مبروك عليك يا نعمة يتربى في عزك ...........
الله يبارك فيك...........
و مرت الايام تلتها الشهور ..........
ـ امشي يا شاطر نادي لي نعمة قول ليها اخوك احمد جاك .......
ـ اهلا اهلا يا سيادة الدكتور زارتنا البركة ..........
ـ وكيف الولادة مرت انشا الله ما تعبت ؟
ـ و الله تعبت تعب و ابو يدخلو لي اي زول ولا حتى امي.. تصدق ؟ ...... والولد راسو شوية كبير عشان كده جروه بالجفت .
كلماتها ايقظت روح الطبيب في احمد و انتبه ان راس المولود اكبر من الحجم الطبيعي ,
ـ انت يا نعمة لما ولدت في دكتور شاف ولدك ؟
ـ لا قالو الدكتور في الجناح الخاص .... لي بتسال ؟؟
ـ كدي خلي الموضوع ده لبكرة بعد ما اتاكد .... ودعتكم الله
و بكرة جات ... و جا احمد و معه شريط متر
ـ ده شنو كمان انت دكتور ولا ترزي ؟؟؟ والله زمان يا احمد بقيت دكتور نسمع كلامك ...
ولكن احمد منهمك في قياس راس الطفل
ـ اسمعي يا نعمة ولدك ده راسوكبير بكرة نمشي المستشفى نوديه
و احست نعمة بالخوف يتسلل الى دواخلها عندما احست الجديه في نبرة احمد .....
و مر الليل اكثر ظلاما من كل ليلة , طويلا, مخيفا يحمل المجهول في صبحه ,
ـ احمد ,,,, قوماك نمشي
و في المستشفى كانت في غرفة الانتظار تمضغ القلق و تعيش الالم كانت تفكر بافكار ابسط من بسيطه ( ولدي شفع الحله حيضحكو عليه و يقولو ليه
راسو كبير رجلينو صغار شن سمو سمو العولاق
راسو كبير رجلينو صغار شن سمو سمو العولاق )
و انتشلها صوت احمد من هذه الافكار الطفوليه الساذجه ...... ادخلي
ـ اها يا دكتور في شنو ؟؟
ـ والله يا نعمة ما اكذب عليك الولد ده عندو استسقا في الراس من جرت الجفت . و المشكله بكل صراحه ان المفروض يتركب ليه جهاز باقرب فرصه عشان يفضي المويه لانو لو ما فضوها حتضغت على مراكز السمع والشوف وبعد شويه النفس ..
ـ يا دكتور فهمني براحه انا ما فاهمه ؟؟
ـ يعني الولد لو ماركبتو ليه الجهاز حيطرش و يعمى و بعد داك حيموت . فهمت ؟يا دكتور ما في طريقه احسن من دي تقول بيها الكلام ؟؟
ـ لا لا خلاص يا احمد جيب لينا الجهاز ده .. بجيبوه من وين ؟؟
ذهب الطبيب و اغرورقت عينا احمد وهو يقول لها ان الجهاز بي سبعميه الف جنيه غير تكاليف العمليه .
صعقت نعمه و تسمرت في مكانها حين افاقتها ضحكه سافرة من احدى الممرضات
ـ هيا مستورة تعالي يختي نحكي ليك الكلام الماخمج ....
ـ تتذكري مدام سوسن الولدت في الجناح الخاص ؟؟ جايبه الليله ولدها حمودي تطهرو في الاستثماري
ـ سمحه المقدرة ياختي الطهور فيه بمليون جنيه ..
ـ وليه ياختي ما ياهو الطهور الواحد ده ولا شي تاني ؟؟
ـ يختي الطهور بتاعهم بفهم ما ساكت زي حقنا ده امسك لي و اقطع ليك ...
و فرت دمعه مريرة على خد نعمه و قالت في نفسها ...... سبحان الله
حمودي الاول يتطهر بمليون جنيه عشان ما يتلوث في حين انو ممكن يتطهر في البيت ولا ما يتطهر ذاتو
حمودي التاني يطرش و يعمى و يموت عشان ما عندو سبعه ميات .......
الراس يكبر و الماساة تكبر معاهو و نعمه بين الاتنين تحاول تشبع من عيونو قبل ما نورها يروح وتتكلم معاه اليوم كله قبل ما يجي يوم تتحرم فيه من الحاجه دي .
والراس يكبر و الماساة تكبر
|
