التقومك من أهلك مريوق تغشيك أم شانق

[أبوبكر عباس]

المشاركة الأصلية كتبت بواسطة شبارقة

مرحبا ً بالأستاذة وهاد

فكـّة الريق (معروفة) وجات منها مريوق (صفة) .. وهي بالمناسبة لا تصل لحد الشبع ولكنها قد تكون من مواد تحسسك بالشبع لمدة طويلة (الدخن مثالا ً)

الحكي بالدارجي لا يخلو من متعة ..وبالتأكيد أخونا بابكر قادر على ذلك .. بس عليه أن يوسع صدرو شوية (ولا حاجة للتبرير) فقليل من النقد لا يضر

هنا مريوق ليست صفة فكّة الريق، وإنما مقصود بيها: تقوم من أهلك مسافر على الريق (حتى شاي ما شربتو)، تغشيك أم شانق و ما يضوقوك شيء وتطلع منهم مواصل سفرك وتبيت في مرزوق ويقوموا ناس مرووق ما يعشوك (تبيت الغوى أو القوى).

[أبوبكر عباس]

بعد مدحة التمساح، وقفت على حيلي منتشياً، وقلت للمداح الما جاب الحجر: اسمك منو؟ قال لي: يوسف، قلت ليهو: شوف يا أب شرا، إتّا صوتك دا أسمح من فنانين ام درمان الحاليين ديل كلهم، ومديح الرسول (ص) حاجة سمحة بلحيل، لكن الزمن عندو حكمو، وحوامة الحلال دي للمديح يمكن بطنك دي ما فايتها، دحين أقلب حقيبة، حافظ غنا حقيبة؟ قال لي: شوية، قلت ليهو ما مشكلة هسع بكتب ليك واحدة وبقول ليك اللحن ونجرب، بتقرأ؟ هزّ راسو لتحت.
كتبت ليهو جزء من الشاغلين فؤادي:
الشاغلين فؤادي .. وفايقين تائهين
يكفي البي زارف .. دمعا ما يقيف
تالي القبلي شايف .. لي برقاً لمع
والصيد في الخمايل .. ياناس إجتمع
قوموا يا أحبّة .. نسترق السمع
ما بطيق القعدة .. والمها اجتمع
وخلطها مع ما بين تبري ناصع وأخصراني اللون
وقفت على حيلي وريتو اللحن كيف، البشوفني يقول اللحن حقي!! عبد الوهاب وردي بس!!
يا أخي، يوسف دا لمان وصل حتة والصيد في الخمايل يا ناس إجتمع، قلبي قرب ينقلع، ولو ما خفت العرب ديل يربطوا تصرفي الجا في خاطري دا بمدني، كنت ...

[ناصر يوسف]

المشاركة الأصلية كتبت بواسطة أبوبكر عباس

يا أخي، يوسف دا لمان وصل حتة والصيد في الخمايل يا ناس إجتمع، قلبي قرب ينقلع، ولو ما خفت العرب ديل يربطوا تصرفي الجا في خاطري دا بمدني، كنت ...

هههههههههه

كان تعملها ياخ

يا كاتبي المفضل

تشكر ياخ علي المتعة دي ياخ

واصل ...

[طارق صديق كانديك]

المشاركة الأصلية كتبت بواسطة أبوبكر عباس

قلت ليهو ما مشكلة هسع بكتب ليك واحدة وبقول ليك اللحن ونجرب، بتقرأ؟ هزّ راسو لتحت.

كتبت ليهو جزء من الشاغلين فؤادي:
الشاغلين فؤادي .. وفايقين تائهين
يكفي البي زارف .. دمعا ما يقيف
تالي القبلي شايف .. لي برقاً لمع
والصيد في الخمايل .. ياناس إجتمع
قوموا يا أحبّة .. نسترق السمع
ما بطيق القعدة .. والمها اجتمع
وخلطها مع ما بين تبري ناصع وأخصراني اللون
وقفت على حيلي وريتو اللحن كيف، البشوفني يقول اللحن حقي!! عبد الوهاب وردي بس!!
يا أخي، يوسف دا لمان وصل حتة والصيد في الخمايل يا ناس إجتمع، قلبي قرب ينقلع، ولو ما خفت العرب ديل يربطوا تصرفي الجا في خاطري دا بمدني، كنت ...

أضحك الله مساك يادكتور

غايتو المتأكد منو إنو صديق سرحان كان حاضر في ذهنك لحظة إختيارك للأغنية دي، وعليك الله لو هزيت راسك لتحت كلمني.


ـــــــــــ

البركة الخفت

[معتصم الطاهر]

[وهاد ابراهيم محمد]

يا باش كده في ناس بكونوا شايلين هم تكون الطوبة دي مطلوبة في صالون الإدارة برضو!

[أبوبكر عباس]

المشاركة الأصلية كتبت بواسطة وهاد ابراهيم محمد

يا باش كده في ناس بكونوا شايلين هم تكون الطوبة دي مطلوبة في صالون الإدارة برضو!

شوفي يا وهاد، لو زول الله سقط؛ مجلس الادارة ح يكون تقدمي جدا، لكن لو فاز؛ ح نجنح للموازنات، والطوب قد يكون حاضرا
خليك قريب يا باش

[فتح العليم]

المشاركة الأصلية كتبت بواسطة وهاد ابراهيم محمد

جميل..
فعل (فكة الريق) معروف ومألوف طبعا، انما اشتقاق الاسم للصفة (مريوق) غريب علي،
يمكن لعدم تداوله في بيئي المحلية (برغم عدم احاطتي بها جيدا)
آلفها أكثر في ألسنة اخوتنا العرب.

ممكن تشوف لي تصريف معاك لحكاية استاذة دي؟
برضو ما بقدر أتأقلم معاها، واقنع لي معاك اخونا فتح العليم
تسلم شبارقة.

التحية لك استاذة وهاد على ذكرنا بالخير في هذا البوست .
والتحية لإبداعات الدكتور ، بالجد متعة الكتابة والحكي . وعبركم التحية للاخ عاصم شبارقة حيث ابدع لغة وفكاهة خفية في هذا البوست .
مودتي

[أسعد]

والله يا بكور النجاح الذي اصبته باسلوب الحكي اليومين يحمل مؤشر انك ستكون ريس فاشل جدا جدا، بصورة اوضح لنا جعفر ح تكون محمد مهاتير لو قارنها بيك...

لذلك انصحك انك تنسحب من الترشيح وتمسك درب الحكي...

وزي ما بقولوا اهلنا (الحكاي ما سواي)

[أبوبكر عباس]

المشاركة الأصلية كتبت بواسطة أسعد

والله يا بكور النجاح الذي اصبته باسلوب الحكي اليومين يحمل مؤشر انك ستكون ريس فاشل جدا جدا، بصورة اوضح لنا جعفر ح تكون محمد مهاتير لو قارنها بيك...

لذلك انصحك انك تنسحب من الترشيح وتمسك درب الحكي...

وزي ما بقولوا اهلنا (الحكاي ما سواي)

أوكي موافق انو أنا كقاص مبدع ممكن أفشل إداريا، طيب السبب شنو البخلي لنا تفشل؟ هل هي موهوبة في أي مجال؟

[فتح العليم]

المشاركة الأصلية كتبت بواسطة أبوبكر عباس

أوكي موافق انو أنا كقاص مبدع ممكن أفشل إداريا، طيب السبب شنو البخلي لنا تفشل؟ هل هي موهوبة في أي مجال؟

لن اتوقع لك الفشل في مهمة مجلس الإدارة كرئيس مرتقب لها .إلا إذا ،،،،،،،،،،،

[أبوبكر عباس]

بعد المطرة وقفت، قلنا للسواق: نتحرك؟ سيد اللوري قال لا لا، أنا والسواق ح ننوم هنا وخيرونا بين نرجع أم شانق، ولّ نمشي مرزوق، واحد من المداحين دندن بالطار:
التقومك من أهلك مريوق تغشيك أم شانق وتبيتك مرزوق
واخوانو بدوا بشيلوا معاهو:
تغشيك أم شانق وتبيتك مرزوق
في اللحظة دي، المرة نزلت من اللوري وقالت لينا بحزم: نمشي مرزوق، بسرعة نزلت شنطتي وعلقتها في ضهري، المداحين دخّلوا عِدّة الشغل في المخلاية، وعمر طلع اللوري نزّل السخل وحلّ الجداد من القناية، وتبعنا المرة.
عمر وهو لابي السخل وشايل الجداد بيدو الشمال قال لينا: أسرعوا خلينا نبقى قدام الوليّة، بسري قلت ليهو: خلاص يا سيدنا موسى!! في لحظة فكرت أساعدو وأشيل منو الجداد، لكن تذكرت انو دا ما بليق بالبرستيج بتاعي، لكني أضفت لعمر صفة الجدعنة بسري، والمداحين سادرين في غيّهم.
شوية ويظهر لينا زول من يمينّا فوق ضهر عنافي حُر، والعنافي ماشي في إتجاهنا بسرعة خفيفة بين الكربتة والخبيب، صوت الشلايل بالجنبات بقى لي زي الزول البصفق، لمان قرّب لينا سلم علينا من فوق ضهر الجمل ورجع للمرة وقال ليها: كيفنك آ نعمات؟ قالت ليهو: بخير يابا وزادت: تراك وصلت معانا، قال ليها: الخير أخركم وبدّر بي.
نوّخ الجمل ومع نزوله منه طلع السكين بجفيرها من ضراعو؛ إضايرت، لكنو مدّاها لبتو، وما زال ماسك بخطام البعير، المرة طفرت فوق البعير بخفة كديسة، وعلقت السكين في المخلوفة وإتناول السخل من عمر وختتو في الخرج وعلقت الجداد جنب السكين وسرحت صوب الحلة.

[ياسر كبوش]

يا ريس سلامات
الواحد بقى يخاف عليك من هواء المرموم مع الخيال السمح دا

[الرشيد اسماعيل محمود]

المشاركة الأصلية كتبت بواسطة أبوبكر عباس

كتبت ليهو جزء من الشاغلين فؤادي:
الشاغلين فؤادي .. وفايقين تائهين
يكفي البي زارف .. دمعا ما يقيف
تالي القبلي شايف .. لي برقاً لمع
والصيد في الخمايل .. ياناس إجتمع
...

هي ما يقيف ولّ مايقين؟
قافية البيت نونية، واستنادا علي فصاحة الشعراء الزمان، حيكون البيت مُعيب لو بقت (ما يقيف)، البيت التاني لمع واجتمع لو ملاحظ يا ريّس!
غالبا (مايقين) وتعني المآقي أي العيون، ودي بلاغة من نوع آخر!

[كيشو]

المشاركة الأصلية كتبت بواسطة الرشيد اسماعيل محمود

هي ما يقيف ولّ مايقين؟
قافية البيت نونية، واستنادا علي فصاحة الشعراء الزمان، حيكون البيت مُعيب لو بقت (ما يقيف)، البيت التاني لمع واجتمع لو ملاحظ يا ريّس!
غالبا (مايقين) وتعني المآقي أي العيون، ودي بلاغة من نوع آخر!

ليلة التلاقي يا روحي زادت نار اشتياقي
ولغاية ما يوصل:
والدمعة غابت عن المآقي
مجذوب أونسة

الرشيد ياخ ما تنط في القصة دي وتكملا بي رؤيتك، تلقاك عايز زول يعزمك، بس أوعك تكتل حيلك وتقول لي: والله ما بعرف ارقص