علاجى من الإدمان *** دعواتكم

[imported_Asma Abdel Halim]

والإدمان عادة يتشبث بها الإنسان حتى تصبح مرضا مخيفا لا حواف ولا حدود له. أصدقكم القول أن هذه ليست حالة الإدمان الأولى فمنذ تعلمت القراءة والكتابة أصبت بحالة إدمان لم تفارقنى. ولكنها كانت حالة مفيدة فى حالات كثيرة. نعم كنت أهرب إليها للتخلص من الحزن والقلق والغم السياسى وحتى حالات الفرح. مفيدة فى قطع الزهج المصاحب للإنتظار فى عيادة الطبيبة أو تلك المطارات شديدة الإضاءة والبرودة. أتناول جرعة من أى نوع تابلويد لزوم قطع الوقت أو منصور خالد لزوم وضع الأمور فى نصابها أو ديوان شعر لزوم فقدان الإحساس بأن هناك وقت قصدت قتله. وأجمل إشباع حالات الإدمان هى تلك التى تأتى بنتائج غير متوقعة مثل العثور على شاعر أو كاتب جديد يقنعنى بان حواء ما زالت تلد.
غنى عن الذكر أن تجربة الإدمان الاولى والتى لا أنوى الإستشفاء منها كانت القراءة (آسفة لتخييب أمل الشماراتية ويمكنهم التوقف عن القراءة هنا) أدمنت حتى بطلت الأكل أحياناً لأنتهى من قراءة إعلان وظيفة للرجال فقط أو لجمع تلك الأخطاء أو الصياغات الغريبة أو لأن أحد أولئك العباقرة قد اتى بما لم تستطعه الأوائل.

قادنى داء القراءة إلى البوردات فدخلتها ومكثت فيها حتى كدت أن اتقدم بطلب لاكتساب الجنسية البوردابية. ثم هدمت البوردات مناعتى فاكتسبت جرثومة الكتابة. والبورد مرآة تعكس صورتنا كمجتمع واحببت فيها ذلك إلى درجة أن انبريت لكل من يعين نفسه ألفة ويطلب من الجميع السكوت والأدب أن يطلع منها ويسيبها تعمر. وفى النهاية وجدت نفسى مدمنة بوردات. أصحو من الدغش وأول ما أفعله هو التوجه إلى الكمبيوتر ثم فتح شباكين two windows
على الشاشة لأضع عليها بوردين حتة واحدة. أقرأ الأخبار العجيبة الناتجة عن أفعال وأقوال قادة أعجب منها. أشاوس دارفوريجتمعون ويتفرقون يوقعون ويخرخرون وعناوين مثل حركة تحرير السودان تجمد إتفاقية أبوجا الهزيلة ..... تصرخ فينا لنقول نعم. ما لهؤلاء القوم يتزاوغون من مسئولياتهم بعد أن حرقوا الاخضر واليابس. تقول لى حماس يا عجب الفيا الفرجة العندنا شوية؟

وليت الأمر وقف عند فقع المرارة هذا. تطور أمر الإدمان على البورد حتى غلبتنى القراية ود عثمان نزل بوست بعنوان ياااا ضنين الوعد..!!! فقرأت يا اضنين الوعد واستغربت يا اخوانا الوعد عنده اضنين واللا المقصود اضنين الوغد؟
على كل حال هى ليست المرة الاولى لهذه ال Myopia وعرفت عندها ان لابد من علاج لادمان البورد وإلا رحت فى حق الله واصبحت بوردابية.
وبدأ العلاج كالاتى:
1- الابتعاد عن البوستات الجذابة
2- الصوم عن فاقعات المرارة
3- التوقف عن الرد مهما كان الموضوع وحتى لو تسببت فى فتحه
أعانى اليوم من ال withdrawal symptoms ولكن أحسن الليلة من باكر عند هبوط المشاغل فتتنازعنى بوستات البورد وأوراق الإمتحانات.

ملحوظة: لستة العلاج أعلاه غير كاملة من أرادها كاملة فليدفع.

[Ismat]

العزيزه اسماء..
بصراحه..صراحه..نحن ندمن ان نقرا لك.برغم شح شتات مقالاتك وحالات الاختزال..ندرة عطائك..يصيبنا فى كثير الاحيان بصعقة نقص الدوز التى ناخذها منك..وهى مبرمجه على السريان فينا حتى اشعار اخر..نفتح البوردات هنا وهناك. ةونتاابع الاسم وكلك على العنوان وتبدا حالة التوهان. فى اشراق تنوع المواضيع والاسلوب السهل المتنع وتلك المهابشه اللصيقه لجوهر الفكره.وفى كثير من حالات البحث نقرا ويتجمد بيانا ولا نستطيع حتى الرد..يغرقنا ترياق ما فنزيد من معدل الجرعه.ونواصل حالة الادمان...بالقراءه
وهنالك حل واحد..يخفف الجرعات وينهى حالة الهرش..ويعيد التوازن..
هو عدم الغياب الطويل..وبرشامه مرتين فى الاسبوع برغم المشاغل..تجعل كمية التخدير فى مجرى الدم فى توازن يتيح حالة من الاستقرار..ويخصب الخيال .ويهدى اضطراب النفس

فتحنا ملف الادمان من اوسع بواباته..
شنو . وايه رايك... وانت الاختصاصيه.وانت من فتح سكة الادمان..وهذا عرض حال مدمن جدا

وعميق الاعزاز

[imported_منعم ابراهيم]

طبعا حاأكون اول زول بتاع شمارات لكن اعمل شنو ..؟؟ واصلت قراية ولقيت نفسي عايز زيادة بس

I. have bad credit .. لكن ممكن ادفع بالتقسيط شيكات ..واحتمال تكون طايرة ..لو ينفع حااكون زبون

وبالمرة الواحد يصلح الcredit بتاعو ..لأنو الوصفة دي الواحد محتاج ليها ..حالة الادمان دي برضو هبشنا راس السوط بتاعها.

لك التحية ..أسماء

[imported_noha_g]

[align=right]Asma Abdel Halim


تحياتي


أدمن القراءة إلى حد أنني إذا لم أجد ما أقرأه تصيبني كآبة و أحسني قلقة إلى حد كبير
و كما أنت أدمن المنتديات أحياناً

أدخليني معك في حلقات علاج الإدمان رجاءاً علني استشفي


تسلمي [/align]

[imported_نزار حسن علي]

الأستاذ/اسماء
تحياتي القلبية لك والله انا مرات بشعر بالكلمات في الكتاب بتتحرك وتذوب ذي قطعة السكر
مع مودتي
نزار حسن
دوحة الجميع
دولة قطر

[elmhasi]

الاستاذة أسماء


الحالة عامة


ووصلتني في حلمي


أول أمس حلمان برد علي بوست نزلتوا قبل سته شهور ....


والله يصلح الحال

[imported_أبو العز الجنوبي]

العزيزة اسماء
تحياتي لك
زي ما قال ليك ابو النسب المحسي انو الحالة عامة.....
لكن بيني وبينك قراية حاجة الشمارات في لذة... ولّ مش كده؟؟؟
دايرين نداوى، وما عندنا بالعملة الصعبة.... تنفع دينارات الالغاز دي؟؟؟

[imported_مهند الجيلي بادي]

اسماء اختي

ان شاء الله كويسة
لكن شايفك مع حكاية الادمان دي ماااااااااااااااا اظن ... !!!

كدي تعالي النقول ليك :

إنو أنا مدمن إمدان عجيب
ودواك دا مااااااااااااا بنفعني
وكمان
مااااااااااداير أخلي الادمان دا

لانو بي صراحة كدي
لو خليتو الناس الآتية أسمائهم :
مايم
والرباطابي
وجمال تاج السر
وناصر يوسف
وعبير خيري
وعبد الغني
وبقية بورداب الداخل

ديل إلا تشوفوا ليهم محل تلموهم مني
لأني ح أبقى زي كبسور

ياختي مالك علينا فاكنا من الادمان دا
نقبل وين تاني
وياتو حتة بتقبلنا
وتملا لينا قدر الزمن البملاهو لينا البورد دا
وأهو زمن جميل


مرفق :
كل المودة
بـــــادي

[imported_Asma Abdel Halim]

جاياكم يا مدمنين
العلاج فيه دوا مر وجنازير وضرب على القفا
بس خلونى أصل من الرحلة دى
لى باكر

[imported_Asma Abdel Halim]

عصمت العالم

فتحنا ملف الادمان من اوسع بواباته..
شنو . وايه رايك... وانت الاختصاصيه.وانت من فتح سكة الادمان..وهذا عرض حال مدمن جدا

سيدى العالم
إنت واحد من أسباب إدمان أهل هذا البورد وإذا رفعنا عليك class action suit براك عارف النتيجة
منعم ابراهيم
.

have bad credit .

أنا جنى وجن الناس ال credit report حقهم زى حقى وما عندهم تأمين صحى..
noha_g

أدخليني معك في حلقات علاج الإدمان رجاءاً علني استشفي

أهلاً وسهلاً.
البداية هى مقاومة ناس أول حرفهم عصمت ومهند ومعتصم والشقلينى وعباس عالم وعبد الماجد وقارسيا وعجب الفيا ومن لف لفهم كأبى الحسين وحنينة ما نسيتها لكن ليها يوم وبعدين الرد ده فيه انحياز أنثوى وكده. الأسماء الأخرى لم تسقط سهوا أبداً ولكنى أمنحهم فرصة أخرى للإقلاع عن ما يفعلون والدعاء عليهم بإدمان رحلات shopping تقطع أنفاسهم وترميهم على السرائر نائمون، أو إمتحانات take home تجعلهم فى العرق يستحمون.

نزار حسن علي

بشعر بالكلمات في الكتاب بتتحرك وتذوب ذي قطعة السكر

وووب عليك ما ياها دى ال myopia ذاتها

elmhasi

أول أمس حلمان برد علي بوست نزلتوا قبل سته شهور.

أعرف ذلك الحلم الجميل حيث تحقق فيه ما لا تستطيع فى البورد. شعور مريح كذلك الذى ينتابك عندما ترى سائق الشاحنة البذئ الذى كتم أنفاسك فى الهاى ويى وأخرجك من قدام وجهه وقد أوقفته سيارة بيضاء يقودها أبيضان ويتلألأ فوق سقفها ضوءان أحمر وأزرق (شفق الشماتة) وقد بدت عليه الذلة والمسكنة. شكراً سنضيف الأحلام لقائمة العلاج.

أبو العز الجنوبي

لكن بيني وبينك قراية حاجة الشمارات في لذة... ولّ مش كده؟

يا أبنى أول المنكرات المؤدية للإدمان هى الشمارات.
ما دام لقيتك هنا كدى النسعلك الجنوبى إنت واللا العز؟

مهند الجيلي بادي

ياختي مالك علينا فاكنا من الادمان دا
نقبل وين تاني
وياتو حتة بتقبلنا

إنت يا اخوى فات فيك الفوات. وأقرا لستة الإتهام الفوق.

[elmhasi]

ياختي مالك علينا فاكنا من الادمان دا
نقبل وين تاني

يا ربي حالة الإدمان فكت ???

عشان كده الغياب كتر !!!!


وطيب طيف نرجع حالة الإدمان للذين هربوا من الإدمان ??

وسلام اسماء عبدالحليم وكل العقد الفريد ..

[imported_محمد ابراهيم قرض]

1- الابتعاد عن البوستات الجذابة
2- الصوم عن فاقعات المرارة
3- التوقف عن الرد مهما كان الموضوع وحتى لو تسببت فى فتحه

علاوة على ذلك يجب أن:

1-تتبخري بي قرض.
2-تستنشقي بخار قرض.
3-تلوكي أقراص القرض المحلاة.

و لو ده كلو ما نفع:

4-تندبغي بالقرض ...

يتحقق لكم الشفاء ..

ملحوظة:
لدينا بالمحل عروق المحبة ..
عروق الطلاق ..
عروق لا تموت إلا كان أجلك تم ..

علينا جاااااااااااااااااااااي ...

[imported_A.A.ALI]

أنا جيت جارى قلت أشوف موضوع الادمان البقى على ( السيدات) دا كمان شنو ؟ ومن شنو ؟ أقوم ألقى الموضوع مختلف !! وخجلت أمرق وتابعت الموضوع......وبالمناسبة سمعتى يى زول أدمن ليهو ( زول ) ؟؟ أنا ...وأهو برضو نوع من الادمان ..!!

[Ismat]

العزيزه اسماء عبد الحليم...

هنالك زمجرة احتجاج... لان غيابكم قد طال...!!!

ثم ناتى للموضوع...الخاص بالادمان.....!!

وتختلف التفاسير...
البعض يقول..انهم مدمنون...مغرمون...!!!والا خرون يقولون..انهم مدمنون.ومعذبون.ومغرمون..!!
فهل الغرام والريد.هو من الادمان فى شىء..؟؟ نسال علماء الافتاء

نسال عن التفسير...فى حالى تعدد اسباب الادمان...؟؟
لهذا البوست...؟؟؟
ولا سيما صاحب الافتاء الاقوى هو الشيخ قرض...ساكن صحار...وهو يعلم كل الاسرار عن ظفار....؟؟
والاحجبه....والبخور...والسحر..والاسحار...؟؟

[imported_Asma Abdel Halim]

سلام حار لكم جميعاً

وشكرا يا المحسى على نكت البوست القديم

قرض:
كان العلاج قرض ساهل أنا صاحبة عقيدة فى القرض (ما يسمعونا الدكاترة)

عصمت:
إنت تسوى لينا فى البجيب الإدمان دحين اسكت ساكت ما تخلى البوليس يقبضك

على:
إياك وإدمان الناس فما أن تدمنهم حتى يفوتون ولا علاج لك سوى إدمان زول ثانى لحدى ما واحد منكم يفوت