحس والدناقلة مُش نوبيين، اللغُة البناضمو بيها دي شنو، واللغُة مُحَدِد واضِح لِلعرق، والذي خلق اللُغات/اللهجات عدَها مِن آياتِهِ جل وعلا، قال الله تعالى: <وَمِنْ آيَاتِهِ خَلْقُ السَّمَاوَاتِ وَالأَرْضِ وَاخْتِلافُ أَلْسِنَتِكُمْ وَأَلْوَانِكُمْ إِنَّ فِي ذَلِكَ لآَيَاتٍ لِّلْعَالِمِينَ> الروم 22

بِعكس المصريين -مثلاً- البدعو إنهُم أحفاد لِلفراعنة، ولأنو الفراعنة مُش أجدادُم ما تتداول بينهُم الهيروغليفية!

ــــــــــــــــــــــــــــــــــــــــــــــــــ ــــــــــــــ

مسألة عقدة اللون دي ياخ كونك تخصص بيها المستعربين فقط دون المستنوبيين ياخ حركة ما حلوة منك، اسي عليك الله موش ياهو اللون الخلا ديل نوبة شمال وديل نوبة جبال؟!
يا اخوي مسألة عقدة اللون دي ورطة انسانية اكتر من انها سودانية، وبالتالي ورطة بتدور لها مناضمة براها

النوبيين ومن تنَوَب فيهم السواد ولا يدعون العروبة، أما المُسْتعرِبين فيهم السواد ويدعون العروبة!

والخلا نوبة الشِمال براهُم ونوبة الجِبال براهُم، الفحص النووي + الشكل الخارِجي.. وفي علاقات لغَوِية قوية بين الشِمال والجِبال

ــــــــــــــــــــــــــــــــــــــــــــ
مشروع السودان للفحص الجيني وجدل الهوية السودانية
http://www.sudaneseonline.com/board/...399571904.html

[أسعد]

أنا لمن حددت 300 سنة، حددتها لأني شايف كدة وبالتالي لا اؤمن بالتاريخ الانساني دا، وعدم الايمان هذا لا يمنع اني أعزل البعجبني وأخلي الما بعجبني، واذا كنت بتشوف العزل دا نوع من التناقض، أنت ذاتك يا اخوي قاعد تعزل البعجبك وتخلي الما بعجبك، على سبيل المثال لو مسكنا في كتابات عون الشريف وعبدالله الطيب ح نلقى بعض الكتابات بتدعم قصة العروبة في السودان.

بعدين نجي لي كلامك دا :

ده كلام ما صحيح ولا عِلْمي أبدًا.. وتصاهُر الفُرس مع العرب لم يُماهي العرقين، وتصاهُر النوبيين مع عرب البقط لم يُلغي عرق أحدهما.. الفحص النووي أثبت ذلِك (راجِع الرابِط أدناه-الهامِش).

أنت موش استنكرت فعل الانتماء للعرب، مع انو العرب مختلطين بالنوبة، طيب ليه مستنكر علي استنكاري في فعل الانتماء للنوبة؟!
بمعنى انه طالما انك شايف القبائل النيلية هي (هاف كاست)، طيب اشمعنى متمسك في طرف ورافض الطرف التاني؟!

النوبيين ومن تنَوَب فيهم السواد ولا يدعون العروبة، أما المُسْتعرِبين فيهم السواد ويدعون العروبة!

كلامك دا اداني احساس كانه عقدة اللون محصورة في إدعاء العروبة!!
ياخ عقدة اللون محصورة بس في ابيض واسود، فما تعمل العروبة دي شماعة عشان تضاري بيها عقدتنا من اللون الاسود دا.

والخلا نوبة الشِمال براهُم ونوبة الجِبال براهُم، الفحص النووي + الشكل الخارِجي.. وفي علاقات لغَوِية قوية بين الشِمال والجِبال

كككككككك هاك (الفحص النووي + الشكل الخارجي) دا!
يا عزيزي نوبة الشمال السواد الاعظم منهم خليط من عرب وحلب وترك وأرناؤوط، أتو الى البلاد واستوطنوا فيها وتداخلوا مع الاجناس التي كانت تقيم فيها ونتيجة لهذا التمازج نتجت اللغات المتداولة حاليا...
عشان كدة ما تعول على حنك اللغة دا كتير، أولادك الان يجيدون اللغة الخليجية أكثر من اجادتهم للغتهم الاصلية...

[أسعد]

القصد يا سيد عزام
أنا لمن شككت في نوبيتكم، شككت فيها لاني عاوز اثبت لكم ان اشكالية الهوية السودانية عمرها ما كانت في ادعاء العروبة كما تعتقدون ...
اشكالية الهوية السودانية تكمن في اننا كلنا مدعيين، انتو بتدعوا انكم من نسل نوبي، شوف جنس الافتراء والادعاء دا، واكاد اجزم انكم ما بتعترفوا بالانتماء للجنس الافريقي، يعني شايفين نفسكم فوووق ثم بعدين يجي الجنس الافريقي ثم المستعربين.
كمان نجي نمسك المستعربين أهلي، شايفين نفسهم أحفاد العباس وانهم أسياد البلاد مع انه عودهم في العروبة لا اقول عود مرأة ولكن ممكن اقول عود القذافي.
نجي نمسك الغرابة، ناس جابهم الدرب للحج وقعدوا في مراعي غرب السودان، والان عاملين فيها اسياد البلد دي، وانه يجب تطهير السودان من الجنس العربي!!
وكذلك بالنسبة للبجة.

فيا عزيزي مكمن خلل الهوية السودانية أننا بدل ما نقعد ننتقد في الآخر، أي زول يقعد ينتقد في نفسو، لانو الشخصية السودانية عبارة عن (عورة) بدون لباس والجمل ما بشوف عوجة رقبتو.