حروف علي الخط
يوماتي معاي ...
بترحلي فيني في جواي
وبين اللهفه يال السمحه
وبين حنيني الجاي
بتتهافت حروفي عليك
في طمبوري في مغناي
وأهدهد فوق حنين طفلي
البهاتي عليك جاي لي جاي
بتتذكري يا دنياي
تلاقي عيونا في المخفي
وصوت نقاره تتدقي
وحنين ساقيتنا والمغني ...
وقت شفتك سحابة صيف بتتجمل
بتغزل فوقي ضل باكر بيترقرق
مطر نقاعه بيتنقط
بيشتل فيني حبة حب
لهيب شوقه البيتحرق
بشوفك طاله من حسك
دلاليكن بتتطربق
تزغرد ليكي يوم عرسك
شبابيكك تغازل فيكي بنتظرك
وياااااااا حسك ....
وا حلات حسك
وتر مشدود في نص العود بيترنم
يرقص في الجدي الأشتر
يعاود لي نغم جواي
في شان أرتاح وأدوزن
وأتاوق تاني في الأسلاك
في شان حسك ... في شان أسلم
نغيم الروح دواء المسكين حنين الكون
وطن مسكون بعشقك كم
وحاتك إنتي ما بقدر وما بقدر
إتاوق تاني في الأسلاك في شان حسك
بدورك هاله في جواي
وأشوفك طالعه من شعري
نغم مشدود علي وتر الكمانه معاي
يا دنياي ... ديمه معاي
بترحلي فيني في جواي
وأموت عندك ..... بحبك كم ..............
ـــــــــــــــــــــــــــــــــــــــــــــ
هذا النص كتب منذ زمن سحيق وكانت بعض تلاقيط المفردات العنيدة التي تناوشتني عندما أتاني صوت الحبيبة من خارج البلاد من بعد غيبة في إتصال هاتفي ...
ـــــــــــــــــــــــــــــــــــــ
إشراق الإشراق
ندهت عليكي وبعض صويحباتك الجميلات الرقيقات علي بوست تسائلت عن غيابكن أهو بفعل البيات الشتوي أم هو فوران البركان القادم للإنفجار بقوة . فكانت الثانية وهاهو البركان يفجر أحلي الكلم البوح الأنيق
لكي الحب أينما أنتي ...
ودمتي
|
