بُـــــــكار الغيــــــم ...

[مهند الجيلي بادي]

بُكار الغيم

بينات العيون
الراجية شوفة زول
وما بين اليقين جواتي
إعتادت تطل محبوبة
سمحات الحروف تتشابا
تتقدر تطول ممشوقا
تتقاصر مع هفاوتي
سايقات بالي تب مربوبة
تتحين قريحة إحصافي
تغلب تب حراير أوصافي
دون ما تجود بكون متصافي
إلا رويحتي هي المغلوبة
راجية تطوف بُكار الغيم
تبل قلباً هراهو الحر
يتب مشتاق
يكوسك في عيون خلق الله
ويتمطَّق طعم حنيتو
حين ما يلسعو الإفراق
تصن كل العوالم فوقو
واتونَّس هواك إطراق
تضلم في وشيهو الدنيا
لكنو
يظل موقن
بأن الروح
في يوم ترتد
كما إنو الحنين حرَّاق
تصبرو هدهدات النسمة
إن قفَّن غنيواتك
بجن راجعات
وإذا غابت شميسة اليوم
مصيرا غداً بكون إشراق
نعم.. آمال لقاك بتفيض
كمان برضو الوجع سلاب
كتار الغابو في الدنيا
ولكن القدر جياب
تفرِّق بي رضاك أو دون
ويظل طعم الحنين غلاب
فما فايدة بكاك إذاً
إذا لسة الضرع حلاب
فصبراً لي حنين الغيم
إذا مال الزمن .. دولاب
وإذا فات دون بريق عينيك
فشن معناهو هو الإصباح
وليك إتجسدن غنواتي
ومن دونك
فما الإفصاح



مرفق:
محبتي للجميع
بــــــادي

[الرشيد اسماعيل محمود]

بينات العيون
الراجية شوفة زول
وما بين اليقين جواتي
إعتادت تطل محبوبة

غايتو براك العوّدتها
يا مهند،،
تخيّل دي أوّل مرّة أقرا ليك؟! ياخي نفس شعري حِنيّن، بسيط ومُغري بإنو الزول يقرا للنهاية!

تحياتنا ليك

[أبوذر بابكر]

وبينك والحروف
قصة الإلفة الشديده
عناق النيل والجروف
وخدرة الريده االشديده

طربنا طربنا

يمين بالله طربنا يا مهند

[زول الله]

المشاركة الأصلية كتبت بواسطة مهند الجيلي بادي

تضلم في وشيهو الدنيا
لكنو
يظل موقن
بأن الروح
في يوم ترتد
كما إنو الحنين حرَّاق
تصبرو هدهدات النسمة
إن قفَّن غنيواتك
بجن راجعات
وإذا غابت شميسة اليوم
مصيرا غداً بكون إشراق

لا إله إلا الله محمد رسول الله

ياناس ..... الروح بهبشوها كيف؟؟؟؟؟








اقول قولي هذا واستغفرالله لي.....................

[ناصر يوسف]

المشاركة الأصلية كتبت بواسطة مهند الجيلي بادي

بُكار الغيم

بينات العيون
الراجية شوفة زول
وما بين اليقين جواتي


يكوسك في عيون خلق الله
ويتمطَّق طعم حنيتو
حين ما يلسعو الإفراق
تصن كل العوالم فوقو


مرفق:
محبتي للجميع
بــــــادي

جواتي ولا جواني

بالتمطق ده دحين ما عصرت علينا شوية يا مهند ؟

يا حبوب يعلم الله مشتاق لحرفك ده شديييييد ياخ

شكرا لبهاء الهطول

[مهند الجيلي بادي]

المشاركة الأصلية كتبت بواسطة الرشيد اسماعيل محمود

غايتو براك العوّدتها
يا مهند،،
تخيّل دي أوّل مرّة أقرا ليك؟! ياخي نفس شعري حِنيّن، بسيط ومُغري بإنو الزول يقرا للنهاية!

تحياتنا ليك

الرشيد يا جميل،،

سلامات ومحبات

سعيد وفرحان بي قرايتك لي

طيب: ما تتعود كيف؟

وإن غابت الروح
تفتحك نفاج يدل لي سكتك دغري
ويمدك بالحنين وتمد
خطيوات التعب موصول
لعلك في جواك واصل..


مرفق:
مودات وحنين
بــــادي

[مهند الجيلي بادي]

المشاركة الأصلية كتبت بواسطة أبوذر بابكر

وبينك والحروف
قصة الإلفة الشديده
عناق النيل والجروف
وخدرة الريده االشديده

طربنا طربنا

يمين بالله طربنا يا مهند

أبذر ،،

هي مفتاح الكلام
ومفتاح الحياة
وأشياء أخر..

وبعض الروح إشراق فعلها
ترى كم طاب لها هذا الغناء



مرفق:
محبتي التي تعرف
بـــــــادي

[Abdullahi Gaafar]

مهند
كالعادة من اول يوم قريناك
مسدار زي دا داير زول فناااان يغنيهو

تحياتي وتقديري

عبد الله جعفر

[مهند الجيلي بادي]

المشاركة الأصلية كتبت بواسطة زول الله

لا إله إلا الله محمد رسول الله

ياناس ..... الروح بهبشوها كيف؟؟؟؟؟




اقول قولي هذا واستغفرالله لي.....................

زول الله،،

سلامات ومحبة

حتى راحة الكلام
حين تمد السلام
الرضي المستهام
أو تهبش رؤاك
بنفتح فيك معين


مرفق:
مودتي وتقديري
بــــــادي

[مهند الجيلي بادي]

المشاركة الأصلية كتبت بواسطة ناصر يوسف

جواتي ولا جواني

بالتمطق ده دحين ما عصرت علينا شوية يا مهند ؟

يا حبوب يعلم الله مشتاق لحرفك ده شديييييد ياخ

شكرا لبهاء الهطول

جواتي يا ناصر جواتي ..

اتمطق زين
انا اصلي بحندك فيك

ومشتاق ليك جداً


مرفق:
محبتي التي تعلم
بــــادي

[مهند الجيلي بادي]

المشاركة الأصلية كتبت بواسطة Abdullahi Gaafar

مهند
كالعادة من اول يوم قريناك
مسدار زي دا داير زول فناااان يغنيهو

تحياتي وتقديري

عبد الله جعفر

أستاذي وصديقي الجميل
د. عبد الله

واتعودت أشيل أشواقي
واجيك متمني
اسمح إنك
تفتح في جواي غناك
أذهلني


مرفق:
محبة وأشواق
بــــادي